قلبي يوجعني

قلبي يوجعني كي نشوف ولد البلاد يسب بنت البلاد ، إلي في الطريق متعدية ، على خاطر زنودها معرية ...

قلبي يوجعني كي نشوف جاهل منصب روحو إمام ، ويخطب وعامل أفلام ...

قلبي يوجعني كي تولي اللحية هي الغاية ... ونحرمو على رواحنا المرايا ...

قلبي يوجعني كي نسمع تكفير ببلاش ... تقول الرحمة ما ثماش ...

قلبي يوجعني كي نسمع تفاهات تنطق بإسم الإسلام ، وناس تربط في الدين بالظلام ...

الناس إلي قلوبها ماليها الخوف ، وفي العيد يسخفهم الخروف ... ويحكيو بإسم الحرية أما مشكلتهم مع الإعتقادات الدينية ... عفيون الشعوب كيف ما يقول ماركس ... علاش في الماضي تفركس وبإسم الله تقلق في التقدم وتشاكس ... خلي مخك محلول وإسمع كلام المتثقفين  ، هما فاهمين الدين والبقية متخلفين ، رجعيين ، ظلاميين و ياسر متزمتين ... 

قلبي يوجعني كي نشوف ناس تنشر الخبر وما تنشرش تكذيبو ... وكيف يتهموك بالشيء ونقيضو ... 

قلبي يوجعني من المسلمين إلي يحكيو في الدين ... ويناقشو ويعاندو وهما موش فاهمين ... 

قلبي يوجعني كي نشوف المتطرفين من الجيهتين ... إسلاموفوبيين وظلاميين هما برك إلي مسموعين ...   

قلبي يوجعني كيف نشوف المحبة تنحات ... خلات بلاصتها للدموع وللاهات ... فنات ، مشات ، كيف القلوب الحنينة إلي تكلات بعد ما تعرات ... 

قلبي يوجعني كيفاش البطال والمسكين تنسى ... ما عاد يتلفتلو حتى حد ،العمى ... 

قلبي يوجعني على السياسة ... ما فيها كان البزناسة ... والناس اللحاسة والغفاصة ... هاو مشروع إنتخابات ، هاو باش نعملولكم مساواة ، هاو باش نطورو البنية التحتية ، هاو باش تاخذو الحرية ... 

قلبي يوجعني كي نشوف ولد البلاد ما يخمم كان في نفسه ، يحب الزيادة ويحب الترسيم ... يحب يتكلم بإسم الشعب وهو أكبر بهيم ...

قلبي يوجعني ، موش حب فيهم ، أما من بلادي وناسي إلي تعاني فيهم ...