الأربعاء، 1 جوان 2011

الجنود الأربعة

Les quatre mousquetaires


قلك يا سيدي ثورتكم قادوها أربعة جنود مسلحة ... إي نعم أربعة لا خامس لهم ... حتى صوابع اليدين أكثر منهم ... قلك ناس قويين قويين يلعبو في الفينال متاع "الشامبيونز ليغ" ... اش باش تقارن بالديفسيون 15 متاعك ، حتى جرد سبادري غزالة ما لقيتوهش ... هو ألحق يقال فيهم شكون يعطيه الصحة ولا نقاش في مشاركته الفعالة في الثورة وفيهم شكون غلط وتعامل مع "الشيطان" أما هذي حاجة عادية ، الإنسان يغلط ويتصلح ... أما طلعت معاهم "جندية" الله أعلم منين جات ... ربما كانت  من جنود الخفاء ، تخدم وراء الشمس ... قلك كانت تخدم دور تنسيق ... تنسيق متاع شنوا ؟ تي لواه تلوج إنت ، اش تفهم منو ، عالم البلوغسفير كبير على مخك وليه اماليه ... ماك إلا مدون جديد ، وزيد متخبي تحكي بإسم مستعار ... 

عادة الجندية المغوارة متاعنا ما شفناها لا في تونس ولا في حنبعل ، منين جات ؟ الله أعلم ... إي تي مش طلع عندها بلوغ تحكي فيه على الديمقراطية باللغة الفرنسية ؟ امالا وينك تحب تمشي "لقنال بليس" بالدارجة واللغة التنبيرية متاعك ؟ تحب تنبر برا لوج مدون وجه 
 لوح كيفك كيفو وشد ركرك التاي معاه في خربة من خرب تونس الخضراء وعيثو فيها تنبير وحتى تبندير ... اش كون يلوج عليك ؟ طز كما قال المثل الأعلى لقادة الثورة ... نرجعو للبلوغ متاع الديموقراطية ، قلك تعمل نهار 18 جانفي ، 4 أيام بعد 14 جانفي ... ركزلي على عدد 4 سيدي خويا ... اللعبة فيها اعجاز رقمي على ما يبدو ... بحيث ما فهمتش كيفاش دور التنسيق إلي كانت تلعب فيه حاملة سيف الحرية ... كاسرة صنم الطاغوت ...  

أما عادي ، نورمال "الثورة" متاعنا طلع قلبها كبير وحنينة المغبونة ... اش تعمل لعمرها ... ما تروفز حتى حد ، إركب واتمتع  ... وعادي ... في نفس الوقت الشهيد البارح في الليل في الجزيرة يستهان به ... تي البوعزيزي قريب يولي أكبر مجرم في تونس ، باندي ما يتقربش ... تي هو البوليس طلع مسكين مظلوم وعندو عقدة نفسانية الكازي ... زادوه في الشهرية وباقي معقد ، قلك كيفاش كيفاش تحرمو عليا لحم المواطن ... وزيد المواطن ساقيه طوالت ولا يطلع فوق السطوحات ويدمغ فيهم بالياجور ... والقناصة ، هذي حكاية أخرى يا راجل .... تي ماهو طلعو إشاعة ، وما نعرفش أنا المدة الأولى متاع الثورة الجيش في شكون كان يشد ...

و عماد الطرابلسي تي ماهو مسكين ضرب عامين حبس ، اش باش يعديهملو ... وزيد عايلتو الكل تتعذب بعيد عليه في الخليج ...برا نزيدو نرقدو الأحكام الأخرى حتى ينسى الشعب ... تو ثمة ما أهم وما أخطر ... ثمة نبيل السعداوي حي يرزق يجري ويبرطع في شوارع تونس ، يد على القلب ويد فوق الحزام الناسف المخبي تحت مريوله الأزرق ... تو ثمة ما أهم ، فروخ في الفايسبوك تعمل في الفتنة ، تي امالا وينك ؟ هما أخطر من محاكمة السرياطي و عبد الله القلال ... تي مش حتى هو عمل أرتيكل وطلع نظيف وزوالي وخاطيه ... عندنا ما أخطر جماعة تكريز وأبوهم الروحي جلال بريك ... عندنا يوسف كابوت يلزم نسكتوه على خاطر هو يقلق الثورة أكثر من فريعة وجغام والمبزع ... 

لا علينا ، نوليش نعمل في الفتنة زادة ويهبط عليا قرار يقصلي البلوغ متاعي ، تفرح الأغلبية الساقطة بنصر من الله لم يكن في العصبان ... قلك أكبر "كومبا" عندهم هي محاربة صفحات الفتنة (إلي ما ننكرش وجودها) والقوى الرجعية الظلامية (إلي على فكرة تسكر في البرنو ... مش كيف في الدول المتقدمة -أنا ضد الحجب التعسفي أما مع الفكرة الانغليزية مثلا-) ... أية أنا باش نحط يدي في يد أحد الجنود ونطالب بتشريع الزطلة ... كهو خويا ... خلينا نوليو "بس اند لوف" و نعملو جو جميع ... علاش المشاكل وتكسير الراس ... خلي الواحد يزهى و زيد هي مشروع هايل متاع فلوس قادر على أن يخرج البلاد من المعزق الإقتصادي إلي فيه (يزي نحكي بجدي ، حاقرينها الزطلة ؟) ...  

abuiyad

13 تعاليق:

jolanare يقول...

(ya3tik e sahha ya kalimero ( j'aime

كاليمارو يقول...

أهلا وسهلا و شكراً على مرورك :)

S.A يقول...

3assal !

ABM 1712 يقول...

فمّا ناس تحب تعطي تصويرة وحدة على عالم المدونين في تونس وتحب تنصب روحها ممثلة عليه.
ما ننكرش أنّو فمّا عباد كانت عندها مساهمة أكثر من عباد أخرى وخذاو الرّيسك ولكن موش من حقهم باش يعطيو لرواحهم حجم أكبر ملّي يستحقوه. من شيرة أخرى ما يلزمناش ندخلو في نقاشات ومزايدات ما عندها فين توصّل: الّي عطى حاجة للبلاد هاذي بارك الله فيه ونشجعوه باش يواصل والّي ما عطاش إن شاء الله يولّي يعطي. الحكايات الأخرى الكلّ انجموا نعتبروها حكايات فارغة.

Sa7bi يقول...

سلام,
مقال ساخر لكن في الصميم.. بارك الله فيك

abdelkader يقول...

jawek a7la jaw calimero lool

Tunisian Smileys يقول...

Calimero in wonderland
very expressive that can only be made in Tunisia

Unknown يقول...

horr illi mechi hè leyyèmèt ilfrancophone mais tant pie fratellino si quelqu un bloguait pour cette tunisie il lui suffit cet honneur ...dieux sait les intentions des masses média regardes combien tu es loyal a cette patrie c l essentiel !

Unknown يقول...

ممتاز جدّا أيّها الكاليميرو، الحقّ المدوّنة متاعي موجودة عندها عامين و مانيش عنتر زماني. عاد كيف البارح تفرّجت، قلت ظاهرلي باش يعديوني حتّى أنا في قناة ماصونيّة هععععععع!

كاليمارو يقول...

& Abir Abid & abdelkader & sa7bi & S.A

شكراً على مروركم وعلى تعليقاتكم :)

ABM 17 12

يعطيك الصحة على تعليقك حوصلت أسباب "تغلغيلي" ... وبالأخص أنه حتى واحد لا عندو ألحق يحكي بإسم المدونين ... كل واحد يمثل شخصو :)
شكراً على مرورك

كاليمارو يقول...

Guyguoz :

On peut tous faire notre blog en Français, et se faire une image française comme l'aime nos colonisateurs ... mais la Tunisie reconnait les siens comme tu dis ! w rabi yej3alna dima metwadh3in w dima ne5dmo b9alb w rab ce petit pays qu'on aime tous malgré nous :)
merci pour ton passage chère amie :)

Mohamed Ali chebâane:

هي صديقي نورمال ما فاتك شي ثمة بلاصة في "تي أف 1" أكبر قناة ماسونية في فرنسا المرة الجاية هههه ... إركب ولا يهمك ... الثورة طلعت كي البهيم القصير إلي يجي يبرك ...
شكراً على مرورك :)

غير معرف يقول...

كاليمارو قداه تعمل الزطلة؟
كان نهار خممت في مشروع ماتنسانيش اختك نعاونك في حويجة ماتخافش

FiCos يقول...

Calimero sei un genio :)

إرسال تعليق

أعطي رايك