الأربعاء، 11 ماي 2011

كيف نتذكر بوب ولد المارلي





اليوم باش نحكي في موضوع بعيد على الثورة والسياسة والغفاصة ... اليوم باش نحكي على الذكرى 30 من رحيل صاحب الفن الجميل ... روبارت نستا مارلي الملقب بال"بوب مارلي" ... 
اييه يا حسرة كيف كنت مغروم بالبوب وصوتو ما يفارقش مسمعي لما كنت صغير ... يا سيدك ملي نقرا في الروضة كان السيد الوالد يحط البوب في الدار وأنا تلقاني نسمع ونتبع وهو في حقيقة الأمر نخرم وحدي ... كنت نثبت مليح على الغناية هذي :


كنت وأنا نلعب في الصدار نبدى عامل كيف عليها ... امشي يا زمان وايجة يا زمان ، كان عندنا حانوت كاريه واحد حجام ... السيد كان حوات (أما موش صاحب الراجحي) ورستمان ... حياتو للبوب واتباعه ... كان في الدخلة مصور تصويرة البوب وفي كل تركينة عندو صنبة متاع البوب ... وداهن الحانوت أحمر وأصفر وأخضر و المنشفة متاعو عليها علم الجماييك وبالطبيعة أعفيكم من التفاصيل و شنوا يعمل كيف يجي الليل ويسكر الحانوت ويحط الفن الجميل ... 



كان هو إلي علمني كل ما يمت بصلة للريغي والرستفاري ... وزاد حبني نهارت إلي هزيتلو كسات قديمة ولقا فيها غناية كان قلب عليها الدنيا وما لقهاش ... وبزهرو الغناية كانت كل شطر في "فايس" متاع الكاسات ... 



من ثمة وأنا بديت نبحث وحدي في العالم متاع الريغي ... كنت في ألسنة سابعة لما عملت "كلاسور" ونحط فيه الكلمات متاع الغنيات ... ونثبت الصيف إلي بين السابعة والثامنة خدمت فيه مرمة ... كنت خدمت مع بياض يدعى "شقلاب" وفي الأخر قلبني في عشرة لاف لتو نسالهالو ...  عدة سيف كامل وأنا من قرقاش لقرقاش ، ومن قصدرية دهن لقصدرية السرفاسير باش في الاخر دبرت تفتوفة شريط بهم "بافلوات" كبار باش نسمع بهم الفن على أصولو ... 


والتنبك متاع الغرام عام التاسعة ... قرا معايا صديق حميم ليا كان يعزف الغيثار و أنا كنت نغني البوب ... وزيد قراني أستاذ انكليزية مغروم بيه ... كان العام محصور بين "البافلوات" .. دار صديقي والحصة متاع أستاذ الانكليز ... وعامتها تفرجت نهار في فيلم على قناة ألمانيا نسيت اسمها وأخر الفيلم حطو غناية البوب ... من يومها وأنا وليت نعتبرها أقوى غناية متاعو ...



وصلت نرقد فوق الطاولة ... راسي فوق الكتاب إلي يحكي على قصة حياة البوب وبافل من اليمين والأخر من اليسار ... كنا أنا وصديقي نصورو راس البوب على ذرعاتنا ونبداو شمخانين تقول اش عاملين ...  هبال قعد متبعني سنين ولو أنه نقص كيف وليت في الليسي وتغرمت ب"بنك فلويد" و-"داير ستريت" و كذلك الفن الشرقي من أم كلثوم وفيروز ، ماجدة والعديد من الأسماء ... الهبال قعد يجري في دمي إلي خلاني في ألسنة الثانية متاع الجامعة نعمل شعري "دريد لوك" كيف البوب ... أما كانت تجربة قصيرة لأني بعد ما قديتو ما حملتش اللهوة بيه ... جوجمة ... وليت عملتها قرعة عالمية شاخو فيها صحابو ضرب ، لا تربحهم  ... 

تو انجم نقول أني معاش مغروم برشة بالبوب أما باقي عند نوستالجي للغناء متاعه وساعة ساعة نحط نقشة نوسع بها بالي ...     

abuiyad

6 تعاليق:

Her Highness ~ صاحبة السموّ يقول...

نستخايل فيك شعرك درادلوك و ما نعرفش علاش يشدني فورير ههههههههههههههه

كاليمارو يقول...

ما نجمش نحط التصويرة (سري للغاية ههه ) أما بالرسمي تموت بالضحك هههه ... أما القرعة هي إلي مقتل ضحك أكثر

Michmécha يقول...

Ö 7abitik fi galbi :))) 7ata éna kont mahboula bih!! w en plus iatla3 3lia j'ai le matériel qu'il faut cha3ri mahboul w t9oul 3lia dima cheykha fi mokhi!!!jawi a7la jaaaaw :))))

كاليمارو يقول...

lol ... tiens une rasta cachée :) aya wa9tech na3mlou ga3da 3la al7an albob ? :D

sakkouhi يقول...

Article blida... wallahi dha77eketni w 5arrejtni m'estress mte3 el bolitique wel 3sab ... ana n7ebbou barcha Bob ... berjoulia 3andou jaw spécial... ana w awled el 7ouma se3a se3a na3mlou 9a3da 3alamia.... w nasm3ou Bob w Pink floyed w gary moor .... Jaw kbir ya 3omri ... ya3tek essa77a :)

Mohamed Amine Maaloul يقول...

Aaaah yal Bob
Surtout Ghnéyét : Buffalo Soldier

إرسال تعليق

أعطي رايك