الثلاثاء، 3 ماي 2011

مخرجة تونسية ملحدة ... إي ومن بعد ؟



الموضوع بش نحكي فيه كلمتين لأنو ما يستاهلش التطويل ... المشكلة الكلها في الوعي التونسي إلي ناقص وإلي لا بد معالجتو من القواعد ... من المدرسة ، الحكاية وما فيها المخرجة هذي ملحدة وقالتها في تلفزة تونسية يتفرج عليها الناس الكل ... بصراحة ما كنتش باش نحكي وكنت نكتب في تدوينة أخرى (خرافة من خرافاتي) ولكن كيف نشوف واحد كيف لسعد عصبان يحكي ويسب فهم وفي نفس الوقت يعمل في إشهار للمسخرية متاعو بعنوان "زنقة زنقة " وشفت مجموعات على الفيسبوك من النوع هذا قلت نقول كلمتين ...

باهي النقطة الأولى ... هي ملحدة ، هي تعبد الجرابع ... اش يهمنا فيها ؟ ... أنا حسب ما نفهم الدين الإسلامي ، يدعو المسلمين إلى أن يكرهو الكفر ولا الكفار ... يعني تكره أن تكون كافر ، وتكره أن ترى الناس تكفر ... ولكن لا تكره الكفار ... وبالتالي الحملة الشخصية المحملة على الإنسانة هذيكة نشوفها لا معنى لها ... هي لم تسب الدين بل رفضته وهذي حاجة تخصها، كان سبتو وقتها نقاش أخر ... 

النقطة الثانية ... لو كان باش ناخذو على حد راهو قناة سي نصرة ... خرمة بعل ... على خاطر هي "تسوق" في الكفر والإلحاد ... و هي بعد هذا الكل قناة خاصة وحتى كان تحب إتدورها أفلام إباحية ما يسالها حتى حد ... أما لا يخفى على حتى حد أنها قناة تفتن وتميع في قضايا الشعب ... وأنا إلى الأن باهت في العباد إلي تتفرج فيها ... تي ماهو كي ما يتفرج فيها حتى حد تو تسكر ... ونرتاحو ، تقعد عندنا كان تونس سبعة واحنا جونا في الأحد الرياضي ...

النقطة الثالثة ... هو أن في فيديو فيها كلام على اللائكية ... وبكل صراحة حنبعل تجيب وحدة تحكي على الكفر ومن بعد وحدة تحكي بالفرنسية على اللائكية ... هذا يعطيني فكرة على لائكية بعض الشلايك ... أنا اللائكية متاع الناس هذوكم ارفضها لأنها اليوم خايفة من أن يفرض عليها الدين غدوة يولي الأذان يقلقها والناس إلي تصلي في الصبح مقلقينها كيف سي الصغير أولاد أحمد ... هذي لائكية مطرفة غير مرحب بها في تونس وكيف هي تعتبر نفسها في حرب ضد "الإسلاميين" ... أنا اعتبر نفسي في حرب فكرية ضد المطرفين هاذم ... 

النقطة الرابعة ... الأنسة هذي ترفض أن يجبرها إنسان على أن تعتنق دين ... ولكن انتي ما تجبرش الناس على اللائكية ... جاية إنتخابات والشعب يختار ... وكانك قابلة للديمقراطية تقبل رأي الأغلبية وتحترم الشعب إلي أكثريتو مسلمة أحببتي أم كرهتي ... وإلي موش عاجبو ما عليه كان يعمل كوردة ... وحاجة أخرى مدام نحكيو على إحترام الغير ... كفانا من إعتبار كل ما يتعلق بالدين رجعي وظلامي ... أو بالأحرى الكذب على الدين وتلصيق كل ما هو ظلامي إليه ... وبالمناسبة لبرشة حيوانات يزيونا من الإشاعات على المسلمين ... إي نقول مسلمين لأن العديد أصبح يحارب الدين وليس يحارب في حزب إسلامي ... وعندكم بعض الأمثلة عن الإشاعات في مدونة المتنوشة ...   

النقطة الخامسة ... باش نخرج شوية على الموضوع ... فيما يخص هالمخرجين إلي عندنا ... صحيح ما يسالهم حتى حد ... أما بربي شنوا هالموضوع  ؟ على قلت مشاكلنا ؟ ... أو إلي يحكي ويلعبها مثقف ومفكر ويفهم في قوالب الدنيا والدين يقلك "حقوق المرأة" ... تي بربي أهبط للشارع وشوف المرى فاش تعاني قبل ما تحكي مساواة ... ياخي شبيكم ما تحكيوش على التجارة إلي تصير بالبنيات الصغار ؟ ما تحكيوش على حلول للقضاء على البغاء أو الحد منه ... مكبشينلي في شطر ميراث ... تي ماهو تحب الشطر إكتب لبنتك الشطر وفك علينا من حسك ... اه حكاية تعدد الزوجات ؟ باهي في تونس قبل ما يجي بورقيبة كان هناك ما يسمى بعقد القران القيرواني إلي تشترط فيه المرى أن زوجها ما ياخو عليها حتى مرة أخرى ... هذا إجتهاد بعض أيمة توانسة ... يعني إلي يجي يقول أن الدين باش يرجع بالتوالي راهو إما مهوش فاهم وما عليه كان يسئل وإما يتبوهم ووقتها ليا وليه ربي ... لأن حسب ما نشوف ، الطرف إلي ضد الدين هو إلي يحب يكون دكتاتوري بدعوى المكاسب والتطور فيضيق ما هو واسع ... تنجم تعمل وصوية كي انتي القوانين الربانية ما ساعدوكش ... هذا ونحب نذكر أن في أمريكا (وما ادراك) كبير العيلة فقط يورث والباقية ياخذو الشب (هذا لا يعني أن نحب نكون كيفها بل نحب نوري أن شطر التركة لا تعني التقدم)...

النقطة الأخيرة ... هي لمن يقدم لنا اللائكية كفانا تمعجين ... يا أخي فاهمين إلي اللائكية هي فصل السياسة عن الدين ... وكان تحب تو نقريهالك ... أما شنوا تحب تعمل في أرض الواقع ... شنوة إلي باش تبدل على قبل ؟ ... شنوا برنامجك للمجلس التأسيسي ... وكفانا كفانا من الحديث على التطرف الديني وعلى غيره  ...  راهو الحديث هذا باش يهزنا للهاوية ... هاو جماعة رافعين قضية بالنهضة ... تي بربي شنوة الخرم هذا ؟ وكنت حكيت على هذا بأكثر تفاصيل هنا ... والسلام 
abuiyad

16 تعاليق:

Youssef يقول...

موافق معاك في برشة نقاط إلا في هاذي
"وكانك قابلة للديمقراطية تقبل رأي الأغلبية وتحترم الشعب إلي أكثريتو مسلمة أحببتي أم كرهتي ... وإلي موش عاجبو ما عليه كان يعمل كوردة ..."
سامحني ، هاذي تولي دكتاتورية الأغلبية وموش دمقراطية عاد ... الدمقراطية قبل كل شيء تحمي حقوق الأقليات .

كاليمارو يقول...

يوسف مانيش نقصد هذا ... ما قلتش ما نحميوهاش أو ما نخليوهاش تتكلم ... هنا نحكي على الناس إلي كيف صالح الزغيدي إلي قلك "نندبهم على شعبي لو إختار النهضة" ...

إنت كيف تحب الأغلبية تحترمك ، ابدى إنت باحترامهم قبل كل شي ... صحيح أنا حكيت نلغت كوردة وغيرها أما خاطر ساعات تلقا واحد عايش في عالم أخر ويحب يفرض رأيه على الناس ...

ما نعرف كان واضح هكة ؟

Her Highness ~ صاحبة السموّ يقول...

j'adore ta manière ironique d'aborder des sujets épineux cher ami
bien que le sujet ne demande pas qu'on en parle à mon avis car la manipulation est flagrante
la dame que nous n'avons jamais connu auparavant et qui nous sort le crane rasé se dit de père communiste et vient en croisade contre l'islamisme
c'est donc clair une guerre 2en1 contre les partis les plus intègres c'est à dire ceux qui ont des principes immuables est en cours
les opportunistes et ceux qui sont prêts à retourner la veste sont les bienvenus

كاليمارو يقول...

Sameh:

Bienvenue chère sameh :)

Je suis en partie d'accord avec toi ... le sujet ne mérite pas et tout le blabla à coté ... mais au début de ma note j'ai expliqué pourquoi je vais écrire, un sujet aussi débile qui prend de l'ampleur alors que d'autres plus dangereux et qui, quant à eux, concernent directement notre future sont abandonnées ...
c'est un appel aux gens de s'occuper des sujets importants et puis expliquer qu'après tout elle est athée c son affaire et y a pas à se faire tout un scandale.
C'est surtout ce second point qui m'a poussé à écrire... je vois que plusieurs sont scandalisés à voir des tunisiens athées et essayent par tous les moyens de les faire taire, et ceci leur fait de la pub gratuite ... mais bon pour ça faut lire entre les lignes :p

Her Highness ~ صاحبة السموّ يقول...

Justement c'est ce qu'il y a entre les lignes qui m'a attirée ;)
je suis sidérée devant l'ignorance de mes compatriotes
j'ai vu leur engouement devant la star'Ac et les soldes de ZARA mais je croyais que ce n'était qu'une minorité
Je me trompais hélas

Astrath يقول...

Tentative d'objectivité échouée.

كاليمارو يقول...

Sameh :

fi9 ya chafi9 fi9 :p

Astrath :

une tentative peut échouer ... par définition :)

Yosri يقول...

Banafsajist, tu as très bien commencé ta note, mais à partir du 3 ème point tu as perdu l'objectivité.
De toute façon, je suis d'accord avec toi que les tunisiens se sont emportés à cause de cette déclaration pour rien, il fallait la laisser s'exprimer comme elle veut. Elle n'aime pas notre religion, c'est son problème du moment où elle ne touche pas notre liberté
D'ailleurs, elle ne pourra jamais nous faire changer d'avis sur l'islam avec "ses oeuvres artistiques"
Par contre, il faudrait être plus rigoureux lors de l'octroi des subvention publiques pour les films de ce genre, en tant que tax payer je refuse de financer "ces oeuvres" ... qu'elle aille en suisse pour se financer

islam_ayeh يقول...

Pour être objectif il faut que tu aies le même avis que les laïcs...

7asilou, zeyed !!

en tout k ya3tik essa7a baradetli 3la galbi ki el3ada ^_^

Al karawen يقول...

و هي بعد هذا الكل قناة خاصة وحتى كان تحب إتدورها أفلام إباحية ما يسالها حتى حد

Non c'est pas vrai. elle a peut être plus de marge qu'une télé publique mais les lois audiovisuelles s'appliquent à tous le monde.

Sinon, Je ne pense pas qu'au nom de la liberté d'expression on peut tout faire. Pour moi ça reste inimaginable de voir des caricatures sur le prophète dans une magazine tunisienne. Il y a des limites (que je veux les plus souples possibles mais elles existent tout de même) et c'est à la majorité de les exprimer pour conserver la cohésion nationale

كاليمارو يقول...

Yosri:

Je l'ai avoué au cinquième point que je sort du sujet... j'ai voulu donner mon avis sur d'autres points dans cette note... sinon je suis d'accord sur ce que tu avances.

islam_ayeh:

sadi9i, hak tchouf ... mais je vais faire des efforts la prochaine fois pour être "objectif" :)

Al Karawen:

C'est quoi les lois audiovisuelles pour toi ? si une TV privée décide de diffuser des films X après minuit et qu'elle inscrit celà dans son pg dès le début, c'est son droit non ?

Pour l'histoire des limites et des caricatures je suis d'accord avec toi.

Primavera يقول...

@ youssef : bah justement mon cher la démocratie c'est la dictature de la majorité, par définition :) belek tes7ayebha parfaite ?

@ calo : j'allais te dire qu'à ta place je ne me dérangerai pas pour cette vermine, mais finalement en y pensant bien, rien qu'avec le titre de son film elle mérite une bonne claque, je suis contre les insultes notamment sur son physique .. mais elle l'aurait cherché, je dirais simplement Rabi yahdiha.

Pour l'article j'ai voté koussi koussa :p parce que j'ai pas aimé que tu dévies du sujet initial, et puis parce que le sujet en tt et pour tt ne mérite pas vraiment qu'on s'attarde dessus, à mon humble avis bien sûr.

al kilebou tanba7 wal 9afilatou tamor .. :)

Tunisian Smileys يقول...

bravo kalimero kol rata7tni men barcha tjaghjigh kont nlawej kifech n9oulou

Lili يقول...

يعطيك الصحة، أنا موافقة مع اللي قلتو، و نزيد عليه ملاحظة إنو خسارة نحنا ناس إنفعاليين برشا، وساعات ناخذو الأمور بحساسية مفرطة و هذا اللي يخلى عباد تسب و تشتم و في بالها تدافع على الدين ( و هوني نعرج على آخر تدوينة متاع يسري حط فيها برشا مراجع باهية ..) من جهة أخرى آني نشوف إنو حتى المخرجة تقولش عليها تحب تستفز العباد، إبدا من عنوان الفيلم و إنت ماشي .. و ربي يهدي ما خلق، و السلام

كاليمارو يقول...

بريمة :

الكلاب تنبح والقافلة تسير ... أنا كلامي موجه أكثر للي يعتبرو أنفسهم يدافعو على الدين (كيف قالت ليلي) وهما نوعاً ما يشوهو فيه ... التعريج متاعي لحكايات أخرى على خاطر في نفس الفيديو حكاو على حاجات أخرى ... ونورمال حط حتى "أسكت خير" ... مانيش ساكت :p

عبير :

مرحبا بيك وشكراً على تعليقك

ليلي :

صحيح هي تستفز في الناس لكن ما يلزمش المسلم يكون ياسر على نيتو وفيسع ما يشعل ... يلزم نرزنو ونعرفو نحقرو إلي ما يستاهلوش ... هذا مع أنا لا بد أن لا ننسى إلي في الوقت هذا الناس الكل على اعصابها وأي حاجة من النوع هذا تشعل النار ...

باهي تو نعمل تالا على تدوينة يسري ويعطيك الصحة على تعليقك

قلم جاف يقول...

قرأت تدوينتك وأعجبت بها كثيرا، واستلهمت منها ما كتبته غير بعيد عن الموضوع ، أدعوك لقراءته:

http://eldeenweldenameet.blogspot.com/2011/06/blog-post_30.html

إرسال تعليق

أعطي رايك