غزر ميغالو الملك إلى صديقو المقرب بنفسجيست وقال ... يا بنفسجيست إضرب لي مثل قوم فاقدي شيء ويدعون أنهم إمتلكو الحكمة والعلم ...
هبط خونا بنفسجيست راسو وفكر وزاد فكر وتنهد :
- يا ملكنا الموقر ... يحكى انو في غابة تسمى ب"رأس اللحم" ... موش بعيدة علينا برشة ... أكثر سكانها حمير (حشاكم وحشى قدركم) لا يبلو لا يعلو عايشين كبقرة الله في زرع الله ... كانت الحمير عندها عديد من الأهداف من أهمها التنبيرة متاع نهار الأحد فالليل بعد مباراة رياضية وكذلك ...
- يا بنفسجيست اش معناتها تنبير ؟
- ههه تنبير يعني أنك تشد واحد تتركك عليه وتزيد تتركك و إطلعلو الدم والسكر حتى لين يسبلك عرشك وقتها تتفرهد وتقول عملت أفار وعديت ليلة ما كيفها ليلة ... أملا يا ميغالو لا يزي بهايم زيد فاضيين شغل ...
أية خلي نكملك ... قتلك مع التنبير بن اهدافهم زادة انو يكون عندهم أخر صيحة في عالم التكنولوجيات ... من "أيفون" و"نيكسوس ون" وبرشة حاجات أخرى ..
- شنوا ؟؟ بهايم بليفون ؟؟
- إي إي يا ميغالو الغالي ... انا زادة نخمم باش ننخرط فالحسينية -إلي باش تأسسها عزيزتنا غيغوز- ونبدى نندب ونلطم من غدر الزمان ...
الحاصل يا سيدي ... أما كانت عندهم مشكلة البهايم هاذم أنهم ما كانوش يخدمو ... كانو نهار و طولو وهما يجارو وراء "أسيادهم" فماش ما يحرثو عليهم شوية ويعطيوهم ما ياكلو في أخر النهار ...
- كيفاش كيفاش ... ما عندهمش ما ياكلو ويحبو عالتليفون أخر "موديل" ؟؟
- يا ولدي بهايم أما ما تنساش نحكي على الأكثرية إلي ديمة تنهق وتصيح ... تو نفسرلك كل شي ... و شبيك كل مرة تقص عليا سي ميغالو ؟ اصبر خلي نحكي ومن بعد علق ... حالة فيك !!
- باهي باهي ... أحكي نسمع فيك وسامحني ملفوق
- إيه فينهم الملوك إلي كيفك إلي يعرفو يعطيو قيمة للحاشية متاعهم ويعطيو لكل ذي حق حقه ... ويطلبو السماح ...
- فاقد الشيء لا يعطيه يا بنفسجيست !
- كيفاش ؟؟
- يعني إلي ما يفهمش شمعنتها حقوق الشعب ما ينجمش يعطيهم حقوقهم ...
- ماهأه ... موش هك يا سي ميغالو ومرة أخرى خلي نكمل نحكيلك مكانش تو نبطل ...
أخيرا ميغالو سكت وحط يدو على خدو وبدا يتفرج في تقاسيم وجه البنفسجيست إلي بدا يتقلق من اسئلته التافهة ... وجهو بدا يطفى والحماسة إلي كانت عندو مالول بدات تمشي وكأنو تفكر حاجة مهمة ...
- شبيك يا بنفسجيست ماو لباس ؟؟
- لا لاباس ... أما ...
- أما شنوا ؟
- تذكرت إلي الوالدة الله يبقيها تحب تحكي معايا في موضوع مهم ...
- موضوع ؟؟ ... كان تحب احكيلي
- إي ... تحبني نعرس ...أية تو نخليك نمشي نحكي معها بال"سكايب" ونرجعلك !
17 تعاليق:
"كوسي كوسا " أن أتندن يولي ممتاز (ج ريجول)
حمدلله مانيش وحدي نستخايل عباد و نحكي معاهم لوول
ربي يونسك بميغالو، وسع بالك معاه تيعلقليلة يسال في اسئلة تافهة خير ملي يبحلقلك وساكت ؛)
tu me laisses toujours sur mes faims ya banafsajist ya 7or
vivement la suite
@ Agenda:
يعيشك وإنت زادة ربي يونسك بأصدقائك :p
التدوينة هذي ماكانتش هكا جملة ... كتبتها على ورقة حكاية أخرى (البداية ما تفرقش برشة) أما كي بديت نكتب على لوحة المفاتيح ميغالو ولا يعبر ويسأل
إن شاء الله المرة الجاية يولي أذكى بشوية ويحسن في مستوى التدوينة :)
@ Venus
وإنتي ديمة "فيدال" يا فينوس وتعليقاتك إلي كل مرة تزيد تشجعني بش ما نلوحش القلم :)
نعود بعد المكالمة إن شاء الله :p
rectification:
جو ريجول = جو رڨول = جو بليسنت :p
في إنتظار الجزء الثاني، بون كونتنوسيون :)
يا أجندة :)
فهمتك "إلي تي بليسنت" لول ... ونحبك زادة وقت إلي عندك ما تنتقد تاخو راحتك ومرحبا بيك :)
تي شنوا الحالة فيك يا بنفسجيست؟
تي او موان كي تيكتيب حلقة اكتب حلقة طويلة شويا موش تقطر علينا بالسطرين بالثلاثة!
ايا اكبسلنا روحك شويا عيش خويا و كفانا من استبلاه القراء D-:
ههه ... أهلا بيك اسامة !
يا خويا كان صبرت شوية راك حجيت ... تو تو هبطت الحلقة الثانية أهيكة طويلة :)
حومة ياخي تخدم مع جماعة الويكيليكس فضحت الناس الكل خاصة في الجزء الثاني؟؟؟ حكايتك فكرتني بكليلة ودمنة (يا حسرة)...يا بيدبا زيد خرفلنا و ربي معاك وبرافو ليك ولد بنزرت
آاااه يا بنفسجييست ما ظهرلك تنبّر كان على الجمعيّه .. هذوكمه يحكيو على أبسيون ، موش لازم تكسب النّاس الكل الآيفون حيحون حيون حيحون !..أهّوكه أختي باش تجيبلي آيفون بلّوشي وعلى خاطر الجمعيّه مانيش باش نخلّي خويا يتلهوث أعليه . إسمع حب الجمعيّه هو الحقيقة الثّابتة إلّي عمرها ما تبدلت عندي بالرّغم ملمحاين ..أيّه حسّنلي خطّك خلّيني نشوف الإبّيزود الثّانيه
أهلا ببنت بنزرت ...صحيح انا تذكرت كليلة ودمنة وقلت كل شي يتعدى بإسم الحيوانات ... أما شبيك يا طفلة ما فضحت حتى حد ... فهمت حاجة أخرى انتي ؟؟
ههه يا غيغوز مش تنبيرة هذيكة ... هههه
لفت نظر القراء متاعي إلي عندهم ما يقولو في رواحهم في فن اللطم بش يساندوك وكان لزم يعملو صفحة للحملة علفيسبوك ...
أية إن شاء الله بالبركة عل أيفون ... وحتى كان خوك طارلك به أهوكة الجمعية ديمة ببانها محلولة ...
الجمعيّه في قلبي يا ولدي إذا كانت البيبان مسكره وإلا محلوله ..تي المرّه الفاتت عملنا ديبا في دارنا على ها الحكايه نلقاو حبّ الجمعيّه وحب الوالدين كيف كيف ما معاهم حتى حد وبالرّغم إلّي ماناش فاناطيك بالأماره عنا ترشّيست في الدّار أمّا الحكايه محسوب ولّات فطره ..عالم ثالث ..فقت يك تعمل في الإشهار لختك غيغوز أمّا يا فتى ظلامو عينيّ على الجمعيّه وما يجيش نحكي معاها على حتّى شيء آخر ..باهي مبعّد إتّكتيفة فمّه منعه ؟ يا ذنوبي هاني نستنّ في لاسويط :/
عجبتني بلامارة عندنا ترشيست ... تقول كان جيت فنتيك راك لوحتوه فالبحر !
حب الكرة في العالم الثالث فات حدود المعقول ... كنهار تحط بتصويرة علفيسبوك قلك السيد قلهم إدهنولي قبري أحمر وأبيض ... نسى إلي بعد بمديدة الأبيض يولي أصفر ويا خيبة المسعى !!
إنت نسيت نقطة هامة ... بنفسجيست وميغالو صحاب بالباهي !!
yelzmik tahdher ala torh nbara fi darna khouya nharetha y3aref illi akber ghalta a3melha ennou yheb ettarachi :eddoufoulement lezem ken t3aref !
لا خاطيك بنفسجيست انت عااااقل برشة
اااه ... قلي يا غيغوز نهارت إلي يخسر فالدربي ما يروحش هههه
املا إنت وينك يا بنت الجلاء :) العقولية وما قالت اناس
إرسال تعليق
أعطي رايك