الاثنين، 11 جويلية 2011

قلبي محروق عليك يا تونس


اللون الأحمر يمثل دم الشهداء
 
- يا ولدي وينك ؟ لا طلة لا سطل غلة ؟ هكا خليتني كيف متحف الأثار، إنش في الذبان من قلة الزوار ؟

- يا مدونتي العزيزة ... يزيني ، إنت كبرتك وحطيتك في عيني ، ملي كنت بنفسجية حبيتك تكون كلمة حق وصوت قلبي ونحكي فيك على البلاد التونسية ، وباللهجة الشعبية ، أما ليوم كل حد في ثنية ، أنا مليت من الكتيبة ... ومليت منهم !

- اجة هنا وين ماشي ؟

- ماشي نعمل ثورة ، ثورة شخصية ، نمشي نتعلم ونقرا ، نقرا تاريخ بلادي ونقرا ديني ، نقرا على الفلسفة الماركسية و الرأسمالية ، نقرا على الفكر الإسلامي ، فكر النهضة (مش الحركة)، وعلم الإجتماع، نتعلم نتسامح مع نفسي ونسمع نفسي، نخدم روحي بش نخدم بلادي ... ونخدم الناس إلي تستاهل ...

- بلادك ما تحبكش تسكت ، بلادك حاجتها بيك ، حتى بالتنبير والتفدليك ... الثورة حاجتها بيك إنت وأندادك ، بالكلام والفعل باش تخدم بلادك ، مش بقراية الكتب في التراكن ...

- أندادي ؟ الأكثرية غطس في حرب هوية ، اش عليك هما فهمو الحداثة والديمقراطية ويحاربو في الرجعية ، ومن الجهة الأخرى يحارب في الإلحاد والعلمانية ، بربي شكون بها الأرض هاذية ؟ شكون بش يبني ويخدم ويتعلم ويعلم ؟ شكون بش يحسب ويناقش ؟ شكون بش يطلع بنا الفوق ؟ 

- هاو يناقش في عقد جمهوري يعملو به دولة ديمقراطية مستقبلية ...

- عقد جمهوري متاع شنوة ؟ باما مناسبة ؟ وحكاية التطبيع مع إسرائيل ؟ ياخي شبيهم ما ينقشوهاش من ناحية ديمقراطية ؟

- معاش نفهمك إنت ، غبت علي برشة ...

- صحيح غبت برشة لأني نكره كثرة القيل والقال وقلة الافعال ، كيف ما يقولك ملك بن نبي " حينما بطل عمل اليد سقط عمل الفكر حتما " ... احنا قعدنا كل من موقعه ينظر ويتفلسف ... مدونين (حاشى إلي ما يستاهلش) كبرو ريوسهوم ... يحسابو أنفسهم أذكى الناس ، وهما من يمثل شباب تونس ... ومن يعاندهم أو يجي ضدهم يسبوه وقدرو يطيحوه ... وهما ياكلوا في لحومات بعضهم ، أنا شفتهم وسمعتهم وما نحبش نكون كيفهم ... 

- على هذاك نسيتني ؟

- تنجم تقول ... أحيانا تجري الرياح بما لا تشتهي السفن ... كيف تشوف ناس مسيبة السراق وتسب في واحد عمل لحية أو مرا لابسة نقاب ، ومن بعد يحكي على العدالة الإجتماعية ويتفلسف عليا ... هذا أمر يسود له وجهي ... كيف نشوف اعباد تجري وتلهث على بلاصة ، على كرسي ، على أربعة فرنك يبيع امو وبوه ... نخاف على البلاد ، قلبي يوجعني والكلام معاش نقدر عليه ...

- تي تكلم يا ولدي شكون شدك ...

- ما شدني حتى حد ، تعرفني مانيش بش نحشم منهم ، أما نخاف على بلادي ، نخاف من الفتنة ، نخاف عليها من روحي ، تجربتي صغيرة وولاد الكلاب برشة ... يلزم وحدة شعبية ، كيف وقت تخريج الإستعمار ، كيف وقت تخريج بن علي ... يلزم كلمة وحدة ...
 هاو الجماعة إلي يفهمولها قالو إلي احنا في مسار الديمقراطية ، هما يفهمو ، أنا شكون ؟ أنا منين نفهم ؟ هما ناس قرية برشة كتب ، ناس تحب تحمينا على خاطرها من الرجعية تخاف علينا ... تيمشش في بالك يعملوا في الوصاية ؟ لا يا راجل ... فك عليك من هاك الغناية ...


- مشيت قيدت روحك في الإنتخابات ؟ 


- مزلت ، أما بش نمشي ، ما عندي شكون ننتخب ، أما تو ننتخب ...


- هاو الأحزاب برشة عندك الخيار ...


- إي ، بش نختار إما حزب يسب النهضة أو النهضة ... هذا اش عندنا اليوم ، إنتخاب متاع شماتة ، متاع كره من النهار الأول ... ما ثماش مشروع بناء للبلاد ، مشروع توحيد الصفوف ، مشروع يتعدى بنا عامين أو ثلاثة حتى الأحزاب تتعلم تخدم وتخرج من إطار الجمعيات ... ما عندناش مشروع بناء للتعليم ، مشروع كل حزب يعطي إقتراح و يتفاهمو مع بعضهم على حل حتى يهربو بالبلاد من الخراب في الوقت الحالي ومن بعد كيف يكبرو ينجمو يتنافسو ...


- زعمة يتفاهمو ؟


- لو كان يسكتو علينا جماعة الخلافة ، وجماعة اللائكية ، نتفاهمو ... الثنين يجيبو في مشروع نجح أما مش في واقع كيف واقعنا ... يعني مشروع فاشل اليوم ... حاجتنا مشروع ينهض بالدولة ، مشروع يحول علمنا إلى عالم أفكار ... حياتنا تدور حول أشياء ، مادة ، وفي أحسن الحالات حول أشخاص ... نحن نعاني نقص فاضح في الأفكار ... أفكار لها روح ... قادرة على إصلاح المنظومة التربوية والمجتمعية والأخلاقية وغيرها ... أما النقاشات البيزنطية فهي تشتت ... أما شكون يفهمك ...


- إي إلى متى بش تقعد ساكت ؟


- زعما كلامي يصلح لحاجة ؟ زوارك تعجبهم الكتيبة ؟ وتونس ... طلعو فئة قليلة من يحبها ... الأغلبية يرحم عمي ... 



- تونس يلزمها رجال ...


- تونس يلزمها من يقول كما قال عنترة " لا تسقني ماء الحياة بذلة ... بل فاسقني بالعز كأس الحنظل" ...
abuiyad

9 تعاليق:

c'est la vie يقول...

c vraiiii

Tunisian Smileys يقول...

اللون الأحمر يمثّل لون الشهداء شكرا للتذكير برشا "توانسة" نساوها الكلمة هاكي و نساو الدم ...

oasis-blog يقول...

ya3tik ese77a lazem ennas illi kifek welli kifi illi faddet merri9 il bared we il klam il fara4 fi il la2ikiyya walla eslamiyya, fe erraj3iyya wel 7adathiyya ennas illi te7ebbe tebni, blad tounisiyya la5ilafa wela mou9ate3a firansiyya, lazemna ne7kou no5orjou lil chara3 n3abbou il blogat wil facebook 5ater thaher illi eltalveza wel jareyed ye7ebbou kan 3la tehntich

Lili يقول...

فكرة الحوار مع المدونة متاعك جميلة، و الأجمل منها المحتوى، يعطيك الصحة ! و كيف ما قلت : تونس يلزمها رجال! و السلام عليكم

Deceazed Fella يقول...

شنوّة هاذي "تونس يلزمها رجال"؟! حضّر روحك باش تجي جمعيّة النّساء الدّيمو تشمّعلك الحانوت
=p

أما نطقت فأقنعت
نعم القول أخ كاليمارو

namonam يقول...

klémek dorar kaléméro ! ama 5sara nsitna moda wena kol mara na3mel talla aw yhabet article aw yhabet article ti 7atta omi s2letni 9atli adhéka leblog li dima ta9rilou mehabatech 7aja jdida ! l7assel ya3tik essa7a 3lé hal article li masni w netsawrou ymes ay we7ed vraiment y7eb tounes =D
PS: 3al inti5abét ay we7ed bech tvotilou mekech bech terba7 deneytek méla voti lenahdha 3ala9al terba7 e5ertek lol

كاليمارو يقول...

fleur chère:

Merci :)

Abir Abid:

هنا نذكرو على أمل أن تنفع الذكرى :)

oasis - blog :

برشة عباد فايقة بالملعوب أما ما فهمتش علاش ساكتين !

Lili :

وتعليقك أيضا جميل :) مرحبا بيك ... وعليكم السلام :)

Deceazed Fella :

ترحيب خاص بيك :) أول تعليق هذا في محلي هههه
ربي يخليك ويبعد علينا وعليك الجمعيات متاع الريق البارد الكل :p

namonam :

مرحبا بيك ، وشكراً على تعليقك :) الله غالب لاهي شوية الفترة هذي ، مع ما قلته في التدوينة هذي ما يشجعش الواحد بش يكتب ... وربي يعطينا القوة والشجاعة الكل :)

Oussama يقول...

لا تسقني ماء الحياة بذلة ... بل فاسقني بالعز كأس الحنظل

Retal ahmed يقول...

ان النظافه ليست مجرد كلمة فقط بل انها كلمه ذات معنى وذات اهميه قصوي في حياة الفرد والمجتمع فان المحافظة على النظافة تعنى الاستمتاع بصحة جيدة بدون الاصابة بالامراض ولهذا جئنا لكم بمجموعه من افضل شركات تقديم الخدمات المنزليه
شركة كشف تسربات المياه بالاحساء


شركة مكافحة النمل الابيض بالاحساء


شركة تنظيف بالاحساء



شركة تنظيف كنب بالاحساء



شركة تنظيف مجالس بالاحساء


شركة مكافحة حشرات بالاحساء

شركة تنظيف فلل بالاحساء



شركة تنظيف شقق بالاحساء

شركة رش مبيدات بالاحساء

إرسال تعليق

أعطي رايك