 |
| شادية رشدي |
البارح وأنا نتفرج في السبسي ، إستغفر الله ، نتفرج على السيد الوزير الأول للحكومة "المؤقتة" ... حسيت روحي قدام عبد العزيز العروي ... بابا الحاج بهيبتو المعتادة محلق في وسط الصغيرات ولاهي ينكت وبالطبيعة ساعة على ساعة يجبد أية قرأنية ثماش ما يبهرهم بصدق قوله
السبسي يبدى بتهمة كبيرة يوجها للراجحي ... فاسق ... الفاسق هو من خرج عن الملة ... فالفسق والكفر يجيو في نفس المرتبة عند الله بحيث يقول (وكره اليكم الكفر والفسوق والعصيان) ... وبالمناسبة سي الباجي نسى أن يتفكر قوله تعالى " هل يستوي الذين يعلمون والذين لا يعلمون " و " هل يستوي الأعمى والبصير"
هجمة شرسة على الراجحي ...بالمناسبة كلام الراجحي لا يلزم ناخذوه وكأنه قرأن أو نضربو به عرض الحائط ... كلام فيه وعليه ... أما الحاجة إلي موش فاهمينها برشة ناس في الحكومة وإلي مسندينها أن الراجحي قام "بتأكيد" بعض الشكوك وإعطاء بعض الأجوبة (سواء كنت اجتهادات خاطئة أو معلومات صحيحة) لبعض تساؤلات الشارع التونسي ... و هذاك علاش لقات إستجابة كبيرة من الناس ... ربما النقطتين إلي غشو بابا الحاج هما أن الراجحي حكى على اللطيف وقال بأن الجيش ينوي تسلم الحكم في حالة ما إذا النهضة ربحت ... لكن هل هذا يفسر المنطق العادم إلي ستعملو البارح ... ناقص كان باش يحكي بما تحت الحزام
إذن قلت هجمة كبيرة بمنطق متاع باندية بحيث إستعمل سياسة "كف وكعبة حلوة" مع الصحافيين إلي مانيش باش نحكي عليهم لأن الناس الكل تعرفهم ... نحب نقول هما يستحقو الكلاط أما موش من عند السبسي لأنها موش مهمتو ... شنية إكتبو وأعملو هاي ولات تسخير الصحافة لخدمة الدولة عيني عينك ... ومرة على مرة يرميلهم كلمة حلوة وتشوف عادة هاك الإبتسامة العريضة تعلو على وجوههم فخراً وإعتزازا بما حققوه من تميز في ميدانهم
من بعد السبسي اتحفنا بجملة من الأكاذيب (زعمة تذكر هنا الأية إلي بدا بها اللقاء متاعه ؟) ... ومن أجملها هي أن رشيد عمار قائد أركان الجيش عظم الله أجره لبس "كوستيم" ومشى لقطر يلوج كيفاش يركحهم على مشروع إقتصادي هايل يطير بإقتصاد البلاد ... بحيث فكرني في التدوينة السابقة وهاك المقولة متاع "أنا بهيم والشعب التونسي لا يمثلني" ... الراجحي خرجوه على خاطر حط مدير حرس وطني من عهد بن علي ... إذن نقيلوه ونحطو الصيد وما ادراك ما الصيد ... بحيث مازال يبرئ في اللطيف إلي بفمو قال إلي هو يخدم في السياسة تحت حس مس ... وباش يكمل الفيلم متاعه يدعو الناس إلى التحلي بالرجولية وألإتجاه إلى القضاء ورفع القضايا ... وكأن القضاء أصبح مستقلا ... وبالطبيعة أشار إلى بعض الأحزاب إلي قاعدة تقود فينا بالسلاسل نحو الديمقراطية والحرية ... التجديد والبي دي بي ... وهذي حاجة ما تجينيش غريبة منهم الثنين .. بحيث بقية الأحزاب "أين أنتم ؟"
القناصة ما ثماش ... بحيث حتى من الراجحي الفاسق موافق معايا في هذي ... الشعب التونسي الكل خرف و كان يحلم وحتى إلي شدوهم (ما إسمهمش قناصة) تحاكمو ... إي قداش تحاكمو ؟ ووقتاش ؟ أساميهم ؟ وشنية التهمة إلي توجهتلهم ؟ ... و هاذم فيسع تحاكمو وتبلعو في الحبس والأخرين تولي العدالة تاخذ مجراها ؟
سؤال بعد ما تبينا أن السبسي يكذب ... مزال شداد صحيح ويحب يحاسب الراجحي ؟
الحاجة الوحيدة إلي عجبتني (مش برشة) في الخطاب وقت حكى على معرفتو للدولة ومفهومها ... صحيح عندو خبرة ويعرف الداخلية ولكن هذا ما يعنيش أنها حكر على الشياب ... بحيث كان ينجم يحط إنسان عنده شخصية قوية قادر على تنظيف الخمج والعفن الراسب منذ سنين
سامحوني راني مزلت دايخ ، صبحت عند الطبيب ، قريب ننسى إلي البوليس متاعنا طلع عندو مشكلة نفسية ... والله سخفوني مساكن قريب نتبرعلهم بلحمي يفشو فيه غلهم بحيث يسترجعو بالتالي كامل هيبتهم ... يمكن من زيادة الشهرية إلي خذاوها بفضل الأش وميتين شهيد مرضو نفسياً ... يمكن زادة على خاطر قعدو مديدة ما يسمعو في الناس تحكي بحرية وتقول عليهم إلي هما موش وطنيين وكلاب ... ونساو هما الكلام الحلو إلي يستقبلو به المواطن في المراكز بخلاف عادة كيف تبدى عامل عملة ... بالمناسبة هاو قلك الصحفي باش يولي لابس كسوة خاصة حتى يتمكن البوليس من التفريق بين الصحفي والمواطن ... بحيث ما تتلزش الداخلية وتطلب السماح من الصحفي على خاطر مشى في
بالهم مواطن
بالهم مواطن
9 تعاليق:
*كلام الراجحي صدمّ السبسي و رجال السياسة الكلّ خاطر خرج على اطار الشيفرة اللّي يحكوا بيها جماعة السياسة و يوصلوا بها مسجات لبعضهم يفهموها كان هوما
*حكاية القنّاصة من الواضح انهم اعوان امن تابعين للداخلية معناها كان يتجبدوا تولّي مشكلة حتّي في القواعد متاع اعوان الامن يقولوا فاش قام احنا طبّقنا الاوامر قبل 14جانفي و بعد 14 الحكاية وقع تهويلها لاخافة الشعب و مقايضة الامن بالحرّية
*اللوبي الاقتصادي او العسكري يتدخّل في السياسة حتّى في انجح الديمقراطيات اما عندنا ثمّة اختلال توازن و حتّي الاحزاب تحبّ تكسب نقاط ضدّ الوبيات هاذي
*التوجّه العام متفاهمة فيه الاطراف الكلّ : الجيش و الحكومة و رجال الاعمال و الاحزاب المؤثرة و هو انتخابات مجلس تأسيسي في اقرب وقت معناها مثماش بدائل
بالله على حكاية رشيد عمار والعلاقات الاقتصادية مع قطر
عاودو اسمعو 3 دقايق لوالى. اجابة على سؤال شمشى يعمل سي رشيد عمار في قطر
خلاصة لي قالو، قال جاتنا زيارة من عند قطر ومشى سي رشيد عمار رجعها مع عرفو وزير الدفاع في اطار التعاون الكبير مع قطر، وكي حكى على التعاون الاقتصادي ماهو الا مثال على التعاون لكبير بين البلدين فقط.
أما لعباد تتلكش وكهو.
وتنجم تشوفو في قطر شقالو على الزيارة :
http://www.alarab.com.qa/details.php?docId=184921&issueNo=1226&secId=16
http://www.alarab.com.qa/details.php?docId=185076&issueNo=1227&secId=16
http://www.alarab.com.qa/details.php?docId=185214&issueNo=1228&secId=16
أكثر من هكا حكايات ما تخصناش.
Ahou Lien lil Video lilli y7eb ythabet : https://www.facebook.com/video/video.php?v=159700844094747&oid=120438101326827&comments
ama juste la3bed mat7bch tsma3 rahou ..
pour 2/ par exmple c'est pareil .. Ce n'est pas vrai aussi BCE ma9alsh qu'il a viré Rajhi PARCEQU'il a désigné un directeur de sureté nationale RCD mais plutot parcequ'il ne sait pas comment ça fonctionne ..et il l'a désigné wa7dou ..et ça ne se passse pas comme ça .. pour RCD ou nn c'était juste une remarque et Rajhi wa7di a dit dans l'une des Vidéo qu'il ne connait pas chkoun RCD ou nn .. mais la raison donné par BCE c'est que son travail n'était pas assez w ma3dhour ..
c'est 2 pts juste pour montrer que barcha 3bed mahuich 9a3da tsma3 f ce qu'il est en train de dire réellement ..
A part 3ad 7kayt l9annasa bizarrement 7ad matkalm ki 9al Raj7i mafamch .. w ki 9alha BCE.. tkalmou la3be dlkol whabtou les video w tsawr etc. . 7asilou.. ma9oltch li 3amlou était parfait wla li 9alou non plus mai 9al zeda ghlot w taw na3ml cellule d'information etc w 9al lil les journalistes merci li t3lmt minkom et tt ca .. famam lbahi wl5ayeb ama la3bed 5arjet kan l5ayeb w mem labhi minnou 9ratou kaynnou 5ayeb ..
enfin, c'est mon point de vue :)
يسلم قرايتك.قراءة موضوعية أما فما نقطة أخرى هايلة في تصرحات سيدي الباجي ربي يبقية ألا و هي أحنا توانسة ما نشوفوش بيه. وزارة الداخلية و ماندراك اعتدرت للصحفيين و هادي حاجة عمرها ما تصير في العالم أجمع لدا يا توانسة يلي ما تشوفوش بيه اتقوا مولاكم واحمدوا ربي ليلا نهارا علي عطاكم خير ما نوليوا كيزملاءا الرؤساء لعرب لخرين. و آخر دعوانا أن الحمد لله بحيث فايس كدا و فهمتلا و ربي يعفينا من كل الأزمات النقدية منها و النفسية
بالنسبة ليّا خطاب السبسي و كلام الراجحي الزوز فضيحة
الطبقة السياسية مازالت تتعلم كيفاش تحكي
لازم السب و التجريح و الشتم
ملّا حالة
حوار متاع ساعة ماتخرجش منّو بنتيجة ولّا موقف واضح
كي نشوف الناطق الرسمي باسم البيت الابيض ولّا اردوغان ولّا وزير في بلاد متقدّمة الكلمة بحسابها و المساج مضمون الوصول موش عندنا لازمك كريبتاج و تكسير راس باش تفهمهم
شي يخلق احساس بالتأخر هههه
walahi baradtli 3la 9albi bi1 dit
أيا هو بش نفتتح بيك يا كاليمارو وأول تعليق عندك xD يعطيك صحة في كل المواضيع مبدع وفنان
وكانك على عمو سيسبي عادي إلي يشد سلطة يولي مريض بداء العظمة والكبرياء و الغرور و حب الشهره والاضواء
Bouk Essebsi jadet 3allih el hadra we 9al chnya c'est notre père kima le père de la nation le5er elli 5alelna ZABA ama yebta ena baba we fedda mennou
شكراً على تعليقكم الكل وردود الفعل جميعاً ... وعلى الإضافات متاعكم ...
أحمد :
ما ثمة حتى مشكل ولو مش متفقين في الرأي مرحبا بيك ... بالنسبة للحكايتين ، رهو كل واحد كيفاش يحلل الكلام وأنا إلي غاظني هو الكذب أكثر من أي حاجة أخرى ... وكيف تجي تشوف علاش حتى واحد لا تكلم على القناصة وقت تكلم الراجحي ؟ على خاطر قال حاجات أخطر ببرشة بكل بساطة ...
وأنا متفق مع عبد القادر الزوز خطابات داخلين في حيط ... وربي يقدر الخير
إيمان وسوزي وسماح وتش ... ربي يخليكم وشكراً على مروركم
يعطيك الصحة في هالتدوينة الخفيفة،المفرهدة و المعبرة برشة.
عمك بجبج بلاصتو في مأوى عجز لا أكثر لا أقل، يفكرني بهاك الشياب الخرنانة الي يهيجو في كبرهم... خلي عاد عمك فوفو حدث و لا حرج، ما فاهم شي يجيبوه يقرى ورقة كي يحبو يبدلو الجو، سينون هو هكة ولا هكة عايش في عالم آخر، تلقاه عندو زهايمر ولا برّا لوج..
جوست عندي ملاحظة صغيرة (بما أني ما انجمش نشد روحي) ، المغنية الي ذكرها بابا الباجي هي شافية رشدي و ليست شادية، مغنية تونسية من وقت شبابو هو، كانت صليحة تخدم عندها، و كانت السبب غير المباشر في اكتشاف موهبتها. (التصويرة الي حطيطها هي متاع شادية المصراوية متاع عبد الحليم في حاجة غريبة و مسرحية ريا و سكينة الخ و هي أصغر ببرشة من شافية هههههه )
افهم وحدك في آناهو عصر عايش السيد....
إرسال تعليق
أعطي رايك