احنا التوانسة عندنا لهجة خاصة بينا و جميلة برشة و معبرة ... أما لتو ما فهمت علاش "ديغاج" ؟
عندنا مخزون متع كلمات في اللهجة متاعنا تفي بالغرض وزيادة ... إقلب وجهك ...تجبد ... أملص ... طير ... سيب صالح ...فك / أعتق/ سيب **** (عمر الفراغ بالكلمة إلي تحلى في عينيك) ... على كل مانيش لهنا بش نعدد الكلمات التونسية إلي تفيد أنا معاش نحبو نشوفو وجه فلان أو فلانة (موش عليك ... أما برى أقرا على روحك :p ) أو حتى فلتان ... أما التوانسة ركبتلهم على "ديغاج" ... هكة ، لصقو فيها ...كبشو غادي ... "تيبلنتاو" ... قصة حب جديدة (أو قديمة شكون يعرف )... عزوزة وشدة بوليس ... مشتاق وذاق ...
علموهالو و وحلوا فيه ... يا ولدي يهديك ، يصلح رايك ... شوف كلمة أخرى ، لا، "ديغاج" !
تحل الفيسبوك تلقى ديغاج ، تخرج للشارع تسمع ديغاج ، مولى القهوة وقت بش يسكر يقلك ديغاج ، تي حتى من عزيزتي قلتلها راك توحشت راجلك الله يرحمو ... قالتلي ديغاج!
ناقص كان الوزغة كي تصدم عليها بشلاكة تقلك "ديغاج" !
ديغاج في الصباح ، ديغاج مع نص النهار ، وديغاج فالليل ... أنا واحد مالناس مرضت ، إي نعم مرضت ... والحكومة عاملة مولى الدار في الزفة !
تي حتى انتي يا كاليمارو ....ديغاج...إي نعم ديغاج ... ديغاج وبلاش "باغاج" ... ديغاج وكول فرماج ... ديغاج يا بو عظيمة ... تشعل في النار ديمة ... ديغاج ما عجبك حتى حل ... تحب إطردهم الناس الكل ... ديغاج ، ديغاج ، ديغاج !
ديغاج طلعت في الكار ، ديغاج روحت للدار ، ديغاج قدام العطار ، ديغاج فوق "التروتوار"، ديغاج يا عمار ...
ديغاج ما بيناتنا ... ديغاج في عروساتنا... ديغاج فوق الخزانة ، ياكل في رمانة ... ديغاج تحت الكلتوسة ، يحصرفي قطوسة ... ديغاج يشري في يومية ، موش رشوة أما هدية ... ديغاج دبر منحة جامعية، يعيشلو "خلتو فوزية" ... ديغاج يطلع في السلوم، ما يهموا كان في اليوم ...ديغاج تحت الكرسي ... يتشحت في "سي المرسي" ... ديغاج قعد على كرسي ... ديغاج يخدم في البلاد ... ديغاج نسى العباد ... ديغاج تبع الفساد ... ديغاج عبا الجيوب ... ديغاج راجل محبوب ...
ديغاج بابا وبوك ... ديغاج خويا وخوك ... ديغاج أنا وانتي ... ديغاج أمي وأمك ... ديغاج وسكر فمك ... ديغاج و ما تتلفتش وراك ... ديغاج مكبر راسك ... ديغاج وحل كراسك ... ديغاج يا جبان ... ديغاج يا حيوان ... ديغاج يا شلاكة ... ديغاج يا حكاكة ... ديغاج واقلب منظرك ... كرهتك وكرهت طلعتك ...
هذي عيطة ديغاج ... للي ما يعرفش الديغاج... ديغاج طلعتلو في راسو ... ستاحش
عرفوا وكراسوا ... ديغاج يا ديغاج ...
شدتني الفواقة جرتك :P
ردحذفالديغاج ساهلة كي تتصرف معا إنت أما معا أنا تولي عنا مشاكل صرف ؛)
ههههه ... ألطف عليك ... شكون يقطع فيك ويريش ؟ :D
ردحذفماهو تحرقوا البوسطات والبنوك ،عادي كي تبدى مشاكل الصرف :)
J'ai pas pu digérer ce dégage non plus!
ردحذفإذهب c'est mieux
و أنا نقول شبيك ديمة هازز صرة حوايج في يدك!! وانت طلعت عامل حسابك ليقولولك ديغاج مكبر راسك !!!
ردحذف:)
"أما برى أقرا على روحك"
ردحذف"ديغاج وحل كراسك ..."
chi5t dho7k 9olt 7ata kalimero fe9 ili éna mé na9rach w ghodwa 3andi examen :ppp
Michmecha Dégage >.<
اوليف 2 تون :
ردحذفمرحبا بيك :) ... وشكراً على مرورك وتعليقك
أجندة :
لا الصرة هذيك بش كي نعرضك نحطك فيها ونطيشك في البحر لوول ... لمحالة يلزم نشوف صرة ما أكبر وإنت تعرف علاش :D
مشمااااشة :
أية حض سعيد في الإختبارات متاعك (هذا كان خلاوكم تقراو)... يا كركارة :p
السلام
ردحذفوترصيلي نغني في "اني أغرق أغرق، أغرق تحت الماء " ماني أختك نهون عليك ???
هيا خوذ هاذي وسامحني:(مش رشوة ، تعويض رغم إلي إنت بديت الكلوف )
http://www.youtube.com/watch?v=UfSJFQ2MZnk
:p