الاثنين، 29 نوفمبر، 2010

مساواة وذني ...

اليوم بديت نكتب في تدوينة ما عندها حتى علاقة بهاذي ... أنا هكاكة وقلت نعمل طلة علفيسبوك ونطيح بأرتكل ... قلت برى نقراه ومن بعد نكمل التدوينة ... كل ما نقرا كل ماتتحيرلي المواجع حتى وليت قلت نكتب هلكلمتين هاذم إلي هما أهم في نظري ملي كنت نكتب فيه ...

تفاديا للمشاكل مانيش باش نحط الأرتيكل ...

قبل ما نكتب السطور القليلة هذي فكرت برشة على خاطر احنا في تونس فيسع ما نلصقو تيكات للعباد ... كل واحد نصنفوه في صنف خاص ... ولكن إلي نشوف ونسمع فيه ليوم ينطق ملأجناب ... وتذكرت زاده إلي المدونة ماهياش مكان تبندير ومناشدة ... وماهياش مكان نميحو فيه مع الأرياح ... ونرضيو فيه العامة والطامة ...

هنا بصراحة بش نحكي بقلبي وطرف الإيمان إلي مازال ينبض في عروقي ... إيمان بأنو التونسي مازال ما باعش روحو من أجل 4 دينارات يدخرهم في بنك الزيتونة فماش ما يطمئن قلبو ...

أية مغير ما نطول ... موضوع اليوم حاسس شوية على خاطر من أكثر المواضيع إلي تهاجم في الإسلام ... الميراث ...

كل ما نحل التلفزة أو الفيسبوك ونتفرج في فيديو تمت بصلة ببلد البنفسج يوجعني قلبي ... حكايات تافهة وريق بارد نهار وطولو يعاودولنا فيه في الأربعة قنوات البنفسجية إلي كسبناها ... كرة ، بكارة ، مساواة بين الراجل والمرأة ... والميراث في قالب المساواة بين الجنسين (ولو انو في تونس ولاو 3 ... اش علينا ) ... يقول القايل معقول المرة ترث الشطر علاش لا ما توليش كيفها كيف الراجل (شوية أخر نوليو نستوردو نساء من أفريقيا يحبلو في بلاست نسائنا باش نطبقو المساواة) ...

أول حاجة نحب نقولها وقلتها برشة مرات قبل :ما قعدلنا كان هل حكاية ونوليو مطورين ؟ يحكيولك على التطور تقول كان جات في ميراث تو نعطيه لأختي بكل الميراث فماش ما تصب علينا أمطار التطور ... ونوليو عالم متقدم اناهزو أمريكا في التكنولوجيا متاعها (بذكر أمريكا ... ملة ضحكة الوكليكس ... طلعو مسخفهم حالنا و حايرين فينا من كثر "هزاننا للقفة" باش ما نقولش حاجة أخرى توفى بالنا حتى هي) ..

يا سيدي اليوم رجال ونساء يعيطو وكشاكشعهم طالعة فالصندوق السحري على حق المرأة في شطر الإرث وتعديل نص القرأن وتفسيرو بما يطابق الأهواء عفواً التطور والتحضر ووو ...

أما بربي أشنوا ألي حرق شعيركم عالمرا ؟؟

صحيح المرأة ولات تخدم وتكدح (هذا كان لقات خدمة ساعة وزيد أنها الأغلبية تخدم بمبدأ "مكره أخاك لا بطل") ... صحيح زادة انو المرأة التونسية متثقفة وقارية ... ولكنها قبل ما تفكر في إرث ... تفكر في راجل يهنيها ويحميها ويحبها ... تفكر في دار مليئة بالدفء العائلي وتحب تشوف صغارها يقراو وينجحو ومن بعد يخدمو موش يتشردو بين القهوة والقهوة وبين الستاد والستاد الأخر والحاكم يكسرلو في فومو وين يحلو وفالأخر يركب البابور ويشق البحور ويعيط يا حبيبة تشاو ...

علاش ما نوجهوش كلامنا للراجل ونقوللو كون راجل بمواقفك مع النساء إلي تحيط بيك ؟؟ علاش ما نعلموهمش حب المرأة واحترامها ؟؟ حبها وتقديرها موش على خاطر الوالد متاعها الله يذكرو بالخير خلالها تركة باهية أو على خاطر عندها bac + 15 وفي اخر الشهر تجيب دزة ...

علاش قبل ما اناقشو ايات الميراث فالقرأن ... ما نذكروش انو الرسول صلى الله عليه وسلم كان يحب المرأة ويحطها في عينيه ...

وفوق هذا الكل السيد أو الأنسة إلي تجي فالتلفزة وتحكي على الميراث والعدل وطار وبندير ... و عازز بهم حال المرأة في تونس ... ياخي تحب أمي أكثر مني ؟؟ تحب أختي أكثر مني ؟؟ تحب مرتي أكثر مني ؟؟ أو بنتي ؟؟
إنت باش تتحير أو تتقلق كي بنتي مستقبلها يضيع على خاطر ميراثها بالشطر مع خوها ؟؟

و فوق ملكل بربي اش مازال ما يتورث في تونس ؟؟ تي هاو ملكو كل شيء والشعب قعد علحديدة ...

غريب أمرك يا بلاد البنفسج ... ما يتكلم فيك كان المرتزق أو التافه ...

وبرى ورثة المرأة الشطر تسميوها مساواة ؟؟ الراجل يخلص النفقة ... الراجل يخلص المهر ... الراجل ما عندوش جمعية "ني أومو ني سومي" إدافعلو على طرف هوى مازال يتنفسو ... وبعد تقلي مساواة ؟؟

وساويو بين الجهات قبل ما تساويو بين الجنسين ...

والسلام
إقرأ المزيد... Résuméabuiyad

الأحد، 28 نوفمبر، 2010

الأحد الموسيقي 2

بعد أم كلثوم في ألف ليلة وليلة الأحد إلي فات ... اليوم نحب نهدي الأغنية هذي لكل من يعشق الوقت الجميل والكو دو فيل بعد نصف الليل ؛)

نخليكم مع وردة في بتونس بيك ... متأسف على الأغنية إلي في زوز أجزاء ما لقيتش وقت باش نعمللهم ميكساج (هذا أجمل أداء لقيتو للأغنية هذي ... تفرجو فالدقيقة 3 و-46 ثانية مالجزء الثاني تو تفهمو كل شيء ههههه) 






إقرأ المزيد... Résuméabuiyad

السبت، 27 نوفمبر، 2010

بالأمن والأمان ... يموت هنا الإنسان

خبير جديد عالطايرمن بلاد البنفسج ... بلاد الأمن والأمان ... بلاد الإطمئنان وريحة الزعفران 

أية سيدي سرقتو ... قلنا عادي ويصير عالرجال 
خطفتو الصغار ... بكينا فالتلفزة ورجعتو الأمانات إلى اماليها
أما وصلنا للقتل في واضحة النهار ؟؟

ضاهرة العنف والسرقة و حاليا القتل (اش مازال ؟؟) ماشية وتتفشى في مجتمع ضاعت فيه الأخلاق...وماتت فيه القلوب

كم أصبحت روحك رخيصة أيها البنفسجي ... كم أصبحت تاكل الصطاكة وفمك مسكر يا حامل البندير  



وعلى قد ما باش تتواصل الفجوة الاجتماعية إلي قاعدة تتخلق في بلادنا (ناس تعبي وناس تولد وما لقاتش كيفاش تربي) على قد ما باش تكثر الحكايات إلي كيف هذه ... 

 بصراحة الوضع أصبح خطير ... الواحد معادش عارف كي يخرج الصباح يروح لباس أو راكب نعشو ... نطلب بكوني مواطن نغير على بلادي من السلطات المعنية تتلهالنا مليح بالحكاية هذي ... هذا ما يشرفش تونس !!

والسلام  



 
إقرأ المزيد... Résuméabuiyad

الجمعة، 26 نوفمبر، 2010

تي ثيب الأخضر

كنت نحوس عند صديقنا EL-FAN (أكهو قالي مدونتك الثانية وليت ندخل مغير ما نشاور) ولقيت تدوينة تحكي على حملة "سيب الأخضر " مانيش بش نعاود الكلام إلي تقال فالتدوينة هذيك ...

كي دخلت عالصفحة الخاصة بالحملة (نشكر إلي قايمين بها) على الفيسبوك لفتت نظري حالة مواطن ... انسان تونسي من لحمنا ودمنا ... وصل إلى حالة تبكي دما ... (فيديوهنا وهنا


نحب نحكي كلمتين مانيش مطول على المواطن "عبد اللطيف بوحجيلة" ... قبل كل شيء نحب نحيه تحية خاصة على صموده ورجوليته ...  وبصراحة مانيش عارف الإحساس ألي يلزم نحس به تجاه ناس كيفو هو ألي تضحي ومستعدة تخلي أرواحها من أجل أن احنا نعيشو عيشة طيبة كريمة ... هل أن التقديريكفي ؟ ما نتصورش ... 

السيد عبد اللطيف بوحجيلة مضرب عن الطعام منذ أكثر من 43 يوم وهذا مطالبة منو السلطات التونسية أنها تعطيه جواز السفر باش يمشي يداوي ... يا رسول الله يحب يمشي يداوي ما عندوش الحق ؟؟ روح التونسي رخصة لهاته الدرجة ؟؟ وانسان في حالة كي هذي اش فيه ما يتحاصر؟؟

أنا بصراحة ما لقيت ما نقول .. شيء يحمم القلب ... أهوكا عندكم الفيدوات ولكم التعليق ..


بنفسجيست حر
إقرأ المزيد... Résuméabuiyad

الخميس، 25 نوفمبر، 2010

علاش الكرة وموش الشأن العام ؟

كيف ما تعرفو الكل وقاعدين تشوفو ... الكورة ولات في كل بلاصة في البنفسج كونتري
تحل البنفسجية تيفي كان موش يحكيو علكورة تلقاهم عندهم ما يقولوا لبعضهم برعاية الهندي للإنتاج والتسمسير ... كان لاهذا لاذاك راهي أخبار ال-8 تحكي على الإنجازات الرائدة متاع ألسنة الدولية للشباب ...
أما علاش  الكلام على الكورة أصبح أحسن من الكلام في الشأن العام ... والتشجيع والكتابة فالكورة خير وأنفع من التطويروالحديت في الشأن العام ؟ ...وعلاش الناس ما عندها حتى فكرة على شكون يسير فالبلاد وشكون لاهي بالشأن العام ولكن بقدرتهم أنهم يعطوك المسيرة الرياضية الكاملة متاع ملاعبي من الملاعبية (بغض النظر على مستواهم الكروي القصديري) ؟... علاش اليوم الكرة هي الموضوع الوحيد إلي تنجم تتلم فيه مجموعة مغير ما يجي البوليس ويفرقهم ؟ علاش في البرامج التلفزية الكروية نحكيو بصراحة وبالمكشوف (ولو أن كي تولي برشة صراحة تخرج الورقة الحمرة ... حمد المغيربي في الأحد الرياضي) ؟ علاش الكرة الحاجة الوحيدة في تونس ما نقولوش فيها اخطا راسي واضرب وبوس الكلب من فومو ووو-...


علاش اليوم ألي يهتم بالشأن العام يلقى روحو وحدو أو هي شرذمة تصيح وتعيط وحتى واحد لا يعبرهم ؟؟ علاش اليوم كي يجي رئيس نادي جديد الجمهور يعبر على فرحتو أو تشأمو وفي وقت يتبدل أي مسؤول أو صانع قرار ما يتلفتلو حتى حد ؟؟


وكأن أخر همومنا هي البطالة وحقوق الإنسان وأموال الشعب والمستوى التعليمي إلي حشاكم كيف بول الجمل ماشي ويوخر ... وكأنو ملاعبية الكرة هي إلي بش تعطينا نخدمو وتوفرلنا كل ما نحتاجو من أجل حياة طيبة ...


بالجهل والامبالاة هذي اصبحنا كرة ... يكورو بنا كيف ما يحبو ووقت الكرة تدور ويسخن اللعب ونحاولو ندافعو على حظوظنا ... يلتجئو للعنف وإهانة المنافس... حتى انو جمهورنا بدا يعتقد أنا فريق تاعب وما جابش منو ربي ... ولكن ألي مش عارفو الجمهور هو انو يلزم يطالب بتغير الحكم ... يلزم حكم عادل يقصي اللاعبين إلي ما يلتزموش بقواعد اللعبة ...


تبديل الحكم ممكن أما بعمرو ما كان انسان أو ثنين يبدلوه انما فريق كامل بجمهرو ... ذاك الجمهور الذي يؤمن بإمكانياته والذي يطالب ويبكي من ضلم الحكم فالتلفاز ...


بنفسجيست حر 
إقرأ المزيد... Résuméabuiyad

الأربعاء، 24 نوفمبر، 2010

أسبوعي الأول من حل بلوغ

الاسبوع الأول كمل والحمدلله رب العالمين ... 
كيف ما قلت في أول تدوينة عندي برشة نحب نكتب لكن مانيش لاقي الجرأة الكافية باش نبدى المسار .. الحملة متع حل بلوغ نشوفها جات في وقتها وهاني وليت تقريبا نكتب كل يوم ... 
الحاجة الاخرى علي عجبتني هي تفاعل التوانسة وحمدلله كان موجود ... والبلوغ سفر التونسية تحركت شوية ... 


التدوينات الأولى كانت نوعاً ما لجس النبض الجماهيري ... زعمة ألي نكتب فيه باش يلقى إقبال ؟ زعمة نقد روحي و وسط الحملة هذي وانجم نلقى بلاصة ؟؟ زعمة نعمل بمبدئ خلف تعرف أو نكون طبيعي ؟؟ 
برشة اسئلة طرحتهم لروحي في كل بداية تدوينة ... من بعد قررت أن نحكي بلاش قيود ... قررت باش نحكي وكأني وحدي مع إحترام الناس الكل ... قررت أن ما نعملش خط نتبعو فالمدونة انما باش نكتب إلي خطرلي في بالي وقت إلي نشد لوحة المفاتيح ... 

أول مرة شفت تعليق فرحت وكأني شنوا ريت ... تحس أنك فما شكون قرالك ... وأنك عندك كلمة تقولها ويسمعولها فالبلوغ سفير ... وهذا إحساس ما يتوسفش ... إحساس بن فرحة وشموخ وإعتزاز ... نفس الاحساس وقت تاخو جائزة في أخر ألسنة الدراسية وقت كنت فالمكتب ...

ثم المرحلة الثانية بديت ندور على برشة مدونات وإلي تعجبني ننخرط بها ... بديت ندخل في هذا العالم "الخيالي" لكن تدير فيه ناس "حقيقين " عايشين معايا وربما نشوفهم كل صباح كي نمشي نشري الخبز أو فالعشية كي نروح ملخدمة ...بديت نحب نعمل أصدقاء جدد ... أصدقاء عندهم رونق خاص على خاطر إلي جمع بني وبينهم هي فكرة أو coup de foudre للمدونة متاعو...و بديت نحب ندخل في حوارات ونعطي رأيي ... لكن مازلت نحس في روحي "غشير صغير " موش نقص ثقة في روحي لكن توقير للقدماء متع التدوين ... وإحترام لهم وللحملة ألي قايمين بها !!

بذكر الحملة هاني قاعد نحاول في بعض الأصدقاء بش يحلو بلوغ ... ونشالله من حسن إلى أحسن ... والحمد لله رب العالمين لا أكثر ولا أقل !!


بنفسجيست حر  


إقرأ المزيد... Résuméabuiyad

الاثنين، 22 نوفمبر، 2010

رضينا بالهم والهم ما رضا بينا

بعمري ما فهمت علاش كلام ناس بكري يا إما تحس فيه نوع من التهكم أو من المعانات أو في أكثر الأحيان منافقة ...الحالة الأخيرة نرجعولها مرة أخرى إنشاء الله ... خلينا فالتهكم والمعانات ...
كي نسمع مثل من أمثال بكري نحس إلي كباراتنا كانو يتميزو بالكلوف والعوج ونفهم علاش اليوم كي تشد ساعتين صف فالبوسطة باش تخلص فاتورة الماء وكي يوصلك دورك يقولك لا تمشي للصف لاخر هنا نخلصو التليفون برك ...

لا علينا في هذا الكل المهم والأهم هو انو الكلام هذا فيه برشة حكم  ... قلك يا سيدي رضينا بالهم والهم ما رضا بينا !
ساعات نتسائل السيد ألي طلع بالمثل هذا شنية كانت حالته النفسية والعاطفية وقت إلي قال ها الكلمتين ... و في نفس الوقت نحاول نتخيل زعمة شنووة كان ينجم يقول لو كان جاء عايش معنا اليوم ...
زعمة لو كان جاء لسانو تحت رحمة عمار ... أو كي يدخل باش يقضي قضية مالإدرات متاعنا اليوم شنوا كان ينطق ؟؟

تذكرت هالمثل ليوم وأنا نتسرجع في أيمات الصيف ... 

في نهار سخانة فيه تنقب الراس 35 درجة مأوية أو أكثر مع العشرة متاع الصباح .... خرجت قاصد ربي للبلدية باش نطلع مضمون ولادة ... عندي يمكن 4 أو 5 فالدار ... أما في تونس المضمون عندو تاريخ صلحية ولتوى ما فهمتش علاش (بغض النظر عل 150 م إلي تخلصهم كل مرة ) ...
وصلت للبوسطة بكلني عرق على خاطر نهارتها ال 103 ما حبتش تخدم وكنت مزروب ... تدخل للبوسطة تقول دخلت لمطحنة (نحكي علمتحنة الحقيقية متاع الفاح متاع الكوجنة موش متع العباد ) من الروايح ألي تدور الخواطر  ... في ضرف دقيقتين معادش  نتحمل ... وألي زاد على همي هو المبرد الهوائي ما كانش يخدم ... مشيت للإستقبال وطلبت منو بكل لطف :

- سلام خويا ، بربي يمشي الكلمتسور ؟
- أي علاش ؟؟
- أمالا ... نسكرو الباب على خاطر البرودة الكلي خارجة وهك تشوف بكلنا عرق !! 
- لا أنا قتلك يمشي أما رهو مهوش يخدم ... أوامر ملفوق (هذي الكلمة ألي ما كانش يلزم يقولها ... الله غالب تقول سبني ... نحسها إهانة ... وكأنا احنا عبيد وفما شكون راكب علينا ملفوق) ما إنجمش نخدمو ! 
- منين ملفوق ؟؟ ياخي هما قاعدين في بيرو مبرد واحنا هكا نعومو ونغطسو فالعرق ؟؟
- خويا ما تلزنيش نطردك ... من فضلك إحترم ألفاظك !!!
- شعندي قتلك ؟؟ سبيتك ؟؟

وهكك جاء البوليسي ألي حاطينو فالباب ... ودزني فالصف بعنف وحذرني كان باش نزيد كلمة باش يهزني للمركز ... ما غير ما نخبي عليكم كنت حاجتي بالمضمون حاجة اكيدة وليت سكتت وقعدت نتمتم وحدي فالصف والشعب لكلو يغزرلي كيني جاي من دنيا أخرى ... لا علينا هي 40 دقيقة وجاني دوري :

- صباح الخير، جيت باش نطلع مضمون 
- ليك إنت أو لواحد أخر ؟؟
- ليا أنا هو إسمي وهاو تاريخ الولادة !!
- مقيد فالبلدية هذي ؟؟ خاطر كان بلدية أخرى ما نجموش نعملوه ...
- لا مقيد هوني وملي صغير نعمل مضموني فالبلدية هذي !
- لحظة هاني جاي 

قعدت نستنى 15 دقيقة السيد شفتو خرج مالباب متاع جماعة الإدارة يعمل في سيجارة ... زدت صبرت روحي ووسعت بالي وستنيت ... 

- أية هاني جيت 
- اه مرحبا :)
- إسمع أنا توا دخلت للبيرو ألي يعمل المضامين وقال ما عندوش حبر باش يطبع الورقة ... أرجع غدوة .
- تعرف خويا عندي ساعة ونصف وأنا واقف هوني علاش بربي هكا كنتو تنجمو تقولوا ألي المطبعة en panne وخلي العباد تشوف ملازمها الأخرى ...
- أنا خطني ... الفوق هما ألي يقرو 

وطلعتلي كلبة بنت الكلب وهزيت روحي وطلع نجري فالدروج نلوج على بيرو رئيس البلدية ... وندهم في واحد كان وقع بيناتنا سوء تفاهم على حكاية حبيت نعملها في دار الشباب وكان حتلي العصا فالعجلة ... 

- وين ماشي ؟؟ وين ماشي ؟؟
- فينو بيرو رئيس البلدية ؟؟
- ديمة في  مشاكلك ؟؟ شتحب عندو 
- فينو البيرو تو هو يقولك !!
- لا ما نقلكش وهاني باش نعيط للبوليس تو يوريك !!

 وهذاك ألي صار ... جاء البوليس ولوحني البرة وسمعت من عندهم كلام حلو برشة ... إلي خلاني اليوم فين نتذكرهم لا نخليلهم لا نبقيلهم ... هما وألي فوق منهم !!

وعدت إلى البيت مكرزا مقهورا ... و كي حكيت الأمي قالتلي "ارضينا بالهم و الهم مارضاش بينا" 

بنفسجيست حر 

إقرأ المزيد... Résuméabuiyad

أية زارتنا البركة ... الدربي نور

يا سيدي على سلامتك شرفتنا بحضورك واحنا مسرورين برؤية شخصك المتواضع في الملعب الأولمبي ب-7 نوفمبر (الفيديو هنا ) ... 

أية هاني أديت الواجب ورحبت بيه ... أما بصراحة مانيش باش نحكي عليه على خاطرو طفل صغير وما عندو حتى دخل بالقفة هذي ومانيش باش نحكي على بوه أو امو على خاطر ما عنديش علاش ( بو وأم بعثوا ولدهم يتفرج في ماتش وبحكم انو الدولار طالع من عام 87 خلسلو بلاصة فالمنصة الشرفية (بون ينجم زادة يكون خالو هدالو تذكرة هو والبمبنوات إلي معاه) ...

مانيش بش نحكي على رازي إلي كالعادة ما خلاش الفرصة تتعدى باش يوري مهاراتو في هزان القفة وضربان البندير وهذي ضاهرة بدات تركبلي فالسكر كل ما نتفرج فالبنفسجية 7 !! والحكاية ولات فيها رسالة متاع أمن وأمان وكأنو بقية المواطنين يبعثو ولادهم باش يحطمو ويكسروا ...حاجة اخرى حكالي عليها صديق مشى للملعب وقال ألي عمرو أقل من 18 سنة منع من الدخول ... ما نعرفش كان الحكاية عندها علاقة مع الرسالة متاع سيادة الحاكم أم أنها خاطية ... وفي حالة أنها اجراءت جديدة علاش سي السيد ألي نتصور مازل ما عملش 18 عام كان موجود ؟؟ ... 

الزاوية إلي نحب ناخو منها الحكاية هي فينك يا شعب ؟؟ حتى لوقتاش باش نقعدو نتفرجو وساكتين ؟؟  إلى متى تخلصوا معلوم التلفزة ولذاعة  باش تتفرجو فالخزعبلات هذي ؟؟ علاش مات الإحساس بالغيرة علبلاد ؟؟ علاش ولت التلفزة متاعنا ضحكة ؟؟ 

أنا ألي غايضني أكثر هو الطريقة كيفاش تقالت فالتلفزة ... عادي جدا ... نرحبو بولد الرئيس ... عملنا حاجة عيب ؟؟  الله أعلم شنية الأبعاد ألي ورى الحكاية هذي وعلاش قالوا عليه فالتلفزة ... وعلاش طفل صغير ؟؟ 

على كل ربي تلطف لا عويمين اخرين تسمع بواحد هزوه لدار الخالة على خاطر سب جمعية سيدي ...  




بنفسجيست حر 
إقرأ المزيد... Résuméabuiyad

الأحد، 21 نوفمبر، 2010

الأحد الموسيقي 1

نهار الأحد تاكل طريحة وما يراك حتى حد هكذا كانت تقلي أمي وأنا صغير ... ومن وقتها نهار الأحد أصبح يتميز عندي بقلة حركيتي وحبي للركشة خاصةً كي يبدا الطقس موش في فورمة ... 


هذاك علاش قررت باش إن شاء الله كل أحد  نخصص تدوينة لنقشة من نقاشات التاريخ الفني العربي (إلي يعتبر بوس الواوا ويا معلم نقشة مالمستحسن ما يضيعش وقتو هوني )


نبداو السلسلة هذي بأغنية ألف ليلة وليلة لكوكب الشرق أم كلثوم :


انجوي :)



إقرأ المزيد... Résuméabuiyad

السبت، 20 نوفمبر، 2010

العذارى في البنفسج كونتري



اليوم فين تقبل فالانترنت تلقى حكاية تمس من بعيد أو من قريب حكاية العذرية متع المرأة التونسية بصفة خاصة والعربية بصفة عامة .. 
كل واحد عندو فالسوق ما يذوق وكل واحد ونظرته للمسألة هذي ... رجال ونساء كبار وصغار عندهم أراء مختلفة وكل واحد وقناعتو .. فما شكون يطرح الحكايات من وجهة نظر دينية وأخر من مبدأ حرية المرأة وعلى الزوج المستقبلي تقبل الحكاية هذي وفما زادة شكون وصل أعلن انو ما يكونش فخور ببنتو لو كان ما فقدتش عذريتها قبل العرس...

أنا هنا مانيش بش نحكي علموضوع على خاطر نشوفو رويق بارد وموضوع ما عنديش علاش نحكي فيه  في مدونة أو في صحيفة في مسلسل أو في أي مكان أخر ... أنا نرى أن كل واحد عندو قناعته ... وأنها حكاية تخص الكوبل ...

ربما الحاجة الوحيدة إلي نحب نذكرها هي أن العذرية ما تخصش كان المرأة (والعذرية ماهيش مرتبطة بالغشاء انما بكل ما يتعلق بالممارسة ) ... 

أما حبيت نكتب على خاطر وليت ديمة نشوف صحفين وسينمائيين ومقدمي البرامج التلفزية والإذاعية تحصر مشاكل التونسي في ما بين فخذي إمرأة أو في كورة يتجاراو وراها 22 واحد (هو كي تجي تشوف فما نوع من مساواة بن الرجل والمرأة ... الكورة لسيدي والحب لست الجمال )... هل حكايات هذي تجعلني نحس بإحباط و خيبة أمل ناتجين عن الثقة المفرطة إلي كنت حاطتها في ناس كنت نعتبر أنهم عندهم شوية همة وعزة نفس وشوية منهجية في إنتقاء المواضيع إلي يطرحوها ... ويبدولي أني كنت ناسي إلي باش تمد وجهك فالصندوق البنفسجي يلزمك تكون بنفسجي حتى للنخاع وتتنفس بنفسجي وترى انو كل شيء بخير في تونس وقعدتلنا كان هل زوز حكايات باش نطورو ... مع بطبيعة الحال هاك المشاكل إلي تطرقلهم هندي برود واللي ما تستحقش نجبد عليها مرة أخرى فالبلوغ متاعي لتفاهتها ...

في البنفسج كونتري ما نحكيوش عل بطالة ولا على مسألة ترفيع الشهرية و ما نجبدوش على الأوبئة إلي عالقة فالادارات من بيستونات ورشاوي و- الخدمة المبلفطة ... انما نحكيو على فلان إلي عندو ما يقول لفلانة بعد 10 سنين مالفراق المر قدام هل 10 ملاين تونسي ... ونحكيو عالحكم إلي حرم الفريق الفلاني من الفوز ... ونحكيو على نص المترو إلي في سروال فواز متع نسمة أما ما نحكيوش على الأحياء الفقيرة إلي الناس ماتت فيها بالجوع وما نحكيوش على الناس إلي يعديو 19 سنة في السجن السياسي بعاد على اولادهم ونساهم على خاطرهم طالبو بمجتمع أحسن ونظام دراسي صالح وادارات تخدم المواطن موش تشيحلو ريقو ...

يا أخي أنا فديت ... يزني ما تفرجت في لجراند جورنال متع كانال بلس وكل مرة نزيد غمة على قلبي ابدى من حرية التعبير ومن المواضيع إلي يتطرقولها والشخصيات ألي يجيبوها و  و  و ... وبعد تحل حنة البغل تيفي وتلقى واحد ميلي ما يتسماوش يقلك تونس في إزدهار ونشكرو ونبندرو وناشدو ... ... يزينا ميل تلحيس وأعملو خشمات بنفسجية بقدرها !!!

 والسلام

بنفسجيست حر 

إقرأ المزيد... Résuméabuiyad

الجمعة، 19 نوفمبر، 2010

أين البنفسج بيبول من حملة حل بلوغ ؟؟

قبل ما ندخل في صلب الموضوع نحب نعمل مقدمة صغيرة بش نحكي فيها شوية على روحي (مش بش نحكي شنوا نلبس ولا قداش من طفلة طيحت ههه) :

نحب نقول إلي أنا مانيش سياسي متمرس ولا عالم في علم الإجتماع ولا عندي أي صلة بعيدة وإلا قريبة بالحكايات الهذي الكل ..


أنا هنا بش نعطي رأيي ويمكن ساعات بش تطلعلي كلبة بنت الكلب ونبدى نهز ونصبت وحدي ... ولذا مذبية لو انو التعاليق ما تبداش تعاير فيا بقلة خبرتي فالحكايات إلي بش نطرقلها ... المهم حسب ما نرى هو أن نعطي وجهة نظر وكان غلط صلحوني !
أنا هنا لأني استجبت لنداء حل بلوغ واللي كان متوجه للتوانسة الكل نتصور ... ولذلك كان بش تدخل فيها شتمان وعيات وصياح يا أخي وقتها الركشة قدام ماتش كورة فالقهوة أهون !! نحب نشير إلى أني كنت دونت قبل 2007-2008 وسكرت البلوغ ملحكيات هذي ...
نتمنى نكون واضح ومرحبا بالناس الكل :)

اخترت في بلوغي نحكي بالدارجة التونسية على خاطرها لغة الشعب أو ما سوف اسميه البنفسج بيوبل  ... الشعب إلي أكثرية متاعو اليوم ما عندها حتى أدنى فكرة علي قاعدين نكتبو فيه ...وما يخفاش عليكم أنا إيماني قوي بأن ما نجمو نحررو تونس كان كيف نحرو الشعب من كل الأوبئة إلي هابطة عليه من كل حدب وصوب !!


قبل كل شي باش نحكي شوية علاش أنا التحقت بالحملة هذي ثم باش نطرق لما انتظر ملمبادرة هذي :

اليوم في تونس والحمدلله فما حركات بدات تعلى أصواتها وبدات تسغيلها وتسمعها أذان وتعطيها الفرصة بش تتكلم ... 
لكن  إلي يتلفت للمعارضة أو للاشخاص إلي قاعدة تتحرك هي في معضم الأحيان شلبوق حلايبي من عند رئيس المركز أو بأكثر جدية بعض القنوات التلفزية أو منظمة من المنظمات عالمية كيف منظمة حقوق الانسان... لكن الشعب وينو ؟؟ ... كيف ما يقولو ناس بكري عامل مولى الدار موش هوني !!
هنا يراودني سؤال ... أما بعد ؟؟ إلى متى عايشين فالأوهام ؟؟

سامحوني فالكلمة ... هنا فضحنا راوحنا وصحنا فالجزيرة وفي فرانس 24 وفي غيرها ... أشنوا ألي بش يفيدونا فيه ؟؟ القنوات هذي غايتها الإثارة وجلب المتفرجين ... ماهياش هي إلي باش تحررنا!!

يقول القايل باهي كيف المتفرج التونسي يحل الجزيرة ويلقى ولد بلادو يحكي على الواقع المر في تونس من حجب فالانترنت وتوريث وغيروا ... لكن الكلام هذا الكل يعرفوا المتفرج التونسي على خاطر إلي يتفرجوا على الفيديوهات متع المعارضة أو غيرها فالفسبوك هما نفسهم إلي يتفرجوا فالقنوات والبرامج  ... وزد على هذا التونسي بصفة عامة كيف يسمع فلان أو فالتان يحكي يقلك السيد عايش البرة هذاك علاش متجرئ عل سيستم ... وهذاك إلي يفسر عدد المضايقات ولغتيلات إلي يقوم بها البوليس السياسي ولي ما داري بهم حتى حد ... ناس ماتت وناس تعذبت و أطفال تيتمت والشعب يتفرج في Stade 7 ... ما نحبش نطول فالحكايات هذي الناس الكل تعرفها وصراحةً توجعلي قلبي ...


إلي حبيت نقولوا هو أنو يلزمنا نتوجهو للبنفسج بيبل بأساليب أخرى ... أساليب توريه إلي فما ناس تتكلم فالبلاد وإلي الناس هذي ما تحكيش بمنطق اخطا راسي واضرب ... يلزموا يعرف إلي فما عباد قاعدة تضحي بطرف حرية إلي عندها من أجل حرية البنفسج كونتري ...

المبادرة متع حل بلوغ نرى أنها تجاوب إلى حد ما على " النظرية" متاعي  ... ونتمنى انو عدد كبير مل توانسة يحلو بلوغ ونحاولو مع بعضنا نبنيو حوار قادر يحررنا مالمأزق إلي احنا فيه ... ولكن  ما ننساوش انو في حلان البلوغ فما عمار قصاص الحلاوة ونتصور انو باش يتحفنا كيف مستانس بموهبتو المتميزة في الصنصرة... الحكاية هذي تو نرجعولها في وقت أخر ...


المشكلة اليوم فما عباد في تونس ما عندهاش غرام بلنترنت أو البلوغات أو حتى ما عندهاش انترنت جملة ... هل شعب الكريم هذا الكل ما تخسوش الحكايات إلي نطرقولها ؟؟ كيفاش باش نجبوهم للبلوغسفير ؟؟


أنا نتصور في مرحلة أولى يلزم حملة حل بلوغ تخرج للشارع ... على سبيل المثال إنجموا نطبعو des flyers متع حملة حل بلوغ ومثلاً نلوحوهم فالقهاوي فالمترو فالتكسي فالحكك الليلية وإلا حتى في باب زرقون ... إنجموا نكتبو بالتباشير كلمة "حل بلوغ" فالطرقات متاعنا فوق السيارات علحيوط ... إنجموا زاده نطبعو البروفيل فايسبوك متاع الصفحة الخاصة بالحملة وكيف كيف نلوحو الأوراق في كل بلاصة من أجل جلب أكبر عدد ممكن مالبنفسج بيبل ...  كل واحد يحل بلوغ يحاول في قدر المستطاع يجيب زوز مدونين ويعرفنا بهم فالبلوغ متاعو ...


عندي كذلك اقتراح صغير : بش نشجعو التدوين النجمو نعملو Mini Blog Awards تختار أحسن بلوغ كل شهر ... ألإختيار يتم بطريقة التصويت في مدونة حل بلوغ مثلاً ...


 وفي خطوة ثانية وهي ما تقلش أهمية علولة هي كيفية إبقاء المدونين ... هنا حسب خبرتي القصيرة القديمة أخيب حاجة يعيشها مدون هي أنو يلقى البلوغسفير ماكلة بعضها ... الكلها تسب في بعضها وهو يصيح في وسطهم حتى واحد لاهو معبرو ... مذابينا لو كان القدم فالتدوين ياطروالحكاية من الناحية الأخلاقية وإلي ما يحترمش نفسو يتعاقب  ...إنجمو مثلاً نعملو دستور للتدوين يحترم الإختلافات المنهجية والسياسية والدينية ... 


هذي بعض الانتظارات الشخصية من الحملة هذي إلي نتمنلهة النجاح ...


بنفسجيست حر






إقرأ المزيد... Résuméabuiyad

الأربعاء، 17 نوفمبر، 2010

البلوغ وحليناه ... أما بعد ؟؟

إستجابة مني لنداء حل بلوغ ...
وبحكم إلي عندي مدة توا نخمم باش نبدا نكتب فالبلوغسفير التونسية ...

اليوم نفتتح البلوغ هذا ... اخترت في بداية المطاف إسم مستعار ويمكن يجي نهار ونرفع الستار ...
انشاء الله بركة يخطانا عمار ...

إقرأ المزيد... Résuméabuiyad