 |
| شلاكة "فلة" منتنة ... صنع تونسي 100 بل 100 |
شلايك ... والشلايك خير منكم !
الناس صاحت وبكات ، غنات وعانات ... وانتم تحكيو بإسم الثورة ؟
اش تفهموا منها الثورة ... يا جماعة البرلمان الجبان ، وينكم وقت مات البوعزيزي وسفكت دماء الإنسان ؟
وينكم وقت تشدو المدونين ، وقت تشدت ارابيكا ؟ وينكم وقت تشد بوكدوس ، وزهير مخلوف ؟ وينكم وقت تعذبت العباد وتحرمت من الجواز وعاشت حياتها في زنزانة ؟ وينكم ؟
اليوم تعيطو وتصيحو ؟ ما تحشموش يا شلايك ! ما تسواو حتى فرنك في عنيا ، وتقعدوا كالبهايم إلي يجي يركب عليكم ويسوق !
هاك الشلاكة متاع التحرري وغيرها كثير ... إلي تحكي وتعيط في البرلمان ... تحكي بإسم الثورة و كأنها هي إلي قادتها ... ووصلت بها الدناءة أنها تتهم الشعب ... تفيه عليك يا حثالة ! تسب فالشعب إلي تاكل من فلوسو ؟ تسب في الشعب إلي انتي غادي على أساس تمثلوا ؟ تسب في الشعب إلي خرج وعرى صدرو وقت انتي في دارك ترعش خايفة على الكرسي ؟ تفي عليك وعلى الشلايك إلي كيفك !
وإلا الشلاكة هذا إلي يعيط "متبني الثورة" وفي نفس الوقت ما يحبش يخرج "بالكروسة" ... بربي اش باش نقلو الخردوق ، الميعة ، القفاف ، السكبان هذا ؟؟ شبيكم اليوم تحكيو وكشاكشكم طالعة ؟ إشبيك ما خرجتش من البرلمان كي هما خايبين ؟
لا يا بابا تخرج وتدز الكروسة ... ماكش خير من البوعزيزي !لا... سيادتك تهز في القفة وتتلحس لذا اليوم تقلب وجهك ... قلك تعتيم و صوتي ما كانش يوصل ههههه !
الشلايك هاذم ما يعرفوش إلي أصوات الرجال كانت توصلنا ، ما يعرفوش إلي الناس إلي نضحي بكل ما عندها من أجل كلمة حق نعرفوها ... ولا حاجة لنا لكلامهم ... هذا غراء ، هذا تقشقيش أحناك وما عندو فين يوصلكم !
أعرفو يا شلايك أن اليوم شباب تونس يحب يكافئو رجالها ... إلي وقفوا أمام الزوبعة البنفسجية ... وعيطو بأصوات عالية رغم التعتيم !
وزيد البارح شلاكة جديدة من نوع زيكو ... الحارس الشخصي لسي الهارب ... جاي عامللنا فيلم من تنفيذ وإخراج أشلاء التجمع الزنسفوري النفوخي ... شلاكة لاعب فيها شريف ... أنا نعرف أشراف تونس ما يدخلش في المعامع هاذم من أصله ...قلك أنا تحصلت على شهادة وريق بارد وندافع على الديمقراطية ... انهيا ؟ متاع أمريكا وحلفائها في العراق ؟؟ لا ما حشتناش بها ... مرحبا بيك في بلادك أما تعمل مزية تسكر فمك علينا موش ناقصينك ! الأفلام متاعك تنجم تمشي لأمريكا وتشوفلك مخرج تحفون وتو تشيخ فلوس !
أكاهو ... في تونس جيب واحد يسب ليلى ويشتم بن علي ، ويحكيلك بلوغة حلال وحرام وخلي الشعب يشيخ ! تفيه عليكم يا شلايك يلي تحسابونا بهايم عندكم ... تفيه عليكم فردا فردا !
هناك كذلك شلايك من نوع أخر، شلايك مازالو كي حطوا سقيهم في الدولة (يعرفوا أرواحهم) ... ناس حياتها وهي "تناضل" منها من يناضل على وزارة "التنمية المحلية" ومنها من يناضل على "وزارة التعليم " ولاخر على "سيت بورنو" ... نعرف إلي برشة موش باش يعجبهم كلامي ... لكن أنا مقتنع بيه ... ومقتنع أن من حقي أني ما يعجبنيش إلي قاعد يصير ... وينو إحترام الأرواح ؟ ويني الإنسانية ؟ ويني الشهامة والرجولية ؟ أم هي طارت مع طائرة بن علي ... والكرسي الكرسي ولا ترحم من مات ؟؟
الحاجة إلي ما تدخلش للعقل هي أن المناضلين هاذم كيف دخلوا للحكومة تقول سحروهم ، إلي يدافع على التجمعيين وإلي حط روحوا واسطة بن الحكومة والشعب ... ما هذا ؟
وإلي يغيض ويزيد يركبلك السكر أن هناك من يدافع عليهم ... هاو فلان عمل سيب صالح، وفلتان عمل إضرب جوع ... يزينا من تمجيد الأشخاص ، يزي فك ... بن علي ما عفس فينا كان مالناس إلي تمجد فيه وتصفقلو ! كفانا ! الشعب التونسي يحب ناس تخدموا موش تترفع عليه تقول الهة ! وينهم من أحداث الكاف ؟ وينهم من أحداث القصبة ؟
الثورة قادها الرجال ، ولن نسمح أن يجني ثمارها الشلايك !
شلايك منتنة ، حاشى إلي ما يستاهلش، مازالت تستبله في الناس ... لكن الحاجة إلي تفرح أن الشعب التونسي ما عاش ساكت، الشعب التونسي مهوش بوهالي ، الشعب التونسي مهوش جربوع ، الشعب التونسي راجل ، الشعب التونسي يعرف اش معناتها نضال ! والشعب التونسي باش يواصل التصدي للشلايك هاذم بكل حزم، بكل حزم !
w cha3b tounsi dé5il fi 7it! ilawij 3la zièda fi chahria wa9tili ilzim iadhrib 3la dimo9ratia ! ilawij 3la il min7a wa9tili ilzim i5amim fil 7oria! i5amim fi kirchou wa9tili ghirou klé il cartouche 5atir mé 3andouch lo9mit nhar! cha3b tounsi intihézi ma 9adarch arwe7 la3bed ili métit 3la 5atir il karama w houma itdhahrou 3la 5atir zouz sourdi!
ردحذفnos cha3b chleyik ki tji tchouf! éna ili nra fih iouja3li 9albi!
:( ، لا إحترام للأرواح ولا للثورة ولا لكرامة ومبادئ العباد ... برشة شلايك حاشاك ...
ردحذفالمشكلة مش في الناس العاديين (حاجة منتظرة أنهم يطلبوا يعرسوا أو زيادة في الشهرية لأنهم سنين و هما ياكلو على ريوسهوم و ساكتين) ، أما كي تكون انسان "فعال" في المجتمع وإنتهازي في نفس الوقت ... وقتها فين تبيركت ... أما نحن لهم بالمرصاد :)
7ata zabel wili i5dim fil matar wili isou9 il bus kolhom fa3alin fil mojtama3 akthir mili imidou fi wjouhom fil barlamèn :)
ردحذفmch wa9t moutalba fi ziedet chahria wa9t moutalba bil 7oria w tarsi58a iezina blè jarien wra il kirch wil intihézia!
kima i9oul il gawri : chaque chose en son tps :))
اه فهمت القصد متاعك توا :)
ردحذفمتفق معاك 100 % ، أما يلزم قبل كل شي انيحو الانتهازيين الكبار ، والصغار من بعد ... كيف نحينا السراق الكبار والصغار جايهم طريقهم ...
المشكلة أن برشة توانسة تعبت (بالأخص إلي كانوا عايشين في عالم بعيد عن السياسة وكل ما يمت بها من صلة) ... كرهوا الكذب والأخبار إلي ما عاش تعرف شنوا الصحيح وشنوا الغالط منها ! وزيد ما عندناش شكون يساند الشعب بقلبو بدون تخديم مخ ! هذاك علاش نرى أن برشة اصبحو يحبو يضربوا ضربتهم ويوخرو :)
ما تنساش إلي الشعب كان كلمتو موحدة ... لكن عرفو كيفاش يشتونا ... مع احنا مش ناقصين تكمبيز ، جات مكيلة !
الله يقدر الخير يا مشماشة ، أنا متفائل أن الشعب معاش يسكت للمسؤلين الكذابين ، أما كان باش نقعدو راقدين هكة شهير أخر ومعاش نلقاو ما ناكلو (تي حتى الخبز والماء لا )
Sa77a lik, faraght 9albek... le mien b3ébbiiiii
ردحذفje suis d'accodr avec toi, il faudrait commencer par éliminer les opportunistes lékbar (sénateurs, députés, Jrad etc...pour poivoir contrôler les plus petits
Yosri:
ردحذف:))) Bienvenue à toi cher lecteur
aya maw 3andek blog, faragh 9albek w rabi m3ak :)