بصراحة موضوع اليوم كان باش نحل فيه باب على المدونة توا في ضرف أسبوع نطيح "الركورد" في عدد التدوينات ... موضوع العوج إلي موجود في كتاب الكشخ (الملقب بالفايس بوك) والبهامة المصطنعة أو العفوية كانت ديمة تركبلي شوية سكر على شوية عظم عربي ... لكن بحكم أني ما نلومش على الشباب "الضايع" و ما نحبش نلوم عليهم (لأسباب متعدة) ... نخير نوجه لومي لاصحاب القرار (كيف فالتدوينات إلي سبقو الكل) بكلماتي وعباراتي ولغتي الخشبية الزنسفورية ... وزيد على هذا المدونين إلي يتناولو المواضيع هذي موجودين بكثرة لذا هاني نخرفلكم في حكايات أخرى ... على كل حال ...
أية سيدك صبحت صباح الخير ليوم ... نحل "عفيون العرب الأزرق " ونعمل دورتي اليومية على صفحاتي المحبذة و نعمل طلة على صفحتي السخصية (هنا) ونصبح على عباد الله ...
في "فان بايج" من إلي دخلتلهم لقيت واحد حاطت تعليق فيه واصل متاع صفحة أخرى (هنا) ... المحتوى ما فاجئنيش ... مستوى أكثرية الصفحات إلي نشوفوهم في تونس ... ضريبة محمد حسان ويوم القيامة وبعدها ضريبة شراب وألعاب ... لا علينا هما قبل كل شيء أحرار وزيد انو المحتوى العشوائي (إلي حلا في عينيك "برتاجيه") حاجة والفت بها وتفسر تذبذب فكر الشباب اليوم إلي معاش عارف لوين يشب ...
في تعريف الصفحة (على اليمين) نلقى حاطين "ليسته" متاع الولايات التونسية ... والغاية ورى هذا ما نعرفهاش ولكن في الوهلة الأولى قلت ما يكونو كان يحبو يوريو إلي هما يلمو في الجماعة الكل دون تفريق بين الولايات ... لكن سامحوني فالكلمة كي انتم بهايم (أي نعم بهايم وهو تو نقلك علاش) اش لز حمة يغني ؟؟
ما نعرف يمكن أنا عينيا مالنوم أو يلزمني "لونات" قعر دبوزة ... أما ما شفتش بنزرت !! (يمكن برشة عباد تعتبرها حكاية فارغة أما أنا وجعتني لأني من أنصار المساواة بين الجهات في كل شي ... حتى على حيط فسبوكي مستواه صفر) ...
هل انو مجرد نسوة ؟؟ في الحالة هذي كي تعرف إلي بهامتك تحضر وتغيب ما تتفافاش على مخك ...
قلت يمكن زادة كتبو وهو في حالة سكر وهو في إحدى النزل في بنزرت ونسا هو فين ... ممكن ؟!
حالة الاخرى وهي إلي نستغربها وما نستغرباهش ... النسيان هذا كان وراه سوء نية (ولو أني ما نتصورش أنها حالة واردة) ... يمكن زادة ما يعتبروش بنزرت في تونس ؟؟
على كل مذبية لو كان الغلطة هذي تتصلح ... على خاطر بنزرت بلاش تونس ما تسوى شيء وتونس بلاش بنزرت كمجاهد بلاش سلاح ...
ملاحظة ثانية على الفيسبوك وهي حكاية عندها مدة مارجتني ...الدعوات للصفحات جايين من كل حدب وصوب ... حويجة باهية ؟؟
لا ... كان باش تقلي اجا ضد أو باش نساند أو من أجل سحب جنسية أو صفحة فيها كلام زايد وشتم لأي شخص كن لونو عرقو أو معتقداته(إلا في حالة تكون مزحة كيف صفحة "عم صالح" أو "معز الصوابني") ... لأني بكل بساطة ما يهمني في حتى حد عندي معتقداتي وقناعاتي ... وأول حاجة نأمن بها هي "إنت حر ما دمت لم تتعدى على حريتي" (هاني راجعلها) !
علاش نحكيلكم في قصة حياتي مع الصفحات الفسبوكية ؟؟
على خاطر حتى الحكاية هذي نحب نقلها "سيب صالح" ...على خاطر يا ناس يزيونا من لغة هذا بيه وهذا عليه ... إنت زنديق وعميل وكافر ... وانتي إرهابي ووهابي متطرف ...
خليونا نشوفو حل للبلاد فماش ما نهار نعيشو فيها كالناس ... ونعيشو بإختلافاتنا ونحترمو الناس الكل كأناس ... مش لازم نزيدو نتفرقو أكثر ملي احنا فيه ... والله ساعات نقول يرزينا فيه الفسبوك !! أما الله غالب "مارك زوكربرج" علمهولنا ووحل فينا ... قلك باش يدخل 10 خدامة يتلهاو بحكاية "سينيالي" إلي ابدعنا فيها (بطبيعة مش بالحق أما "البروجرام" إلي عاملينو للغرض راهو كفر بريحة التوانسة والمرج متاعهم) !
ملاحظة ثالثة ضلامية برشة في أعين بعض الناس ... لكن هامة بنسبة لشخصي المتواضع ... اليوم زادة - نهار مبروك - صبحت على تعليق واحد بنفسجي ملبريمة مانيش باش نحط اسمو على خاطر تتوسخ المدونة متاعي ... السيد يحكي على حجاب المرأة -بنفسجيست رجعي ووهابي مطرف من النوع الرفيع- ... عادة قلك في إحدى الصفحات متاع وحدة تعرفوها الكل ... كيف كيف ما نحبش نسميها (ملاحظة ما عندي حتى مشكلة معاها) ... إلي "تحب تلبس تلبس سفساري أبيض وإلا ملحفة تونسية أنا لا اعتبر ذلك لباسا طائفيا ، اللباس الطائفي هو الخمار الأسود الإيراني خاصة " ... مانيش باش نحكي على شرعية الحجاب أو غيرو ... انما قاعد باهت في ناس تدعي الحرية والعلم وهي ما فاهمة شيء ... كيفاش تمشي تقرا بلسفساري ؟ ويا سيدي شبيك انتي تلبس سروال جاي من البرة علاش هي تحب تحسرلها لبستها في سفساري أبيض (ردو بالكم السفساري إلي عاطي علصفورية لا ) ... ؟ هذي الحرية إلي تدعيلها سيادتك ؟؟
ومرة أخرى يا ناس يزيو من تحويل الحكايات ... تونس ماهيش افغنستان أو الجزاير أو غيرهم ! أخر كلمة للسيد إلي نتمنى انو يقرا كلامي ... ويفهم انو الفرق بني وبينو هو أني نعطي لمرتي لجارتي لختي لأمي حرية أنها تختار إلي تحب وتلبس كيف هي تحب وهو لا ...
و يمكن ياسرهذي أخر مرة نحكي فيها في موضوع يخص الفيسبوك ...
أخير نتوجه بكلمة لغيغوز ونقلها حضرلي هاك السلسلة هاو غدوة عاشوراء ...
22 تعاليق:
يعطيك الصحة على التدوينة.
قريتها مداخلات السيد القزوردي..و من كثرة البهتة لم اعلق عليها..السيد خذا على عاتقه مامورية تحرير المراة من الخرقة او الطبة كما يقول معظم الحنوشة التوانسا..تبنى التعريف الحرفي لظاهرة الحجاب من قبل النظام التونسي نفس الغناية: لبس طائفي و على المراة التونسية التمسك بالسفساري و بالمليا العربي هههه و الا فهي متاثرة بالسعودية..كلام معاش انجم نسمعه
و يعطيك الصحة في انك جبتله مثال يناقض ما قاله و هو اننا مثلا في تونس نلبسو لبس اوروبي ليس له اي علاقة بالتراث التونسي كيف الكوستيم و اللبسة الي نعرفوها الكل زعما هذا موش تاثر بالغرب و يناقض ما قاله السيد!!! بكل وضوح التاثر بامريكيا و اوروبا مقبول و تتسمى حرية شخصية و التاثر بالسعودية و ايران يولي معاش حرية شخصية و لازم انواجهوها بكل ما اتينا من قوة!!!!!..
بين ظفرين انا مع تحرر المراة و مع مقاومة كل اشكال الرجعية و الظلامية و التخلف الفكري لكن في نفس الوقت انا مع الحريات و الحرية الشخصية بكل اشكالها و الوانها و سادافع على المنقبة و على المحجبة و على العاهرة و على الشاذ جنسيا و على البيكيني و البوركيني على حد سوى
أنا مانيش مع فكرة إنو كل عبد يعمل آش إيحب على خاطر الثّابت إنّو إلّى يخلق في مجتمع ما ، يلزمو يلتزم بضوابطو في حدود معينه إلّي خلّى القزورديه ينتهكو الحرّيّه العقائديه بالأساس هي الوصايه إلّي فرضوها العلمانيين على النّاس على خاطر في الفوندو ما عندهم مايبيعو ـ ها توّه يقلّك مؤسسات الدوله ـ دوّيو تي المجتمع في عهد الحجّاج كان يحتذى بيه أكثر تريليون مرّه مالغباء والإسهال الفكري إلي نراو فيه توّه ولّي خلّى كمشه مالإنتهازيين يحاربو عقايد النّاس حتى ولّينا نراو في العجب من إنحدار الأخلاق . "لكم دينكم ولي دين "هذيكه وين يلزم تاقف الحرّيّه أمّنت وإلّا لا ..إذا كنت في مجتمع مسلم تحترم تمظهرك لأنّو باش يكون عندو إنعكاس على لخرين ..محاولات تغريب المجتمع التونسي ماهو باش يرجع بالوبال كان على البروطاغونيست متاعو و إلّي مشاركين فيه ، الحجاب مهواش ركن عباده و إنّما هو النّسق للزّي الّي وضعو ربّي للمسلمات كيف ما حدّد للرّاجل كيفاش يكون لباسو داخل المجتمع المسلم إلّي موش عاجبها تنجّم ما تتحجّبش أمّا ما تعريش روحها علينا زاده وتسميوها حرّيّه .. المصيبه إنّو ما يولّيو يحبّو المرا كان باش يعرّيوها أما كيف تِكلت ليل ونهارعلى عايله وإلّا كيف تنتهك حرمتها الجسديّه في المواخير العلنيّه وما لفّ لفّه ميسالش ! . الرّجعيّه إلّي نعانيو منها اليوم هي التّكبيشه الحيوانيّه متاع بعض دعاة الشبقيّه و الوصوليين في مصالحهم الذّاتيّه وممارستهم للتمثيل الحر باش يخرجو من الأرشيف أكبر كذبه : حرية المرا ،المساواة مع الرّاجل ،وهومه أبعد ما يكون على السعي لإعطاء الرّفاهيّه لأي شخص مالشعب . الحسينيه متاعي مسكرتها ها نهارين بش ما نطيحش في شبهة إنّي شيعيّه .صباح الخير يا بنفسج !
انا ماذا بيا لوكان لعباد الكل تفهم حاجة برك:
كل واحد حر في حياتو ي يعمل آش يحب طالما ماتعداش عليك!
حاجة اخرى نحب نقولها لمجاهدي العالم الافتراضي:
في بلاصة ما نهار كامل شاد الفايسبوك و تسب في العباد و هاو ضد فلان و فلتان، كان مشيت عملت حاجة باهية في حياتك تنفع بيها روحك و تنفع بيها بلادك و تنفع بيها الاسلام الي تدافع عليه خيرلك. و بجاه ربي قولولي شكون المسلم الحقيقي هل هو السيد الي ورا الكلافيي ولا مثلا السيد هذا الي في الفيديو (الفيديو باللغة الانڨليزية):
http://www.facebook.com/video/video.php?v=490019227224
صباح الفل الناس الكل :
@ مهرج tn :
شكراً على مرورك وعلى تعليقك إلي يشجع باش الواحد ما يحسش بروحو وحدو في هالعالم الغريب ... حشاك بهايم بالقرون عاملين فيها طز حكمة ... شرفتنا خويا بزيارتك و مرحبا بيك :)
@ guyguoz
أنا لخصت الفكرة إلي نحب نوصلها في "إنت حر ما دمت لم تتعدى على حريتي" ... وأول حرية حكيت عليها اليوم (بطريقة موش مباشرة برشة) هي حرية المعتقد ... يعني فالإخر حبيت نقول "لكم دينكم ولي ديني" !!
هنا فقط حبيت نرد على السيد بحجج "عقلانية" ... نسيت باش نذكرو انو تونس دولة مسلمة فالقانون وعلى الجميع إحترام المسلمين إلي فيها باللي فيه الكلام إلي قلتو سيادتك :)
"المرا المعرية" ماهيش مقبولة فالمجتمعات الكل موش المسلمة برك ... على خطرها قلت إحترام ... وأنا نواجه أي واحد يقول العكس وندعوه انو ينقص من الفرجة في التلفزة وقراية القصص الوهمية ويسافر تو يفهم ...
بارك الله فيك يا غيغوز و انتي زادة نهارك زين ...
@ اسامة :
مرحبا بيك وشكراً على الفيديو المعبرة ... الرسالة وصلت !
فقط ملاحظة صغيرة ... نسيت ما وجهتش كلمة لمحاربي "مجاهدي العالم الإفتراضي" ... من باب المساواة ليس إلا :)
شبيه حتى واحد لا علق على بنزرت ؟؟
wassa3 belek 5ouya w ma3adech ta3mel 9dar lelli ma yestehelch (hétha concernant banzart) quoique el faza tghith chwayya moch 3la 7aja ama 3al jahl mta3 la3riba :D
Pour le reste merci d'aborder le sujet, j'ajoute aucun commentaire ça m'énerve d'y penser :/
آنا باش نعلق على بنزرت موش من باب التعصب أما من باب محبتي لبلادي الا منها بنزرت...بنفسيجست انت واجعك كيفاش ما تذكرش اسم بنزرت الغالية في صفحة تافهة وما فيها ما يتشاف ؟؟ آش قولك كي واحد يجي لطفلة بنزرتية ويقلها : انتم بنات بنزرت بنات البابور ؟؟ ولا يقلك : شد يدك ببنزرتي حتى لين تلقى راجل؟؟آنا شخصيا ما نعذلش على العباد هاذم على خاطر نعرف الي هوما بأفكارهم المعاقة يبعدونا على بعضنا أكثر وأكثر.....آنا نقلك حاجة برك خويا : طفيهم وكملنا حكايتك التحفونة وربي معاك
مش كان بنزرت ناقصة :) الليستة فيها 21 ولاية، و في تونس عندنا 24
ناقص : بنزرت، توزر و قبلي :))
يعني ينجم يكون مجرد جهل بالولايات التونسية...
ken jet lia éna ili tatla3lou fi mokhou bch i7il saf7a wala groupe fi fb ia3mil matlib w zouz tsawir w io93id istana 7ata ijih dawr! ia3ni bi tari9a mta3 idarat twensa =) irat7ouna w irte7ou houma mil méchékil ili tji min wra hal 7keyet il fergha! au moins iwaliou i5amimou 2 fois avant d'agir!
haw awil commentaire lol
@primevera:
- مرحبا :-)
موش حكاية قدر أما كي ما تعرفش ما تحطش ... لول
نفهمك علاش تتنرفز وأنا زادة ما نحبش نحكي فيه الموضوع أما ساعات يكثرولها ...
@bent بنزرت :
نعرفهم الجمل ألي قلت عليهم ... و نعرف واحد لتو كي يغزر لوجهو في المرايا يتذكر كيفاش يلزمو يحكي ويقدر ...
@ تحلم بالسعادة :
أنا متأسف إلي ما ثبتش وتو نصلحها ...
الحقيقة أني فيسع لاحظت غياب بنزرت و طلعتلي على خاطر عندي مدة نخمر من حكايات الفيسبوك ... هنا كنت نحب نعمل لفت نظر على البهامة المتفاقمة ... وخاصةً كيف ما قلت فالنص "(يمكن برشة عباد تعتبرها حكاية فارغة أما أنا وجعتني لأني من أنصار المساواة بين الجهات في كل شي ... حتى على حيط فسبوكي مستواه صفر)" ... يعني ردت الفعل متاعي مش على خاطر انتمائي الشخصي ...
نشكرك برشة على الملاحظة متاعك :-)
@ مشماشة :
كان جيت نعرف نزغرت تو نسجلها ونبعثهالك :)
حمدالله كي نحيت البخل :D
شكراً على الفكرة الحلوة لول ... ولو أني نخير ديمة نعطيهم الحرية أما نعلمهم ينقصو مالتجوبير
مرحبا بيك مرة أخرى ونشوفوك :)
juste pour te dire que quand on critique le hijab on ne critique pas celles qui le portent ou leur droit de le porter on critique l'idée du hijab en soit même.
cauchy @:
Bienvenue à toi :)
et merci pour ton commentaire
1- ton commentaire est hors sujet ... car j'ai bien précisé que je ne parle pas de l'idée du voile mais des "attaques" que subissent ces femmes qui le portent
2-avec ton raisonnement tu as confirmé que le faite de critiquer une idée revient au final à critiquer (ou s'attaquer) les personnes concernées et leurs liberté et inversement
Amicalement,
et bienvenue à toi à tout moment :)
merci Banafsagist-7orr :
je ne vois pas comment mon raisonnement confime ce que tu avances...critiquer une idée c'est remettre en cause son raisonnement ses arguemnts sa finalité etc...critiquer une personne qui croit à cette idée c'est attaquer sa personne et l'insulter..
La liberté se mérite! Ils ont beaucoup de chemin à faire pour l'avoir :p
@ cauchy :
bein de rien :)
Bon on va faire un petit listing de quelques critiques qu'on écoute tout les jours (vraiment y'a que ça à faire) sur le port du voile:
* ce n'ai pas un symbole de libération de la femme et tout le reste => la femme voilée est complexée retardée ...
* Dieu ne l'a pas imposé dans la religion ?
cette femme qui est convaincu sentira sa liberté de choix et de croyance atteinte et comme si on lui dis tu es bête tu ne sais pas réfléchir ...
* si je reviens à la phrase que j'ai cité dans le texte:
c'est une atteinte claire à la liberté vestimentaire de la femme ...
* le voile n'ai pas symbole de piété ?
oui et alors ? on met en question la piété de toutes les femmes voilés ?
* le voile est un symbole politique ? et que la femme ne le sais pas :
je ne vais pas discuter cet avis ... mais c'est une forme d'expulsion de la femme de la vie politique ou aussi prendre les femmes pour des imbéciles encore une fois en leur disant qu'elles sont manipulées
et en générale critiquer un type de vêtement revient à viser les personnes concernées ...
@ michmecha:
Méchante va :p
je suis d'accord qu'ils ne la méritent pas ... mais bon si elle est là faut pas la faire partir ... on le regrettera un jour
إرسال تعليق
أعطي رايك