الأربعاء، 23 فيفري 2011

صبراً يا أهل الجماهيرية

 
البارح بكيت والليلة إلي قبلها زادة ... بكيت وتذكرت روحي وأنا نضحك على النكت متع الليبي البهيم ... تذكرت نهار إلي حكيت مع ليبي وقتلو أنتم انكتو عليكم في تونس ... بكيت وعرفت قيمة الشعب الليبي ... عرفت معنى الرجولية الليبية ... معنى الثورة الليبية ، معنى حب الأرض والعيش من أجل الكرامة في ليبيا ... 

البارح بكيت ... على خاطرو شعب أعزل ... شعب منسي ... شعب مسالم ... شعب بالحرية أصبح حالم ... بكيت من المهبول إلي يقتل فيهم والعالم ساكت يتفرج عليهم ... لأنها هذي مش أرواح عباد ... هذي جرذان كيف ما قال أكبر حيوان ... هذي كلاب مكلوبة ، تستعمل في المخدرات ... نقتلها حتى اخر عرق، وننساو إلي فات

البارح بكيت ... لأن الليبي ما عندوش زهر ... من إستعمار الطليان إلى حكم المخنان ... الجبان ، "قاهر الأمريكان" ... بكيت لأنو سبهم وسبلهم أصلهم وبعد ما قتلهم وشتتهم مازال مصر ... يحب يقتل ... عطشان ... يحب يشرب دم ... و يدوزو باللحم ... راس الهم ... قتلهم قبل وقتلهم اليوم ومازال يحب يقتل ... قتل و  في الكرسي مكبش ما حبش يتقرقش ...

أنا البارح بكيت ... لين مليت وجفيت ... بالقهرة غصيت ... كي سمعتوا يتكلم حسيت باختناق ... كلام فخر ونفاق ... حطيت روحي في بلاصت الليبي ... شفت الأبدان قدامي مفلوقة ... والرضيع كيفاش كبدة أموا محروقة ... بكيت و فهمت علاش سماونا ثورة الياسمين ... فهمت أن الحاكم العربي يمشي في بالو الشعب ملكوا ، يتحكم فيه كيف ما يحب ... يسبوا يشتموا يضربوا يقتلوا ... حاجة عادية لأنو ملكوا... يهلكو ويهلك إلي يصفقلو

أنا البارح بكيت وانيت ... ودموعي جريت على الروح العربية الرخيصة ... أما يجيك نهارك يا قذافي ما خرجكش الشعب الليبي ... يخرجك شعب تونس وشعب مصر ... لأنك سفاح ولا تستحق النصر

abuiyad

9 تعاليق:

مسلمة يقول...

يجيك نهارك يا قذافي ..عاجلاً وليس اجلاً ان شاء الله ...

كاليمارو يقول...

أمين ...

تهبط عليه قنبلة ملي يلوح فيهم ... تقسلو صبعو وتحرقلو شعرو... يجي يخسل وجهو يطلع الماء مسموم يعميلوا عينيه ... يدهم في الفرش يضرب صبع ساقوا الصغير ... وهو شادو يعفس على مسمار بساقه الأخرى ... يطيح يجي في سطل وتحتو قطوس جيعان عندو جمعة ما كلاش ... يبدا يصيح ويعيط ... يقوم يجري والقطوس مكبش فيه .. يخرج للشارع ترفعوا كار تنحيلو ساق ... يقعد يحبو في الصحرا لا ماء لا طعام ... أربعة أيام ...

أية كمل الفيلم وحدك (مغير ما تقتلوا عاد)

AlKhottaf يقول...

انشاء الله نهايتو الجمعة هذي قبل ما يزيد يعيث فيها فسادا. باش تكون اشنع موتة في التاريخ على الجرائم اللي ارتكبها هالسّافل ...

illusions يقول...

موش كان انتي بكيت، لكلنا بكينا مل القهرة و الاحساس بالعجز، كل واحد منا تمنى كان جا ينجم يشد خناقو، يطلعو من التلفزة و يقتلو، يرتاح و يرتّح منو شعبو. الواحد يغلي و هو يستنى يسمع خبر يقول الا فما شكون وصلّو وسكّرلو فمّو.
بقلوبنا معاكم يا ليبية، نعرفكم طيّبين اما قدام القهر ما عادش تنجمو تقعدو ساكتين، الي دفعتوه من دمكم غالي اما اجيه نهار قريب، وي خلّص القديم و الجديد

كاليمارو يقول...

الحطاف :
من فمك لربي يا خويا ... أاامين

اللزيون:
نعرف إلي كلا على قلوبتنا وشرب الكلنا بدون إستثناء ... لأن هاذم اخوتنا ، يتكلمو لغتنا ، ويجيونا ونمشيولهم ... النذل الواطي القذافي المسخ ... أكثر حاجة مخوفتني أن يضيع الدم لكل ويرجع يتربع على الكرسي ويأخذ منهم ثارو.
وأكثر حاجة اتمنى أن أراها هو رأسه في التراب ويطلب السماح من شعبه.
شكراً على مرورك :)

Yosri يقول...

أنا زادة البارح بكيت و قبلو بكيت و توا كي قريت تدوينتك زدت بكيت .... بكيت من الظلم و القهر ... بكيت على روحي كيف كنت نضحك على الليبية .... غلطوني ... الشعب الليبي كبير لكن مظلوم و مقهور و ما عندوش زهر ...
أما لا ... اليوم يوفى الظلم ... اليوم ننتصر أو نموت ... لكن نموت شهداء ... نموت احرار ... ربي ينصرنا وينصر اخواننا في ليبيا و يثبت اقدامهم

Imène يقول...

قلوبنا مع جارتنا ونشالله تونس وليبيا الزوز احرار

مواطن مصري يقول...

قلوبنا مع شعب الليبي الحر ابناء عمر المختار
بس ياريت القذافي ميتقتلش نجيبة يشتغل في السرك
القومي يملك موهبة الكوميديا ممكن يشتغل اراجوز
ربنا مع شعب الليبي و بقية الشعوب العربية

كاليمارو يقول...

يسري :

الله يهلكوا القذافي بكى العالم الكل ومش حاب يسلم - شكراً على تعليقك الحلو

إيمان :
آمين :)

مواطن مصري :

مرحباً بك صديقي وأخي المصري :)
اللهم ينصر كل العرب ويوفقنا وإياكم إلى بناء البلاد على الخير
هههه ... القذافي إن ذهب سوف يكون أكبر خسارة في الفكاهة العربية !

إرسال تعليق

أعطي رايك