السبت، 16 جويلية، 2011

غازات في عينين المعتصمين ... وتزغريط في ديار "المثقفين"



ما لقيتش كيفاش نبدى ندون ، الكلام واحل ومش حابب يخرج ... صعيب ، صعيب علي نصدق أنه في تونس هناك أوباش للدرجة هذي ... حتى العنوان ما لقيت ما نسمي ... وبربي سامحوني إلي حطيت كلمة مثقفين بين ظفرين على خاطر نحطلهم مية ظفر وباقي باهي معاهم ... 

ابدى من الأحزاب إلي حتى واحد لا ندد بالحكاية هذي (بخلاف المؤتمر ، أو النهضة "لايت" كما يحلو لبعض الأذكياء تسميتها) ... وحتى واحد لا ندد بإقتحام المسجد ... وهاك الوجوه (الحرفة) إلي أربعة شهور التالي عملو عيطة على ماخور تسكر و جمعتين التالي الكلها تبكي وتمخط على بلار تكسر ومواطنين كلاو طريحة من عند مواطنين في قاعة الافريك أرت ... و كي تقتل القس البولوني الكلها صاحت فرد صيحة و عرفو الكل بأن "الخوانجية" وراء الحكاية ومش معقول حرية المعتقد تدنس بهذه الطريقة البشعة ، أما كي عرفو من بعد شكون وراء الجريمة تجدهم كالنعام يغرسون رؤوسهوم في التراب حتى لا يعترفون بسوء تقديرهم للموقف ...

أكثرية الناس إلي كانت ضد الإعتصام هذا وإلي مطالبه في أغلبها لفائدة تونس (كيف إستقلال القضاء ومحاسبة رموز الفساد ...) اعتبرو أن النهضة وراء الإعتصام ... ولذا هما اليوتوبيون (نسبتا إلى "اليو توب") شلقو بالعفسة ومهمش بش يخرجو أما بش يناضلو من أجل تونس في بيت  بالكلماتزور ... بش ينتصرو على الدكتاتورية وعلى الخطر الرجعي "بستاتي" يقولوا فيه إلي النهضة تحب تتقلب علينا ... ناس ترضى بأن تتواطأ مع نظام مزال خامج ، أنها تسكر وذنيها على قباحة السبسي وقلة احترامه للرأي المخالف ومن بعد تقول شبيه الشعب يسمع كلام النهضة ...  احزاب تاخذ مواقفها عناد مع النهضة لا أكثر ولا أقل .... ومن بعد يقولوا شبيها النهضة اقتحمت الميدان وكل المنابر الإعلامية ووو...    

أغلبية الناس هاذم (فيهم إلي لم يبع قلبه) ... تشمتو في ألي صار .. في شنوا ؟ في جماعة توانسة كيفنا كيفهم من دمنا ولحمنا كلاو طريحة ولكرموجان في سخانة تنقب الراس ... إي ووين كلاو طريحة ؟ في جامع ... شنية ؟ إي نعم في جامع ... في مكان مقدس ، في مكان على كل مسلم أن يجد فيه الأمان لما يدخله ... ضرب وغازات مسيلة للدموع وسبان الجلالة ... بففف بصراحة ما نجمش نزيد نحكي على خاطر ذكر الحادثة برك يوجع القلب ... بالمناسبة تحية لجماعة "أنا مسلم والنهضة لا تمثلني" ، اليوم أكدتولي صدقكم في القول ... 

ويجيوك من بعد بعض إلي يفهمولها ويبدا يفسرلك ...

- تي هما لواش هاربين للجامع ؟ يستعملو في الجامع لأغراض سياسية (بربي إلي يفهم الجملة هذي يفسرهالي ، عنكش الجامع متحف للمصاحف وأنا ما فيباليش ؟) ... إي أما وين تحبوهم يمشيو ؟ كل الطرق مسدودة ، و القنابل المسيلة للدموع هابطة عليهم ؟ ياخي بأنا حق "رجال" البوليس يضربو ناس في الجامع ؟ "الحجة" هذي تذكرني بإسرائيل في القصف على غزة ، وقتها يضربو في المدارس ويعيطو جماعة حماس الغادي ! 

- إي وشنوا أخر ؟ البوليس حكى معاهم بالسياسة من الأول وقاللهم أخرجو وهما ما حبوش ! عنكشي ماشين يتفسحو غادي مش يعملو في إعتصام ؟ يقتلوني الناس إلي يلوجو في تبرير ما ليس له مبرر ... 

- وعجبني زادة تعليق هذا "كي اعتصام النهضة 3 كلا كبوط .. و كي عرفو الي لوغة "البوليس السياسي قمعنا" و "المندسين" و "المعتصم الي اغتصبوه" ماعادش توكل الخبز ..دوروها توا البوليس يقتحم في الجوامع ..مسرحية جديدة لاستدراج تعاطف الناس .. حتى بيوت ربي تستغلو فيها .." 

ناس ما تحشمش وما تسواش ، هذا شنوا انجم نقوله ... أبهم من من يعتبر منقالة شارع الحبيب بو رقيبة ماسونية ! 

 بالطبيعة التفسير هذا الكل يدور حول فكرة محركة واحدة : إلي يعتصمو خوانجية وبلاصتهم في الحبس ... والعنف هذا الكل شوية فيهم ... 

الحاصل اليوم فهمت أن المسيرة الوحيدة في تونس إلي ما يتصدالها حتى حد هي إلي من نوع "لا للعنف ولا للرجعية" يعني هاك المسيرات إلي حتى ليلى بن علي تهبط تمشي فيهم ... أما رد بالك تبدى تبربش في مطالب تحسن العيشة ، فالويل لك ، تولي نهضاوي وراكب على الثورة ... 

ناس تحب على "العدالة"  وهي في أبسط الأشياء ما تنجمش تعدل ... قلوبها الكحلة وكرهها لحزب النهضة جعلتها لا تسمع ولا ترى ... أما ميسالش إفرحو اليوم وأعرفو أن الدكتاتورية لا تعرف الألوان ... اليوم ليك وغدوة الداخلية تفرح بيك ... إفرحو اليوم وأرقصو وغنو كان لزم ... كي تشوفهم يحكيو على حقوق الإنسان وعلى حرية التعبير تقول الدنيا اتخذت ، والفعايل حاجة أخرى بمجرد أنك تكون ضدهم في الفكرة ... 

أنا فديت من كذبهم ونفاقهم ، فديت من خوفهم المرضي من بعض الأحزاب ، فديت من الديناصورات إلي تحب تحكم بالقوة ، فديت من الصور متع الزوالي إلي يتركل ويتسب ويتشتم و يجي شكون يقول مليح فيه ... فديت من الناس إلي ذاكرتها قصيرة وتسمي القصاص للموتى همجية ... 

هاذم عباد ما تحشمش ، كيفهم كيف البوليس إلي جاء يبكي وأنا بريء وغلطوني وهو كي يلقى العفسة لا يعرف لا كبير ولا صغير لا نساء ولا رجال ، الكلها مواطنين فشخ الكازي وديمة تمشي ... واحنا مش بلعاني وكنا نتصرفو عن حسن نية ... تعرفو "أوديب" شنوا عمل وقت تصرف عن حسن نية ومن بعد فاق بالجريمة البشعة إلي ارتكبها ؟ 

ادعوكم إلى أن تفعلو مثلما فعل أوديب إن كنتم صادقين ...  

abuiyad

11 تعاليق:

Primavera يقول...

I'm glad you're back !

كاليمارو يقول...

شكراً بريمة :) نستنى في صرخة من عندك :)

maliberte يقول...

حممتلي قلبي))

سَـبَـنْـدَى يقول...

بعد ما زادوه 90 دينار في الشهرية على نضالو ضد الثورة يزيد يعمل أكثر من هك، بوليس فاسد ياخذ في الرشوة و فك في ارزاق الناس و يعذب و نهار الكل يسب في الجلالة تو يعرف اش معناها جامع و بيت ربي. هذومة عباد متصلّحش طول حياتها يلزم إطيشوهم في البوبال هوما و عروفاتهم و يجيبوا ناس نظيفة تعرف اش معناتها تونس.

Sameh_b يقول...

أنا نحبك و إنحب كلامك و ما عندي ما نقول خاطر عزّيني نقبل العزاء ليوم نبكي و إنمخط!! ما قهرنيش الضرب و قمع البوليس في أولاد بلادي خاطر شيء عادي ستانست بيه كان قدّام ستاد و إلا في مظاهرة اللي قهرني شماتة أبلا طازا فينا

Royaume Mélancolique يقول...

chapo bas ^_^

Lili يقول...

السلام عليكم و رحمة الله،
أولا يعطيك الصحة على التدوينة ،
ثانيا باش نحاول نعطي رأيي البسيط و نكون موضوعية قدر الإمكان ( يمكن تلقى برشا تكرار ) :
الإعتصام كانت مطالبو مشروعة و إذا كانت النهضة هي الي نادات بيه ما يلزمش النقطة هذي تطرح أي إشكال إذا كنا فعلا نناديو بالعدالة و الديموقراطية و لا نتهموها بالركوب على الثورة ( ما فهمتش شنوة لازمها تعمل النهضة باش ما نأولوش مواقفها تأويل فاسد ؟ )
الشماتة عيب، مهما كان الشخص و الحزب، إذا كانت الطرق سلمية و منظمة.. و هذا إن دل على شيء فهو يدل على أنو الناس تاخذ مواقفها على حسب أهوائها موش مع الحق ، كيف ما قلت إنت "ناس تحب على "العدالة" وهي في أبسط الأشياء ما تنجمش تعدل " ... و بالعكس لازم نشكروهم خاطر في الوقت إلي الناس حافلة في العروسات و و تتشخلع في الشواطىء ، هوما يخممو على مصلحة البلاد و مستقبلها ...
آني حسب اللي فهمت إنو المظاهرة هذي ما خذاتش ترخيص هذاكا علاش تصدالها الحاكم، أما للأسف بأسلوب شنيع، موش عارفة وقتاش باش تبدل أساليبها ها الحكومة و وقتاش باش يترباو :/ وقتاش باش تكون كرامة التونسي محفوظة ؟
ما نستغربش إنهم ما يحترموش لا جامع ، لا كبير لا صغير ،خاصة إنو عناصر الشرطة أغبهم ما تبدلوش و نعرف بالباهي شنوة ينجمو يعملو ... و فعلا الفيديو إلي تفرجت فيهم وجعولي قلبي و حسيت بنوع من الإحباط ...
لكن حسب ما لاحظتو إنو قاعدين ناخذو المسألة بنوع من العاطفة المفرطة و إنو هذية حرب على الإسلام وهاك الحديث، بالطبيعة إقتحام مسجد و الهجوم على المصلين الي ما عندهم حتى دخل في الحكاية، مصيبة و مافيهاش حتى أدنى إحترام للمقدسات و لا للناس، خاطر العباد إلي تظاهروا مظاهرة سلمية ناس واعية و مثقفة و تفهم بالحوار موش لازم منو ها العنف الكل و و فوق كل شيء في بيت من بيوت الله !
أما شخصيا نرى إنو تم توظيف الحادثة لغايات أخرى ، كيف ما تم توظيف حكاية القس و الهجوم على السينما باش يخوفو الناس من الإسلاميين ..

بالنسبة لاستغلال الجامع لأغراض سياسية بخلاف الي صار البارح إلي حسب رأيي ما ينطبقش عليه، ما يلزمناش ننكرو إنها ظاهرة موجودة، و فعلا كيف تسمع خطبة الجمعة تفهم ساعات إنو الإمام تابع للنهضة ، كي يقول " الناس تحب تشوهلنا سمعتنا خاطرنا قريب نوصلو للحكم" ظاهرلي ما تحتملش 20 تأويل، كي يقول الإنتخابات قربت برا قيدو أساميكم و نحنا قبلتنا مكة و هوما قبلتهم الأمريكان و بني صهيون ما نعرفش على شكون يحكي و لا لشنوة يلمح ؟
واستغلال المنابر و الحجج الدينية لإستعطاف الناس آني نشوفو "لعبة قذرة" ، كيف نسمع مورو(رغم الي ماعادش مع النهضة) يغني على قناة فرنس 24 و نقرا في جريدة الشروق ( الي نقلت الخبر من صحيفة التايمز البريطانية ) كيفاش الغنوشي يقول ماحناش ضد بيع الخمر ، نشوف إنو قاعدين يميحو مع الأرياح باش يوصلو للسلطة، إذا إنت مسمي روحك حزب إسلامي وإنو هدفك رفع راية الإسلام و تحكيم شرع الله لازمك تقول كلمة الحق و تثبت على مبادئك مهما كانت العواقب ... ظاهرلي حكيت برشا و خرجت على الموضوع ...
ربي يقدر الخير في ها البلاد و الله لا يرجعنا لعصور الظلمات ... و توا نشوف السيد السبسي آش باش يقول المرة هذي ...
و السلام

Lili يقول...
أزال المؤلف هذا التعليق.
Lili يقول...

"أما شخصيا نرى إنو تم توظيف الحادثة لغايات أخرى ، كيف ما تم توظيف حكاية القس و الهجوم على السينما باش يخوفو الناس من الإسلاميين ..
بالنسبة لاستغلال الجامع لأغراض سياسية بخلاف الي صار البارح إلي حسب رأيي ما ينطبقش "

حبيت نفسر ها الجملتين خاطر يظهر فيهم تناقض :
حبيت نقول إنو لجوء المتظاهرين للمسجد باش يتخباو من القنابل المسيلة للدموع ماكانتش وراؤو حتى نية حسب رأيي
أما حسب رأيي زادة تم توظيف هجوم الشرطة على المسجد باش نقولو إنو هذي حرب على الدين و المسلمين ...
آسفة على الإطالة، قلبي معبي :P

كاليمارو يقول...

ma liberte:

ميسالش يهون على خاطر تونس ، اللطف عليك :)

سَـبَـنْـدَى:

ACAB كيف ما يقولوا ، شكراً على مرورك وعلى التعليق :)

Royaume Mélancolique:

مرحبا ، نوار البلوغ :)

Sameh_b:

الحب مش مقبول ما عندوش مبرر ، أنا نحب العرق والسبان :p الله لا يفرحها نهار طازة ولا اش اسمها :)

كاليمارو يقول...

LiLi :

وعليكم السلام ورحمة الله ،
شكراً على تعليقك ، تنجم اطول قد ما تحب الدار دارك وفرغ قلبك ، المفيد تخرج من هنا فرحانة :)

حكاية الترخيص متاع الإعتصام فيها وعليها ، فما شكون يقول أنهم عندهم ترخيص وفما شكون يقول لا ، المفيد أعتقد شخصيا أن الإعتصام ينجم يكن بدون ترخيص خاصة وأنه ليس من الممكن أن ياخذو ترخيص لو كان المطالب في أغلبها ضد سياسة الحكومة ...

في ما يخص توظيف حادثة المسجد أنا نشوفها "مشروعة" بمعنى أنه كنت هناك شكوك في طريقة تعمل أطراف معينة مع قضية الحرية الدينية ، وبالحادثة هذي تأكدت الشكوك ... ما نعرفش لو كان رأيي واضح هكا ؟؟

بالنسبة لحكاية إستعمال المساجد أنا معاك في "الإشهار لحزب معين" ... أما نعتبر من واجب الإمام أن يدل المصلين على ما فيه خير دينهم ودنياهم في إطار الشرع ... يعني أن يقول مثلا " أنا أرى أن اللائكية ضد الدين " أو "أنا أرى أنا اللائكية والدين لا يتضاربان" فهذا حديث في السياسة في مسجد أما الغاية منه هو نفع المسلمين ولا أرى علاش برشة ناس تحب ترفضه ...

بالنسبة للنهضة حزب إسلامي ، هي تعتبر نفسها حسب ما يقولوا حزب مدني ، يحافض على ألهوية الإسلامية للشعب ، والدين له مرجعية أخلاقية قبل عملية ... يعني حسب ما فهمت أن المشروع متاعهم إصلاح المجتمع و-"تحضيره" إلى خطاب ديني متكامل (كيف ما يقول الجبالي "يجب مصالحة الشعب مع دينه")... هذا مش دفاع على النهضة ، أما حبيت فقط نوضح ما فهمته منهم وكان غلط صلحني :)وكان عند مؤاخذات على النهضة فهي في مجالات أخرى ...

بالنسبة لحكاية الوصول للسلطة ، للأسف الأحزاب الكلها تلهث وراء الكرسي :/

وربي يقدر الخير ...

إرسال تعليق

أعطي رايك