الاثنين، 28 فيفري 2011

الجمل لوكان يرى حدبتو ...


قبل كل شي التدوينة هذي متاع صرخة ... راهي روحي طلعت وحبيت نفرغ قلبي هنا .. 

يا ولاد تونس يا ولاد الغالية ... قولولي وفهموني راني حرت وضعت ...

الإخوة التوانسة إلي تطالب الغنوشي أن يعود ... مش كان مشيتو للقصبة وطالبتو بمجلس تأسيسي خير؟ مش هذي أخر كلمة قالها الغنوشي ؟ وإلا ما تعرفوا كان بالروح وبالدم ... اعملوا خشم و كفانا "يحيا أش إسمو"  راهي اللغة هذي هي إلي صنعت الدكتاتورية !
مانيش بش ندخل إناقش في سيرتو، ولكن الحاجة إلي لا تخفى على حتى انسان هو انو مهوش في المكان المناسب ... منذ شهر و نصف ما قدمنا في حتى شي ... بالعكس اليوم رجعنا بالتوالي !

نهارين التالي طفلة مدونة اغتصبوها، صحافي اليوم فتقوه بطريحة ، منذ ثلاثة أيام رجعنا للقتل والتخريب ... ويني اللجان الشعبية متع ما بعد الثورة ؟ علاش ما تعاودوش تكونوها باش تحميو الممتلكات ؟ علاش اصبحنا نكذبو في أي واحد يقول ضربوني ؟ علاش كل واحد أصبح نفسي نفسي ؟ شنوا إلي صار ؟ 

الأمر المؤسف اليوم ... كي نحل الفيسبوك نلقى فيديوات متاع إما مسلم إرهابي أو لائكي كافر ... تجمعي قفاف أو ثوري مهوكش ... وإنت بهيم ما تحكيش في بلاصتي وانتي أرجع أحكي في الكورة ... و و و برشة حاجات تبكي وتكره الواحد في روحو ... رجعنا للحرب العقائدية وإلي يقول النهضة وراء هذا ، وإلي يقول اليساريين باش يفسدوا صورة الإسلاميين وهات ما جاك من الحديث متاع الدجاجة أو ألعظمة قبل ... 
  
الأمر إلي يفدد ويطلع الزفت للراس هي الناس إلي تتمنيك على رجال القصبة ... على خاطرهم ما يحكيوش مليح "بالفرنسي"  أو على خاطر الوعي السياسي متاعهم محدود للبعض (تقول احنا عندنا سياسين يعملوا الكيف ... و هما الكل الشكارة و البحر) ... نذكركم أنك كيف انتي باش تنتخب الناس هذوكم زادة باش ينتخبوا ... يعني كيف تعطي لنفسك ألحق في التظاهر هما زادة كيف كيف ، أحببت أم كرهت ... نذكرك أن الجهوية الملعونة هي إلي خلاتهم يعيشوا في ظروف تبكي الحجر ... ونذكرك أنهم هما إلي عراو صدورهم للسلاح ولا مجال أنك نحل فمك وتسبهم ، تشتمهم أو تحكي عليهم بالخايب ... الناس هاذم جاو من أجل الكرامة ... رجال القصبة فيهم العديد من البسطاء ولكن ذوي كرامة ما يتشراوش بالفلوس كيف برشة عباد كنت نحترمهم أما طلعت غالط فيهم ... 

تلقى نوع أخر متاع عباد ... يشيخ ويعمل كيف ويزغرط من مؤخرتو كي يبدا يسب في الشعب ... أي حاجة موش عاجبتو ... الكلهم بهايم وهو وليدها وما يلعبوا شي ... هو المعلم إلي يقعد على دبوزة وما يتكلم ... هو زادة من جماعة شلبوق يبكيه وثلاثة دورو يسكتوه ...    

وبربي هاك الجماعة "المسقفين" .. إلي يفهموا في كل شيء موش كان سيبتوا التمقعير والتنبير عالماسونية والبهايم إلي يتبعوا فيها (إي ساعات البهامة تتعدى الحدود) وتلهيتو تلوجوا في المخربين شكون موش خير ؟  موش كان تحاولوا تعملوا تحليل معمق للحكاية خير ... موش كان نشوفو حلول عملية خير من التنبير ... أما زايد الجمل لوكان يرى حدبتو ... 

هذا نداء للتوانسة إلى أن يوحدوا صفوفهم وينقصوا من التفوريخ ... وإلي يعرف روحو  ما عندوش شجاعة من توا يتلهى بفرختو ويخطانا أو يرقد خير ... سامحوني ما نحبوش الشياب يحكمو فينا أما زادة التفريخ هذا ما عندو وين باش يأدي ! كيفاش تحبوا نكبرو في مخاخنا كان مازلنا نتعاركو على حكاية عقيدة أو على شكون أبهم من الأخر ... وكيفاش تحبوا نصلو نستحقو مراكز متع قيادة كي احنا نتكالبو على تفاهات ...

هذا نداء إلى كل تونسي غيور أن يحكي ويتكلم في الوقت هذا على خاطر باب الفتنة تحل واليوم احنا في حاجة إلى أياديكم باش نوحدو صفوفنا ...  الوحدة الوطنية ولا للجهوية ... هذي هي الثورة الحقيقية في تونس ... ثورة العقول والرصانة ..

إياه ... غصة وتنحات من على قلبي 
abuiyad

4 تعاليق:

Primavera يقول...

Tu as dit tout haut ce que je pensais tout bas, merci !

HaRhOuR يقول...

ya3tik essa7a

Venus يقول...

et la prochaine note serait pour ?????

كاليمارو يقول...

مرحبا بكم ، سامحونا على التأخير ...
شكراً على تعليقاتكم شي يشرفني :)

فانوس : أهيا جاتك إلي من بعد :)

إرسال تعليق

أعطي رايك