الاثنين، 13 ديسمبر 2010

قصة ميغالو و بنفسجيست ... الجزء الثاني

ورجع بنفسجيست إلى مكان إجتماعو مع ميغالو من بعد ما كمل المكالمة مع الحنينة ... يلقى ميغالو يستنى فيه على أحر من الجمر يحب يعرف شنية حكاية العرس .. علق بنفسجيست "الفيستا" متاعو في المكان المحدد وجلس حيث صديقه الملك ...

- أيوه، سي ميغالو، عاد قتلك الغابة فيها شوية متثقفين وبرشة حمير يحبو الفيس والتنبير وعام وطولو ضاربهم الكساد ... حتى المتثقفين إلي قراو و تخلاوعن الجهل وكانو يحلمو بمستقبل نير ... وخاصةً إلي عملو استاذية (ربي معاهم إلي يعديو "كباس" على قريب) ...

الغابة يا ميغالو تعرفت بالأكتاف و" تشري يومية" و"جيتك من طرف الحيوان الفولاني" ... الفساد هذا خلا معشر البهايم وبعض المتثقفين يقومو باجتمعات سرية يلوجو على خطة بش يطالبو بها بإصلاح قانون الغاب هذا إلي معادش يوكل الخبز ... وصل الخبر للأسد من طرف زوجتو إلي كانت تخاف برشة على ملك رجلها وحذرتو من البهايم إلي ناوينلو على خلاها ... فثارت ثائرة الملك وصاح في بعض الذئاب من سكان الغاب أن يأتوه بخبر هؤلاء الذين يريدون الإطاحة به ...

و كانت أول مرة يكتشف فيها الملك قيمة الذئاب ... ففي لحظات قليلة رجعلو ذيب بأخبار في قمة الأهمية ومعاه ليستة متع أسماء الناس إلي لقاهم مجتمعين وزاد من عندو زوز أو ثلاثة عندو معاهم بونتو ... من وقتها قرر الملك انو يحرم إجتماع أكثر من زوز مواطنين مع بعضهم إلا  برخصة وزاد كثر في عدد الذئاب حتى صار عددهم يناهض عدد الحمير ...

وفي تلك الأحيان دخلت إحدى الخادمات بالقصر وحملت معها الكم الكثير من الخيرات ... غلال وفواكه جافة ومشروبات من كل الأصناف ... كانت الخادمة روعة في الجمال وكانت مسلحة بإبتسامة رقيقة زادت فيها الشطر ...و قعد بنفسجيست يتبع فيها بعينيه حتى خرجت ...

- تعرف يا بنفسجيست ... كان بودي أنك تحكيلي على حكاية العرس وأخطانا من الأمثلة والعبر 
- اش تحب نحكيلك يا ميغالو ؟ كل شي بالتسهيل و الطيبات للطيبين ...
شوف يا ميغالو ... المصيبة في الغابة هذيك انو الذيوبة والحميرو المتثقفين كانو يد وحدة ... ولكلهم دافعو مع بعضهم على غابتهم من الأخطار المحدقة بيهم وبغابتهم العزيزة عليهم ... ولكن الخبزة المرة جعلت الذيوبة يكشرو عن أنيابهم ويتحولو إلى أكلت لحوم الحيوانات ...


- ملة حكاية يا بنفسجيست ... احنا العباد ما عنندناش الشيء هذا ... احنا عندنا كلمة وأمانة وصدق 
- يا ميغالو ... سامحني أما على الدزة متاعك من قبيلي وإنت تقاطع فيا بش نوليو كي الحيوانات إلي نحكيوعليهم ...

باهي توا إنت بديت تفهم شوية الحياة اليومية إلي فالغابة وإلي هي معقدة برشة ... أما بحول الله تبعني مليح توا الرؤيا توضاح ... قلك عادة الذيب (إلي هو في أغلب الحالات شاب بطال ومطرد نهائيا من جميع المعاهد بسبب الوقاحة وسب الجلاله و تلقاهم سقاط من الدرجة الأولى) يبدا يدور وعينيه ووذنيه شادين "ڨارد" يا بوك يشوف أو يسمع ثلاثة مواطنين أو أكثر يحكيو ... يجري عجاجة لمركز الحنوشة إلي فيسع ما يهبطو على المجموعة كهبوط الغيث من السماء ويترفعو ... ثم يتم الالقاء بهم في اقفاص حيث يتم ترويض ما تيسر ترويضه ثم ادماجهم في السيرك الوطني ...

- سيرك ؟

 - كان سكتت راك حجيت ...هاو نعطيك لمحة على السيرك الوطني ... يا سيدي متكون من ثلة ثعالب ملاقيط ليكس وولاد حرام لا دين لا ملة أخبث منهم ما ثماش و أفات في إختراع الأكاذيب والأساطير حتى يسكتو الحيوانات إلي مش فرحانة... قول اللطف وبرا ...

الثعالب هاذم يخدمهم حسب التقريب 2 ملاين من الضبوعة ... أي نعم وهو ما يمثل خمس سكان الغابة ... الضبوعة يا صديقي همهم الأول والأخير هو التقرب من الثعالب وعلاش لا ما يوليوش ثعالب بدورهم أو حتى أسود لو سنحت لهم الفرصة ... 

- ملا غابة وملا قانون ... تو الغابة هذي موجودة بالحق ؟
- إي نعم يا غالي ... تي حتى الولايات الحيوانية المتحدة حارة فيهم ... أية سيدي يجيش على بالك انو الصيد الكبير مهوش معبرهم وعامل مولى الدار مش هوني ... 
- أنا ما نحبش نكون كيفو ... نحبك تقلي كان غلط معاكم ... إنت عندي فيك الثقة 
وعلى ذكر كلمة ثقة ... تحل باب القاعة إلي مجتمع فيها ميغالو و بنفسجيست على مصراعيه ...و صاح ثعلب من ثعالب ميغالو في جنوده أن يلقو القبض على بنفسجيست وتنطر أحد الاحناش عليه فكمم له فمه وكتفلو يديه وساقيه وحتى وذنيه ... 
      
abuiyad

4 تعاليق:

Unknown يقول...

نهايه منتظره تي مليح عدّالو الجملتين إلوالى يابنفسجيست ..أهّوكه قالها ميغالو : غرررغرر يا غراب ما ظل في الغابة من أنيس غير وحشتها وحتّى ابن آوى خير من بنادم كيف تبدى من قطيعو ..

كاليمارو يقول...

مازالت ما وفاتش يا غيغوز ... سوف نواصل بعد الفاصل

الله يعطيك الصحة فكرتني في هل أمثال ... لبارح نلوج على متع " غرررغرر يا غراب " نسيته وليت بدلت السيناريو

مسلمة يقول...

:s بنفسجيست ولا لا يسمع لا يرى لا يتحرك ولا حتى يصفق، زعمة يسلكها؟ :
ماداموا بنفسجيست و حر أكيد تو يسلكها، أما قول بالك ميغالو يسترجل و يسلكهالو (مش حباً فيه أما حباً في حكاية العرس إلي يخرنن يحب يعرفها) لووووول
ممت____________________از

كاليمارو يقول...

@ Agenda:

هاك بديت تفهم ... لول
مانيش بش نحرق الفيلم ...
wait & see :p

إرسال تعليق

أعطي رايك