الثلاثاء، 7 ديسمبر 2010

أعمل كي خوك لا يعايروك 2

أنا شديت الميكرو في يدي و أمي بدات تتبسملي وكأنها تحب تقلي "أهوكة كيف ما وصيتك"

تمنيت فاللحظة هذيك أنها ما كانتش قدامي على خاطر بديت نتربث ... قبل ما نقول حتى كلمة رميت عيني على الحضور ... ألوان وأشكال قاعدين يستناو فيا باش نشكر ونمجد كيف وخياني إلي حصللهم الشرف عبرو وعطاو كلمة وصفقولهم ...
ما عرفتش منين نبدى خاصةً كي شفت أسماء (هذيك إلي عجبت أمي) مركزة معايا ... سميت بإسم العالي وتوكلت عليه :



- عالسلامة الناس الكل ... كي وقفت قدامكم اليوم وخذيت وسام الشرف هذا حسيت إن العلم هو أسمى حاجة ينجم يتميز بها الإنسان ... هذاك علاش نحب نشكر قبل كل شي الوالدة العزيزة إلي قاعدة بناتكم ونوجهلها تحية على وقفتها معايا ... نحب زادة نشكر بابا إلي مهوش هنا ... نشكركم الكلكم على حضوركم وكدلك على وقفتكم مع أولادكم إلي هي وقفة فيها برشة تضحيات و مش ساهلة ...

أية سيدي هذا الشكر وكملتو ... لا ما نسيت حتى حد البلدية وما جاورها مانيش بش نشكرهم ... على شنوا نشكر فيهم ؟؟ ماو لباس ؟؟ هاكاك وبديت نسرح والعباد بداو يصفقو وجاء السيد الكريم رئيس البلدية :


-صحيت ولدي أية تنجم ترجع لبلاصتك ...

وقتها فين خرجت من شبه الغيبوبة إلي دخلت فيها ... غزرت للوالدة وكأني نحب نقلها "مزلت نحب نحكي " وهي تقحرلي (ثلاثة نقاط فوق القاف وسامحونا على تعبكم) وكأنها تحب تقلي "عيش ولدي اليوم أسكت"


سي رئيس البلدية مد يدو يحب على الميكرو ... غزرتلو ويا ليتني ما غزرت ... تذكرت البوسة إلي مازالت ما شاحتش وإلي يلزمني نتمكن من تنشيفها قبل ما تتسربلي كميات لباس بها من التسكبين و هزان القفة إلي بلاش وذنين عبر الثقب إلي تتنفس منهم الجلدة متاعي ... بعدت يدي بش ما يفسعليش بالميكرو وقتلو:


-مزلت ما كملتش 
- باهي ازرب مالا ... فما شكون يستنى في دورو !!
- نعرف أما عندي إقتراح هام نحب نطرحو عليكم
- نسمعو فيك ... أية يا جمعة من فضلكم إستمعو لولدنا عندو إقتراح ..


وقتها تذكرت ايامات المعهد الكل ... والمعانات متاع "جيب ولي" و "عندك إنذار" ... تذكرت زادة التغيير الكبير إلي صار في حياتي الدراسية ... ليلة إلي بتت فالمركز والمتراك تمسد فيا على خاطر على حسب كلام مدير المعهد أنا "مجرم حرب متخفي" وتسببت بوحدي في المظاهرات من أجل فلسطين ... وقتها فهمت انك في البلاد هذي يا ترفع التحديات يا ترفعك الباڨة  (مش نورمال لقيت ڨ ) ...كي تذكرت حكاية المتراك ... تدكرت إسطوانات الشاب خالد إلي كانو في " الساك ا دو " وفتفتهملي البلالج إلي تولى "تربيتي" حسب ما قال... وما فقت من هل ذكريات كان كيف جات عيني في عين أسماء ... نظرتها كادت تسلب مني أنفاسي وكدت أنطق شعرا ... أدركت نفسي وهذبت وقفتي :


- إقتراح عندي مدة نخمم فيه ... توا في دار الشباب متاعنا ديمة تعملو نشاطات ... أما الكلها شطيح ورديح ما يفيدنا في حتى شيء ... نحب نعرف علاش ما نعملوش حاجة تفيدنا وبكوننا في يوم العلم حبيت نشوف مع سيادتكم علاش ما نعملوش ورشات نتعلمو فيها "الروبوتيك" ... ورشة يأطروها اساتذة من المعهد متاعنا ... والله ما تتكلفش غالية ...


كنت كل ما نزيد كلمة كل ما يزيد سكوت العباد ... كل ما وجه رئيس البلدية يزراق ... و قلت في قرارت نفسي إلي الناس عجبتعهم الحكاية وخذيت أكثر ثقة وبديت نتحرك فوق الركح ونحكي بصوت أعلى ...


- الأساتذة هاذم ينجمو ياخذو سوم رمزي من عند البلدية بش نشجعهوم على وقفتهم ... ويقريو التلامذة المغرومين ... وحتى لو كان ما فماش عدد كبير من الأول تو يكثرو من بعد ... إنجمو من بعد نعملو مجلة صغيرة على الإنجازات متاع الورشة ونفرقوها في الديار الكل ... يفرقوهم أولاد العايلات فقيرة الحال ونعطيوهم سوم صغير ... مصروف متاع الشهر متاعهم ... 


وأنا فوق السحاب متاعي نحلم بالمدينة المثالية ... إنسجام وعلم وناس تخدم في مخاخها في حاجة مفيدة ..


- هههه ولدنا يحسبها ساهلة الحكاية إلي جايبها هههه 

وبطبيعة كي تبدى واقف أمام شعب بندار وفي هزان القفة فنان ما تستنى منو كان باش يضحك عليك كيف ما عمل "سي" رئيس البلدية والشلة وجوه اللوح إلي مترصفين بحداه على المنصة القصديرية ... في اللحظة هذيك حبيت ندخل عليهم كل واحد بمشطة وصرفاڨ فماش ما ينقصو شوية من البهامة ...

- يا ولدي متعب روحك ومتعبنا على حكاية صعيبة ... احنا مسؤولين ونعرفو قداش يلزم تضحيات وفلوس على الحكاية هذي ... هههه جريدة وورشة عمل نكملو نعملو مدينة العلوم وأكهو 

وزادت تعالت ضحكات القوم ... جيت نطلب في حاجة تعود بالنفع على الناس الكل وليت كركوز ؟ ... ما حبيتش نقولو إلي هو مسؤول فاشل وأبسط حاجة (تعديل الطرقات) ما يعرفش يعملها ... ما حبيتش نشكر الأولياء والتلمذة إلي شاخو عليا ضحك بينما كنت انا الوحيد إلي شكرت الناس الكل على تربيتهم لأولادهم ... يمين البكوش في صدرو ... سكتت على روحي ...

- أية ولدي مرة جاية فكرة على قد مخك بش إنجمو اناقشوها
- على قد مخك إنت تحب تقول 
- نعم ؟
- لا حتى شي قلتلك باهي ... نرجع لبقعتي ؟
-إي تنجم ترجع ... أية صفقو عليه 

وهزيت راسي نغزر لأمي بعد ما حاولت نتفاداها ونتفادى غزرتها وقت إلي كنت نحكي باش ما تأثرش عليا ...كنت راجع لبلاصتي ونسمع في التصفيق لكن ما كان يعنيلي حتى شيء ... كنت نردد في داخلي أغنية للشاب خالد كنت ديمة نواسي بها نفسي ... 


وقت شافتني قريب نبكي رققتلي عينيها وكأنها تقول "راك ولدي وديمة نبقى فخورة بيك" ... رجعت على الطاولة وتلطخت
على الكرسي بكلني خيبة امال ... قالتلي :

-إياه مليح فيك ... شفت كيفاش ما تسمعش كلامي ؟
-فك علينا ... انسى 
-ناس بكري يقولو " أعمل كي خوك لا يعايروك" وإنت ديمة تحب روحك مبدع ... أهوكة ضحكو عليك !!
-هذي تربية اديك ... معاش تستعرف بيا تو ترتاح من البدع متاعي ...

abuiyad

20 تعاليق:

Youssef يقول...

"في اللحظة هذيك حبيت ندخل عليهم كل واحد بمشطة وصرفاڨ فماش ما ينقصو شوية من البهامة ..."
اييييه ! وشوية فيهم :)

كاليمارو يقول...

يا خويا رهوط حشاك ... شرف لهم ياكلو شلبوق من عندي لول

مسلمة يقول...

بيناتنا حتى أنا ضحكت ...
أما خسارة محضرتش نهارتها ولا راني ضحكت "لايف" على بهامة الحاضرين، (حشاكم وحاشى أمك و أسماء) عالقليلة وقتها عندي سبب يضحك بالحق أما هوما علاش ضحكو!!!! كارك كلمتهم بالفلاقي بالك يفهموا لول

مبروك عل "ڨ" :)

مفهمتش الكستوم منين مش عادي بيك فل تكست لول بش تلبس "شرط وشلاكة " لووووول

كاليمارو يقول...

مرحبا بيك أجندة ... طلتك عزيزة وغالية :)
خسارة ما كنتش معايا .. عالقليلة يكون وقف معايا انسان يفهمني ...
أما التصويرة ما لقيتش وحدة تستجيب لجميع المعاني إلي حبيت عليهم ... وليت ركزت أكثر على تقاسيم وجه واحد "مبهم وحاير" أكثر من أللبسة ...

مرحبا بيك مرة أخرى :)

fléna bent flén يقول...

توا هكا يا خويا روبوتيك ضربة وحدة !
ماقلتش كلوب تصفيق ؟
جمعية عمل بطاحونة الحومة ؟
روبوتيك جملة وحدة ! وضعك ما يعجبش :/
سياسة المراحل ما سمعتش بها هذاكة ما انجم اكون في حيز اتنفيذ كان بعد 20 سنا

توا إلي بيه الفايدة ، وين لقيت ال-"ڨ"
؛)

يوميات زوجة يقول...

تحب تقدم اقتراحات؟ لووول، تي تحمد ربي كيف عطاوك الحق بش تعبر و تقدم الشكر للي تحب. وخيتك عمرو حد ما قلي تفضل عبر قول كليمة... نستنى في السوتننس متاع الدكتوراه بش نشكر ههههه

كاليمارو يقول...

:@ fléna

مرحبا بيك المدونة نورت يا للة :)
الله غالب ما قريناهاش فالباك سياسة المراحل هههه ... أما علدزة هذي احنا قاعدين ماشيين للهاوية بالمراحل لا أكثر ولا أقل ...

بنسبة ال-"ڨ" لقيتها هنا:
http://www.qwled.com/vb/t164976.html
"إينجوي "

كاليمارو يقول...

@ تحلم بالسعادة :

مرحبا بيك دكتورة :) نشالله تتعدى "سوتننس" تحفونة ... وتنجم تجي تعبر في محلي وقت ما تحب :)
أما والله عندك الحق مانيش في بلد الإقتراحات ...احنا متاع اشكر وصفق ويزي ... الله المستعان وبرى

يوميات زوجة يقول...

بارك الله فيك، ربي يوفق الجميع :)

على ذكر الاقتراحات، تربيتنا و ثقافتنا زرعت فينا للأسف نوع من السلبية. الاستهلاك و الاكتفاء بالوجود. توة كيف يقلك في الخدمة عندكش اقتراحات لتحسين المردود و إلا ظروف العمل، الواحد يحير و ما يلقى ما يقول! على خاطر ما تعودش يعبر و يبادر... الله المستعان

بالمناسبة، ويني أسماء؟ شنوة صار معاها من بعد؟ :))

Primavera يقول...

assalemou alaykom :D

heureusement que j'ai lu les deux épisodes ensemble, malla tachwi9 :D

une question bête peut être : echay hétha sar 3lik wala c'est le fruit de ton imagination ?

dans les deux cas chui fière de toi weld blédi :)

Primavera يقول...

7a99a une petite remarque de forme, je préfère la police plus grande que celle là (plus petite et gras)

wa chokran :p

كاليمارو يقول...

@ تحلم بالسعادة :

في تربيتنا ديمة يشوفونا كأطفال صغار أو كحثالة (حاشا الناس الكل) ...حتى برشة منا فقدو الثقة في قدرتهم وإقتنعو بالحكاية ...

بنسبة الأسماء ربما يجي نهار ونخسلها تدوينة ههه

كاليمارو يقول...

@Primavera

وعليكم السلام
نورتنا بطلتك العزيزة :-)

الحكاية هذي صارت بالحق ... بطبيعة الكلام مش بالحرف الواحد ... أما الأحداث الهامة حقيقيين
باهي يا للا اتو نرجع الخط القديم و شكراً على الملاحظات هاذم على خاطر مهمين في نظري ...

و مرحبا بيك

ريحة تونس يقول...

يصير عالرجال...النهاية موش متوقعة بالكل

كاليمارو يقول...

حومة خايبة النهاية ؟؟

Venus يقول...

et maintenant tu as ton espace perso ton blog, donc 3abbér ya 5ouya 3abbér


j'ai bien aimé comme toujours, bravo

كاليمارو يقول...

Venus ??
ti winek ya tofla ?
ravie que ça te plaise

ريحة تونس يقول...

موش خايبة النهاية بنفسجيست وموش طيارة ...سلمية أكثر ماللازم...توقعت تأييد من زملائك وعلاش لا حصول صدام بينكم وبين سيدي المعتمد ..ومدير الليسي يستنجد بقوات التدخل السريع ويبدا عاد المتراك ...وترجعنا لأيامات كان فيها التلميذ والطالب عندو موقف وتأثير في تاريخ البلاد على خاطر الي نشوفو فيهم تو من نوعية أخطى راسي وأضرب ...حبيتك تعطينا شوية أمل موش تتلطخ عالكرسي وتسكت...... يظهرلي كثرتلها مالنقد ؟؟

كاليمارو يقول...

فهمتك يا بنت بنزرت ... أما انتي تعرف "كلامك مع إلي ما يفهمكش ينقص ملأعمار" ... وزيد كان بودي نكتب كيف انتي قلت أما خيرت نتقيد بلي صار ...

لا يا بنتي انقد ... ما يقلقنيش :-)
ومرحبا بيك في العالم البنفسجي في كل وقت

غير معرف يقول...

تي هاو باهي الي مشيت
:)))))
انا قالولي ايجا خوذ زايزة في يوم العلم وايجا هز استدعائك مشيت يلقاوني مسفسرة متخلفة قالولي ماعناش الاسم هذا
ومن فوق حتى في الليسي قالولي تعمل مزية ماتجيش
قلتلهم حاضر عرفي انتوما آمروا برك وانا عبد المامور
زيد وقتهاماعندي كان اكا التونيك الموف متاعي مستورة نخرج بيها خفت يقولوا علي بندارة والا حاجة كي هكا

طون طون كاليمارو اكييييد شعبة تكنيك ماكانش مانتصوركش تخمم في الروبوتيك

إرسال تعليق

أعطي رايك