‏إظهار الرسائل ذات التسميات تونس المسكينة. إظهار كافة الرسائل
‏إظهار الرسائل ذات التسميات تونس المسكينة. إظهار كافة الرسائل

الأربعاء، 26 أكتوبر 2011

أفكار على الطاير في ما يخص الشلبوق الظلامي للحداثة


أولا وقبل كل شيء ، السلام على من إتبع الهدى والصلاة والسلام على رسولنا المجتبى محمد إبن عبد الله ... طب صلي عليه ... طب زيد صلي ...  (إي هاو قلك من تو إنجمو نكتبو هكا، من غير ما يجي حتى حد يتهمنا بالرجعية والتخلف بما أننا بهايم بطبيعتنا و تونس بكلها بش توخر 200 سنة لتالي) 

اليوم حبيت نتخيل واحد حداثي نهار 23 أكتوبر، عفواً أكتوبغ ... 

عادة قالك ليلة السبت واحد حداثي بايت مع اصدقاؤه على الفايسبوك ينبروا على الخوانجية، وكيفاش غدوة بعد ما تهبط النتيجة بش ينظمولها بلعة عالمية ، ومشوي وأجواء إحتفالا بالديغاج الديمقراطي إلي بش يقولوا شعب تونس العظيم لرشودة الإرهابي ...    

ولا تعرفش كيفا ؟ أخطانا منهم ، عندنا بلاد نبنيوها ، فساد بش يتبلعو في الحبس، وبرشة خدمة ... والعباد هاذم لا يصلحو ولا يصلحو ، بل هما الفساد بعينه.

باهي النتائج ماشية وتتأكد والحزب الخارج بأكبر عدد من الأصوات وهي النهضة ، وهنا نحب نقول أنه لو كانت الأصوات الإنتخابية محسوبة بطريقة "عادية" راهو النهضة شنغلتهم تشنغيلة عالمية ، أما نورمال هي رضات بالهم والهم ما رضا بها ... والعام الجاي الشرفي ... (مثال على الحساب الديمقراطي جدااا)  

الإنتخابات برهنت على نضج كبير للشعب، أولا وهو حظور غفير للناس والصفوف وصلت لثلاثة سويع أو أكثر إنتظار ... 

عدم فوز  النهضة بالأغلبية المطلقة يوري أن الشعب مثني على هويتو وأنه صوت في أغلب الأحيان لبرامج ، أي عن إقتناع ... 

الحزب الرابح :

النهضة وبكل موضوعية هو أكثر حزب تطور منذ 14 جانفي، بعد ما كان مشرذم من طرف الزين وأحبابه والقافلة المثقفة المطبلة لكل مكسب من مكاسب الحداثة، عرف كيفاش يرمم نفسه وينسق بين القيادات متاعه إلي بعد سنوات من الغياب عن الساحة كانوا ينجموا يبلبزوها ... عرفو كيفاش يلمو شبابهم والقاعدة الكبيرة متاعها كانت تخدم في أغلب الأحيان بانتظام ... وهما قامو بأحسن حملة إنتخابية وهذا لا يشكك فيه كان الكذاب وخوه ... 

السبان والثلب والكذب والتلفيق والمغالاة فيهم لدرجة أن الواحد ماعاد حامل يحل الفاسبوك ... تصور وصلت الحكاية في بعض الأحيان إلى الاتهام بالرجعية والإرهاب لمجرد أنك تقول النهضة خاطيها أو يكذبو عليها ... هذا الكل لعب في صالح النهضة ... والناس في تونس فايقة وما تحاسب كان على النتائج ... والفزاعات (المتواصلة إلى حد اليوم) ما عندها وين توصل.

وهذا الفوز الباهر ... خلا عمك الغنوشي يفتق مواهبو الفنية البارح ،كاس ماء زمزم في يدو وهو يعط "كامبيوني كامبيوني أولي أولي أولي" ... 

الحزب المفاجأة:

هو كي تجي تشوف فما زوز مفاجأت، المؤتمر و العريضة ... 

المؤتمر عرف كيفاش يخدم ، خلا الاديولوجية على جنب وخدم سياسة ... هو لا محالة واصل السياسة إلي بداها منذ تأسيسه ، وهي محاربة الإستبداد والفساد، هذاك علاش يجمع ناس من مختلف الأطياف ... المؤتمر جاء الثاني بعد النهضة، ونتصور دوره في التأسيسي بش يكون هام وهام جدااا ... وهنا مرة أخرى رغم الحملات التشويه على شخص المرزوقي ، من ملحد لقفاف للخوانجية ... مرة أخرى التوانسة يعجبوني ويجبدو بكل من هو لاعب فيها مهف و عينوا ترف ...

العريضة وما العريضة ... قلك يا بهيم تصوت للعريضة ؟ نصوت مالا لا ؟ 

بما أنه وعدنا بمنحة بطالة وصحة مجانية وتنقل مجاني للمسنين ... بما أنه خاطب الطبقة المنسية -إلي وراء البلايك- بينما بقية الأحزاب تتناحر على ألفصل الأول من الدستور ، وجماعة الحداثة عاملين مسيرة فتقني قبل ما تطرشقني على خاطر "كوميك" ... فإن الشعب فتق مواهبو وصوت بكل حرية للي يحب عليه وللي تلفتلو و حكى على مشاغله اليومية و أرسل رسالة "أعتقني" إلى كل من مزال غالط في روحوا ويحسب نفسه أغلبية ... نعرف إلي عدد الفانات على صفحة في فايسبوك يغلط الإنسان في روحوا ويمشي في بالو إلي هو معلم وإلي هو يأثر على الناس وماشي فبالو إلي مثل "بيع القرد واضحك على شاريه" مزال يخدم ...

فما طبقة ما كلمها كان الهاشمي وما عليكم كان تشوفو الفيديو هذي والطبقة هذي كان ما فيبالكمش موجودة بدرجة كبيرة ... وماهيش بهيمة كيف ما يتصور البعض ... أما تفكيرها مختلف ، على خطرها مهمشة وقعدت لتالي لسنوات وسنوات ... يلزم دراسة معمقة لمشاكل الناس هاذم وخدمة صحيحة مش كذب لأنه من هنا فصاعدا كيف فما شكون بش يستقطب على أساس ايديولوجيا، فما شكون بش تعجب حكاية الهاشمي و يخدم على خطاه ، وحتى ما يجيناش صرفك أخر في المستقبل يلزم نوعيو الناس ... مش نحطولهم برسيبوليس وليلة 27 نحكيو على قداسة الإسلام ، والشعب من كثر الجوع لا ينام ... 

الحزب المخزي : 

فما أكثر خزي وفشل من حزب الشابي ؟ ما نتصورش ... أنا واحد من الناس لو قالولي لشكون تصوت نهار 13 جانفي الصباح، كنت نحير بين الشابي والمرزوقي ... أما الشابي أبدع في الفشل ... الزلعة تلو الأخرى ، وخرجو من حزبه عباد ، ونقدوه عباد ولكن الطمع في الكرسي يعمي ... 

كان ديمة فين يحكي يكبش في النهضة بها والنهضة عليها ... والنهضة تستغل الدين ، ويبدا يجبد في ايات بش يثبت إلي الدين مفصول عن السياسة ( على فكرة أكثر عباد أبدعت في التلعب هذا هما جماعة القطب) ... بحيث كلمة حق أريد بها باطل ... 

نتمنى أنه يفيق على روحوا ويحط بزايد طن في الكسكروتات ثماش ما المرة الجاية يولي يصلح لحاجة.

التناصف في المجلس التأسيسي : 

ياما صاحو على التناصف والنهضة ضد المرأة والريق البارد الكل ... النتيجة هو أن أقرب حزب للتناصف هو النهضة 41 مرا (تقريب هكا كان ما خانتنيش الذاكرة) من جملة 86 كرسي ... والأجمل من هذا أنهم أغلبية متحجبات ... ولله الحمد ...  

رد فعل النهضة : 

اليوم استمعت إلى الغنوشي على اكبريس أف أم ... وكلامه يفرهد ... يركز على أنه يؤمن بالديمقراطية وعلى أن الأحزاب عليها أن تعمل اليد في اليد بش يبنيو البلاد ... وينظفوها من الجراثيم إلي تاكل فيها ...

أهم حاجة :   

أهم حاجة على ما أتصور هي الإعلام ... كان تحبوا تونس تقديم ما تسيبوش الإعلام والتربية والتعليم لنفس الوجوه متع 50 سنة لتالي ... هما إلي هلكونا وهلكوا صغارنا ... هذي أهم "حرب" سياسية قادمة ... البقية تجي بطبيعتها.

الأغلبية الصامتة : 

هع هع هع هع ... كنت نسميها أغلبية ساقطة، واليوم تأكدت التسمية لأنها فعلا سقطت من فووووق، وجاها صرفاق عالمي ... نتمنالها الشفاء العاجل، وما عاش تعاودو صنعتكم ... 
اليوم هلي سماو رواحهم أغلبية صامتة وخرجو للقبة، اكتشفو أن هناك أغلبية صامتة حقيقة مش ضربان لغة،  و العودة إلى أمر الواقع صعيبة أما نورمال تو توالفو :-)

هاذم أعداء الثورة وأعداء الحرية وأعداء الشعب ... هاذم الأنانية هي شعارهم والكذب والنفاق هو سبيلهم وتشعيل النار وإثارة الفتن هي هوايتهم (مثال)  ... نحب نوجهلهم تحية عطرة وزكية ولكل من ساهم في تشعيل نار الأيديولوجية على الفيسبوك ، مع بعض مدوني الهانة إلي يحب يولي معروف يبدا يتفلسف علينا ويمخور ويحط ... نحب نقوللهم كما قال جماهير المكشخة "وتحبوا تهزو البطولة" ...والعام الجاي الشرفي ... 
إقرأ المزيد... Résuméabuiyad

الاثنين، 18 جويلية 2011

أخر كرطوشة ...



كيف انسان يبدا قاعد فوق شجرة وعندو نظرة استشرافية عليا على الناس يحس بروحو عندو طاقة كبيرة ، طاقة تمكنو من معرفة أسرار الناس و بالتالي تصبح عندو إمكانية أن يمسك عليهم الغلال ، بحيث يخول له أنهم يعيشون تحت رحمته ... لو كان أطلق لهم الغلال ها تو ياكلو ويشيخو ولو كان ما عطاهمش تو يبداو يبكو عند قدم الشجرة ويترجاوه أن يشملهم برحمته ...

بعض الناس كان يعيش بهذه الطريقة في تونس ، كان (ولا يزال) يعتبر الشعب جبان وجاهل وبهيم فيعامله بتلك الأساليب ... و الحكاية هذي موجودة من أسفل الهرم إلى أعلاه ... نبداو من العامل إلي في البوسطة أو في الإستقبال متع الوزارة إلي يعتبر أن الإرشادات إلي بش يعطيهملك هما كنز ويلزم تنبطح أمامه وتترجاه أن يسلكلك أمورك وكان لزم تمشيلو مرشانة باش يبدا فرحان بيك ... نفس الأساليب نجدها في أعلى الهرم -بالطبيعة- لأن من وصل إلى "الفوق" فقد مر في 90 بالمية من الحالات بفترات من الإنبطاح و التمسكن أمام "سيدو" ... هذا ما يجعله يزيد تفرعينو وتمسكو بالمكان إلي يوصل له وكل ما يعلى المكان كل ما تنبت العروق وتكبش (تماما كيف الشجرة العالية) ... 

لنفترض الأن أنك تحب اطيح واحد من الناس إلي الفوق ، -وإنت من أسفل- ، كان بش تهد وحدك وتبدى تضرب في الشجرة يهبط عليك بعض "الدامة" فوق راسك تجيبك ڨادم لسانك ... لذا الخيار هو انكم تهدو حمص وزبيب وتشدو حق الشجرة هذي عندي هذي عندك ، هذي عندي هذي عندك ، لين السيد إلي الفوق يجي فيه ... أما لا بد أن لا ننسى أن السيد من الأول باش يبدى يضرب ويسب ويسميكم مطرفين تكرهو الطبيعة وزقزقة العصافير ، وباش يجيب معاه جماعة مغرومين بالرسم وال"بغونزاج" حتى يدافعو بشراسة على الشجرة إلي يحب يطيحها المنحرفين، المتشددين المتوحشين ، المتلثمين (هذي معاش موضة حسب ما سمعت) ... 

عادة جماعة الرسم باش يسمعوكم وسخ وذنيكوم، باش يسبولكم أصولكم وجدودكم وباش يعيطو حتى لأصدقاء لهم في الجهة الأخرى من البحر المتوسط ثماش ما يمدولهم يد المساعدة ... والسيد إلي راكب فوق الشجرة يبدى حاطط سماعات في وذنيه وأمورو هانية يسمعلك في "فوق النخل" و يلوح عليكم في الكرطوش فماش ما تخافو وتبطلو من الإرهاب ... 

إلي حبيت نوصله رغم الإطالة أن السيد إلي الفوق وهو طايح باش يكبش في كل عرف يلقاه ، في أن حاجة ينجم يشد فيها باش يشد ... ويعيط لكلابه مع كل طيحة باش يهجمو عليكم ... وكل ما يقربلكم كل ما بش يزيد كذبو ، وتكثر وعوده ، وعنفه في نفس الوقت ... لذا لا بد من المثابرة ومواصلة المشوار حتى يطيح ...

يقول القايل علاش ما يجيبهاش برجلة ويهبط ... الخوف ، إي نعم الخوف ... هو إلي كان يخوف في الناس طيلة مشوار الصعود ، هو إلي يعرف معنى الخوف ... يخاف على روحو ، على عيلتو ، يخاف يرجع فقير ... يخاف من الحساب ... والخوف يجري الجوف ، هذا ما يفسر بعض النتونة إلي نسمعو فيها من برشة مصادر الأيمات الأخيرة ... هذي أخر حربوشة أو خرطوشة يستعملها السيد إلي "الفوق" حتى يقعد وين هو ... 

  الأفكار التي تتعرض للخيانة تنتقم لنفسها ... فالإنتفاضة الشعبية التونسية قامت على فكرة الحريات وفكرة الديمقراطية الي باش تحسن معاش الناس وتخرجنا من الفقر والميزيريا... الفكرة هذي اليوم تلاقي خيانة من العديد من من نادو إليها ، أنا لا ادعوهم إلى أن يتفقو مع أفكاري ، انما إلى احترامي ومناقشتي وعدم تلفيق التهم إلي ... اليوم تهمة "خوانجي" و"كافر" كيف صبلي نشرب ... حك راسك ولفق تهمة ... بدون حجج صحيحة ... الكلها إيحأت ، الكلها تشم فيها وتفهم أما بدون حتى دلائل قاطعة ، وأذكر على سبيل المثال إعتبار النهضة كمحرك إعتصام القصبة 3 ... برشة حكايات اخرين يطول ذكرها هنا وإلي هو مش موضوعنا ...

فكرتا الحرية والديمقراطية ربما يوصلو إلى مفترق طرق ... على سبيل المثال هناك من ينادي اليوم بسحب ترخيص عمل النهضة ، وفي نفس الوقت ينادي بحرية التفكير و العمل السياسي وغيره ... هنا يجب تحديد شنية الأولوية ، الحرية أم الديمقراطية ... أنا اعتبر أن الأولوية للديمقراطية لأنها تحترم جميع حساسيات الشعب وبها سوف تبنى أسس الحرية ... بمعنى تحديد العلاقات بين الناس باختلاف توجهاتهم وارائهم ... هي التي ستحدد الميثاق الجديد الذي يخط طريقة التعامل بين الناس ... وهكذا نكون قد اعطينا معنى للحرية في إطار المجتمع والدولة (لا معنى للحرية الفردية)، و هذه الحرية لا يمكن تقييدها (كما في 50 سنة إلي تعداو) ولا اطلاقها (كما في 6 شهور إلي فاتو) لأنها في كلتا الحالتين باش تضرنا ! 

ومن هنا أنا متعجب كيفاش ثمة عباد اليوم تشوف في الكذب في التلفاز والوزارات والحكومة و السبسي يخرف و مزالت ينطلي عليها الخطاب أو تعمل وكأن الخطاب مقنعها لأنها تخاف من غول يأكلها ... بصراحة لا أرى فرق كبير بين حكومة بعلول والحكومة الحالية ... وهذا ما يحثني على مواصلة المشوار ... السبسي ألي دخل يتمسكن البارح ، أصبح اليوم يهدد فينا بالبوليس المسكين ... اليوم يكذب علينا ويقرر في بلاصتنا ... السكوت على هذا رهو يرجعنا إلى العهد القديم ... السكوت عن هذا يعني السكوت عن كل شي في مستقبل ليس ببعيد .... وربي يوفقنا إلى ما فيه خير تونس ...    

إقرأ المزيد... Résuméabuiyad

السبت، 16 جويلية 2011

غازات في عينين المعتصمين ... وتزغريط في ديار "المثقفين"



ما لقيتش كيفاش نبدى ندون ، الكلام واحل ومش حابب يخرج ... صعيب ، صعيب علي نصدق أنه في تونس هناك أوباش للدرجة هذي ... حتى العنوان ما لقيت ما نسمي ... وبربي سامحوني إلي حطيت كلمة مثقفين بين ظفرين على خاطر نحطلهم مية ظفر وباقي باهي معاهم ... 

ابدى من الأحزاب إلي حتى واحد لا ندد بالحكاية هذي (بخلاف المؤتمر ، أو النهضة "لايت" كما يحلو لبعض الأذكياء تسميتها) ... وحتى واحد لا ندد بإقتحام المسجد ... وهاك الوجوه (الحرفة) إلي أربعة شهور التالي عملو عيطة على ماخور تسكر و جمعتين التالي الكلها تبكي وتمخط على بلار تكسر ومواطنين كلاو طريحة من عند مواطنين في قاعة الافريك أرت ... و كي تقتل القس البولوني الكلها صاحت فرد صيحة و عرفو الكل بأن "الخوانجية" وراء الحكاية ومش معقول حرية المعتقد تدنس بهذه الطريقة البشعة ، أما كي عرفو من بعد شكون وراء الجريمة تجدهم كالنعام يغرسون رؤوسهوم في التراب حتى لا يعترفون بسوء تقديرهم للموقف ...

أكثرية الناس إلي كانت ضد الإعتصام هذا وإلي مطالبه في أغلبها لفائدة تونس (كيف إستقلال القضاء ومحاسبة رموز الفساد ...) اعتبرو أن النهضة وراء الإعتصام ... ولذا هما اليوتوبيون (نسبتا إلى "اليو توب") شلقو بالعفسة ومهمش بش يخرجو أما بش يناضلو من أجل تونس في بيت  بالكلماتزور ... بش ينتصرو على الدكتاتورية وعلى الخطر الرجعي "بستاتي" يقولوا فيه إلي النهضة تحب تتقلب علينا ... ناس ترضى بأن تتواطأ مع نظام مزال خامج ، أنها تسكر وذنيها على قباحة السبسي وقلة احترامه للرأي المخالف ومن بعد تقول شبيه الشعب يسمع كلام النهضة ...  احزاب تاخذ مواقفها عناد مع النهضة لا أكثر ولا أقل .... ومن بعد يقولوا شبيها النهضة اقتحمت الميدان وكل المنابر الإعلامية ووو...    

أغلبية الناس هاذم (فيهم إلي لم يبع قلبه) ... تشمتو في ألي صار .. في شنوا ؟ في جماعة توانسة كيفنا كيفهم من دمنا ولحمنا كلاو طريحة ولكرموجان في سخانة تنقب الراس ... إي ووين كلاو طريحة ؟ في جامع ... شنية ؟ إي نعم في جامع ... في مكان مقدس ، في مكان على كل مسلم أن يجد فيه الأمان لما يدخله ... ضرب وغازات مسيلة للدموع وسبان الجلالة ... بففف بصراحة ما نجمش نزيد نحكي على خاطر ذكر الحادثة برك يوجع القلب ... بالمناسبة تحية لجماعة "أنا مسلم والنهضة لا تمثلني" ، اليوم أكدتولي صدقكم في القول ... 

ويجيوك من بعد بعض إلي يفهمولها ويبدا يفسرلك ...

- تي هما لواش هاربين للجامع ؟ يستعملو في الجامع لأغراض سياسية (بربي إلي يفهم الجملة هذي يفسرهالي ، عنكش الجامع متحف للمصاحف وأنا ما فيباليش ؟) ... إي أما وين تحبوهم يمشيو ؟ كل الطرق مسدودة ، و القنابل المسيلة للدموع هابطة عليهم ؟ ياخي بأنا حق "رجال" البوليس يضربو ناس في الجامع ؟ "الحجة" هذي تذكرني بإسرائيل في القصف على غزة ، وقتها يضربو في المدارس ويعيطو جماعة حماس الغادي ! 

- إي وشنوا أخر ؟ البوليس حكى معاهم بالسياسة من الأول وقاللهم أخرجو وهما ما حبوش ! عنكشي ماشين يتفسحو غادي مش يعملو في إعتصام ؟ يقتلوني الناس إلي يلوجو في تبرير ما ليس له مبرر ... 

- وعجبني زادة تعليق هذا "كي اعتصام النهضة 3 كلا كبوط .. و كي عرفو الي لوغة "البوليس السياسي قمعنا" و "المندسين" و "المعتصم الي اغتصبوه" ماعادش توكل الخبز ..دوروها توا البوليس يقتحم في الجوامع ..مسرحية جديدة لاستدراج تعاطف الناس .. حتى بيوت ربي تستغلو فيها .." 

ناس ما تحشمش وما تسواش ، هذا شنوا انجم نقوله ... أبهم من من يعتبر منقالة شارع الحبيب بو رقيبة ماسونية ! 

 بالطبيعة التفسير هذا الكل يدور حول فكرة محركة واحدة : إلي يعتصمو خوانجية وبلاصتهم في الحبس ... والعنف هذا الكل شوية فيهم ... 

الحاصل اليوم فهمت أن المسيرة الوحيدة في تونس إلي ما يتصدالها حتى حد هي إلي من نوع "لا للعنف ولا للرجعية" يعني هاك المسيرات إلي حتى ليلى بن علي تهبط تمشي فيهم ... أما رد بالك تبدى تبربش في مطالب تحسن العيشة ، فالويل لك ، تولي نهضاوي وراكب على الثورة ... 

ناس تحب على "العدالة"  وهي في أبسط الأشياء ما تنجمش تعدل ... قلوبها الكحلة وكرهها لحزب النهضة جعلتها لا تسمع ولا ترى ... أما ميسالش إفرحو اليوم وأعرفو أن الدكتاتورية لا تعرف الألوان ... اليوم ليك وغدوة الداخلية تفرح بيك ... إفرحو اليوم وأرقصو وغنو كان لزم ... كي تشوفهم يحكيو على حقوق الإنسان وعلى حرية التعبير تقول الدنيا اتخذت ، والفعايل حاجة أخرى بمجرد أنك تكون ضدهم في الفكرة ... 

أنا فديت من كذبهم ونفاقهم ، فديت من خوفهم المرضي من بعض الأحزاب ، فديت من الديناصورات إلي تحب تحكم بالقوة ، فديت من الصور متع الزوالي إلي يتركل ويتسب ويتشتم و يجي شكون يقول مليح فيه ... فديت من الناس إلي ذاكرتها قصيرة وتسمي القصاص للموتى همجية ... 

هاذم عباد ما تحشمش ، كيفهم كيف البوليس إلي جاء يبكي وأنا بريء وغلطوني وهو كي يلقى العفسة لا يعرف لا كبير ولا صغير لا نساء ولا رجال ، الكلها مواطنين فشخ الكازي وديمة تمشي ... واحنا مش بلعاني وكنا نتصرفو عن حسن نية ... تعرفو "أوديب" شنوا عمل وقت تصرف عن حسن نية ومن بعد فاق بالجريمة البشعة إلي ارتكبها ؟ 

ادعوكم إلى أن تفعلو مثلما فعل أوديب إن كنتم صادقين ...  

إقرأ المزيد... Résuméabuiyad

الاثنين، 11 جويلية 2011

قلبي محروق عليك يا تونس


اللون الأحمر يمثل دم الشهداء
 
- يا ولدي وينك ؟ لا طلة لا سطل غلة ؟ هكا خليتني كيف متحف الأثار، إنش في الذبان من قلة الزوار ؟

- يا مدونتي العزيزة ... يزيني ، إنت كبرتك وحطيتك في عيني ، ملي كنت بنفسجية حبيتك تكون كلمة حق وصوت قلبي ونحكي فيك على البلاد التونسية ، وباللهجة الشعبية ، أما ليوم كل حد في ثنية ، أنا مليت من الكتيبة ... ومليت منهم !

- اجة هنا وين ماشي ؟

- ماشي نعمل ثورة ، ثورة شخصية ، نمشي نتعلم ونقرا ، نقرا تاريخ بلادي ونقرا ديني ، نقرا على الفلسفة الماركسية و الرأسمالية ، نقرا على الفكر الإسلامي ، فكر النهضة (مش الحركة)، وعلم الإجتماع، نتعلم نتسامح مع نفسي ونسمع نفسي، نخدم روحي بش نخدم بلادي ... ونخدم الناس إلي تستاهل ...

- بلادك ما تحبكش تسكت ، بلادك حاجتها بيك ، حتى بالتنبير والتفدليك ... الثورة حاجتها بيك إنت وأندادك ، بالكلام والفعل باش تخدم بلادك ، مش بقراية الكتب في التراكن ...

- أندادي ؟ الأكثرية غطس في حرب هوية ، اش عليك هما فهمو الحداثة والديمقراطية ويحاربو في الرجعية ، ومن الجهة الأخرى يحارب في الإلحاد والعلمانية ، بربي شكون بها الأرض هاذية ؟ شكون بش يبني ويخدم ويتعلم ويعلم ؟ شكون بش يحسب ويناقش ؟ شكون بش يطلع بنا الفوق ؟ 

- هاو يناقش في عقد جمهوري يعملو به دولة ديمقراطية مستقبلية ...

- عقد جمهوري متاع شنوة ؟ باما مناسبة ؟ وحكاية التطبيع مع إسرائيل ؟ ياخي شبيهم ما ينقشوهاش من ناحية ديمقراطية ؟

- معاش نفهمك إنت ، غبت علي برشة ...

- صحيح غبت برشة لأني نكره كثرة القيل والقال وقلة الافعال ، كيف ما يقولك ملك بن نبي " حينما بطل عمل اليد سقط عمل الفكر حتما " ... احنا قعدنا كل من موقعه ينظر ويتفلسف ... مدونين (حاشى إلي ما يستاهلش) كبرو ريوسهوم ... يحسابو أنفسهم أذكى الناس ، وهما من يمثل شباب تونس ... ومن يعاندهم أو يجي ضدهم يسبوه وقدرو يطيحوه ... وهما ياكلوا في لحومات بعضهم ، أنا شفتهم وسمعتهم وما نحبش نكون كيفهم ... 

- على هذاك نسيتني ؟

- تنجم تقول ... أحيانا تجري الرياح بما لا تشتهي السفن ... كيف تشوف ناس مسيبة السراق وتسب في واحد عمل لحية أو مرا لابسة نقاب ، ومن بعد يحكي على العدالة الإجتماعية ويتفلسف عليا ... هذا أمر يسود له وجهي ... كيف نشوف اعباد تجري وتلهث على بلاصة ، على كرسي ، على أربعة فرنك يبيع امو وبوه ... نخاف على البلاد ، قلبي يوجعني والكلام معاش نقدر عليه ...

- تي تكلم يا ولدي شكون شدك ...

- ما شدني حتى حد ، تعرفني مانيش بش نحشم منهم ، أما نخاف على بلادي ، نخاف من الفتنة ، نخاف عليها من روحي ، تجربتي صغيرة وولاد الكلاب برشة ... يلزم وحدة شعبية ، كيف وقت تخريج الإستعمار ، كيف وقت تخريج بن علي ... يلزم كلمة وحدة ...
 هاو الجماعة إلي يفهمولها قالو إلي احنا في مسار الديمقراطية ، هما يفهمو ، أنا شكون ؟ أنا منين نفهم ؟ هما ناس قرية برشة كتب ، ناس تحب تحمينا على خاطرها من الرجعية تخاف علينا ... تيمشش في بالك يعملوا في الوصاية ؟ لا يا راجل ... فك عليك من هاك الغناية ...


- مشيت قيدت روحك في الإنتخابات ؟ 


- مزلت ، أما بش نمشي ، ما عندي شكون ننتخب ، أما تو ننتخب ...


- هاو الأحزاب برشة عندك الخيار ...


- إي ، بش نختار إما حزب يسب النهضة أو النهضة ... هذا اش عندنا اليوم ، إنتخاب متاع شماتة ، متاع كره من النهار الأول ... ما ثماش مشروع بناء للبلاد ، مشروع توحيد الصفوف ، مشروع يتعدى بنا عامين أو ثلاثة حتى الأحزاب تتعلم تخدم وتخرج من إطار الجمعيات ... ما عندناش مشروع بناء للتعليم ، مشروع كل حزب يعطي إقتراح و يتفاهمو مع بعضهم على حل حتى يهربو بالبلاد من الخراب في الوقت الحالي ومن بعد كيف يكبرو ينجمو يتنافسو ...


- زعمة يتفاهمو ؟


- لو كان يسكتو علينا جماعة الخلافة ، وجماعة اللائكية ، نتفاهمو ... الثنين يجيبو في مشروع نجح أما مش في واقع كيف واقعنا ... يعني مشروع فاشل اليوم ... حاجتنا مشروع ينهض بالدولة ، مشروع يحول علمنا إلى عالم أفكار ... حياتنا تدور حول أشياء ، مادة ، وفي أحسن الحالات حول أشخاص ... نحن نعاني نقص فاضح في الأفكار ... أفكار لها روح ... قادرة على إصلاح المنظومة التربوية والمجتمعية والأخلاقية وغيرها ... أما النقاشات البيزنطية فهي تشتت ... أما شكون يفهمك ...


- إي إلى متى بش تقعد ساكت ؟


- زعما كلامي يصلح لحاجة ؟ زوارك تعجبهم الكتيبة ؟ وتونس ... طلعو فئة قليلة من يحبها ... الأغلبية يرحم عمي ... 



- تونس يلزمها رجال ...


- تونس يلزمها من يقول كما قال عنترة " لا تسقني ماء الحياة بذلة ... بل فاسقني بالعز كأس الحنظل" ...
إقرأ المزيد... Résuméabuiyad

الثلاثاء، 3 ماي 2011

مخرجة تونسية ملحدة ... إي ومن بعد ؟



الموضوع بش نحكي فيه كلمتين لأنو ما يستاهلش التطويل ... المشكلة الكلها في الوعي التونسي إلي ناقص وإلي لا بد معالجتو من القواعد ... من المدرسة ، الحكاية وما فيها المخرجة هذي ملحدة وقالتها في تلفزة تونسية يتفرج عليها الناس الكل ... بصراحة ما كنتش باش نحكي وكنت نكتب في تدوينة أخرى (خرافة من خرافاتي) ولكن كيف نشوف واحد كيف لسعد عصبان يحكي ويسب فهم وفي نفس الوقت يعمل في إشهار للمسخرية متاعو بعنوان "زنقة زنقة " وشفت مجموعات على الفيسبوك من النوع هذا قلت نقول كلمتين ...

باهي النقطة الأولى ... هي ملحدة ، هي تعبد الجرابع ... اش يهمنا فيها ؟ ... أنا حسب ما نفهم الدين الإسلامي ، يدعو المسلمين إلى أن يكرهو الكفر ولا الكفار ... يعني تكره أن تكون كافر ، وتكره أن ترى الناس تكفر ... ولكن لا تكره الكفار ... وبالتالي الحملة الشخصية المحملة على الإنسانة هذيكة نشوفها لا معنى لها ... هي لم تسب الدين بل رفضته وهذي حاجة تخصها، كان سبتو وقتها نقاش أخر ... 

النقطة الثانية ... لو كان باش ناخذو على حد راهو قناة سي نصرة ... خرمة بعل ... على خاطر هي "تسوق" في الكفر والإلحاد ... و هي بعد هذا الكل قناة خاصة وحتى كان تحب إتدورها أفلام إباحية ما يسالها حتى حد ... أما لا يخفى على حتى حد أنها قناة تفتن وتميع في قضايا الشعب ... وأنا إلى الأن باهت في العباد إلي تتفرج فيها ... تي ماهو كي ما يتفرج فيها حتى حد تو تسكر ... ونرتاحو ، تقعد عندنا كان تونس سبعة واحنا جونا في الأحد الرياضي ...

النقطة الثالثة ... هو أن في فيديو فيها كلام على اللائكية ... وبكل صراحة حنبعل تجيب وحدة تحكي على الكفر ومن بعد وحدة تحكي بالفرنسية على اللائكية ... هذا يعطيني فكرة على لائكية بعض الشلايك ... أنا اللائكية متاع الناس هذوكم ارفضها لأنها اليوم خايفة من أن يفرض عليها الدين غدوة يولي الأذان يقلقها والناس إلي تصلي في الصبح مقلقينها كيف سي الصغير أولاد أحمد ... هذي لائكية مطرفة غير مرحب بها في تونس وكيف هي تعتبر نفسها في حرب ضد "الإسلاميين" ... أنا اعتبر نفسي في حرب فكرية ضد المطرفين هاذم ... 

النقطة الرابعة ... الأنسة هذي ترفض أن يجبرها إنسان على أن تعتنق دين ... ولكن انتي ما تجبرش الناس على اللائكية ... جاية إنتخابات والشعب يختار ... وكانك قابلة للديمقراطية تقبل رأي الأغلبية وتحترم الشعب إلي أكثريتو مسلمة أحببتي أم كرهتي ... وإلي موش عاجبو ما عليه كان يعمل كوردة ... وحاجة أخرى مدام نحكيو على إحترام الغير ... كفانا من إعتبار كل ما يتعلق بالدين رجعي وظلامي ... أو بالأحرى الكذب على الدين وتلصيق كل ما هو ظلامي إليه ... وبالمناسبة لبرشة حيوانات يزيونا من الإشاعات على المسلمين ... إي نقول مسلمين لأن العديد أصبح يحارب الدين وليس يحارب في حزب إسلامي ... وعندكم بعض الأمثلة عن الإشاعات في مدونة المتنوشة ...   

النقطة الخامسة ... باش نخرج شوية على الموضوع ... فيما يخص هالمخرجين إلي عندنا ... صحيح ما يسالهم حتى حد ... أما بربي شنوا هالموضوع  ؟ على قلت مشاكلنا ؟ ... أو إلي يحكي ويلعبها مثقف ومفكر ويفهم في قوالب الدنيا والدين يقلك "حقوق المرأة" ... تي بربي أهبط للشارع وشوف المرى فاش تعاني قبل ما تحكي مساواة ... ياخي شبيكم ما تحكيوش على التجارة إلي تصير بالبنيات الصغار ؟ ما تحكيوش على حلول للقضاء على البغاء أو الحد منه ... مكبشينلي في شطر ميراث ... تي ماهو تحب الشطر إكتب لبنتك الشطر وفك علينا من حسك ... اه حكاية تعدد الزوجات ؟ باهي في تونس قبل ما يجي بورقيبة كان هناك ما يسمى بعقد القران القيرواني إلي تشترط فيه المرى أن زوجها ما ياخو عليها حتى مرة أخرى ... هذا إجتهاد بعض أيمة توانسة ... يعني إلي يجي يقول أن الدين باش يرجع بالتوالي راهو إما مهوش فاهم وما عليه كان يسئل وإما يتبوهم ووقتها ليا وليه ربي ... لأن حسب ما نشوف ، الطرف إلي ضد الدين هو إلي يحب يكون دكتاتوري بدعوى المكاسب والتطور فيضيق ما هو واسع ... تنجم تعمل وصوية كي انتي القوانين الربانية ما ساعدوكش ... هذا ونحب نذكر أن في أمريكا (وما ادراك) كبير العيلة فقط يورث والباقية ياخذو الشب (هذا لا يعني أن نحب نكون كيفها بل نحب نوري أن شطر التركة لا تعني التقدم)...

النقطة الأخيرة ... هي لمن يقدم لنا اللائكية كفانا تمعجين ... يا أخي فاهمين إلي اللائكية هي فصل السياسة عن الدين ... وكان تحب تو نقريهالك ... أما شنوا تحب تعمل في أرض الواقع ... شنوة إلي باش تبدل على قبل ؟ ... شنوا برنامجك للمجلس التأسيسي ... وكفانا كفانا من الحديث على التطرف الديني وعلى غيره  ...  راهو الحديث هذا باش يهزنا للهاوية ... هاو جماعة رافعين قضية بالنهضة ... تي بربي شنوة الخرم هذا ؟ وكنت حكيت على هذا بأكثر تفاصيل هنا ... والسلام 
إقرأ المزيد... Résuméabuiyad

الأربعاء، 16 فيفري 2011

تحية عطرة زكية لشهداء تونس


الشهادة ... أحلى هدية ... للناس الحية ... ليك وليا ... للأخوة وللأحباب ... للأحياء للوطن وحتى للجبناء ... 

الشهيد يهدي أغلى ما عندو إلى من يخلفو بعدو ... 

الشاهدة ما يعرفوها كان الرجال ... الشهادة ما هياش ملوحة عالمادة ... يلزم تجريلها وتستقبلها بصدر رحب ... تقبل أنك تكون معبر ... ممر ... قنطرة يتعدى عليك إلي يسوى وإلي ما يسواش ... من أجل مستقبل أحسن، من أجل رسم البسمة لأحفادك ، من أجل أن تدون على صفحات التاريخ بدم قلبك ... 

الشهادة ... هي إيمان بالتغيير ... إيمان بالإنسانية ... إيمان بالرحمة في الأرض هاذية ...

الشهيد انسان صنديد ... قلبو حديد ... عندو فخر وعزة ... وكرامة ... هو كالنسر يحلق عليا شامخا لا يبالي بما يجري في عالم الخيانة ... الشهيد دمه غالي ومجيد ... الشهيد ما عندناش منو برشة ... الشهيد قلبو أبيض ... مش يتبرع بأعضاء أو بالدم ... يتبرع بحياة كاملة ... انسان يعطيك حياتو لا يعرفك لا تعرفو ... لا شافك لا شفتو ... أما فكر فيك ... فكر في حاضرك ومستقبلك ... وحب يفسخلك ماضيك ... الماضي الجبان ... متاع المكسي العريان ... 

الشهيد اليوم ودعناه ... في تاريخنا قيدناه ... وفي حكايتنا نسيناه ... لا عاد تسمع اسمو ولا تشوف تصويرتو ... الشهيد إلي وحدلنا كلمتنا ... الشهيد إلي فرحلنا حومتنا ... الشهيد إلي خلانا نحلمو ... ونفلمو ... ونحكيو إلي احنا فايقين واعيين ... وفي مطالبنا ماناش مسلمين ... 

إي متفقين و ... الشهيد الله يرحمو ... أدى واجبو ... وحتى حد لا قالو موت ... صحيح خلا امو ومرتو ... وخواتو وصغارو ... خلا دارو وقطع عنهم اخبارو ... صحيح العدة مازالت ما تمتش ... والدموع ما تمسحتش ... القلوب مجروحة و الجراح مفتوحة  ... فيهم شكون عطاووه تعويض ... شوية مصروف في بلاصت الحياة وإلي مات ... 

احنا كي نحكيو على الشهيد تقول نحكيو على كأيها الناس ... لا قدر ولا إحساس ... فدينا و نحبو نرجعو للمعبوكة ... التبندير والتطبيل واللسان الطويل ... إلي يسبك سبو ونحيلو جدو ... إلي ما عجبكش أعملو ضحكة وقردو قدام الناس ...

احنا نحبو نقودو ثورات الأخرين ... ما تلهيناش بهمنا دورناها ... ليبيا ، يمن ، بحرين ... تي أكهو تحلتلنا ...وإلي مات موش منا ... 

إلي مات اسمو شهيد ... شهيد الوطن ... شهيد الكرامة ... إلي خلا حياتو وما رضاش بالإهانة ... إلي خلالنا دمو وعقلو في شوارعنا ... نشربو وناكلو منها إذا جعنا ... احنا أوباش ، نحبو كل شي بلاش ... لا نعرفو قيمة ... لا لموت ولا لحياة ... روحي روحي ولا يرحم من مات ... 

أحيي أرواحكم العطرة النقية من كل جبن وأنانية يا شهداء تونس ...
إقرأ المزيد... Résuméabuiyad

الثلاثاء، 15 فيفري 2011

التونسي ... والكبت الزنسي


أية يا سادة يا مادة ... قلنا السلام وبعد السلام يحلى الكلام ... اليوم مش باش يحلى برشة على خاطر مخي وقف ... إي نعم وقف وتيبلنتا وعمل "فران ساك" ...

تونس دولة المواخير المغلوقة ... هذا الشعار الجديد ... باهي باش نكونو واضحين وضوح الشمس في ضلمة الليل ... لاني مغروم بلمواخير أو ما يعبر عنه بلغتنا العامية البرديل ... ولاني من روادو ... لاني من مشجعي بائعات الهوى ولاني من عاشقي مغامرات ولد الحي في بورديل "نعيمة رزوار" ... أما راني مانيش فاهم ... ومعاش فاهم ... وما عاش نحب نفهم ... فقط نحب نصيح !

تي الزح ... تونس داخلت في حيط ... دولة تكمبزلنا و حكومة تستبله فينا بدم بارد... لا نعرفو وقتاش الإنتخابات ... لا شكون باش يترشح ... لا شنية البرامج متاعهم ... لا شكون ورى التجمع ... لا شكون ورى غياب الأمن ... لا خاممنا في الدستور إلي يلزمو يتبدل لا في عمر بو الزور إلي يلزم ينقص من الإنتهازية متاعو ...

لا ... كيفاش والكلوف لشكون يقعد ؟؟ ... في تونس ما وقفوش للجماعة إلي تسرق في الأراضي وتقسم فيها بصحة الرقعة ... ما شدوش جماعة التجمع وحاسبوهم واحد واحد ... 

التونسي اليوم أحكيلو على ليلى وبن علي كي جابو أولاد في الحرام ... وعماد ولد ما نعرف شكون ... يشيخ في مخو ... يعمل كيف ، ويبدا يصور في أفلام في مخو ... زعمة كيفاش زعبوع ركح ليلي ... وعملو استغفر الله العظيم ...

إلي لاهي يحل في مواقع الإحم إحم ... والصابون مقطوع و رياقنا شايحة ... تي عالقليلة رجعوا كارفور يخدم ... حالة فيكم يا مكابيت !

وجماعة لخرين لاهين يسكرو في المخاور ... وناسيين أنها البلاد بكلها ولات ماخور كبير ... وجماعة اخرين يصيحو عليهم ويشتمو فيهم ... تي هكاك حك راسك سكر ماخور ؟؟ 

يخي البنات إلي غادي عاجبهم الحال ... تي فادين أكثر مني ومنك من المزيريا الكلبة إلي عايشين فيها ... انتي انسان شريف ونظيف كي تحكي على وحدة استر اسمها على القليلة مش توري في بطاقة تعريف بوها ... إتبرعلها بالفلوس و سمعها كلام ربي بالسياسة ... تزيد تكرهك وتكره الدين إلي انتي تحكي بإسمو ...

أنا شخصيا ضد البرديل ... و مشتقاته من الجنسين ... أنا من أجل أن كل مرى تعيش عيشة هانية كيف اندادها وكيف النسا الكل ... من أجل أنها تقرا وتتعلم وتخدم ... لكن تجي تهينها وتسبها ...المرأة كائن حساس ، يجب أن نحكيو معاه بالسياسة وبكل لطف ... مش بالشتم والذم ...

أنا نعرف طفلة أمها "باعتها" ملي عمرها 14 سنة ... شنوا ذنبها ؟ حلت عينها في برديل ... ألا تستحق أن نرفق بها ؟ ... ألا تستحق أن نعطيها خدمة أخرى ؟  ياخي عجبها الحال نهار كامل وهي مستحملت الخمج على أربعة فرنك ؟ 

وفي نفس الوقت برشة "مدافعين عن الحريات" ما قالوش شبينا ما نعاونوش البنات ... همهم هو الخوانجية إلي يسكرو في المواخير ... مشكلتهم هي السيد إلي كتب الله أكبر على باب البرديل ... أما البنية إلي عندها سنين وهي تقاسي ما تلفتلهاش ... مشكلتو أن البرديل تعنيلو "حرية" موش أكبر إهانة إنسانية !
 
هذي مشكلة إجتماعية كبيرة ، ويلزم معالجتها بكل رياض ... 

 باهي هذي حاجة ... أما بربي هذا وقتو ؟ توا وقت البرني والبرديل وليلى رقدت مع فلان وفالتان ؟ 

ما يزيناش ألهم إلي احنا فيه ؟ عباد ميتة بالجوع ، عباد ولادها ماتت بلكرتوش والتونسي همو في شيقول فمي ... باش نبدى نهز ونصبت من العوج إلي الواحد ولى يرقد عليه ويصبح ... تلهاو بالأهم والمهم ... الناس إلي ما عندهاش خدم ... موش بريق البارد والزنود العريانة ... أخطانا من الحكايات بو دورو وخلي نبنيو بلاد على أسس صحيحة ...      

إقرأ المزيد... Résuméabuiyad

الثلاثاء، 1 فيفري 2011

إنت كافر ... وإنت إرهابي


اليومين إلي تعداو ما كنتش عندي حضور دائم على الانترنت وذلك لبعض الأسباب الشخصية ... لا علينا !


اليوم حليت المدونات إلي مستانس نزورهم وبعض الصفحات الفسبوكية باش نعمل طلة علي فاتني ..
تفاجئت ... إي نعم تفاجئت برشة كي نلقى مستوى الحوار انحصر في "يساري كافر" و"خوانجي إرهابي" ... بعد ثورة كيف هذي وناس ماتت وناس حرقت أنفسها ... احنا نرجعوا للغناية متاع انتي بيك وانتي عليك ... فكروني في حكاية بسيشو أم وسوسن معالج !


تو بربي فسرولي، عباد في القصبة تاكل في الضرب ونساء خارجة تعيط "حرية ومساواة" ... هذا كلام ؟ والأخر باللحية خارج يعيط (شنوا الشعار متاعو الساعة ؟؟) هذا وقتوا ؟


انتم يا نساء يا جماعة الحريات والريق البارد ... شفتوها تونس حرة ؟ معاش عندنا حتى مشكلة باش تخرجوا توريونا طول لسناتكم ؟ وزيد شكون حكى على 4 نساء ؟ شكون قال باش يولي يطلق مرتو بالكلمة ؟ شكون قلك ايجا دافع على "حقوق" أمي أو أختي أو مرتي ؟ عطيتك توكيل ؟ جاتك تبكيلك ؟ هذا ما يعبر عنه بشريان شبوك ... وتدخل في حاجات ما تعنيكمش ... وما عندها حتى أهمية في الوقت الراهن !


نعرفوكم ما تتقتعوش وما يوصللكم حتى حد ... فيبالنا بكم مثقفين وقاريين ثلاثة كتب فلسفة وأربعة كتب متاع ياسمينة خضرة وفاهمين الدنيا علاش تاقف ... نعرفو زادة إلي كل وحدة فيكم راجلها ما ياخو عليها حتى مرا أخرى (يا من وراني)  ... لا وإلي يمرج أنهم ديمة مساكن ويسخفو ، ويا لطيف ساعة ما عملت حتى شيء ... تي مالا وينك انتي ، النساء هاذم البراءة تمشي على ساقيها و هما خرجوا يعيطو وجاو وحوش باللحية شبعوا فيهم شلابق و الحاكم يتفرج !


نقرا بعض المدونات متاعهم أو تعاليق على الفيسبوك ، نحس باختناق ، ناس تحسها نفخت برشة نبايل في صغرها حتى النفخ لصق فيهم إلى يوم يلبسون التراب ! بكاء ووحدة مصورينها خناننتها تجري واش عليك واحد متوحش هبط عليها بسرفاق حلايبي ...  في نفس الوقت الحكومة أو بالأحرى بقايا النظام قاعدة تحفرلنا وباقي تستبله فينا ، شيء مؤسف على خاطر الشعارات إلي يدعولها هما يتميزوا بها ، يعني الكل ريق بارد !


نجي توا لك انتي ... يالي نصبت روحك إمام وطالع فوق ضهور الناس وتعيط ... باهي هام طيحولك قدرك ... وزدت عطيتهم سبة باش يسبوا الإسلام إلي أنا شخصياً أفخر بانتمائي ليه ، أما كي نشوف واحد كيفك نفد ... على خاطر في جرتك أنا تسبيت في ديني ، في جرتك أمي تسبت ، في جرتك أختي كي يشوفوها لابست حجاب يقولو عليها متخلفة ووو... ولو أنها إلي في المضاهرة الكل ما يلعبوهاش في معادلة رياضية ...


باهي دخلت في وسطهم ومن بعد ؟ وين وصلت ؟ شنوا ؛ اش تحب اطالب ؟ الحجاب ؟ تي هاو عملوا جواز سفر بالحجاب ولا حد لا عاد يتكلم ... النقاب ؟ تي إلي تحب تلبس تلبس على روحها و زيد توا مش وقتوا ، اه وإلي ما عجبوش أهوكة الحيوط برشة، على خاطر إلي مش عاجبهم هما إلي يخلقوا التطرف بالبهامة متاعهم ! صلاة الصبح ؟ أنا واحد مالناس نطالب بها ، لكن مش هكا ، لا ما يجيش و موش وقتوا !


شنوة مطالبك ؟ النساء ما يخرجوش يتضاهرو ؟ يشدو الكوجينة ؟ أحكم في صباطك يعيش بابا ... وسيرجو مليح قبل ما تخرج !


إلي نحب نقول كل واحد يشد دارو كان باش تخرجوا تهزوا وتنفضو ...

نحب نتوجه خصيصاً لجماعة الحرية المحنونة ... راكم عايشين في تونس ، بلاد فيها 90 % وربما أكثر مسلمين ... فيها ألي يتبع في الدين وفيها إلي بالإسم مسلم ... أما الكلها تغير على دينها ومش باش تجيو اليوم تحبوا تبدلوا الناس بمضاهرة باسلة ! مهما يكون اللبسة العارية تبقى عندها نظرة دونية والجنس الثالث يبقى ديمة مرفوض  ، تي هو حتى في أوروبا كلمة "بيدي" يعايرو بها العباد وقليل إلي يقبلها... كفانا تخلبيز وكونوا واقعيين ... إلي مشاو يستقبلوا في الغنوشي الكل ارهابيين ؟ الكل يحبو رجالهم ياخذوا 4 ؟ ... ما أتفهكم والله ... 


نزيد نذكركم ، حذاري تعاودوا نفس الغلطة مع بن علي وتحطوا يدكم في يد النظام ... راهو تكونوا شجعتوه على القمع ... نوعدكم ما تنجموهش من بعد !


اه حاجة أخرى ، هنا ركزت أكثر على" المتحريين" -إن صحة العبارة- على خاطر يشريو في الشبوك ... تو تقولو خوانجي جاهل وبهيم ... عاملينلو قدر لواه ؟ ... ونسيتومنعرف قداش من مسلم تونسي أمورو ستة زيت ، لا يلوج لا على مشاكل لا على غيروا ، فقط يحب يصلي في الجامع ومرتو تحب تلبس حرة وما يهمهمش فيكم .... وتلوجوا في الحالات القليلة كيف هذي ؟
وكان ما جيتوش تلوجوا في الشبوك .... اش مهزكم للمطار تستقبلو في الغنوشي ؟ (السيد قال نحب نجي و لا حاجتي لا برئاسة لا بزمارة) ... ولو أني كنت نستنى نشوفكم في بيكيني ثماش ما نجمل شوية "سيئات" ههههه ! 
وكلمة أخرى خلاصة الحكاية ، اش خص علينا كان يشد تونس حزب كيف في تركيا مثلاً... اش خص علينا يكون عندنا رئيس حكومة كيف تركيا ... أهيكة هي إلي علمتنا اللائكية ... أما فهموا ...  إلي في بلاد بكلها مسلمين صعيب كان تنجح ونظامهم اليوم مثال يقتدى به، أما وينهم الناس إلي تفهمك !


يا أخي تونس في حالة خطر ، التجمع مازال ما ماتش ، التجمع موش الغنوشي أو المبزع ، انما هيكل كبير قاعد يخدم ويربح في الوقت بش يزيد يستفحل فينا ، ويبث سموم متاعو ، كيف توا بعد ما نجمش يقسم التوانسة ، دورها "حرب " عقائدية وقعد يتفرجوا في البهايم تتناهق ، وهما يخدموا في خدمتهم في الخفاء ! 

حتى الوزراء الجدد المستقلين إلي حطوهم ... راهم باش يكورو بيهم كيف ما كورو بنا 50 سنة وكورو بالشابي وأحمد إبراهيم وغيروا وغيروا ... يا عباد يا توانسة فيقو !
ما تسكتش على اللعبة إلي يلعبولنا فيها ، القمع والصنصرة مازالوا ! والكلاب متاع التجمع مازالوا !
إقرأ المزيد... Résuméabuiyad