الخميس، 9 ديسمبر 2010

أسياد أم عبيد

البنفسجي انسان طيب... يحلم كأيها الناس ... البنفسجي انسان لطيف ضريف دموخفيف ... يحب كل الناس وقلبو حساس ...
البنفسجي يحلم بالشهرة والمناصب المرموقة ... وفتح الأبواب المغلوقة ...
البنفسجي يشيخ ... كي يقدم ويخلي شكون التالي ... على خاطرو انسان زوالي و يحلم بش يولي مدير ولا والي ...
هو انسان ذكي ... ما يوقفو حتى شي ... شعارو نجمة وهلال... يسترجل مرة فالفال ...عادي كيف يطيح السروال ويدفع الأموال ... البنفسجي للكرسي طماع وعلى خاطرو الشرف يتباع ... كي يقربلو يزيد الإشتياق ويكثر النفاق ... 
البنفسجي يحب يولي من الشرفة... وياكل الحوت بالمغرفة ...
ماهوش دغفة يحب هزان القفة وضربان البندير ويكره حرية التعبير... قلبان الفيستا ما يقلقوش والكرامة ما عندوش ...


أما البنفسجيين الأحرار ...هما ناس ابرار هابط عليهم الدمار ... يحلمو بالكرهبة والدار وفلوس وصغار ... أحلام طارت كالغبار كي عرفو نهاية المسار ... ناس تحب البلاد كرهت فيها الفساد ... 
عباد ... تحب الحرية والديمقراطية ... تكره الظلامية والتلفزة البنفسجية ... ناس جرات وقرات والخدم ما لقات ... ركبت البلنسيات وفي الغربة شبابها فنات ... قهرهم الغش وطارتلهم من عيشة الهوش ...
فيهم ناس تعبت مالتصفيق وبدات تفيق ... عيات مالتنوفيق ...
وفيهم ناس فالسجون تنسات على خاطر الفجر صلات ...
وفيهم ناس لا قرات ولا عرفت "ليسيات" ... على خاطر بلادها دمومتها جرات ... باش البنفسجي يلقى فين يبات من غير تضحيات... ويرفع التحديات ويشتت عائلات فالحبوسات ...يعملو المنتديات والملتقيات ... ويحلمو بالتمديد واننا نكونولهم عبيد ... ويربيو النمورة والبلاد ياكلوها غورة ...
     
كلام اليوم بسم الشعب المظلوم ... بسم كل من هو من حريتو محروم ... بإسم كل من يبكي عالضروف ... وفالعيد ما لقاش خروف ... بإسم عباد حفات وتعرات وعلى ساقيها الفلقة كلات ... على خاطرها حبت البلاد ودافعت على الحريات ...

  

abuiyad

13 تعاليق:

إنسان / Insane يقول...

rayi rayek

ريحة تونس يقول...

قوية قوية بصراحة... والسجع زاد حلاها..والله برافو

كاليمارو يقول...

@ انسان :

مرحبا بيك شرفتنا بالزيارة :)
وشكراً على المشاطرة فالراي بابا الزين ...

@ حومة :

شكراً على التشجيع ... نشالله بكلنا من حسن إلى أحسن

EL FAN يقول...

يحب هزان القفة وضربان البندير ويكره حرية التعبير... قلبان الفيستا ما يقلقوش والكرامة ما عندوش ... D:

ما عندي ما نزيد ...
(; chapeau bas

كاليمارو يقول...

شكراً يا فنان على مرورك :)

Venus يقول...

avant de partir en week kend, je te lis et je me remplis de tes mots hmmm ca fait du bien

surtout ne t'arrêtes pas :D

كاليمارو يقول...

Bon Week -end venus ... tu sais quoi on va faire un deal "si tu arrêtes j'arrête " :p

Unknown يقول...

ذكرتني الّتدوينه هذه بنبض الشعب و الشّارع يعطيك الصحّه على حقيقة النّقل يا حر ! تعرف جاني في إخّر كلامك خاطر الآيه إلّي نقلت على هاك المومن قولو :" يا ليت قومي يعلمون .."

كاليمارو يقول...

أهلا غيغوز :)
بذكرك لأية "يا ليت قومي يعلمون" ذكرتني بأبيات شعرية حفضهملي إمام وأنا صغير وقعدو ملازميني :

ما الفخر إلا لأهل العلم إنهم على الهدى لمن استهدى أدلاء

وقدر كل امرئ ما كان يحسنه والجاهلون لأهل العلم أعداء

ففز بعلم تعش حيا به أبدا الناس موتى وأهل العلم أحياء


سامحني "نبض الشعب و الشّارع" مش متع مصر هذي ؟؟

Unknown يقول...

نبض الشعب والشارع من عندي أصلا حسني البارك ضيّع علينا أم الدّنيا معادش نتبّع ملّي زاد الحزب الوطني في خطفان مصر لكن مالممكن إنّو يكون عنوان لبرنامج شكون يعرف ، بالنّسبه ليّه الشّعب ممكن يكون موجود بحتميّة أهليّة الوجوب إلّي ما ينحّيها كان ربّي أمّا الشّارع عنّا في تونس فمفقود ولولا بعض من كلام الوخيان في هذا العالم الإفتراضي راني ظنّيتو كيف الخل والعنقاء و الغول لربعة ما عندهمش وجود . بارك الله في شيخك وأهلك إلّي سهلولك العلم .آنا هاني باش نهبط نشكي للمركز خلّي يهزّوني لبوفرده عندي مديده نتهدّد على مدرسه قرآنيّه براس لحنينه دعيوة خير يسهّل المولى لوخيتك راني شنموت مالغيره باش نحفظ القرآن

كاليمارو يقول...

أي نعم يا غيغوز فما حاجة كيف هكا في مصر ... ما عنديش التفاصيل ... أما إنت تبرك الله عليك جبتها مكيلة :)

أنا ديمة عندي إيمان ولو ضعيف انو التونسي الحر إلي يحب بلادو ويحب الناس الكل مازال موجود ... أما ساكن ببوشتو على خاطر مش خالط يتكلم في وسط الوحوش إلي قاعدة تتلقف فينا كالكرة ... الحمد الله فما حاجة اسمها عالم إفتراضي يفتق فيها مواهبو

يا غيغوز برا الله يفتحها قدامك وربي يسهلك الحفض ويجعلو نور لك ...

Venus يقول...

hmmm, j'arrête pas , j'arrête pas :D

bon début de semaine

كاليمارو يقول...

Hey jaw :)
Merci à toi de même

إرسال تعليق

أعطي رايك