السبت، 31 مارس 2012

الزوجة المثالية 3



بعد جمعة من ما أعلنت لأمي عن رغبتي في مقابلة البنية، خدمت هي الأكتاف متاعها ودبرتلي النومرو وموعد "تعارف" في دار الناس ..

الحقيقة وأني من الأول ما عجبتنيش الحكاية .. شنية نمشي لدارهم نقعد نحكي قدام بوها وأمها ؟ .. من بعد قلت ما فيها بأس، بعد ما وقفتها في الشارع، نورها إلي أنا جدي في التمشي متاعي وناوي على الخير .. كهو وجاء اليوم الموعود .. نهار يعمل ستة وستين كيف ، كلموني صحابي على تكويرة وقعدت نغزل كيفاش فلتتها وبديت إنغنغ على أمي :

- أهيكة من تو بدات تحرم فيا من زينة الحياة !
- يزي من المساطة ..
- هذي نقطة "نيغاتيف" في الحساب ، مش خاطر مزيانة بش ننبطحلها .. محسوب ما فما كان هي !
- باهي كي تمشي تحكي معها قوللها منك ليها 

سكرت فمي ومشيت نلبس في حوايجي، عادة وأنا قدام "الأرموار" ونفرت في الحوايج الكل :

- أمي ، نورمال نمشي بشورط ؟
- لا تلبس كوستيم !
- شنية كوستيم متاعك ؟ عرس بش يولي !

لبست سروال "بوزي"  وسورية ، وتوكلت على العالي 

وصلنا للدار، وقبل ما ندقو على الباب ، غزرتلي الوالدة تعمل في دورة وعكلة .. صاوب رقبة السورية، السروال ملوطا مبروم شوية حلو .. شبيك حطيت شوية "بارفان" ؟ 

وأنا نسمع وساكت، مخي في الطفلة كيفاش بش نلقاها .. وكيفاش بش تكون ووين بش توصل الحكاية .. 
يحل خوها الكبير الباب ، ويهزني ويهبطني بعينيه، وبعد ما رحب بالوالدة تبسملي تبسيمة صفراء :

- إنت صاحب قجر ؟ 
- إي .. تعرفوا 
- إي إي شنوة نعرفه ! .. و يتمتم في حوايجو "ملا سلعة جاي للدار

تبسمتلو، و لفت انتباهي امو و هي ترحب بالوالدة .. ويحكيو على أيمات كانوا يقعدو في نفس الطاولة في المكتب .. الحاصل بعد نصف ساعة قصف عنيف عليا وعلى حياتي واش عملت واش ما عملتش وشعندي واش ما عنديش .. تجي بدر البدور .. 

كانت في أحلى حلة، وأنا نشوف فيها ونصلي على النبي (في قلبي) .. كانت لابسة الأحمر ..الأحمر لون الحياة و لون الحب .. لون يبعث على الإنشراح .. وقعدنا في بيت مش بعيدة نحكيو على راحتنا !

- أنا ما نحبش الراجل "macho"  برشة .. ونحب إلي يدو كريمة !
- لا مش معقول يكون مشحاح الراجل ، حتى الجيران اش يقولوا عليها المرا ..
- إي والله .. صاحبتي راجلها من الأول كان وين نحطك يا طبق الورد ومن بعد العرس ولا عبد جديد !
- ربي يهدي .. 
- تعرف يا كالمارو .. أنا صحيح نقرا أما ما نحبش نخدم .. راجلي هو إلي يدللني وكان لزم نزيد نقرا .. 
- إي معقول ، اطلبوا العلم من المهد إلى اللحد .. 
- وأنا راني نحب الراجل المثقف .. خيت عليهم ، فما برشة تلقاه قاري باك + 20  وهو مخو قد العصفورة.
- حاشى العصفورة 
- "أون بليس"، قداكش "drôle" هيهيهي ..

الحاصل من غير ما نطول، كل جملة تنطقها، تزيد تغرق بها روحها .. هذي تقرا "prepa" ؟ هذي بش تولي مهندسة وتبني البلاد ؟ أوه يا عمري أوه ! .. وبديت نحس في الإشمئزاز هابط علي من كل صوب .. معاش حامل حتى كيفاش تتحرك وتحكي وأنا سرحت بمخي ..

ياخي اللون الأحمر إلي لابسته، زعما عنده علاقة بالفشل هذا ؟


اللون الأحمر إلي كي شفته من الأول اعتبرته لون الحياة .. فالإنسان إلي خدوده حمراء على سبيل المثال يقولوا عليه حي في أوج عطاؤه، الرياضي لما يجري ويسخن يولي كذلك أحمر اللون كعلامة للإستعداد للبذل البدني والعطاء .. كيف كيف الأحمر هو لون الحب والرومنسية .. ابدى من الوردة الحمرة وإنتي ماشي ..

أما الأن وهي تحكي و ليت نشوف فيه لون الموت والدكتاتورية .. تي حتى عزيزتي كيف تحكي على جهنم تقول "جهنم الحمراء" ... اللون الأحمر ماهو زادة لون الدم والقاتل والمقتول ... لون الدكتاتورية السياسية والمنزلية تي حتى المدرسية .. أليس اللون الأحمر هو الذي يستعمله المعلم حتى يخزيك ويوريك أنك "بهيم" .. وكم من مرة لقيت مكتوب بالأحمر الشعشاع "صفر" على كراس القسم أو هي "اطلعت عليه" ... اللون الأحمر لا يناقش في المدارس ، فكلمته هي الفاصل والفيصل بين التلميذ ومعلمه ... لون كذلك  إمتزج في صغري بالبكاء والطرايح في داخل القسم أو في الدار.. حتى لما تاكل طريحة البلاصة متع الضربة ... قبل ما تزراق ... تحمار !

والأحمر هو إلي يشكب على الأزرق على أوراق الإمتحان .. ياخي شنية العلاقة بين الأحمر والأزرق ؟ علاش نحسهم سابق ومسبوق ؟ وعلاش الأحمر هو إلي يوجع والأزرق هو إلي يخفف ؟ فالضربة لما تبدا تبرد تولي زرقاء .. و حتى في ورقة الإمتحان، اللون الأزرق الصافي هو إلي يطلع المورال !
والسماء ... زرقاء .. السماء لما تكون صافية تبعث للأمل وللتطلع إلى مستقبل مشرق بالرغم من الآلام "الحمراء" الموجودة في الأرض، حتى الشمس كيف تجي تغرب ، يظهر شفق أحمر وكأن السماء الزرقاء تتألم لفراقنا .. والبحر.. أزرق .. البحر وآفاقه الواسعة بالرغم من الخطر إلي فيه أزرق .. فعليسة لما استحال معاشها في بلادها، وسفكت الدماء فيها .. هربت عن طريق البحر .. وكأن الطبيعة اتفقت على أن الأزرق هو لون الإرتقاء والطموح و الأمل

من غير ما نحس ... ومن غير ما نعرف شنوا الموضوع إلي كانت تحكي فيه سألتها :

- شنوة لونك المفضل ؟
- فابتسمت و سكتت لوهلة ثم قالت بكل ثقة في النفس .. الأزرق !

يتبع

إقرأ المزيد... Résuméabuiyad

الأربعاء، 21 مارس 2012

الزوجة المثالية - 2


عادة وأنا بديت نتبسم ونحب نشدها بالحديث ونبدا ننصح فيها ونعاود على القسم التحضيري وأهمية المراجعة وكيفاش تنجم تنظم وقتها وكيفاش يلزمها تخدم في فترة المراجعة ، وفي الأخر بش نقترح عليها نجيبلها كتبتي وكراساتي لدار خالتي ... و- بالطبيعة يلزم تخليلي نومرو التليفون ... الحاصل بدات الأحلام تتبنى ، ولكن سرعان ما  ... 

أنا من الناس إلي كيف ياخذ الثقة في روحو مع طفلة يوحل ويولي يلبز .. المرة هذي هذاك شنوا صار، بديت نحكيلها في قصة حياتي، إي نعم ... تقول قاعد معها في قهوة والطفلة ما عندها ما تصنع ... نحكيلها إلي أنا عملت "بربا" و من بعد مدرسة مهندسين، إلي فيها برشة جو .. ما نفيق كان بعلامات الإسمئجاج على وجهها :

- باهي باهي ، ربي يعينك .. أية تصبح على خير 
- ( في قلبي: صحيتك يا بوهالي) ...  تصبح على خير ..



تلفتت وأنا دايخ نلوج على "قجر" .. لقيتوا يتفرج فيا و يتبسم 

- تعبر يا مدير 
- لا شي بلبزتها !
- إي من ضحكتها وتلفيتتها بعد ما إنت مشيت، أنا نقول بلبزتها هههه 

خليتو يهرج ومشيت خدمت الموبيلات، ركب هو وطرت بيه للبحر .. في الثنية فمة قنطرة تشق فوق طريق سيارة ! وقفت غادي .. وهبطت من الموبيلات وطلبت منه أنه يسكت .. 

كانت الدنيا قبل المغرب بدرجين تقريب، نشوف من بعيد في الشمس وهي هابطة وراء الغابة ! واللون الأحمر في السماء الصافية زايد في المشهد شطرين ! وسرحت معاه .. تعرف، ساعات الإنسان يجري من خدمة للدار للقضية للماكلة للتليفون للفايسبوك .. ولكنه قليل وين يعدي لحظات يتفكر فيهم مع نفسه ويراجع حساباته ... لحظات يحس فيهم بأنه إنسان، يحس فيهم بالجمال ويتذوق الطبيعة و كل ما فيها من أحلام .. نتصور أني لو كان نخصص نصف ساعة كل يوم للتفكر تو نولي أسعد انسان ... نسكر كل الألات، كل ما له علاقة بالعمل ... كل ما له علاقة بالتعب والشقاء والضجيج  ... ونحل كل ما هو رحلة إلى العالم الفسيح ... إلى الطبيعة والخيال الشاسع المريح ... أنك تفتح الشباك وتتأمل في الناس المزروبة، أنك تطلع في قمة وتشم الهواء النقي، أنك تستلقي على ظهرك وتتفرج في السماء أو أنك تحل كتاب أو رواية وتسرح في عالم ما وراء الحياة .. تحس بروحك  إنسان، تحس بنفسك تتحرك ... و تتنهد ... 

- صاحبي، الدنيا بدات تظلام راهي ! وأنا نحب نروح .. 
- أووه يا عمدة، برحمة أمك علاش تقص عليا !
- تي كهو، شنوا بش تلعب فيها نومنسي والعصافير تزقزق ! تي زايد تكذب على روحك، جادور تطلع تهبط تقعد جادور هههه 

تلفتتلو ومن غير ما نجاوبو، إبتسمتلو ... على خاطر إنسان بالرغم الهوة الشاسعة إلي بيناتنا، يبقى من أعز الناس عندي .. إنسان بسيط، كل شيء يفرحوا، أعطيه رزق يومه ويعيش أسعد الناس .. إنسان إلي في جيبو موش ليه، و السرقة والقلبة خاطيه .. ما يستحق لحتى حد والناس الكل تستحقلو، ديمة مبتسم ولكنه مش يضحك، وديمة كئيب ولكنه مش عبوس .. هو مزيج من الأحاسيس و التناقضات ... هو قلب طيب .. هو روح خفيفة .. هو إبتسامة تسرقها في وسط الحياة التعيسة .. "قجر" مش طالب من الدنيا كان رضاء الوالدين .. إلي ما يعرفهمش ... ماني ما قلتلكمش .. يتيم من والديه  الإثنين .. أموا توفات كيف ولدتو و أختو توامة ... بوه بحار، غرق وهما ولاد 5 سنين .. رباهم عمهم حتى للعشرين ... الطفلة عرست وتهنات، والولد ولا عرصة متع حانوت الحماص ... 

طلعنا في الموبيلات ووصلته للدار .. 

- كان عجبتك الطفلة قلي .. تو نتلف "وزغة" .. نقلوا مخطوبة !  
- تو نحكيو .. تصبح على خير 

أنا دخلت للحومة نلقى غسان كشاكشو طالعة، قلتلو بش نهز الموبيلات نشري خبزة لأمي فيسع حاجتها بها، ضربت 3 سوايع وأنا ندور عليها .. 

هز موبيلاتو وما سكت إلا بعد ما وعدته بش نصبلوا دينار "لايت" ! 

في اللحظة هذيك .. حسيت بالهدوء .. بعد الصخب والجري الكل، لقيت روحي وحدي بش نخمم في الحكاية على كيفي قبل ما ندخل للدار .. تعديت للعطار خذيت من عنده دبوزة "ڢيڢا" و شطر "باڨات" بالفرماج والهريسة و "الڢريانت" .. وقعدت على عتبة الجيران نملخ في الكسكروت و نكمبز .. 


الحكاية وما فيها، الوالدة جبدتلي على طفلة كشيت عليها ... طلعت وردة عيني ما تاذيها ! و مخ الهدرة كيفاش بش نعمل معاها موعد ! 

الحلول المتاحة قدامي مش برشة .. 
إما نكلم "قجر" يتصرفلي في نومرو التلفون .. وهنا تنجم تشك في نيتي وحتى ما تعطينيش حتى أهمية .. كيف ما تنجم تعجبها الحكاية وتفرح ووقتها عادة شاخ العصفور .. 
إما نولي أنا زادة عرصة من عرص البلاد ، ونشد راس الحومة متاعهم حتى نطيح بها ... أما الحل هذا فيسع نحيتو .. حسيت فيه برشة تروميز !

الحل الأخير ، وربما الأضمن، هي أني نكلم الوالدة .. تقول شافها، ويحب يدخل من الباب الكبير ..

الحقيقة وبالرغم من أنه نخير نعرف رأي الطفلة مني لها قبل ما يدخل حتى حد بيناتنا، إلا أني  خيرت الحل متاع أمي .. أول حاجة بش نعطيها الإحساس أني ناخذ بخاطرها، ثم ارتح ليا ... هي تخدم الخدمة و الجواب يجني ! 

كملت الكسكروت، ڨعبت الڨازوزة ... و قصدت ربي .. 

نلقى أمي مش فرحانة حتى طرف ! وطول دخلت فيا !

- اسمعني مليح مليح ... أنا كي نجبدلك على طفلة لمصلحتك ، نحبك تكون فرحان و تكمل روحك .. أما إنت شي ... ما فهمتش لشكون جيت ، بوك في عمرك يجري من طبيب لطبيب بش يداويك  ! وإنت لاقي كل شي بين يديك و تسيب في الهبال !

- اسمعني .. 

- يزيني ما سمعتك، دبر راسك ! أنا معاش بش نتكلم على حتى حد .. نهار إلي تلقى شكون قلي .. أما من ناحيتي تهنى معاش نتدخل .. 

- تي أنا جايك بش نقلك راني خممت وبرا تكلملي عليها ! شفتها اليوم، وعجبتني ونحبك تتكلملي عليها .. 

يتبع 

إقرأ المزيد... Résuméabuiyad

الثلاثاء، 20 مارس 2012

الزوجة المثالية - حلقة 1

قلنا السلام ، 

بعد مدة من أخذ ورد مع نفسي الإمارة بالسوء .. نجمت نتغلب عليها ونقنعها أن الحديث في السياسة في تونس في الوقت الحالي كصعود جبل الهملايا ! تبوريب فارغ .. و كل متسلق يزايد على صاحبه بش في الأخير يوصلو لنفس النقطة ! 

قلت نرجع نخرف حكايات لا علاقة، منها تفرهدني وربما تفرهد حتى المار عليها وتخرجوا ولو للحظات من أزمات الفاسبوك والعصب .. وعلى الطاير هكا ما نستحظرش حكاية ولكن بش نحاول .. 

في إطار "لمان الساقين" و "تكميل شطر الدين" الوالدة -ربي يخليها ويبارك فيها- عاملة فيا تو محسوب عام وشوية .. يا ولدي اش ناقصك ؟ بعقلك، بخدمتك، حليلتك (في هذي ما جابتش هههه) ... 

أنا في الحقيقة بخلاف أني ما نحبش برشة تكسير الراس متاع فترة التعارف، الفترة إلي تبدا تعرف إلي الطفلة إلي قدامك تغالط فيك (طبيعة نسوية نرجسية) .. وتعرف إلي على قريب بش تبدا الطلبات والتنغنيغات و غيرها من قسوات .. ونعرف إلي نهار إلي نغلط ونعتب باب دارهم، غير نعس على شعر الشيب وقتاش بش يبان برك ! 

هي فما برشة ظروف موضوعية أخرى بخلاف الدلال هذا ، هو أني نحس في روحي مش مستعد نجابه مسؤولية العرس وكل ما يجي في جرته من إلتزامات أنا في غنى عنها .. وزيد وألحق يقال عاجبتني الحياة إلي أنا فها ، اش قام عليا ندخل فيها فارعة ؟ على كل .. الجواب الوحيد إلي نجمت نخرجه للوالدة من غير ما تعملي عرعور ، هو ما عنديش وقت بش نلوج على بنت الحلال ! 



فما راعني إلا وشمرت على ذرعاتها  وبدت تلوجلي .. 

- ولدي لقيتلك طفلة تعمل ستة وستين كيف 
- أخطاني 
- الزين والقد والقراية 

أنا سمعت الزين والقد و حسيت أن إبتسامة بدات بش تفلت، ولكن فيسع ما جبدتها وقلتلها :

- شنية هالقراية ؟ 
- اسمها "تسنيم" تسكن بحذا دار خالتك "منيرة" !
- شنية تقرا للا تسنيم ؟
- شنوا عجبتك ؟
- تي بربي اش من عجبتني وأنا حتى خليقتها ما نعرفهاش ؟ مش لازم هاني خارج ! 

ودوب ما نرجع الباب ورايا وأنا خارج، نجبد التليفون ونكلم صديقي "قجر"، نعيطلو زادة "العمدة" .. هذا انسان يعدي 25 ساعة من جملة 24 وهو قدام حماص يعس على إلي طلع وإلي هبط .. 

- أهلا فلوس ! وينك ؟ 
- أنا هاني خارج ! نتقابلو قدام الحماص ؟
- باهي ازرب روحك ، عندي دوسي نحظر فيه ! 
- دوسي شنوة ؟ 

وقص عليا التلفون .. مش عوايدو ، وزيد "قجر" عنده ما يعمل ؟ هزيت ال 103 الخضرة متع غسان ولد حومتي بش فيسع وصلت .. 

- جابك ربي على الموبيلات .. هزني وين دار خالتك "منيرة" تعمل مزية ! 
- تو أنا كلمتك حاجتي بيك ، مش بش نخدم تاكسي سي الشباب ! 
- برس أمك، هذي برك وبعد نسمع العزيز !

واحنا في الثنية، بدا يحكيلي على طفلة مزيانة اسمها تسنيم ، تسكن وين دار خالتي، ماشي "يراقب في الحركة" في الحومة  ... طفلة ما يعرفهاش وغاضتو كيفاش هذي تفلت من الرقابة متاعو ! 

- العمدة وما ادراك يا فلوس ، وما يعرفش نوارة البلاد ؟
- نوارة البلاد جملة وحدة ؟ 
- إي إي ، تعرفوا إنت منير وزغة ؟ 
بعد مدة من التفكير :
- إي يضهرلي عرفتو ، شبيه ؟
- تي ماهو هو حكالي عليها ! يحب يستحسن !

أنا في مخي : هذاك إلي مزال بش ندخل في صراع  وجودي على طفلة مع وزغة ؟ تي ستنا الساعة وكي يطلع ذوقه خرشف .. 

وصلنا للحومة وكالعادة جبد "قجر" التليفون وكلم شكون في الحومة هذيك ... حكاية تتليف الجرة، بش ما يشكوش فينا متساكنين الحومة، بحكم إلي أحنا مش موالفين ناقفوا غادي .. واحنا نهرو، ونحكيو على الثورة وجرحى ودمومات و الجبالي والمرزوقي .. وإذا بملاك يتعدى من أمامي ! 



كانت ، كيفاش نقلكم .. من أجمل ما رات عيني، بالوقت ذوبتني ودغدغتني و في مخي خرمتني .. هذي بالحق نوارة وعليها الكلام ! هذي بالحق حتى كان خارجة ثالثة إبتدائي تستحق نعمللها "جام" ! 

و فجأة ومن غير ما نفهم كيفاش، ننطلق وحدي وراها، و يدي تهرب عن السيطرة وتجبدها بكل لطف من كتفها  ... تلفتت وكيف شافتني تفجعت .. وبدات تتمتم :

- شتحب عندي، سيبني 
- اه ، سامحني ، طريقتي بش كلمتك ماهيش محترمة أما ... 
- سامحني تعرفني ؟ 
- لا 
- مالا تصبح على خير يعيش خويا !

خويا ؟ شنية خويا هذي ؟ ماهو لباس ؟ ... ولكنني شديت روحي و ركزت معاها :

- بربي، لو كان ما تراش مانع بش نطلب منك حاجة صغيرة ! تعمل مزية ! 
- هيا عيش خويا مروحة تاعبة من القراية، وعندي برشة إمتحانات الفترة هذي !
- (مزلت تعاود "خويا" نفشخك !!!) متأسف على القلق ، ميسالش تنجم تمشي على روحك ، ربي ينجحك .. 
- يعيشك ، أما والله المرحلة التحضيرية من أصعب ما شفت في القراية  !
- اه نعرف نعرف، حتى أنا عملت "prepa" و ما يحس الجمرة كان إلي يعفس عليها ! 
- يا بالحق ؟ و بربي صعيب الكونكور ؟ 
- لا لا كان تراجع مليح تسلكها !

أحنا هكك و جات في مخي فكرة جهنمية، تخليني انجم نقعد معاها على إتصال .. 

يتبع  
إقرأ المزيد... Résuméabuiyad

الأربعاء، 21 ديسمبر 2011

أنا ... معارض



في تونس الثورة، الحكومة خايبة والمعارضة هي الليكس لوكس هي الكل في الكل يا أمل  ...و يمشيش يغر بيك الشيطان ويحطلك في بالك إلي العقلية البعلولية الإستبدادية هي إلي ورثت النظرة هذي ؟ لا وألف لا !
يزي توحد مولاك يا راجل، احنا قبل كان العيب هو أنك تعارض، هاكم المتمسحين على العتبات الأجنبية و التواقين إلى الثورة البولشفية ... أما اليوم كل شي تقلب: المعارضة هي الحل ، و لذا لا بد أن إنقلاب الموازين يقعد متواصل إلى يوم يبعثون ... إذا كنت مع الحكومة فاعلم -كرمك الله- أنك من جماعة رني رني و الشرف متاعك مشى يغني ... 

في تونس ما بعد الإنتخابات المعارض الحقيقي هو إلي يقول لا ولا يبالي، هو الصنديد إلي كلمته أصح من الحديد ...  

و هذاك علاش بعد أخذ ورد ... فهمت إلي أنا، في داخلي ... أقرب إلى المعارضة ووليت نحب نعارض 

نحب نولي معارض ... خاطر إلي يساند الحكومة قفاف ومش شريف ، وعمرو ما يولي إنسان نظيف ... نحب نولي معارض على خاطر المعارضة باهية، فيها جو على الفاسبوك و تزيد تكبر في عين أمك وبوك ... نحب نولي معارض ننتقد الحكومة نقدم شكوى بالناس إلي "سرقوني" (نشهدلهم هالصفحة بالذكاء) ونسب الخوانجية إلي باش يظلموني ويحطموني وسهرية "سامدي سواغ" بش يحرمني ... أما مانيش عارف كيفاش، المعارضة راهي فن مش ملوح للناس الكل ، المعارضة راهي خدمة صعيبة في زمن الديمقراطية ... تسب وتشتم وتقذف وتعيط إلي ما فماش حرية ... 

على كل، قعدت مدة وأنا نراقب في المعارضين والثوريين ولقيتهم ينقسمو إلى صنفين :

- المعارض الأزلي والأبدي : السيد هذا ملي في كرش امو وهو يعارض ... في شنو ؟ الله أعلم ، أنا قلتلك يعارض وإنت دبر راسك ... ما عجبتوهش، مش فرحان بالدنيا ، يحس في روحو موش ولا بد ف ... يعارض، تسالوه ؟ وجرب مسو ولا قلو شبيك تعارض ؟ تو يقلك إنت ما تحبنيش نعارض، نعارض ونص ، وأضربلي على الطيارة ... إي نعم الطيارة ! 

- المعارض إلي عمرو ما كان يعارض : النعامة سابقا إلي اليوم ولات صيد (لا مش الصيد متع النهضة ، تي متع الداخلية) ، وهاذم عمرهم لا فهمو ولا عمرهم بش يفهمو المعارضة ... ويندرج تحت هذا السقف التجمعيين الخاسئين، إلي ما نجموش يطولو اللحية و يبداو يتربشو بالبربيشة البيضاء للخليفة الموقر ...  نجدو فيهم رجاء بن سلامة (يعمبو زينها هاك الدودة قداش تتقرمش) و ألفة يوسف و سفيان بن حميدة (اختصاصه قفة بالفغونسي) و البهلول و غيرهم من صحفيي ومثقفي الهانة و الرقاد في الجبانة وبعض المدونين إلي لا داعي لذكرهم مش خوفا منهم (هذا لأنهم بدورهم يضربولي على الطيارة) أما ما نحبش نكبرلهم ريوسهم ونجبد اساميهم في تدوينة ممتازة كانت أو حتى شوليقة ...    

وبعد التفصيل الغير ممل هذا نجمت والفضل لربي نعرف كيفاش نولي معارض ... بالطبيعة نحكي على الزمرة الثانية ، لأن الأولى فات فيها الفوت وضيعت أجر من أحسن المعارضة من قبل ما يتوجد الإنسان على وجه البسيطة ... 

- أول حاجة تعملها: تحط " بادج" متاع "معارضة" على بروفيلك الفاسبوكي وحتى التويتر والغوغل بليس ، وتلصق "بادج" معارض فوق "الأيفون كاتغ اس" متاعك وفوق الفيسبا ... تي الحاصل تصنع جوك ، تعمل إشهار إلي إنت معارض بش الناس ما يغلطوش فيك ، ويقولوا عليك إلي إنت هكا ولا هكا مع الحكومة ... النظام والإلتزام بالمبادئ ، هي أحسن بداية لحياة معارض ناجح.

- ثم تبرتاجي على الفاسبوك والتويتر ، أي خبر يجي قدامك فيه تنقيص للحكومة وحلفائها، ما تنساش في نفس الوقت تسب أصحابك إلي يساندوا في الحكومة وكيف يكلموك في "مساج" بش يبردو الجو ، هبط ستاتي وأفضحهم، إفضح أساليبهم العفنة في تسكيت صوت الحرية والعدالة ... ومذبيك قد ما يكون صاحبك قريب ، قد ما تعفس فيه ... الأقربون أولى بتطييح القدر ... 

- لو هبط تكذيب لخبر إنت نشرته ، أو أكدلك إنسان تثق في مصداقيته إلي الخبر كاذب، رد بالك تصدقه أو حتى كان صدقته رد بالك تفسخ الخبر ... شكون يعرف فما برشة دغف في البلاد ولعل يشوفوا الخبر يصدقوه ...

- لو كان إنت مسؤول في حزب ولقيت روحك في المجلس التأسيسي فمذبيك تعمل فيها عيرود، وتقوم تصيح وتعيط وتدافع على الديمقراطية إلي ما تعرفها كان إنت، على خاطر الحكومة ديمة مشومة يراها من النفس محرومة ...

- رد بالك تعارض الأفكار و تناقشها ! ورد بالك تخمم بمصلحة تونس ومصلحة التألف ! لكلو تمويه ولكلو تفشليم وريق بارد، الأحزاب الوطنية الصحيحة هي إلي خسرت في الإنتخابات بفعل فاعل ... أنا نقلك ! ديمة شوف شكون يتكلم ، كانو من الحكومة، عارض طول وعرض من غير ما تثبت شقال وشنية الحجج إلي جابهم ...

- الرئيس الجديد ، سبو وطيحلو قدرو ... كان خذا 10 ملاين سبو ، وكان خذا 3 فرنك  سبو ... المفيد سبو ، ما جاء شي ، ما عندو لا تاريخ ولا ثقافة ولا موقف ورؤية يدافع عليها ... هو تحط رئيس بش يتسب ونتمقعرو عليه ...

- الصبر ، انسى حاجة اسمها صبر ورزانة وتريث ... ديمة فرفش ونتش وعيط وصيح ... وكان لزم إستعمل شوية عنف  ساعة ساعة ما فيها باس ... وسب كل من يعترف بالحقيقة ويكشفك ويكشف ملعوبك، هو لعبة في يدين الخوانجية ... وفي باب الصبر كذلك رد بالك تخلي للحكومة الوقت بش تتنفس وترتب أمورها ، يا ولدي ما يلزمش يرقدو.

- تحط في مخك إلي إنت على حق، وإلي إنت أو لا أحد ... رأيك هو السديد وإنت تعرف كل شي وبقية الشعب بهيم ودغفة ولا يصلح لحتى شي ...

- يلزمك تكون فخور إلي إنت معارض ، ذلك لأن كلمة لا ما تجيب بلا ! وزيد مش ساهل أنك ديمة تقول لا ... شبيك راهو كل مرة تقعد اتعب في روحك وتخو في موقف وتقول "لا" ... يلزمها مجهود كبير وإرادة كبيرة حتى وإن كانت إرادة ضد إرادة الشعب ... أما نورمال هاو قالو الشعب بهيم ...

- تحكي على الفقر وقت تشوف الحكومة لاهيا في نقاشات تنظيمية، وتقوم بالتصعيد الإيديولوجي وقت الحكومة تحكي على المحاسبة ... الحاصل تعمل كيف الحاج كلوف وإلي لو كان جاء بن علي حي راك شبعت كفوف ...

- يكذب عليك إلي يقلك إلي المعارضة تبحث عن الأصلح للبلاد، ولو كان توصل إلى توافق مع الحزب الحاكم حول مسألة من المسائل فيا حبذا يحطو اليد في اليد ويخدموا جميع ... كل شي إلا هذا ! مهوش معارض نزيه إلي يعمل هكا !

في خلاصة القول بش تكون معارض ناجح يلزمك تشترك إنت و السلفي الناجح في حاجتين ثنين مثلثين بالدجماطقية :أولا أنك تبان قدام الناس على أنك ثوري ومعارض ما تبيعش و ما تشريش في مبادئك (كالسلفي إلي يكفر الديمقراطية ، وبش يوري إلي هو مؤمن صادق وحقيقي يزيد يكفر كل من يشارك فيها و يلبس قميص ويطول اللحية (البادج) ) ثانيا تتلطى على العلماء والناس إلي عدات عمرها بين الكتب ودراسة السياسة والمجتمع وأن لا تعطيهم لا قدر و لا قيمة (كما يفعل بعض السلفيين عند ما يسبو الإمام مالك على سبيل المثال ولا ما يستعرفوش برواية ورش أو قالون ...)  ... 
إقرأ المزيد... Résuméabuiyad

الأربعاء، 26 أكتوبر 2011

أفكار على الطاير في ما يخص الشلبوق الظلامي للحداثة


أولا وقبل كل شيء ، السلام على من إتبع الهدى والصلاة والسلام على رسولنا المجتبى محمد إبن عبد الله ... طب صلي عليه ... طب زيد صلي ...  (إي هاو قلك من تو إنجمو نكتبو هكا، من غير ما يجي حتى حد يتهمنا بالرجعية والتخلف بما أننا بهايم بطبيعتنا و تونس بكلها بش توخر 200 سنة لتالي) 

اليوم حبيت نتخيل واحد حداثي نهار 23 أكتوبر، عفواً أكتوبغ ... 

عادة قالك ليلة السبت واحد حداثي بايت مع اصدقاؤه على الفايسبوك ينبروا على الخوانجية، وكيفاش غدوة بعد ما تهبط النتيجة بش ينظمولها بلعة عالمية ، ومشوي وأجواء إحتفالا بالديغاج الديمقراطي إلي بش يقولوا شعب تونس العظيم لرشودة الإرهابي ...    

ولا تعرفش كيفا ؟ أخطانا منهم ، عندنا بلاد نبنيوها ، فساد بش يتبلعو في الحبس، وبرشة خدمة ... والعباد هاذم لا يصلحو ولا يصلحو ، بل هما الفساد بعينه.

باهي النتائج ماشية وتتأكد والحزب الخارج بأكبر عدد من الأصوات وهي النهضة ، وهنا نحب نقول أنه لو كانت الأصوات الإنتخابية محسوبة بطريقة "عادية" راهو النهضة شنغلتهم تشنغيلة عالمية ، أما نورمال هي رضات بالهم والهم ما رضا بها ... والعام الجاي الشرفي ... (مثال على الحساب الديمقراطي جدااا)  

الإنتخابات برهنت على نضج كبير للشعب، أولا وهو حظور غفير للناس والصفوف وصلت لثلاثة سويع أو أكثر إنتظار ... 

عدم فوز  النهضة بالأغلبية المطلقة يوري أن الشعب مثني على هويتو وأنه صوت في أغلب الأحيان لبرامج ، أي عن إقتناع ... 

الحزب الرابح :

النهضة وبكل موضوعية هو أكثر حزب تطور منذ 14 جانفي، بعد ما كان مشرذم من طرف الزين وأحبابه والقافلة المثقفة المطبلة لكل مكسب من مكاسب الحداثة، عرف كيفاش يرمم نفسه وينسق بين القيادات متاعه إلي بعد سنوات من الغياب عن الساحة كانوا ينجموا يبلبزوها ... عرفو كيفاش يلمو شبابهم والقاعدة الكبيرة متاعها كانت تخدم في أغلب الأحيان بانتظام ... وهما قامو بأحسن حملة إنتخابية وهذا لا يشكك فيه كان الكذاب وخوه ... 

السبان والثلب والكذب والتلفيق والمغالاة فيهم لدرجة أن الواحد ماعاد حامل يحل الفاسبوك ... تصور وصلت الحكاية في بعض الأحيان إلى الاتهام بالرجعية والإرهاب لمجرد أنك تقول النهضة خاطيها أو يكذبو عليها ... هذا الكل لعب في صالح النهضة ... والناس في تونس فايقة وما تحاسب كان على النتائج ... والفزاعات (المتواصلة إلى حد اليوم) ما عندها وين توصل.

وهذا الفوز الباهر ... خلا عمك الغنوشي يفتق مواهبو الفنية البارح ،كاس ماء زمزم في يدو وهو يعط "كامبيوني كامبيوني أولي أولي أولي" ... 

الحزب المفاجأة:

هو كي تجي تشوف فما زوز مفاجأت، المؤتمر و العريضة ... 

المؤتمر عرف كيفاش يخدم ، خلا الاديولوجية على جنب وخدم سياسة ... هو لا محالة واصل السياسة إلي بداها منذ تأسيسه ، وهي محاربة الإستبداد والفساد، هذاك علاش يجمع ناس من مختلف الأطياف ... المؤتمر جاء الثاني بعد النهضة، ونتصور دوره في التأسيسي بش يكون هام وهام جدااا ... وهنا مرة أخرى رغم الحملات التشويه على شخص المرزوقي ، من ملحد لقفاف للخوانجية ... مرة أخرى التوانسة يعجبوني ويجبدو بكل من هو لاعب فيها مهف و عينوا ترف ...

العريضة وما العريضة ... قلك يا بهيم تصوت للعريضة ؟ نصوت مالا لا ؟ 

بما أنه وعدنا بمنحة بطالة وصحة مجانية وتنقل مجاني للمسنين ... بما أنه خاطب الطبقة المنسية -إلي وراء البلايك- بينما بقية الأحزاب تتناحر على ألفصل الأول من الدستور ، وجماعة الحداثة عاملين مسيرة فتقني قبل ما تطرشقني على خاطر "كوميك" ... فإن الشعب فتق مواهبو وصوت بكل حرية للي يحب عليه وللي تلفتلو و حكى على مشاغله اليومية و أرسل رسالة "أعتقني" إلى كل من مزال غالط في روحوا ويحسب نفسه أغلبية ... نعرف إلي عدد الفانات على صفحة في فايسبوك يغلط الإنسان في روحوا ويمشي في بالو إلي هو معلم وإلي هو يأثر على الناس وماشي فبالو إلي مثل "بيع القرد واضحك على شاريه" مزال يخدم ...

فما طبقة ما كلمها كان الهاشمي وما عليكم كان تشوفو الفيديو هذي والطبقة هذي كان ما فيبالكمش موجودة بدرجة كبيرة ... وماهيش بهيمة كيف ما يتصور البعض ... أما تفكيرها مختلف ، على خطرها مهمشة وقعدت لتالي لسنوات وسنوات ... يلزم دراسة معمقة لمشاكل الناس هاذم وخدمة صحيحة مش كذب لأنه من هنا فصاعدا كيف فما شكون بش يستقطب على أساس ايديولوجيا، فما شكون بش تعجب حكاية الهاشمي و يخدم على خطاه ، وحتى ما يجيناش صرفك أخر في المستقبل يلزم نوعيو الناس ... مش نحطولهم برسيبوليس وليلة 27 نحكيو على قداسة الإسلام ، والشعب من كثر الجوع لا ينام ... 

الحزب المخزي : 

فما أكثر خزي وفشل من حزب الشابي ؟ ما نتصورش ... أنا واحد من الناس لو قالولي لشكون تصوت نهار 13 جانفي الصباح، كنت نحير بين الشابي والمرزوقي ... أما الشابي أبدع في الفشل ... الزلعة تلو الأخرى ، وخرجو من حزبه عباد ، ونقدوه عباد ولكن الطمع في الكرسي يعمي ... 

كان ديمة فين يحكي يكبش في النهضة بها والنهضة عليها ... والنهضة تستغل الدين ، ويبدا يجبد في ايات بش يثبت إلي الدين مفصول عن السياسة ( على فكرة أكثر عباد أبدعت في التلعب هذا هما جماعة القطب) ... بحيث كلمة حق أريد بها باطل ... 

نتمنى أنه يفيق على روحوا ويحط بزايد طن في الكسكروتات ثماش ما المرة الجاية يولي يصلح لحاجة.

التناصف في المجلس التأسيسي : 

ياما صاحو على التناصف والنهضة ضد المرأة والريق البارد الكل ... النتيجة هو أن أقرب حزب للتناصف هو النهضة 41 مرا (تقريب هكا كان ما خانتنيش الذاكرة) من جملة 86 كرسي ... والأجمل من هذا أنهم أغلبية متحجبات ... ولله الحمد ...  

رد فعل النهضة : 

اليوم استمعت إلى الغنوشي على اكبريس أف أم ... وكلامه يفرهد ... يركز على أنه يؤمن بالديمقراطية وعلى أن الأحزاب عليها أن تعمل اليد في اليد بش يبنيو البلاد ... وينظفوها من الجراثيم إلي تاكل فيها ...

أهم حاجة :   

أهم حاجة على ما أتصور هي الإعلام ... كان تحبوا تونس تقديم ما تسيبوش الإعلام والتربية والتعليم لنفس الوجوه متع 50 سنة لتالي ... هما إلي هلكونا وهلكوا صغارنا ... هذي أهم "حرب" سياسية قادمة ... البقية تجي بطبيعتها.

الأغلبية الصامتة : 

هع هع هع هع ... كنت نسميها أغلبية ساقطة، واليوم تأكدت التسمية لأنها فعلا سقطت من فووووق، وجاها صرفاق عالمي ... نتمنالها الشفاء العاجل، وما عاش تعاودو صنعتكم ... 
اليوم هلي سماو رواحهم أغلبية صامتة وخرجو للقبة، اكتشفو أن هناك أغلبية صامتة حقيقة مش ضربان لغة،  و العودة إلى أمر الواقع صعيبة أما نورمال تو توالفو :-)

هاذم أعداء الثورة وأعداء الحرية وأعداء الشعب ... هاذم الأنانية هي شعارهم والكذب والنفاق هو سبيلهم وتشعيل النار وإثارة الفتن هي هوايتهم (مثال)  ... نحب نوجهلهم تحية عطرة وزكية ولكل من ساهم في تشعيل نار الأيديولوجية على الفيسبوك ، مع بعض مدوني الهانة إلي يحب يولي معروف يبدا يتفلسف علينا ويمخور ويحط ... نحب نقوللهم كما قال جماهير المكشخة "وتحبوا تهزو البطولة" ...والعام الجاي الشرفي ... 
إقرأ المزيد... Résuméabuiyad

الجمعة، 21 أكتوبر 2011

علاش ما نخافش من الخوانجية ؟


تدوينة فيها برشة مدح للخوانجية ، ندعو أحباء الطمطومة -بكل لطف- ينزلو على القرص هذا من توا، هما وجماعة حزب النهقة ... خلينا ولاد بلاد أحباب ، نحترمك وتحترمني ... ومن غير ما تسيب عليا ركاكتك ولا نشبع فيك بخص ... و هذا سيدي خويا في إطار مبدأ "بيناتنا فلسة" :-)

بسم الله ، 

شنوة صفا الجو ؟ خوانجية صافيين ؟ ... ومعنا بعض الفضوليين، مرحبا بهم ... و كمشة مندسين، نفرحو بيهم ... يا مندس يا تحفون، دم الشهيد لا يهون ... يا مندس محلا سروالك، البس سبتة لا نوكلهلك ... 

هيا اش علينا في المندسين ... هذوكم كي الملح في الطعام ... يحليو القعدة مبنهم ...

عادة قلك حزب النهضة "السلفي الاخواني" يحب يعمل برنامج "وهابي" كيف في "إيران وأفغانستان" ... يا محمد العسكري ، واشبيك تدز ؟ بالهداوة تجيك الحلاوة ... 

اجة هنا ، أقعد غادي، حل وذنيك واسمعني مليح، الكلام هذا مش بش تسمعو ديمة، قداش بش ندوملك ؟ ... باهي قلت نعمل تذكير صغير لبعض التعاريف لكي يطمئن قلب الجميع:

- طالبان : تنظيم سلفي "جهادي"، بالنسبة ليه الأحكام مطلقة صالحة لكل زمان ومكان، ولو إنت "حصلت" ونطقت بالشهادة فإن الشريعة هي إلي تحكم فيك، رغما عن انفك، و"الملا" وجماعته يعسو عليك، وإذا كنت كافر فحكاية أخرى ...

- الوهابية: دعوة الشيخ محمد عبد الوهاب في السعودية إلى العودة إلى أصول الفقه وإستنباط الأحكام من الشريعة، ركبوا عليها ملوك السعودية الخونة (ال سعود) و دخلوا معاهم في العجة شوية أيمة ضعاف الإيمان ( الله  يهدينا و يهديهم)، والإستبداد هذا ولد إستغلال الدين من أجل تبرير المنصب السياسي، ومن هنا تخرج فتاوى من نوع تحريم الخروج على الحاكم ولو سلميا، و حملات تشويه كبيرة لكل من عادهم وقال فيهم كلمة حق، فتخرج لنا أقلامهم كتب من نوع "اسكات الكلب العاوي يوسف القرضاوي" ("ولا تنابزوا بالألقاب") ...

- الدولة الشيعية : و هي كيف ما أشرت في التدوينة السابقة، الحكم في إيران ثيوقراطي بمعنى أنه هناك مرجع أعلى عندو منصب "إمام" (أو أية الله) ( وعلى فكرة علي إبن ابي طالب عنده نفس المنصب لدى الشيعة) ثم تحته يترأس البرلمان "الرأس" الثاني للدولة ... على سبيل المثال وقت كان الخميني هو أية الله، رفسجاني (ثاني مرجع شيعي) كان هو رئيس البرلمان. وبالتالي فإن الحكم يكون "عمودي" بمعنى أنه كل ما يصير في الدولة يجب أن يكون تحت علم أية الله و رئيس البرلمان تحته. 

- الدولة عند الإخوان المسلمين: بش ما نطولش برشة، الإخوان المسلمين أسسها حسن البنا ، إلي تأثر بالصوفية (و ما ادراك ما الصوفية، هاذم أصعب من طالبان إلي يقلك) في مرحلة أولى وبالأستاذ رشيد رضا في مرحلة ثانية ، إلي هو تلميذ محمد عبده (صاحب كتاب " الإسلام دين علم ومدنية" -شوف ما ابنو العنوان) ، إلي هو تلميذ جمال الدين الأفغاني ... هاذم الكل مصلحين، وقرينا عليهم في التفكير الإسلامي (بخلاف حسن البنا والأسباب لا داعي لذكرها، نخليك تخدم زوز نورونات من مخيخك تو تفهم كل شي).

يعني، في أخر الحديث، إلي مزال يجيك ويقلك النهضة (تنظيم اخواني، وهو ما يفسر تلقيبهم بالخوانجية) ارهابية وبش ترجعني كيف إيران وأفغانستان والسعودية ، أعرف إلي السيد يحب يدغفك، وإذا سيادتك خيرت تسمعو هو على التفسير متاعي أنا أعلاه نعلمك ، يعني بكل رجله، ومن الأخر قال الراجل، إلي إنت أمورك ما تعجبش، وانتحارك ينجم يكون أسعد نهاية لحياتك ... 

اه مندس! مزلت هوني ؟قاعد تفهم على القليلة ؟ كان ما فهمتش ولا ماكش حابب تفهم تنجم ترجع تقرا السطر الأول ...

على كل ، سي حمادي الجبالي طلع يتغزل بالديموقراطية الإسرائيلية ... لا والله عيب ، مش معقول هذا ! أما كي الأمريكان يسألوه، كيفاش تحب على حزب ذو مرجعية دينية وفي نفس الوقت تحب على ديمقراطية ... يلزموا يسكت ، ويقول واللهي جماعة اللائكية في تونس قالوهالي، شي هذي حكاية المرجعية الدينية ما توكلش الخبز ...
والغنوشي هاو يحب يهبط تونس الكل للشارع بعد الإنتخابات ... يا والله أحوال ! والغريب أنه "مسؤول" في حزب جاب ما عندو وهبط يتحلف ويتكتف، يا ولدي ... فيق يا شفيق ، ويزي من الكذب والتلفيق ! (مع العلم أن الفيديو هذي جات بعد التكذيب، يعني بيحط نفسو في مواقف بيخاااا).

صديقة عزيزة عليا ، قالتلي نخاف من الخوانجية، على خاطر ثمة شكون يقلقها في الشارع ... وكلام زايد ، ويتحلفو فيهم ... أنا بصراحة هاذم لا نسميهم لا خوانجية ولا سلفية ولا توانسة ولا حتى رجال ! وما تنجمش تربط واحد في الشارع يقلق فيك بحزب معين ... التربية المجتمعية والمدنية هي من أصعب المهام في المرحلة القادمة !

يقول القايل -ونختم بهذي- أنا ما نخافش من النهضة أما نخاف من "فروخها" ... يا أخي القواعد تخوفني ، ما يعرفوش يتصرفوا !

باهي متفقين، لكن شوف، أول حاجة إنت تحكي على أقلية، وزيد مش أي واحد يقول "أنا مع النهضة" (أو مع أي حزب كان) يعني من القواعد، ينجم يكون متعاطف ... تربية القواعد كيف تربية الأولاد، تطلب وقت ، برشة وقت، و بالنسبة لحزب كيف النهضة بالقاعدة العريضة إلي عندو مش ممكن في 10 شهور يوحد خطاب القيادات (إلي كل واحد عندو فكر ، ويلزمهم يتفقوا على برنامج) ، يعمل برنامج، يوسع بالو مع إلي يسبو فيه ، ويربي القواعد ؟ ... برشة ... وإلي يقول عكس ذلك يعطيني حزب عمل تطور أحسن وأسرع من تطور النهضة في 10 شهور إلي تعداو !
 
باهي اش معناها بالنسبة ليا حزب ذو مرجعية إسلامية ؟ 
هنا مانيش بش نحكي على النهضة أما بصفة عامة ... 

رسالة التوحيد، هي رسالة كسر القيود ورفض الخضوع لأي بشر في الكون هذا ... يعني فهم رسالة التوحيد، يعطي للإنسان طاقة جبارة تحرروا من جميع القيود، مع تعليمه في نفس الوقت أبجديات الحياة الإجتماعية ... رسالة التوحيد عبارة على محرك للجينات البشرية، وإلي بعد فترة معينة يولد جينات جديدة في الأجيال الصاعدة اسميها "بالجينات التحررية" ... إي أما اش دخل الأحزاب ذات المرجعية الإسلامية ؟ ... هي إلي بش تحط الوسائل والأليات إلي بش تسهل عملية التطور هذي ... من منهجية تعليم، إلى تربية على الأخلاق ... و المولود الجديد، هو انسان قادر على النقد والعطاء والوقوف في وجه الظلم، هو انسان بش يقلب موازين القوى بفكره وصموده أمام هذا "الإنتحار الجماعي" إلي ماشيتلوا الإنسانية، هو إنسان قادر على تصحيح مصير البشرية من أجل بناء "ملك الله".

أنا ندافع على النهضة ونحب نقنعك إلي هي خيار أفضل ؟


كان إنت تعرف روحك ذكي وتفهملها ومعااالم، جوابي هو "إي" :-)
وكان العكس، فأنا هنا راني نبين في بعض الأكاذيب (كيف جوهر بن مبارك متاع دستورنا، إلي ما قراش برنامج النهضة وهبط يفلح هنا، على فكرة جماعة دستورنا مش هما إلي جابو كارولين فورست ؟ نسأل وبرا، كان غلط صلحوني)  والغاية هي أني نحاول نفسر علاش ما يلزمش نخافو من النهضة، بش حتى كان ربحت بفارق كبير -لا قدر الله- ما تاكلش بعضها ... أنا نخاف من إلي يخوف فينا من النهضة. 

وبعد هذا الكل إنت حر في اختيارك ولا أنا نجبرك ولا إنت تجبرني على التصويت لزيد أو عمر 


شبيني ما ننقدش النهضة ؟

النهضة عرست للعباد، وعملت طهورات، وغيرها فرق الدخان والكسكروتات ...
النهضة قاموا بأخطاء واعترفوا ببعض منهم ... (وخلصوا سنين في الحبس والعذاب)  ... 

إي ومن بعد ؟ هذا نقد بناء ؟
المشكل هو أني نحب ننقد، ولكن مش إنت تبدى تتناقش وفيسع يخرجولك ، خوانجية ضد الحرية ... وبالتالي هنا قاعدين ،انتم تكذبوا وأنا نحل العينين ... حتى توفى حكاية تقشقيش الحناك هذي ... 


باهي، والفصل الأول من الدستور ؟


برشة يقولوا دين دولة لا معنى له، واننا تطورنا ولا حاجة لنا لإثبات هويتنا من جديد ... احنا مزيج متلاحق من الأجيال، تقول في بقية العالم مقطوعين من شجرة ... والله حكاية ! ... بالنسبة لدين ودولة اكتفي بذكر بعض الأمثلة من دول متقدمة ماذا تنص في دساتيرها وإلى اللقاء في تدوينة قادمة :


  1. ينص دستور الدنمارك ــ في القسم الرابع ــ علي أن الكنيسة الإنجيلية اللوثرية هي الكنيسة المعترف بها من قبل دولة الدنمارك, وعليه ستتولي الدولة دعمها.
  2. في المادة الثانية من دستور النرويج نص علي ان الانجيلية اللوثرية ستظل الدين الرسمي للدولة ويلتزم السكان المعتنقون لها بتنشئة أولادهم بموجبها.
  3. في أيسلندا, تنص المادة 62 من الدستور علي أن الكنيسة الإنجيلية اللوثرية هي كنيسة الدولة, بموجب هذه ستظل هذه الكنيسة مدعومة ومحمية من قبل الدولة.
  4. في إنجلترا أقر البرلمان مختلف النظم الأساسية التي تعد القانون الأعلى والمصدر النهائي للتشريع (أي الدستور القانوني), وجاء فيه: إن كنيسة انجلترا هي الكنيسة المعترف بها, وإن العاهل الانجليزي بحكم منصبه ــ هو الحاكم الأعلي لكنيسة انجلترا. وهو متطلب مقرر في قانون التسوية لعام 1701م, بأن ينضم كنسيا لمجتمع كنيسة إنجلترا وكجزء من مراسم التتويج يطالب العاهل بأن يؤدي القسم بالحفاظ علي التسوية المبرمة مع كنيسة إنجلترا, وأن يحفظها بدون خروقات, كما يحفظ العقيدة والشعائر والنظام وطرق إدارتها وحكمها, وذلك بموجب القانون الذي تم إقراره في إنجلترا. وذلك قبل التتويج بواسطة الاسقف الأعلي للكنيسة رئيس أساقفة كانتربري.

    وفي إسبانيا الكاثوليكية ــ ينص الدستور ــ في المادة 16 ــ علي أنه علي السلطات العامة أن تأخذ في الاعتبار المعتقدات الدينية للمجتمع الإسباني, والحفاظ علي علاقات التعاون المناسبة مع الكنيسة.
إقرأ المزيد... Résuméabuiyad

الأحد، 9 أكتوبر 2011

نسمة والحملة الإنتخابية


حكاية فارغة يقول البعض ما تستحقش الإهتمام متاعنا ... أنا نشوفها مغالطة كبيرة للرأي العام ، خدمه مصالح سياسية وبالأخص إستبلاه للشعب ... والإستبلاه هذا هي أكثر حاجة مستعد نحاربها ! الإستبلاه هو إلي يولد الإستبداد ويؤسفني أني نشوف ناس متثقين وقاريين يمارسو في الخبث الفكري ويغلطوا في العباد على أمل أن يطيحو بناس "دغف" ... الدغف هاذم موجودين بالمشطة و بصراحة يسخفوني وما نحبش حتى نعبرهم لأن المكان الوحيد إلي ينجمو يحلو فيه جدقاتهم هو الفاسبوك ... أما إلي يقود في القطيع هذا هما أصحاب الشاشة والمناصب (وبعض الأحزاب الكاكوي ك هاذم (المرى مش متاع الفيلم ؟)) إلي ما تحبش تونس توصل بخير للإنتخابات ومستعدة أنها تقنع التونسي بأن إنتخابات مزيفة خير من حكم "بإسم الدين" وأن الديموقراطية في الوقت هذا لن تخدم حداثة تونس ... هذا بالطبيعة خوفا من أن ينتصر حزب "ثوري" ويقوم بمحاسبة جميع الفاسدين !و الخوف يجري الجوف ويجعل من الكلب حلوف !

عادة نجيو نعملوا ليلة نحذرو فيها من الخطر الديني (مع العلم أن الحزبين الثوريين الأخرين تابعين هاك الحزب الديني الاخواني إلي مستورد فكره من البرا حسب ما قال واحد من سحافييي نسمة) ! 

برا نترجمو فيلم إيراني تحفون ياسر (وكان جاو عندهم شوية فلوس راهم صورولنا "خطاف كابول" و " حجاب الخوف" و غيرها من القصص متاع ضحايا الإستبداد الديني) ... لكن هنا الظروف التونسية تقرب من الظروف الإيرانية ... ثورة وناس فرحانة ... عودة رمز الحركة الإسلامية (الغنوشي في تونس ويقابله الخميني في إيران) ! فبالتالي تسهل عملية التخويف وغسيل الدماغ ... 


مانيش بش نحكي على الصورة  متاع "الذات الإلهية" وإلي من المفترض أن انسان مسلم ويعرف ويقدر الله حق قدره ما يحكيش على حرية لأنها مش حرية كيف تبدى في دولة أغلب الناس تعتقد وتدين بالإسلام كدين ! ثم إن للحرية حدود وكلمة "بيناتنا فلسة" مش مقبولة و مردودة على اصحابها ، لأنهم نفس الأشخاص ما عجبهمش برنامج مورو الديني إلي تعدى في حنبعل في رمضان ! والحرية هنا ما عندها حتى معنى لأنك ما تنجمش تجي في تلفزة وتستعمل ألفاظ عنصرية على سبيل المثال فبنفس الطريقة مش معقول تخدش الناس في شعورهم الديني ! وسوف يقول سفيه بأن الإيمان ضعيف إلى الدرجة هذي حتى يخدش بصورة ؟ فأنا أقول بأن إيمان المسلم يحرم عليه تصوير الذات الإلهية لأنه "ليس كمثله شيء" وبالتالي إنت قاعد تبربش في العقيدة العميقة للمسلم ... وبالطبيعة إلي ما يفهمش هذا نقلو الحديث مع ألي ما يفهمكش ينقص من العمر وإلي عملتو نسمة ممنوع بالقانون وبش يقعد ممنوع أحب من أحب وكرخ من كرخ ! (هي هي وحكيت ) !

هنا نحب نشير إلى المغالطة إلي من العيار الثقيل وإلي هي أن إيران شيعة وتونس على حد علمي سنة ومذهبها مالكي ... يعني اش مجيب مكة لبو حمير ! عند الشيعة ما يسمى بولاية الفقيه ويؤمنو كذلك بالإمامة وعصمة الخليفة ، وهذه نقطة إختلاف كبييييرة مع السنة ، وما قامت الدنيا وقعدت في ما يسمى بالفتنة الكبرى كان على خاطر الحكاية هذي ... يجيونا في 2011 جماعة ما يعرفوش قداش فما من سورة في المصحف ويبداو يتفلسفو علينا ؟!! 

مغالطة تبرهن على سوء النية "الدينية" في مرحلة أولى ! هاذم يحبوا يقنعو الناس بالأساليب الكل أنه لا بد من فصل الدين عن السياسة، وأن الإسلام دين "يقعد في الدار" وأن الحكم الديني لا يؤدي إلى المدنية بل نهايته سوف تكون لا محالة ثيوقراطية ! هذي كذبة ... وبخلاف جهلهم بالدين أنا إلي نلومو عليهم هو جهلهم بالعلمانية والحرية إلي يدعوننا إليها !  هذي الطريقة تفكرني بسياسة تجفيف المنابع متاع بوهم الحنون ... سياسة تحب تقنعنا بجميع الطرق أن الدين يا إما تكون إرهابي يا إما تكون ديوث ... 

من ناحية أخرى هذي المغالطة الغرض متاعها سياسي بحت، و الحزب ألمقصود نعرفوه الكل، وأكثر من هذا تمت الإشارة له علنا في "النقاش" الثري جداااا إلي كان فيه وجهات النظر المختلفة الكل ! سياسة التخويف هذي عملها بن علي ومن قبله بو رقيبة (إلي علم الناس تمشط شعرها) ولم تعد تجدي نفعا ! و لذا حتى نصدقكم جيبو حاجة جديدة ! الشعب إلي إستقبل الكرطوش بصدره لا يخاف من خزعبلات زفر عليها الترينو !  

إذا الحكاية هذي الكل تدل على حاجة برك  صارت بعد 14 جانفي خلاصتها "مات في المدينة كلب قلنا ارتحنا من عواه ، خلف الملعون جروا فاق من عواه أباه" ... 

في النهاية، جمعتين قبل الإنتخابات، وقناة تقوم بالتهجم على حزب وعلى أسسه وتحاول هدمها ... و هذا ممنوع قانونيا ! لذا الواجب أن تتم معاقبة هذه القناة بالقانون ...على خاطر كان ما تمتش معاقبتها نكونوا قد بدأنا في خرق القانون من أول "إتفاق قانوني" عملناه بعد 14 جانفي (وثيقة تنظيم الإنتخابات) ... والسلام 
إقرأ المزيد... Résuméabuiyad