الأربعاء، 26 جانفي، 2011

"ديغاج" يا "ديغاج"


احنا التوانسة عندنا لهجة خاصة بينا و جميلة برشة و معبرة ... أما لتو ما فهمت علاش "ديغاج" ؟

عندنا مخزون متع كلمات في اللهجة متاعنا تفي بالغرض وزيادة ... إقلب وجهك ...تجبد ... أملص ... طير ... سيب صالح ...فك / أعتق/ سيب **** (عمر الفراغ بالكلمة إلي تحلى في عينيك) ... على كل مانيش لهنا بش نعدد الكلمات التونسية إلي تفيد أنا معاش نحبو نشوفو وجه فلان أو فلانة (موش عليك ... أما برى أقرا على روحك  :p ) أو حتى فلتان ...  أما التوانسة ركبتلهم على "ديغاج" ... هكة ، لصقو فيها ...كبشو غادي ... "تيبلنتاو" ...  قصة حب جديدة (أو قديمة شكون يعرف )... عزوزة وشدة بوليس ... مشتاق وذاق ...

علموهالو و وحلوا فيه ... يا ولدي يهديك ، يصلح رايك ... شوف كلمة أخرى ، لا، "ديغاج" ! 

تحل الفيسبوك تلقى ديغاج ، تخرج للشارع تسمع ديغاج ، مولى القهوة وقت بش يسكر يقلك ديغاج ، تي حتى من عزيزتي قلتلها راك توحشت راجلك الله يرحمو ... قالتلي ديغاج!

ناقص كان الوزغة كي تصدم عليها بشلاكة تقلك "ديغاج" !

ديغاج  في الصباح ، ديغاج مع نص النهار ، وديغاج فالليل ... أنا واحد مالناس مرضت ، إي نعم مرضت ... والحكومة عاملة مولى الدار في الزفة !


تي حتى انتي يا كاليمارو ....ديغاج...إي نعم ديغاج ... ديغاج وبلاش "باغاج" ... ديغاج وكول فرماج ... ديغاج يا بو عظيمة ... تشعل في النار ديمة ... ديغاج ما عجبك حتى حل ... تحب إطردهم الناس الكل ... ديغاج ، ديغاج ، ديغاج !


ديغاج طلعت في الكار ، ديغاج روحت للدار ، ديغاج قدام العطار ، ديغاج فوق "التروتوار"، ديغاج يا عمار ...

ديغاج ما بيناتنا ... ديغاج في عروساتنا... ديغاج فوق الخزانة ، ياكل في رمانة ... ديغاج تحت الكلتوسة ، يحصرفي قطوسة ... ديغاج يشري في يومية ، موش رشوة أما هدية ... ديغاج دبر منحة جامعية، يعيشلو "خلتو فوزية" ... ديغاج يطلع في السلوم، ما يهموا كان في اليوم ...ديغاج تحت الكرسي ... يتشحت في "سي المرسي" ... ديغاج قعد على كرسي ... ديغاج يخدم في البلاد ... ديغاج نسى العباد ... ديغاج تبع الفساد ... ديغاج عبا الجيوب ... ديغاج راجل محبوب ... 

ديغاج بابا وبوك ... ديغاج خويا وخوك ... ديغاج أنا وانتي ... ديغاج أمي وأمك ... ديغاج وسكر فمك ... ديغاج و ما تتلفتش وراك ... ديغاج مكبر راسك ... ديغاج وحل كراسك ... ديغاج يا جبان ... ديغاج يا حيوان ... ديغاج يا شلاكة ... ديغاج يا حكاكة ... ديغاج واقلب منظرك ... كرهتك وكرهت طلعتك ...


هذي عيطة ديغاج ... للي ما يعرفش الديغاج... ديغاج طلعتلو في راسو ... ستاحش
عرفوا وكراسوا ...  ديغاج يا ديغاج ...
إقرأ المزيد... Résuméabuiyad

الأحد، 23 جانفي، 2011

الحكومة الجديدة ... المرزوقي ، الشابي وحركة النهضة



صعيب بش تكتب وقت تبدى الأحداث سريعة ومتسارعة وصعيب تحليلها ، صعيب نلقى حتى الوقت باش تكتب ، تخاف لا يفوتك خبر هام ...على كل باش نحاول نكون منظم و خاصةً ما نطولش برشة :

في ما يخص هروب بن علي :

هنا باش نعاود نذكر الكلمة إلي قلتها في التدوينة هذي وهي أني لا أعتقد بأن الرئيس السابق خاف من الشعب وقال إلي الشعب غلبوا وهز حوايجو وهرب ... أنا متأكد أنه تم طرده من طرف جماعتو ... إلي هما توا شادين المناصب القيادية بصحبة الجيش ... وصلوه للمطار وعطاووه بوستين وقالولو "تشاو" ! 

حبيت نذكر النقطة هذي على خاطر برشة مازالو يحكيو على ال"ديغاج" التاريخي !

في الحكومة المؤقتة :

باهي الحكومة هذي كيف ما يخفى على حتى تونسي اليوم أنها تخدم في مخها وتستعمل في الأساليب الكل باش تغالط الرأي العام ... التلفزة إلي بدلت الإسم لكن المقص مازال موجود، عودة عمار على الإنترنت -بنسبة ضعيفة لكن موجود- ، وأخيراً محاولت تشويه صورة الاتحاد (إلي كان خرج من الحكومة هذي) ... 

الإتحاد إلي قاعد يقوم بخدمة هايلة ، مع بعض التحفض على قيادييه إلي سيرتهم ما كانتش ديمة نظيفة .

حاجة أخرى على أعضاء الحكومة (إلي اكثريتهم أياديهم ملطخة بالدم)، السادة الكرام طلعوا ما عندهمش همة وقدر ... يعني ما فهموش أرواحهم، ومش حابين يسيبو السلطة وقاعدين يدغفوا فينا ... يقول القايل تي هاو باش يمشيو بعد شهرين (أو ربما أكثر إن تم تنقيح الدستور) ... صحيح أما حتى بن علي مشى ووصى علينا كلابه ! 

مش كيف ؟  الشعب واعي ؟ ... الشعب واعي بالحكومة الزبالة ، واعي بالنظام إلي يلزموا يتبدل ، لكن الحاجة إلي ما تخفش علينا هي الثقافات السياسية الفقيرة إلي يتميز بها الشارع التونسي ... مانيش نلوم على الشارع انما هذي هي مخلفات النظام الدكتاتوري !  
يعني أنه لو تم إنتخاب وجوه جديدة وغير نظيفة فإن أكثر شرائح المجتمع لن تتحرك ... و الدليل إلي قاعد يصير الأن ... أكثرية الناس بردت ، تنبر على بن علي وليلى، وتقولك خلي الغنوشي يخدم ...

الغنوشي نظيف وحوكمته نظيفة ؟ يكفيهم أن يكونو شاهدين على قتل التوانسة وعدم تقديم استقالتهم (باش ما نقولش أن يثورو مع الشباب على النظام) ... يكفيهم أنهم مازالوا يكذبوا علينا في وسائل الإعلام حتى نتوجهو اليهم بأصبع الإتهام  ... ما ينجموش يثورو ؟ خايفين ؟ املا ما نحبش انسان خواف في رأس الحكومة الجديدة ! 

هنا نحب نعطي بعض الإقتراحات في صورة ما إذا باش نخليو الحكومة هذي :

- علاش ما يتمش تعيين مع كل وزير (وخاصةً الوزارات القيادية) مراقب ، أو وزير ثاني ، يتم إختياره من الوزرة إلي إستقالو سابقاً من النظام الفاسد بحكم فساده أو من العديد والعديد من الكفاءات التونسية المعروفة . ؟ وهذا ينجم يدل زادة على النوايا الحسنة للحكومة الجديدة الإنتقالية !

- الوزرة المساعدين هما إلي يقومو بتأطير الوزرة إلي باش يجيو بعد الإنتخابات ، باش الحكومة الجديدة تكون أبعد ما يمكن عن النظام الفاسد !

- أن تقام لجان التحقيق في أسرع وقت، حتى لا يفر أصحاب الشبهات و قبل أن يتم تدمير كل وثائق الإدانة !

- المشاركين في الحكومة هذي ما يشاركوش في الإنتخابات الجاية !     

عندي أفكار أخرى لكن هاذم الأهم إلى حد الأن.

لا ديمقراطية من غير "اسلاميين" : 

هنا باش نحكي على الحملات الكبيرة إلي تتوجه إلى "الإسلاميين" ... من تهم وفديوات إلي فيها "تشويه" لصورة حركة النهضة (لعبة بن علي عام 90 أما وقتها ما كانش موجود فايسبوك باش يكشف الأكاذيب هذي) وللأسف الشديد ناس عقلانيين مازالوا يصدقوا فيهم ... باهي قبل كل شيء باش نكونوا متفقين ، راني مانيش تابع حركة النهضة ومانيش معاها وانما أنا مع مشاركتها في الإنتخابات ومع منحها بعض الكراسي داخل البرلمان، يعني أنا مع تواجد جميع الأصناف السياسية إلي تمثل الشعب في الإنتخابات الجاية ! وذلك لعدة أسباب :

- سياسة الإقصاء هذي (وعدم الثقة في البرنامج النهضوي) هي طريق سريع إلى التشويش الشعبي وربما العودة إلى دكتاتورية بن علي (نذكر مثلاً جمعية النساء الديمقراطيات إلي كنت في التسعينات اعانة بن علي حتى يطيح بحركة النهضة ثم دار عليهم) !

- حركة النهضة عندها مشروع حضاري ("كونسرفاتيف" نوع ما) أما مهوش مشروع "العودة إلى الخلافة" و الكلام الفارغ الكل ... حركة النهضة ماهيش حركة التحرير التونسي !

- في أمريكا مثلاً ، هناك احزاب دينية وحتى الأحزاب إلي تنادي إلى الحروب الصليبية موجودة وتتكلم وكل شي لباس ... علاش احنا في تونس نحبو نكونوا مبدعين ؟

- المثال التركي والمغربي يبرهن على أن الأحزاب إلي كيف هذي ماهيش باش تعطل سير الديمقراطية !

- الناس إلي تساند في حركة النهضة ، شنوا باش نعملولهم ؟ نلوحوهم ؟ نطردهم من تونس ؟ نبلعوهم في الحبس ؟ يا أخي كفانا تمنييك وإلي عندو مشاكل شخصية مع الحركة مش لزم يصفها على حساب توانسة كيفو كيفهم !

- النقطة هذي ما كنتش باش نزيدها انما ما نجمش يلزمها تخرج : إلي يقولو الغنوشي ما يلزموش يرجع ، إرهابي ... يا سيدي هذاك تونسي وعندو ألحق في بلادو كيفك كيفو وماكش زايد عليه ساق أو راس ... وكان تحب تستقبلوه بال-"بكيني" هزلوا أمك وأختك ! وماهو ما عجبكش ؟ ما تصوتلوش ... ساهلة العملية !

الإساءة إلى المرزوقي :  

بطبيعة الحال ، باش تبدا "حرب الأعصاب" ويبدا كل واحد يحفر لخوه ... الفيديو إلي تدور في الفيسبوك وفيها منصف المرزوقي إلي يسيء إلى المسلمين ... بطبيعة الحال فيديو مغلوطة وفيها إساءة إلى السيد هذا والأغراض إلي وراء التشويه معروفة ... هنا نحب ندعوكم إلى قراءة التدوينة هذي في مدونة المتنوشة إلي عجبتني ! 

أحمد نجيب الشابي والدعوة إلى الهدوء: 

أحمد نجيب الشابي نحترمو برشة، انسان مناضل وما نجمش نشكك في وطنيته ...
أنا كيف برشة توانسة كي سمعت بيه طلع على الكرسي الوزاري (إلي يحب يخلقوا منذ مدة -اغراض شخصية ؟-) ... تنرفزت وقلت بعنا وباع دمائنا ... لكن كيف سمعتوا يحكي حاجة وحدة خلاتني "نبرد" تجاهو هو كي يحكي يبدو أنه واثق من نفسو ... هنا نقول نبرد تجاهو هو أما الفكرة متاعو مانيش مقتنع بها حتى طرف ... لسبب بسيط هذا إستخفاف لدماء التوانسة وحطان اليد في يد القتلة !

السيد عام 89 كان ساند بن علي ... واليوم يساند حكومته - تاريخ يعاود نفسه ؟- ...

حاجة أخرى العديد يحكيو على سياسة المراحل ! ما يلزمش ننساو أن سياسة المراحل سلاح ذو حدين ! سياسة المراحل تخدم مع الفرنسيس أما توانسة في بعضنا نقعد ننافقوا ؟؟ في حرب احنا باش نحكو على المراحل ؟   

على كل اتمنى أن أكون مخطئ في هذه النقطة !

خلاصة صغيرة :  

- لا للإقصاء ، نريد دولة تراعي الحريات وجميع شرائح المجتمع و تعطي الكلمة لكل الأحزاب من أقصى اليمين إلى أقصى اليسار ... والشعب هو إلي يختار !

- الضغط على الحكومة الحالية - وبعتبار أن الاطاحة بها أصبح صعيب نوع ما بحكم أن العديد من الناس تساند فيها وبردت تجاهها (مع أنه يمكن أن نتيح الفرصة إلى إنقلاب عسكري في صورة ما إذا غابت السلطة) - مع المطالبة بمراقبة كل وزير ... أو أبعد من هذا الوزراء الحاليين يلعبوا دور الوزراء المساعدين ! 

- بن علي ما خافش منا بل تم طرده من طرف جماعتو !

هذا رأيي الشخصي المتواضع ... والسلام 
إقرأ المزيد... Résuméabuiyad

السبت، 22 جانفي، 2011

وداعاً يا بنفسج

البنفسجي اليوم نودعوك ...في كل بلاصة زرعوك
حبوك تكون لون مبارك ... اليوم هاو جا نهارك
من شوارعنا نفسخوك ... وفي تاريخنا نتذكروك
يا بنفسجي العيب مش فيك ... أما فلي غناو عليك
اليوم أنا زادة بش نخونك ... معادش نحمل لونك
ما تغزرليش هكى ما تلومنيش ...
شوف إلي خدموك سنين ... وباعوك في رمشة عين 
أنا ربيت عليك الكبدة وحبيتك ... ستنيتهم يقلعوك و من بعد نسيتك 
اليوم نبدى حياة جديدة ومستقبل جديد ... نلبس لبسة جديدة ، لبسة العيد 
نلبس سروال باللية وبلغة وشاشية ...و في يدي عود قرنفل و  ورقة طرنجية 
نلبس بالأبيض ، لون السلام ... لون الحرية ، لون الأحلام 
بنفسجيست حر حتى هو مات ... اليوم يبدى حياة جديدة وينسى إلي فات 
وداعاً يا عمار ... وداعاً يا صنصار
وداعاً يا بنفسجي يا حر ...  



إقرأ المزيد... Résuméabuiyad

الأربعاء، 19 جانفي، 2011

قلبي في بلادي

والله يا ناس ... تعبا الكأس ...ديمة نقول لباس
واليوم هاني ندادي...نحب نرجع لبلادي
بالحريات نحب انادي... نخرج مع أندادي
بالزلاط ندافع على ممتلكاتي ... عيلتي وفليساتي
نحب نشم ريحة الحرية ... ريحة الياسمين والطرنجية 
نحب نبات متهني ... على دارنا وكل من يقرب مني 
نحب نلعب فالحومة ... مع الناس إلي كانت مظلومة 
نحب نشوفك يا مدينتي ... نتذكر الماضي و طفولتي
أيام كنت فيك صغير ... نلعب كيف الطير 
نعوم في بحرك ... نجري فوق رملك 
نشري كسكروتاتك ... ونسهر في كيساتك 
ناكل كسكسي ومرقة ... ونمشي لسوسة ولطبرقة 
نركب على الموبيلات ... ونسترجع ذكريات 
مشات وفنات ... كيف ما تعدات الحياة ... وضاعو أيمات 
نتذكر واحد جلاد ... كان يحكم البلاد 
كرهوه العباد ... مسكر النات 
فاهم المواطنين والمواطنات ... هرب ما لقاش وين يبات 
نحب نلعب بيس وزربوط ... ونعدي سهريات تحت الحيوط 
نهز عينيا الفوق ... ونعيط من غير بوق 

محلاك يا حرية

زينك يا تجمع هرب ... قعدو فيك قطاطس الخرب 
الجوع والطمع ماكلهم ... والشعب ما حاملهم 
شفناك يا تجمع باستمرار ... ملي طيحتو الإستعمار 
اليوم قهرتونا وذبحتونا،عملتو العار ... حتى من الانترنات منعتونا، انتم وعمار 
حبينا يا ناس نفهموكم ... أما اليوم لازم نخرجوكم
يزي ما خدمتو تونس، بلادنا ... اليوم يبني محمد ويونس، مستقبل اولادنا 
خليني نحكي للزين ... قلو يحل هاك الوذنين
أنا الإرهابي المخرب... خرجتك وخليتك تتهرب
 برى عند ال السعود... أما نجيبك قبل ما ياكلك الدود
في حقي ومالي ماني مسلم... ما تنساش إلي انا متعلم 
تعلمت نقرا كذبك ونفاقك... وكي نحكي نكشفلك أوراقك
اه يا تونس من حبك نطقتيني... ومعاش قادر نغمض عيني
 نحب نشوفك لابسة الحرية ... سامحني وأرضى عليا 

تو يا بلادي ينقص فيك اللعب ... وتحكم فيك إرادة الشعب
ما تخافوش يا شباب ... الراجل ما يخافش من الكلاب
لما نوريوهم العذاب ... ويتنحى الإرهاب
وترجع الخدمة و القراية ... ونقولوا كيف الغناية 

أنا بتنفس حرية

هذي صرخة متغرب ... من بلادو يحب يتقرب
صرخة قلب حزين ... معادش يغمض العين
بلادو شمت الحرية ... وتقولو شبيك بعيد علي
أرجع وواسيني بضحكتك ... واحكيلي جرحك ومحنتك  




إقرأ المزيد... Résuméabuiyad

الاثنين، 17 جانفي، 2011

الثورة متواصلة يا توانسة

منذ فرار الجنرال بن علي ... جلاد الشعب ... قاهر العباد ... الناس الكل صاحة النصر وفرحت وبكات من الفرحة والغصة إلي تنحات من قلوبنا ... أنا زادة بكيت وصحت ... ومن كثر الفرحة معادش نخمم ندون ... حسيت يديا من الفرحة عجزت عن الكتابة وعقلي من كثر ما كان الخبر سار كاد يطير ... 

المهم توا انتصرنا على الدكتاتور ومازالت الدكتاتورية ...  كيف قال منصف المرزوقي 

اليوم نحب نعطي وجهة نظر متاعي في ما يصير في البلاد ... التخريب القتل ... هناك من يتحدث عن سياسة الأرض المحروقة (التي بالمناسبة لم ينفيها الغنوشي في حواره مع الجزيرة) ... هناك من يتحدث عن تخويف للشعب ومحاولات من بقايا النظام إلى تنظيم صفوفه و إقتلاع منا ثورتنا ... 

الحاجة إلي متفقين عليها الناس الكل ... أن هناك أطراف مشبوهة (تجمعيين سابقين إلي على الضاهر قلبو الفيستة أو إختفاو من الواجهة ولكن مازالو ما يحبوش يسلمو في المناصب متاعهم ويبثوا في السموم متاعهم في وسائل الاتصال كيف التلفزة والفايسبوك -سلاح الثورة الأول-) ... قلت أن الأطراف هذي تبث في الرعب وتراقب فينا وتهز في القفة إلى أعرافها من السفاح القلال وغيره من سراق !

لا علينا مانيش بش نعاود كلام الفيسبوك الكل هنا ... إلي نحب نقول هو أن حسب ما نرى أن البلبلة إلي في صفوف المواطنين والشك هذا الكل لا يتم القضاء عليه إلا بعد القضاء على التجمع (ولو أن هذا أمر يؤسفني لأنه تاريخيا هو إلي قضى على الاستعمار) ... 
أنا نشوفها هي أولوية ... لا القضاء على المخربين ولا غيره ... القضاء على التجمع قبل كل شيء ... لأن ما دام التجمع موجود فإن بن علي موجود ... روح بن علي العفنة موجودة ... والسراق إلي ساعدوه وخباو عليه موجودين ...

أولوية القضاء على المخربين... هذا ما يتم ترويجه في التلفزة إلي مازالت تحت قيادة "سمير العبيدي" الرجل المستحيل ...

 أنا نتصور أنه لما كثر المتظاهرين وتعبا شارع الحبيب بو رقيبة وتعالت أصوات التوانسة بالجملة التاريخية "خبز وماء وبن علي لا" ... التجمعيين حسو أرواحهم وخاصةً مصالحهم ومناصبهم في خطر فضغطو على "المعلم" حتى يفر من الغضب الشعبي ... ولكن النية هي هي ... 

النوايا السيئة للنظام كل يوم تزيد تبان ... بعد ما نحاو الأمن من البلاد (املا وينك الإنسان قبل ما يفكر في الماكلة ... يخمم في الأمن) والباين من الحوار مع الجزيرة أن الغنوشي لا يريد إعطاء حتى إجابة واضحة لأسئلة كانت جد مهمة وكان كل مرة يقول ما نعرفش (بهايم عندك ؟) ... المحاولة هذي الأولى كانت تحب تحسس التوانسة أن الخايب هو بن علي وأن البقية "ولاد حلال" ... 

في حوار البارح مع فرانس 24 (هنا) يقول "كنت لاهي بإقتصاد البلاد ولا علم بالتجاوزات إلي كانت تصير" ... ياخي الجماعة تسرق وتنهب وإنت ما حسيتش إلي الإقتصاد أمورو تاعبة ؟ حاجتين إما تعرف واتلف في الجرة ... وقتها إنت سارق ... أو ما تعرفش ... وقتها إنت بهيم ... ومذبيك تقلب منظرك !

بلغة أخرى السيد هذا قاعد يقول كيف ما قال بن علي "إي نعم غلطوني ... وسوف يحاسبون" ! (ماغير ما نعلق على حكاية أنه مازال بإتصال مع الدكتاتور)

حاجة أخرى في الفيديو هذي ... نشوفو البوليس قدام التجمع ... فاش يعمل غادي ؟ ... فينو البوليس قدام ممتلكات الشعب ؟ فينو في الحوم ؟ فينو قدام السبيطار إلي حرقوه ؟ أم أن ممتلكات التجمع أغلى من غيره من الممتلكات ؟

النية المسخة متع التجمع واضحة ... ولذا لا بد من كسره قبل كل شيء ... وما غير ما نتسألو إن كان الخبر إلي نسمعوه صحيح أو اشاعة ... لا بد من مواصلة الثورة ... ولا بد من الحذر من الذين سيشترون ثورتنا بمناصب سوف تمنح لهم ... أعتقد أن مع كسر التجمع بش يتنحاو المخربين وغيرهم من ارهابيين ... بالطبيعة يلزم في نفس الوقت نكثفو من اللجان الشعبية إلي تحمي المواطنين رفقة الجيش !     

هذا الوقت إلي يلزم نخدمو فيه مستقبل بلادنا وبدون إنتظار أو تخاذل ... هذا وقت إلي السلطة في "ضعف" ويلزم نصعد الضغط حتى ننال حريتنا التامة ... 

في الخلاصة نحب نقول أن حكومة "الوحدة" سوف تكون ك "التلفزة الوطنية" ... يعني وجوه جديدة وإسم جديد والصنعة هي هي ... مش تشام مني ولكن إيمان مني أن من يرضى أن يضع يده في ياد قتلة فهو منهم ! وبربي يزيونا من لغة إحترام الدستور !

والسلام 


إقرأ المزيد... Résuméabuiyad

الجمعة، 14 جانفي، 2011

لا يا بابا ... مازلت ما فهمتش

قلك فهمتكم ...

فهمتكم إلي يلزم نكذب عليكم بصراحة ... ونلعب فيها ضحية وكان لزم نبكي ونجيبلكم عيلتي الكل تبكي معايا !
كيف ما بكى عماد في الفيسبوك ...بكى هو !
مش غريب علينا ... شعبنا يحب البرامج من نوع "عندي ما نقلك " و"المسامح كريم" لذا يلزم يحكي بصراحة و يطلب السماح ويبكي ...
قلك 50 سنة نخدم في البلاد ... متفاهمين (ولو أن ثمارها لم تخرج من باطن الأرض) أما وقيت بابا بش تتكنس  ... بش تقلب وجهك ... وقيت بش نشوفو شكون يصلح البلاد ويرتح العباد ...

والله خاطني هما أشرار يكذبو عليا ... أنا نحبكم وجربو صدقوني تشوفو كيفاش نعفس فيكم ...
ماو تتفكروه خطاب 87 ؟ كيف كيف بالضبط بش نعاود نفس الحكاية أما المرة هذي في يدي 3 سنين باش ناكللكم قلوبكم ...
ماو تحبوا اليوتوب ؟ باهي ... هاو اليوتوب أما إدعيو ربي باش تلقاو الوقت ليه !
تحبو تاكلو ؟ من غدوة تهد على العطار تشري إلي يحلى في عينيك وتقيدو على حسابي ...
أنا عندي الحلول الكل ...
أنا الرجل المناسب في المكان المناسب (اييه ... يح باني يح باني...فوق الكرسي ما أحلاني) ...
وراس العزوزة مانيش مترشح ال-2014 ... أما عندي شكون باش يتولها بكم بعدي ...

قلك فهمتكم  ...
ملا يا رمز يا هم يا مغلاق ... والله ماك فاهم شي ... زيد ثبت عنكشي مازلو يكذبو عليك ؟
نحبوك تمشي ... لا وين تمشي ؟ ... نحبو نحاسبوك ! ماو قلت 50 سنة خدمة ... يعني ما عندك مناش تخاف ... عادي زوز اسئلة أو تلاثة ونعتيوك فيلا في المرسى تكمل فيها العامين إلي مزالولك (تي ملة وينك ما ريتش روحك كيفاش داخل بعضك البارح ؟)

قلك فهمتكم ...
50 سنة يخدم في تونس وما فهمش الديمقراطية ... وفي جمعتين فهم شعب كامل  ... يا خويا قداشو قوي ... بربي زيد ورينا إلي إنت قوي وتعمل هك وترتحنا من وجهك ...تراه اش قولك ؟  

قلك فهمتكم ...
الكرطوش معادش ... عشرة دقايق من بعد بوليسك مازال يصطاد فينا ...
قالو يا حوانتي باش تبيع ... قالو كل شي بالحاضر !

قلك فهمتكم ...
يا غالي يرحم والديك ... فينهم السجناء السياسيين شبيك ما حكيتش عليهم ؟
يطلعش ماشي في بالك الديمقراطية يعني تسيب الفيسبوك  و اليوتوب ؟؟

قلك فهمتكم ...
كان جيت تفهم راك فهمت جورج بوش كي قلك قدام العالم أجمع "يا ولدي أحشم على روحك" ...
كان جيت تفهم راك احترمت الأرواح إلي قتلتها ... وما تمنيكتش عليها ... قالو تلفزة حرة ... وهي فيسع ما حطت المزود والقوادة تتراقص بعد ما خرجو من الجحور العفنة إلي كانو مخبين فيها كشخهم ... الشوارع مازالت ريحتها بالدم وجماعة التجمع تصفق ... 
كان جيت تفهم راك قدمت استقالتك ... كرهناك بش تفهم ؟؟

أما زايد والله زايد ... الفهيم من غمزة ...

إقرأ المزيد... Résuméabuiyad

الثلاثاء، 11 جانفي، 2011

والله لا يحشمها

هو ملا شكون ... هذاك إلي البارح يبرر في الدم متع ابنائنا ... قلك مقر تجمع كسروه ... و بلدية دهمو عليها !
ما قلناش ومانيش قاعد نقول إلي التكسير باهي ... أما القتل ؟؟  نفترضو هوما غالطين ومتوحشين وهمجيين ... تقتلهم ؟؟

هو ما يحشمش على خاطر يسرق فينا ومازال يمد في منظرو في التلفزة يحب يركحنا بش يزيد يسرق ... قالك نعمل مواطن شغل ...ههههه ... يا ولدي باش تفهم ماناش مصدقينك ... ماعاش عنا فيك الثقة ... إنت تقتل فينا وأمهاتنا تزغرت ... ما فهمتش روحك ؟؟  

لا وإلي يزيد ينرفزك ... يجيك واحد من أطفال (كلمة شباب حرام فيهم -الشاب عندو مخ-) التجمع البنفسجي القصدوري ويقلك  "شبيكم تسميو فيهم شهداء ؟" ... بربي هذا إلي حرق شعيرك ؟؟ يعني عباد مخاخها خرجت بلكرتوش وإنت تتفلسف ؟؟ زايد ما يحشموش ... والله لا يحشموها ...

ولد الفار يطلع حفار ... سيدهم وزميمهم رقعة وما يحشمش ... مخيب راسو ... شايب مكمل مازال يسبغ في شعرو... ما يحشمش ... يا ولدي قلنالك فكنا ...طير ... إذهب ...تجبد ... أملص ... أعتقنا ... فش مزلت تخرف ؟ 

شدو علي أولادكم لا نقتلهم ؟؟ هذا مخك اش قلك بعد ثلاثة اسابيع من مواجهات ؟؟
شدو أولادكم راهم يلعبولهم بمخاخهم ؟؟ وإنت لعبت شوية بمخاخ العباد ؟
هاني باش نسكر المدارس ؟؟ بطبيعة تحبنا بهايم باش تعديها علينا إنت والمافيا متاعك ... تعيا إنت وتقبض يلي ما تحشمش !!

جماعة مهمش وطنيين وما يحبوش الخير لتونس ... ويستعملو في أطراف أجنبية ... الخير لتونس هو السرقة متع أموالنا ؟ الخير لتونس هو المثقفين إلي في الحبس ؟ الخير لتونس هو المحامين إلي ياكلو في العصا ؟ الخير لتونس هو أنا نموتو بالجوع ؟ الخير لتونس هو الصحافة بوفرنك ؟ الخير لتونس هو التلفزة البهيمة متاعك ؟ 

أنا إلي مبهتني كيفاش مازالو يبسطوا في الحكاية ... مازال يحكي على حالات شاذة ويحكي كان على الشغل ! يا ولدي الشغل أكهو ماشي في بالك ؟ 
قللنا معاش ننهب ... قللنا عمار باش نقيلو ... قللنا البوليس متاعي باش نربيه (أي على خاطرهم سقاط وشلايك من البريمة) ...قللنا التلفزة معاش تكذب عليكم ... بلغة أخرى أحكي معنا كراجل مسؤول واعتبرنا كناس تفهم ... وقتها شوف نسمعوك شوف لا ... على خاطرنا احرار !!

هو وجماعتو والبوليس ما يحشموش وإلي ناويين (والمجراب تهمزو مرافقو) يتاجرو بدمومات ابنائنا وجوهم بالكاغت الأحرش وسقاط أكثر منو ...


إقرأ المزيد... Résuméabuiyad

الخميس، 6 جانفي، 2011

توة انتم رجال ؟

توة انتم رجال ؟ تشدو مدون مسالم ... يحب على بلاد زينة ... ريحتها بنينة ... تخلص فيها مليح ... دولة تعاونك كيف اطيح ... عيلتك  متفرهدة ... من السرقة والنهبة والفدة ؟؟
توة انتم رجال ؟ تشدو ولاد بلادكم على كلمة حق ؟؟... يرى مصارنكم تتفلق ... يا وجوه اللوح ... حيوانات عايشة بلاش طموح ...  كان تدوير الحزام يا ولاد الحرام ... 
توة انتم رجال ؟ تتجسو على العباد ... ونسيتو أكبر فساد ... إلي سرقو البلاد ؟ توة انتم رجال ؟
توة انتم رجال ؟ تسمعو في أوامر ... الحاكم علينا وعليكم متأمر ... وما يهمو كان جيبو العامر ...
توة انتم رجال ؟ ما تقدمو كان بالمجموعة ... يا كمشة ضبوعة ... ما تعرفو كان ضربان الدف ... والكف ... والرشوة والحشوة ... يا خماج البلاد ... يا حماة الفساد ... يا ريوس اللحم  ... داهمين على ولد في يدو قلم ؟ 
توة انتم رجال ؟ كلوشارات تقود فيكم ... وتضربو في ناس قوية عليكم ... قوية عليكم بالعلم و بالنور ...و بالحبر ... يا كمشة جبور !
توة انتم رجال ؟ تضربو في كبار وصغار ... ونساء ورجال ضعاف الحال ... 
توة انتم رجال ؟ تشدو في محامين ... يا زبالة العابدين ... يراكم محروقين ... وسراولكم طايحين ...
توة انتم رجال ؟ تشدو في فنان ... غنى عليا وعليكم ...الله يعمي عينيكم
توة انتم رجال ؟ 

   
إقرأ المزيد... Résuméabuiyad

شهداء بالجملة

الوفاة متاعه وجنازتو سمعت بهم عندي مدة صغيرة ... لكن أحداث سيدي بوزيد والحرقة إلي في القلب خلاتني نتناسى "الشهيد" عز الدين القفصي ...

المرحوم القفصي كان من أول (بش ما نقولش هو الأول) الناس إلي تحصلو على شهادة الطيران في بنزرت ... قاري القانون وحارب الاستعمار ... ذنبو أنه شارك في إنقلاب ثنين وستين ... حكم عليه بالإعدام (وخوه الهادي اعدموه بنفس التهمة)  وهرب إلى الخارج إستقر في سويسرا و عاش ثمانية وأربعين سنة (إي نعم - نصف قرن) مغير ما يعتب البلاد إلي حارب من أجل أنا احنا نشطحو ونردحو فيها ... توفى يوم تسعطاش ديسمبر إلي تعدى وقعد قرابة جمعة بش الحكومة سرحت للجثمان متاعو أن يجتاز الحدود مغير أدنى  مساومة ... إلي كان رفضها الله يرحمو في عديد المرات ...   


اش فكرني فيه ؟ 
اييه ... نحكي مع صديق لي على سيدي بو زيد ونتناقشو في تصوراتنا لمستقبل الحركة الوطنية هذي ... عادة في خلاصة الحديث قلي "يا ولدي خوذها قاعدة احنا ماناش متع حرية ... وإلي يهز راسو يا يقصوهولو يا يندم عليها حياتو كاملة كيف عز الدين القفصي " وكأنو هذا لا يكفي زاد على مرمتي "تي كان جات الدنيا دنيا ... راهو اعدموه وما خلسنالش احنا المصاريف متاع الطيراة من جيوبنا ... اش عمل محسوب كيف هرب للخارج" ... 

ثاني "شهيد" في الفترة هذي ... هو محمد البوعزيزي ... إلي أعلن إنطلاق الحركة الوطنية إلي نعيشو فيها منذ تقريبا اسبوعين بعد ما أشعل في بدنو النار... توفي محمد وفي التلفزة البنفسجية حكاو عليه عشرة ثواني وبقية الحديث كان على المكاسب إلي عندنا في السبيطار وعلى اش سماه ربي إلي يواسي في أمه ... ولكم الفيديو :




زوز "شهداء" اخرين مانيش بش نطول هما زادة وفاتهم المنية في أحداث سيدي بوزيد ... الله يرحمهم جميع ...

فقط البارح وأنا سارح تسائلت هل أنهم هاذم فقط شهداء ؟ ألسنا نحن أيضاً "شهداء" ؟
شهداء على عصرنا ... شهداء الجبن ... شهداء القفة ... شهداء التلحيس ... شهداء التحقير ... شهداء التشليك  ... 

صحيح أن أحداث سيدي بو زيد لقات تجاوب أكبر من الرديف وبن قردان ... ولكن النتيجة هل ستكون مختلفة ؟؟ إي أكثر أموات في صفوف المواطنين ... أكثر مساجين أو معتقلين في صفوف المثقفين ... شنوا إلي بش يتبدل جديد في بلادنا بخلاف الخمسة متع الوزارة ... وبخلاف الناطق الرسمي بإسم الجمهورية ... شنوا إلي بش يتبدل جديد في حياتنا ... في مكاسبنا ؟ ... 

كان ما تبدل شيء ... مالة احنا زادة "شهداء" ... على خاطرنا أحياء أموات لا ننعم بالحياة ... لا نعرف الحرية ... شهداء على موت الشهداء ... 

للأسف... إلي قاعدين نشوفو فيه هو أن الحركات بدات تبرد ... وقريب ناكلو على ريوسنا بكل حزم ...

ملاحظة صغيرة : متأسف على الفيديو الأول ... لقيتو كان على اليوتوب (يلزم بروكسي نتصور) ...  إن شاء الله كيف نلقى وقت نهبطها على الفيسبوك في الصفحة متع المدونة ...
إقرأ المزيد... Résuméabuiyad

الثلاثاء، 4 جانفي، 2011

الصوابني في حوار مع أننيموس

le site pm.gov.tn attaqué 



كيف ما يعرف برشة "إنترنوت" توانسة "أننيموس" (مجموعة قراصنة على الانترنت -مجهولي ألهوية-) قامو بمهاجمة عدة مواقع حكومية بنفسجية (موقع الوكالات التونسية للأنترنت مثلاً ... إيييييه)... وثارة ثائرة الصوابني الكذاب وخاصةً وزير الاتصالات الجديد ... 
بعد جهد كبير دخل الصوابني على غرفة من غرف الأي أرسي  (غرف دردشة يستعملوها برشة مدمني الحاسوب) ونجم يتصل بأحد المتهمين بالهجوم العنيف هذا ... ودار بينهم الحوار التالي :

- أهلا سي الشباب 
- Hey M Souabni are you okay ؟ lol  
- تي شبيه يحكي بالانجليز هذا ؟؟ يا عمار براس العزوزة ايجة فسرلي ... 
- هههه ... يا ولدي باقي بوهالي وما تفهم شيء ... أنا التونسي إلي ركحت جماعة أننيموس بش هبطوا عليكم كالغيث النافع ...
- تتركك ؟؟ مهوش وقت لعب راهو ... كان إنت ما عندك ما تعمل خلي الناس تخدم على رواحها !!
- يا خويا قدشكم مسكانين وقدشكم سكبانين يا أبناء البنفسجية ... إنت وليت تحكي على الخدمة وقاصص شطر الانترنت ؟؟ واحنا نسيت خدمتنا إلي عطلتها بلصنصرة متاعك ؟
- تي اييه شبيكم ما تفهموش ... أمريكا أمريكا أمريكا 
- شبيها زادة ؟
- هي إلي تقص في المواقع !
- والديك مزلت تستبله فينا ؟ بربي فسرلي كيفاش اليوتوب يمشي في أمريكا وفي تونس لا ... ملة قصاصة حلاوة هذي أمريكا ... وهذي مش تعتبر استقواء بالأجنبي ؟؟ 
- وانا منين نعرف ... أية يزيو بلا ريق وأركحو ملتفورخ .. 
- هههه ... أمريكا مش احنا ... كلمناها حبينا نعاونوكم على الصنصرة ... كيف يوتيوب وبرشة صفحات فسبوكية تعطي صورة خايبة على تونس ...
- إيه كملي ... 
- حبيت نقلك إلي مواقعكم تمرض التونسي بالدم والسكر والقلب والكلاوي ... حبينا نحميو المواطنين متاعنا من الأمراض الخبيثة هذي الكل عافانا وعفاكم الله ...
- ووووه ... يزي بلا خرمك ... شبيني أنا ما مرضتش ؟
- إنت عندك مرض الأكابر ... فيه ألف بركة ...
- إنت بديت تنرفز فيا ... راني باش نعيط لعمار يصنصرك بكل حزم !!
- هههه ... هاني باش نضربلو "السرفار" متاعو وقلو يعرضلي في التوتير...

 وإذا بالصوابني يلقى روحو خرج من الصفحة إلي كان عليها وأصبحت 404 ...
-يا عمار إشبيك ؟؟
-تشري في الشبوك ومن بعد تقلي قص وتجي في راسي ... السبان والقرصنة وكلو يجي في راسي ... من توا نشوف وجهك على النت نلعج عليك ب-404 ...       
إقرأ المزيد... Résuméabuiyad

الاثنين، 3 جانفي، 2011

أخر خطاب لسيادته

قمت الصباح كيف العادة مدهشر وتاعب ... الخبزة صعيبة هالأيمات وكي تشد بلاصة  يلزمك تنضبط أكثر من اللازم وما تعرفش على البلاء ... يجي ولد سي فلان يطيروك وما يتلفتلك حتى حد ...

كيف كل صباح مشيت للكوجينة نلقى الوالدة مطيبة قهيوة ززوة تعمل ستة وستين كيف ... قبلتها من على جبينها وقعدت نسمع في الراديو ... كنت نسمع كل يوم للغناية متاع ماجدة الرومي "خلقت طليقاً" (شعر أبو القاسم إييييه) ونبدى سارح معاها حتى تنبهني الوالدة إلي الوقت جاء ويلزم نمشي ...

يومها على غير العادة برشة حركة في الراديو والأخبار تلو الأخبار والجماعة الكل تحكي على خطاب الرئيس مع الثمنية متاع الليل ... عادة قيدتها مليح خاصةً وأنهم أكدو على أهمية الخطاب ...

مع الثمانية قدام الصندوق السحري ... جات المقدمة متاع الأخبار تحكي ... طولة برشة الحقيقة حبت تلم أكثر عدد من المتفرجين وجاء الخطاب بعد طول إنتظار :


شعبي الكريم ... نعرف قداش انتم تعانيو من الفقر والبطالة ... نعرف قداش عملتو مطالب شغل وقروضات حتى تعملوا مشاريع وقعدتو بالعام والعامين أو أكثر وانتم تستناو و ما جوبناكمش أو قلنالكم لا بدون تبرير... نعرف إلي عيلتي سرقتكم برشة ونهبتكم وكرهتكم في حياتكم ... نعرف إلي أنا عبيت جيوبي من عرقكم ... نعرف إلي أنسابي سراق وإحتكرو إقتصاد البلاد ... نعرف إلي كان مش البوليس إلي في خدمتي راكم كليتوني من هاك العام ... نعرف إلي انتم شعب يقدر ويصبر وينسى ولكن اليوم خرجتو تعبرو على غضبكم وهذا حقكم ... اليوم فديتو وحرقتو أنفسكم ... وهذا أمر يؤلمني !

هذاك علاش أنا اليوم نحب أولاً نطلب السماح من شعبي لأني كثرت على ما وصاوني وهاز البلاد في هاوية وعزوز وما همها قرص ... نطلب السماح للعائلات إلي دمرتها والنساء إلي رملتها وللأطفال إلي يتمت ... نطلب السماح من القاري إلي يبيع الحمص والدكتور إلي في الحبس ... نطلب السماح من الحارق إلي غرق ... ومن الفقير إلي عايش بلكريدي والعطار والجزار والخضار يجريو وراه ... ومن الجهات إلي نسيتها وكبيتلها سعدها ... نطلب السماح من كل إنسان ضريتو من قريب أو من بعيد بسياستي الفاشلة ! 

نحب ثانيا نوعدكم انو جاء الوقت إلي تستعيدو فيه حرياتكم ... بدايةً من اليوم تشيخو في الانترنت كيف ما تحبو ... اليوم يكسر المقص ويرفع الحجاب عن الانترنت ... اليوم يطلق سراح الصحافيين والسياسين ولي في جراء حقوقهم مسجونين ... بش نخلي الأحزاب المعارضة تتكون من يسار إلى يمين مروراً بالدين ... كيف أمريكا ... اليوم حق المعرفة أصبح مصرح بيه ... فلا للكتب الممنوعة ولا للصحف والمجلات المحظورة ولا وألف لا للتلفزة البنفسجية ... معاش تعتيم ومعاش تجلطيم ... شعبي مهوش بهيم...

ثالثا ... الفقراء بش نعملولهم دار المال ... تؤخذ الأموال من الأغنياء وتعطى للفقراء ... المنح الجامعية باش نزيدو فيها ونبدلو في الدخل الأدنى للعايلة حتى يفرح أكبر عدد من الزواولة بالمنحة ...

رابعا ... البطالة باش نحاربها ... انقصو من شهريات الكوارجية والمدربين ... انقصو من المصاريف المخصة لبناء المساجد (علاش في كل حومة جامع ؟؟) انقص من مصاريف بناء الملاعب (كل ما نبنيو ستاد كل ما مستوى الكورة يطيح) ... انقص من مصاريف بناء الملاهي كالعلب الليلية وغيرو من أماكن ما يدخلهم كان إلي جيبو معبي ... الفلوس هذي الكل باش نبنيو بها مواطن شغل ... ونعملو منحة للباطل عن العمل حتى ينجم يصبر على البطالة وما يتلزش يسرق أو يحرق روحو ...

خامساً ...  باش نقدم استقالتي من اليوم على خاطر ...

في خامسا الصوت قص وبديت نشوف في تصويرة ماهيش واضحة ... شكيت أن عمار إدخل وقطع علينا الخامسة و قص علينا حلاوة الاستماع إلى خبر يفرح جميع البنفسجيين ... ولكن شوية و بدا يرجع الصوت وماشي ويقوى ...

- أية يعيش ولدي فيق ... معادش وقت على خدمتك ... 
إقرأ المزيد... Résuméabuiyad