طالع في الدروج ، معبي بالقضية ... تو مروح من "كارفور" والليلة عشا رومانسي مع المدام ، ترقى في الخدمة والشهرية بش تكبر ... علاش لا ما يعملوش سهرية تنسيهم شوية في تعب الأشهر إلي تعدات ، في التضحيات ... تو ملي صارت الثورة المحنونة ، ما عملوش قعدة مزيانة ... مزالو عرايس جدد ، تي حتى شهر العسل ما فرحوش بيه ... هو مغروم بالسياسة وحكايات المعارضة ... وهي ما تلوجش جملة ، وزيد مالي صارت الثورة فقدت الضحكة متاعها ونهار كامل وهي محيرة ...
يغزرلها قدامو ، طالعة تتبختر ، روبة متاعها قداش خارجة عليها ، زايدة فيها الشطر ... تبركالله عليها وعود في عين الحسود ... شكون كيفها ... قربو لباب البرطمان وجبدت هي المفتاح من المحفظة إلي في كتفها معلقة ... قربلها وشم ريحتها ... ريحة بنينة ، كيف مسك الليل في ليالي الصيف ... زادة هيجتلو مشاعرو ... فين يقربلها تجبدو لها وكأنو أول مرة ... هو ما عندو كان هي ، عطاها روحو وحياتو ... تحل الباب ، دزها في الدار ولوح إلي في يديه وقربلها ، ضمها لصدرو ، غزرلها في عينيها ...تبسملها ... دزتو ...
- ما تمسنيش ، ما تقربليش ...
- شبيك ؟
- ما عينيش بش نحكي ...
دلدل راسه و تنهد ... هز القضية ودخل للكوجينة يصفف فيها ... دخلت هي تلوحت في الصالون وحلت التلفزة ... تلقى واحد من الحزب البنفسجي سابقا يحكي وجايب ما عندو ... على أبناء الثورة ، وعلى مشاركته العظيمة في إجتثاث راس الأفعى من البلاد وتدمير دولة الفساد ... سكرت التلفزة وخلطت على "الميسيو" ...
- شبيك متقلقة ؟ عندك مدة ، ما تحبش تحكيلي ؟
- شي ... ما تعرفش خير ...
- شفمة في التلفزة ؟
- واحد مناشد سابقاً ...
- ما أكثرهم هالأرماز ... وجوههم بالكاغت الأحرش ، قول يحشموشي ؟ شي ...
- تي اش عليك فيهم ...
- تعرف نحمد ربي ونشكرو إلي عيلتي نظيفة ... لا واحد طلع فينا قفاف ولا بنادري ... عيلة شريفة عفيفة ...
- إن بعض الظن إثم ...
- لا لا يا بنتي والله كيف ما نحكي معاك عندي "رادار" متاع قوادة ، تي بالعمل في الفاك كانو يعيطولي "الليزر" على خاطرني نخطف "الفيولي" و"الالترا فيولي" هههه
- وكي أنا نقلك راك غالط ؟
- تيه ... تعرف عيلتي خير مني ؟
- لا أما ... أما .... بدات اتمتم وزلقتلو بالشوية "نعرف روحي خير منك ..." ...
ش ش ش شنوا ؟ ... م م مرتي أنا ؟ ... صدمة ....
صدمة عاطيفوسياسوية اصابة مخيخه المعارض البسيط ... يحس في وذنيه تسدو وكأنو غطس تحت الماء ... حس روحو يغرق ، يغرق في المصيبة إلي هبطت عليه ... اش يقولو عليه الناس ؟ اش يقولو عليه المناضلين ؟ اش يقول هو في الندوة متاع الحزب متاعه ؟ و لو أنه حزب كاكوية ... قعد ربع ساعة فمو محلول ...شداد راسه وهو ينيل ... خواطرو دارت و وجهو يصفار مع كل نفس يتنفسو وهو بالكاد يتنفس ... حس بضيق في صدره وحسرة كبيرة بدات تغمره ... تمنى تصاورو متاع نهار 13 جانفي في الحبيب بورقيبة يتحرقو ... تمنى يكون في بلاصت برهان بسيس وتكون الحشمة متاعه مشروعة ... تفكر نضاله الفسبوكي والبلوغ و وأيمات الدبوزة فنتا في الداخلية ... وبدات عينيه تدمع ... مرتي أنا ؟ تهز في ... في ... لم يتمالك نفسه وأجهش بالبكاء ...
وبدات هي تسردلو في ماضيها النضالي ... أمتعتو... شيخة في مخو ... أشنفت سمعه بالقصص حول طريقة كتابة المحاظر ... وكيفاش كان يوصلها الخلاص ... وطرقية تتبع الناس ... وكيفاش كذبت في التقرير إلي يخصه وما قالتش عليه الحقيقة بأكملها ... تمنى في اللحظة هذيك يعدي حياتو في الحبس ... تمنى في اللحظة هذيك بن علي يرجع ...
8 تعاليق:
حلو هاني تعلمت كلمة جديدة اليوم "صدمة عاطيفوسياسوية"
غلّطوه و ما هوش وحدو :) اش عندو باش يعمل؟ يتفكّر زينتها و يغم راسو و يتكب يرقد :))))
très belle note jusqu'à ce qu'elle se refuse à lui :D
je rigole...
bravo comme toujours caliméro pour ce beau texte
yoora501 :
هههه أية أعمل عليها بحث علمي الحكاية وقلي اش لقيت :)
illusions :
هههه ... ينجم زادة ينزل على دواء الفار ههه
venus :
وين حيك ؟ أية باهي كيف عجبتك ... وتذكرنا في تدوينة يا hraba :)
اهلا بعشيري :))
يا راجل ابدعت ههههه ملا موقف بايخ خلاص
شخصيا ما نتمناه لحد، و ربي يعيننا نطويو صفحة الطحين و التقارير و القفة :)
العيدودي بوكشان :
أهل بالغالي :))
أمين ربي يعطينا القوة مع هالمصايب !
تي احمد ربي بالله جات داب هذي باللطف
والا كل شي والا الفيولي ولاالترا فيولي؟؟
^____^
يا خويا يجي نهار وخاف نطلعوا احنا جماعة القفة والطحين وهوما خفاف نظاف
ماعاد تستغرب شي
وشنوا صار مبعّد .. زعمة شنوة غلب الحب وإلّا الانتماء السّياسي ؟
إرسال تعليق
أعطي رايك