الجمعة، 2 سبتمبر 2011

متيقر من الوضع

تونس الخضراء

قلنا السلام على من إتبع الهدى، فهمتلا، وأما من بعد خوكم حسيت روحي في حاجة إلى أن اكتب هذه الكلمات ( والتي ليست كالكلمات) وأن لا أطيل ، 

بعد الفصعة العالمية إلي عملتها من كل ماهو فاي- شبوك وبلوغ وغيره من تكنلوجيات رقمية حديثة من صنع الدول الفاسقة ، حسيت ومن الصميم متع لب الفؤاد متاعي إلي أنا توحشت حاجة اسمها كتيبة وتدوين ... إي نعم يصير على الرجال قال الراجل ... 

قلت قبل كل شي، نسلم على الأحباب والأصحاب ونقلهم عيدكم مبرووووك، وأني اتمنى أنهم يكونوقد فرغوقلوبهم بالتكبيييير... صحيح التهنئة إمخر شوية ، أما خير من بلاش ! 

ثم نحب نمارس شوية فن الضرب على لوحة المفاتيح على خاطر صوابعي عكشت، والبخل قتلني،وليت كيف نحل الفيسبوك وننزل على المربع وين انجم نخربش طرف كلام ، ما نلقى ما نقول ... تي مش ما نلقى ما نقول أما راني فديت ...

يا رسول الله عندنا 7 شهور واحنا في هاك العوادة نكعررو ونزيدو نكعررو ، نسكتو شوية نجسو النبض نعسو على بعضنا ومن بعد نرجعو نكعررو ... شكون فينا ما تسبش ؟ وشكون فينا ما تهموهش بالإنتماء إلى البوليس البسباسي أو التجمع الخائن للبلاد والعباد ؟ تنجم تقول إلي في هالثورة "المبركة" كل واحد خرج بما لا يقل عن 5 تهم أهم صفة فيهم أنهم متناقضين ...

لكن المشكل مش هوني ، المشكل إلي أنا روحي طلعت (مع بعض الحكايات الشخصية الجانبية إلي أثرت عليا وقزمتلي حالتي النفسية الهشة) و جاب ربي مانيش سكارجي مدخن كيف البوعزيزي ولا راني صبيت على روحي كاس من الصفراء التي لا تنزل الأحزان ساحتها (دويو) و عملت من بدني فلام  ... أما أحمد الله على نعمة العقل الرصين (شكار روحو) والكرش السليم في الجسم السليم !

الحقيقة هو أني وليت ديمة على أعصابي من العوج إلي في تونس ، الكذب عيني عينك ويجيك واحد يقلك إي ميسالش خير ملي يشدوها الخوانجية والعكس صحيح ، التهمة إلي باش تكسر بها المنافس تقول أنه ماسوني عميل لأسرائيل ... كل مرة نكتب ونقول إلي أنا كرهت روحي في وسط التفاهة هذي الكل ، لكن الحكايات متواصلة ، وحتى كان ما تحبش تدخل يدخلوك بالسيف عليك وينطقوك من جنابك في هالحكيات ! 
 
عادة قررت باش نشد بوبشتي مديدة ونركح شوية ثماش ما يهبط عليا الوحي كيف شيكسبير ونولي نقول في الدرر، وخاصة نلقى مهرب من الحكايات هذي ونجم نحلل وندرس ونقرا الأحداث في راحة من عقلي وعلى القليلة نعمل فكرتي الشخصية عالي قاعد يصير ...فما راعني إلا والحكاية عجبتني، لقيت وقت بش نعمل برشة حاجات "تصلح"، عيشة ولات ما أحلاها بدون إشاعات ، وبالأخص من غير ما نسمع ولاد بلاد كانو البارح أخوة وأصحاب واليوم اصبحو أعداء ! شي مؤسف أن تختزل العلاقات الإنسانية في معايا أم ضدي ، حماقة !

لا علينا ... الأمر الأخر إلي مفددني ، هو أن الناس الكل تعرف إلي الحكومة تكذب وإلي السبسي يكذب وإلي التجاوزات في وزارة الداخلية مزالت وإلي القضاء فيه وعليه وإلي الحكاية معقدة أكثر ما نتصورو ، لكن ديمة يتم تبسيط الحكاية كأن يقلك "تي القضاء ياخو وقت راهو (والله ؟؟) ، ياخي تحب قضاء مستقل أو ان تنصب المشانق ؟" وكأنه القضاء متاعنا مستقل وإلي ما يعجبوش راهو يحب يعدم الناس الكل ، وكأن القضايا المرفوعة ضد العديد من السراق والقتلة و غيره قاعدة توصل إلى القضاة في وقتها ! وكأن المحامين ما يجيوش يعملو في إشهار لأنفسهم في التلفزة طمعا في فلوس الناس ! 

كيف كيف الكل نعرفو أن الأسباب إلي من أجلها خرجت العباد للشارع ما تحقق منها شي : " يا ليلى يا حجامة ، رجعي فلوس اليتامى" (وينهم ؟) ... " خبز وماء وبن علي لا" (اليوم ثمة شكون يرحم عليه) ... والعديد من الشعارات الأخرى إلي تدعو للعدالة الإجتماعية و إيجاد مواطن الشغل ... صحيح فما حاجات قاعدة تتعمل ولكن مش كافي ، لأن 24 % من التوانسة يعيشو في مزيرية صحيحة ... 


الكل نعرفو ولكن نخالفو ومانيش فاهم علاش ساكتين ونسكتو في بعضنا ! تقول عليه باش يجيو توانسة من القمرة يحكيو في بلاصتنا !


على كل، الأسباب هذي الكل جعلتني نتيقر ، نخمم نمشي ندخل في جمعية "صحيحة" تعمل من أجل المواطن مهما كان صفته ولونه وانتماؤه ، تعمل من أجل العدالة والمساواة ، وتعمل من أجل التوعية الصادقة والنزيهة ... هنا نحب نشكر الجمعيات القليلة إلي يدخلو في إطار العمل هذا ... عدة قلتلكم نمشي ندخل في جمعية ونعمل من جهتي على أن تكون الأمور أحسن خير من إلي قاعد نتبع في أخبار الفيسبوك: هذي إشاعة وهذي لا ، هذا لاييك وهذا خوانجي ، هذا تجمعي وهذا درى شنية ... تي ، رويق فارغ ...

المهم والأهم هو أن بالرغم من الفدة هذي ، الأمل مازال عندي في مستقبل أفضل ، على خاطر مزال الخير في الدنيا كيف ما يقولوا ، فقط يلزم الناس هذي تخدم وتوري إلي هي تخدم مش تفوخير، أما حتى الناس تنساق معاها إلى العمل البناء وتخطانا من لائكية وخوامجية وحزب النهقة (بالمناسبة نحب نقول إلي أنا عندي رغبة عميقة على أن أشلبق وجه كل واحد يعدي نهارو يشعل في النار وعامل باج يخرج في الإشاعات ويشجع في الناس على التشاتم و الكره ... ولكني لن أفعل لأنه شرف عظيم لهم أن تمس يدي (وما ادراك) وجوههم الحرفة) ... 

سلام
abuiyad

10 تعاليق:

Al karawen يقول...

كابتن كالو...
كابتن كالو...
عاد إليكم من جديد

ما عادش تطاول على سيدي البوعزيزي يعيشك وشنيا كرش سليم؟ مممم...

Her Highness ~ صاحبة السموّ يقول...

هههههههه وحدك يا فلّوس و شفلنا حلّ في الكرش السليم هذا مايساعدنيش راهو

Lili يقول...

و عليكم السلام و الرحمة
ضحكتني التدوينة متاعك رغم الحزن و الفدة ( بكلنا فادين من الوضع راهو... )
أما علي القليلة هاك خممت تعمل حاجة تنفع و تشارك في جمعية .. ( شنوة إسمها? بالك ننضموا :P )
ملاحظة بسيطة.. على البوعزيزي .. الراجل مات، و ربي يرحمو ...
يعطيك الصحة و إن شاء الله صوابعك ماعادش تعكش :)

Primavera يقول...

tellement metti9er faddetni m3ak :/

sinon j'y ai pensé au travail associatif 9ablek enti :pp

mathabeyya nentham wala wselt 7ata 5amemt n7el jam3eyya wa7di w bdit nlawjelha fel esm mte77a, "jam3eyyet al ri7 al morssala" :pp

koussi koussa :/ mel ghir ma non9or

ناقصة عقل و دين يقول...

توحّشنا هالجوانح و هاك الرّيشات..
يا خويا ما أحلاها تدوينة بالفدّة اللّي فيها وبالأمل اللّي ماليها.. و ما أحلى هاك اللّي بين () الكلّو (يا معلّم)
:)

عيدك مبروك (again)
مرحبا بيك في محلك..

EL FAN يقول...

عيدك مبروك كالي ... عيب عليك تخلي صحابك :))
أما أنا موافقك على حكاية الجمعيات ...
أكيد تحس روحك تنفع أكثر وتقدم في شي ملموس
؛))

aikidoismylife يقول...

عيدك مبروك يا كالي :)
عندك مدّة...

حزني و ألمي كبيران لما آلت إليه الأوضاع في الأيام الأخيرة :(

كاليمارو يقول...

مرحباً بالجميع ، وسامحوني على الإجابة المتأخرة

الكروان :
عندك مشكل مع كرشي ؟

سماح :)))) زارتني البركة ، يزي نطير في النفس بها :)

ليلي :

مرحبا بك :))
بالنسبة للجمعية مزلت ما لقيتش حاجة تعجبني ، ثمة برشة أما برشة زادة هكاك وبرا ... تو كيف نلقى حاجة تعجب إن شاء الله تو نعمللها إشهار :)

بالنسبة للبوعزيزي ، هذا نرمي في المعنى على العباد إلي اليوم ولات تسب فيه بش ينقصو من قيمة الإنتفاضة ... شكراً على تعليقك ومرحبا بيك :)

Primavera :

تحب تعمل جمعية ؟ شنية ؟ شتحكي ؟ على شنوا ؟ عرف بأهدافك ! نستمع فيك ...

فيبالي بها مش طيارة التدوينة من غير ما تزيد تكلاشيني :/

ناقصة عقل ودين :

مرحبا بيك :) أنا زادة توحشتكم وما أحلى تعليقك :)

الفن العزيز :)
مرحبا بالغالي وعيدك مبروك وسنين دايمة :)
هيا مالا كان تعرف جمعية باهية (بخلاف صديقاتك الديمقراطيات) انصحني بها :)


aikidoismylife :

عيدك مبروك ... إيه ربي تستر البلاد والعباد ، مرحبا بيك وشكراً على مرورك

Tunisian Smileys يقول...

ايييه بالله شيء ينَعْوش و يعمل الكيف خويا ويلكوم باك محلاها الفدّة جاية من عندك ...

شركة تسويق الكترونى يقول...

شركة نظافة بالبخار بجدة
شركة تنظيف بالبخار بجدة
عزيزي العميل الكريم نحن شركة تنظيف كنب بالبخار بجدة يسعدنا أن نعرض عليك كافة الخدمات التي تقدمها شركتنا شركة تنظيف كنب تلك الخدمات التي تتعلق بكافة أنواع الكنب، ومما لا شك فيه أن قطع وأطقم الكنب في داخل أي منزل لا يمكن الاستغناء عنها ولعل السبب الرئيسي في ذلك يكمن في أن تلك الأطقم من الكنب يكون له دور كبير في الظهور بالمظهر اللائق لأي منزل.
شركة تنظيف بالبخار بمكة

إرسال تعليق

أعطي رايك