الاثنين، 29 نوفمبر، 2010

مساواة وذني ...

اليوم بديت نكتب في تدوينة ما عندها حتى علاقة بهاذي ... أنا هكاكة وقلت نعمل طلة علفيسبوك ونطيح بأرتكل ... قلت برى نقراه ومن بعد نكمل التدوينة ... كل ما نقرا كل ماتتحيرلي المواجع حتى وليت قلت نكتب هلكلمتين هاذم إلي هما أهم في نظري ملي كنت نكتب فيه ...

تفاديا للمشاكل مانيش باش نحط الأرتيكل ...

قبل ما نكتب السطور القليلة هذي فكرت برشة على خاطر احنا في تونس فيسع ما نلصقو تيكات للعباد ... كل واحد نصنفوه في صنف خاص ... ولكن إلي نشوف ونسمع فيه ليوم ينطق ملأجناب ... وتذكرت زاده إلي المدونة ماهياش مكان تبندير ومناشدة ... وماهياش مكان نميحو فيه مع الأرياح ... ونرضيو فيه العامة والطامة ...

هنا بصراحة بش نحكي بقلبي وطرف الإيمان إلي مازال ينبض في عروقي ... إيمان بأنو التونسي مازال ما باعش روحو من أجل 4 دينارات يدخرهم في بنك الزيتونة فماش ما يطمئن قلبو ...

أية مغير ما نطول ... موضوع اليوم حاسس شوية على خاطر من أكثر المواضيع إلي تهاجم في الإسلام ... الميراث ...

كل ما نحل التلفزة أو الفيسبوك ونتفرج في فيديو تمت بصلة ببلد البنفسج يوجعني قلبي ... حكايات تافهة وريق بارد نهار وطولو يعاودولنا فيه في الأربعة قنوات البنفسجية إلي كسبناها ... كرة ، بكارة ، مساواة بين الراجل والمرأة ... والميراث في قالب المساواة بين الجنسين (ولو انو في تونس ولاو 3 ... اش علينا ) ... يقول القايل معقول المرة ترث الشطر علاش لا ما توليش كيفها كيف الراجل (شوية أخر نوليو نستوردو نساء من أفريقيا يحبلو في بلاست نسائنا باش نطبقو المساواة) ...

أول حاجة نحب نقولها وقلتها برشة مرات قبل :ما قعدلنا كان هل حكاية ونوليو مطورين ؟ يحكيولك على التطور تقول كان جات في ميراث تو نعطيه لأختي بكل الميراث فماش ما تصب علينا أمطار التطور ... ونوليو عالم متقدم اناهزو أمريكا في التكنولوجيا متاعها (بذكر أمريكا ... ملة ضحكة الوكليكس ... طلعو مسخفهم حالنا و حايرين فينا من كثر "هزاننا للقفة" باش ما نقولش حاجة أخرى توفى بالنا حتى هي) ..

يا سيدي اليوم رجال ونساء يعيطو وكشاكشعهم طالعة فالصندوق السحري على حق المرأة في شطر الإرث وتعديل نص القرأن وتفسيرو بما يطابق الأهواء عفواً التطور والتحضر ووو ...

أما بربي أشنوا ألي حرق شعيركم عالمرا ؟؟

صحيح المرأة ولات تخدم وتكدح (هذا كان لقات خدمة ساعة وزيد أنها الأغلبية تخدم بمبدأ "مكره أخاك لا بطل") ... صحيح زادة انو المرأة التونسية متثقفة وقارية ... ولكنها قبل ما تفكر في إرث ... تفكر في راجل يهنيها ويحميها ويحبها ... تفكر في دار مليئة بالدفء العائلي وتحب تشوف صغارها يقراو وينجحو ومن بعد يخدمو موش يتشردو بين القهوة والقهوة وبين الستاد والستاد الأخر والحاكم يكسرلو في فومو وين يحلو وفالأخر يركب البابور ويشق البحور ويعيط يا حبيبة تشاو ...

علاش ما نوجهوش كلامنا للراجل ونقوللو كون راجل بمواقفك مع النساء إلي تحيط بيك ؟؟ علاش ما نعلموهمش حب المرأة واحترامها ؟؟ حبها وتقديرها موش على خاطر الوالد متاعها الله يذكرو بالخير خلالها تركة باهية أو على خاطر عندها bac + 15 وفي اخر الشهر تجيب دزة ...

علاش قبل ما اناقشو ايات الميراث فالقرأن ... ما نذكروش انو الرسول صلى الله عليه وسلم كان يحب المرأة ويحطها في عينيه ...

وفوق هذا الكل السيد أو الأنسة إلي تجي فالتلفزة وتحكي على الميراث والعدل وطار وبندير ... و عازز بهم حال المرأة في تونس ... ياخي تحب أمي أكثر مني ؟؟ تحب أختي أكثر مني ؟؟ تحب مرتي أكثر مني ؟؟ أو بنتي ؟؟
إنت باش تتحير أو تتقلق كي بنتي مستقبلها يضيع على خاطر ميراثها بالشطر مع خوها ؟؟

و فوق ملكل بربي اش مازال ما يتورث في تونس ؟؟ تي هاو ملكو كل شيء والشعب قعد علحديدة ...

غريب أمرك يا بلاد البنفسج ... ما يتكلم فيك كان المرتزق أو التافه ...

وبرى ورثة المرأة الشطر تسميوها مساواة ؟؟ الراجل يخلص النفقة ... الراجل يخلص المهر ... الراجل ما عندوش جمعية "ني أومو ني سومي" إدافعلو على طرف هوى مازال يتنفسو ... وبعد تقلي مساواة ؟؟

وساويو بين الجهات قبل ما تساويو بين الجنسين ...

والسلامabuiyad

7 تعاليق:

Venus يقول...

Rien à foutre le d'héritage, comme tu as dit, ma3ad chay mayoutouréth kèn el 9alba wénnahba 9éllét la7ya (7achekom el kol), et tannoura pour combattre la violence contre les femmes !!! mon oeil !!!!

دمت ذخراً للوطن يا بنفسجست يا حر :)

PhiloZoph يقول...

خويا بنفسجيست ، يعطيك الصحة في ها التدوينة . عندي إضافة صغيرة ،فما معلومة ما يعرفوهاش برشة ناس ، و هي أنو في الولايات المتحدة (و هي من الدول المتقدمة بطبيعة) ، الشخص الوحيد إلي يورث هو الأكبر سنا بين الأبناء، و الباقي يمضمضو بالدنتفريس . (هكا تكون العدالة و المساواة في الدول المتقدمة) . و حكاية الميراث إلي طلعوا بيها في المدة الأخيرة و ألي عجز على تشريعها بورقيبة خاطر فيها نص قرآني واضح و صريح، ماهي إلى لذر الرماد في العيون
و خلق ببلة باش الناس تلقى ما تحكي و هوما يلقاو مواضيع يعملوا عليها منتديات و ملتقيات و فعاليات و البرامج التلفزية . سينون الناس باش تولي تحكي في اخطوط الحمراء . هوكا كل واحد يعطيوه اش يحب ، إلي يحب الكورة يعملولو برامج على الكورة من نهار الإثنين للأحد ، والي ما يحبش الكورة يعملولو برامج "البكاء" ، احنا بطبيعتنا حالنا "يبكي" ، و في نفس الوقت فرصة باش ينعوشو الخزينة متاعهم.
أما الفئة الأخرى (اغلبهم من من يسماو بالمثقفين) إلي لا تحب الكورة لا البرامج متع البكاء فإنهم يحاولوا باش يخلقولهم قضايا و معارك وهمية باش يفتقو فيها مواهبهم في الإقناع و التنظير .

Imane يقول...

تدوينة حلوة يا بنفسجيست كما قال PhiloZoph هاذم إلي نسميوهم
des faux problèmes بش العباد تلقى ما تحكي وما تحكيش في مشاكلنا احقيقية هانو كل مرة يطلعونا بموضوع تافه يطلعلنا شوية سكر وشوية دم

bentbinzart يقول...

حومة باركلي هاني تعلمت كيفاه نعمل كمنتار في البلوغ...آنا عجبتني باااارشة : وساويو بين الجهات قبل ما تساويو بين الجنسين...يعطيك الصحة...وثانيا نطلب من جنابكم الموقر تكثرولنا من الفيديوات الراقية متاع فن ناس بكري كيما أم كلثوم ووردة.موش كان مرة في الجمعة.والسلام عليكم من بلد الكفاح المسلح

بنفسجيست حر يقول...

اه محلاها لمت الأحباب ...

@Venus :

اه بنت البنفسج حلوة منك ذخراً هذه ههههه ... أية وينك فالبلوغ متاعك ... ما تحرمناش من تدويناتك الجميلة !

@PhiloZoph :


طلتك عزيزة غالية يا باشا ... وهذي إضافة لكس كما يقولون ... حكاية أمريكا ما فيباليش بها ... لكن ما نحبش نعمل كيفهم على خاطر هذي ولات حقرة (نقط القاف كيفما يحلو لك) ..

أنا ألي يغيض انو أصبح فما هجوم من المثقفين هاذم كبير على كل ماهو مسلم وواضح ... وقلت ألحياء ولات عادي عندهم ...
يعني حتى في أوربا الحوارات والمنتديات التلفزية إلي باش يحكيو فيها بالنصف التحتاني يعملهوم مل 10 متاع الليل وانتي طالع ... توا في عز السهرية كبار وصغار قدام التلفزة و تبدى تسمع في حكايات لا علاقة وكل شيء نورمال ...
عجبتني منك اللمحة على البرامج متاع البكاء على خاطر ما نحبش برشة نحكي عليهم ... إستبلاه للشعب عيني عينك و فضايح على الهواء ما عندها حتى تفسير ...و ما خذينا من عند فرنسا كان البرامج هاذم إلي ما جاو شيء ...

خويا فيلسوف نهارك زين ... وتبخلش علينا بإضافة تحفونة كيفك :)

@Imen :
ونحن ناصبين العسة هههه ... أما أنا باش ما يطلعليش السكر قبل ما نفوت شهرين من التدوين يلزم ندورها مواضيع أخرى ... نولي نحكي على les vrais problemes كيف هجران الحبيب و الدولار طايح و برشة مفاجأة أخرى ؛)

محلاها طلة ومرحبا بيك في دارك الثانية :)

@bentbAnzart :

هذي يلزمها غناية خاصة ... أية حللتي أهلاً ونزلتي سهلاً في عالم التعاليق على البلوغ :)
مم تو ننظر فالأقتراح هذا متاع المزيد من الفن ...

Zied يقول...

ماننساوش زادة إللي المرأة ثما حالات تورث فاهم مثل الرجل وحالات أخرى تورث فاهم أكثر من الرجل وحالات أخرى تورث فاهم المراة والرجل مايورث شيء ! يعني العبرة مش في الجنس العبرة إللي خذاها ربي سبحانو في حال الإنسان فإذا كانت مرأة عندها شكون توفى وماعندهاش محرم يقوم بها ويعولها هي تورث أكثر من الأخرين .. يعطيك الصحة خويا وإللي يحب يتعرف ع القضية هاذي أكثر يقرا كتاب ميراث المرأة وقضية المساوات اتو يلقى فاهم الأمثلة، يعني الاسلام ماخذاش العبرة بالجنس وإنما خذاها بمراعات أحوال العباد :)
http://www.4shared.com/document/duFOh2fC/___.html

بنفسجيست حر يقول...

أهلا زياد مرحبا بيك ... صحيح الكلام إلي قلتو انتي موجود وشكراً على الكتاب :)
أما أنا ما حبيتش ندخل في التفاصيل أو نحكي بحجج قرأنية لأني في مرحلة أولى معنديش علم كافي وفي مرحلة ثانية نحاول نحكي فقط بالمعقول قبل كل شي (كيف ما يحكيو الجماعة إلي فالتلفزة) ...
شكراً على مرورك ونشوفك انشالله :)

إرسال تعليق

أعطي رايك