حزب العياشة

كثرة الأحزاب وكثرة الأسامي ، وكي تجي تحل السرة تلقى الشب ، كثرة بلا بركة  ...هذاك علاش قلت نقترح مشروع حزب بدوري خلي كان هكا خطفت نوليشي رئيس ونعمل بعمايلي وفي أخر المطاف نعمللها حجة وعمرة ونقابل ربي وأنا نظيف عفيف ...

باهي باش ما يسالني حتى حد على ألفصل الأول متاع الدستور، باش نكونو متفاهمين من البداية  : 

تونس دولة ذات هيبة ، نظام حكمها اعتصامي (يوجع الكرش)، النفاق دينها ، والجهل لغتها ...

والأن باش نعطيكم فكرة على بعض المشاريع إلي خممت فيها في حزبي ألفريد من نوعه ، وإلي بحول الله باش تكبر مع إستقطاب أكبر عد ممكن من المخرطين : 

* تعويض النشيد الوطني بالمانبولسيون متاع بسيكو أم  

* إجتثاث المنقالة إلي في شارع الحبيب بو رقيبة في العاصمة ، على خاطر فيها شعار الماسونية ... ذاك الهرم الذي هرمنا من جرائه. 

* ألفصل التام بين النساء والرجال ، وذلك ببناء جدار فصل بين الشرق التونسي وغربه يمتد من بنزرت إلى بن قردان ، وبعد نقسمو شكون عاليمين وشكون عاليسار (وقتها معاش حتى حد يتقلق من اشهارات هيكزا بيت) ، وهذا من باب تكريس لمبدأ المساواة بين الرجل والمرى، كل حد في شونو  

* في كل عام يتم إختيار ملكة جمال تونس ومن بعد يحوطها في النصف "الرجالي" لمدة عام حتى تجي الملكة القادمة ، وكيف كيف يتم إختيار ملك جمال ثم يلقى به في الأمازون حيث أسماك البيرانها  تفرحلنا بيه 

* منع اللبسة التقليدية ، الظلامية و التسويق إلى ثقافة الإستعمار والدجين المحزوق والجيب ميني (إلي نذكركم مش باش يقلق حتى حد ، على خاطر ألفصل إلي قبل)

* تعويض الرياضات الشعبية ، كيف الكورة و"الهاند" برياضات تونسية يهواها الجميع كالبهامة والقفة و التبندير وما إلى ذلك من ممارسات لا يكلها ولا يملها التونسي 

* التكذيب بكل النظريات العلمية ، بدون إستثناء ، (برشة علينا) ومن ثم الإنطلاق في العمل بكل حزم و نحطو اليد في اليد من أجل إنتاج علمي يرتقي ويمثل المخ التونسي العبقري المبدع ، وخاصةً مع التقليل من سرعة الضو (ياسر يجري) 

* في إطار الإرتقاء بالتعليم العالي إلى مستوى "عالي" ، نقترحو بناء جامعات ناطحات سحاب لا يقل عدد اطبقها عن 150، والقراية تكون كان في الطابق العلوي  

* إدراج مادة "برمان الخضراء" في إمتحان الباكالوريا ، حتى يكون كل طالب مستعد إلى خوض الحياة الجامعية بكل "نشاط"  وتمكين كل مجتاز للإختبار بملاحظة "حسن " من الأدوات اللازمة ، مع مجلد "كيف ترعى الخضراء" إلي سوف يتم السهر على إنجازه من قبل وزارة الفلاحة مباشرة اثر فوزنا في الإنتخابات الملعونة 

* "اللغة الخشبية" تعوض الفلسفة في الباك ، وعندها أكبر ضارب في مهما كان الإختصاص 

* إنطلاق فوري في مشروع تنقيل جبل "بو قرنين " على الحدود التونسية الليبية حتى نمكن الجرذان من مكان إقامة يليق بيهم 

* قطع العلاقات الخارجية مع جميع الدول ، لا تجيونا ولا نجيوكم ، لا تعونونا ولا نعاونوكم 

* عدم الإعتراف بالديون متاع العهد البائد ، وإلي يشد صحيح نبعثولو فقوسة  في البوسطة 

* العودة إلى العبودية ، وبالمناسبة عندنا مادة خامة هلأيمات في راس الجدير 

* تمويل جمعية "التنكيل بالحيوان" والإعتراف بها وكذلك إستيراد بعض الحيوانات إلي قريب تنقرض حتى تكون نهايتها على يدين التوانسة (بالمناسبة يا حسرة عالبو مزين )

* تمكين الأحزاب المعارضة من قوارب تحرق عليها ، هرباً من الويل إلي باش نذوقوهولها 

* حفاظا على البيئة ، نقترح تزليز كامل تراب الجمهورية بخلاف بعض المناطق الفلاحية ، وبالطبيعة الوسيلة الوحيدة للنقل باش تولي الكار الصفراء 

* في نفس الإطار - المشروع البيئي لتونس- سوف يتم إستبدل العطور الأنثوية باهظة الثمن بعرق الرجال 

* تعويض القنابل المسيلة للدموع بالهندي الموش مقشر 

* تعليق تصاور بو رقيبة في كل مدينة ، في كل حي ، في كل زنقة، في كل دار ، في كل بيت ، وإعطاء الزعيم ما للزعيم 

* تعويض الماء متاع السبالة بعصير البرتقال (أو حاجة أخرى - تمر ، أو بطاطا مثلاً - للي عمرهم فوق السطاش) 

* القطع مع الجوع ومرض السمنة بمنح السمان كأكلة شهية للجوعى

* تعبئة الشواطئ التونسية بالجرذان والديدان باش الحوت متاعنا ما يحرقش اللمبدوزا 

* إلي يوعد وما يخالفش ، يخلط على ملك الجمال في الأمازون 

إذاً هذي بعض الأفكار للحزب ، يبقى أن نذكر أن الشعار الأول والأخير هو " معا ندخلو في حيط "