الأحد، 19 ديسمبر 2010

قصة ميغالو و بنفسجيست ... الجزء الرابع والأخير

بعد ما خرج بنفسجيست ساقيه أعلى من راسو والمرى متاعو تجري وراه بال"تالون" وفحجة لباس والفحجة إلي من بعد ساقها تتلوى ... وكل مرة تصيح على راجلها أن ينتظرها ولكنو عامل مولى الدار مش هوني ... يجري ويبرطع وهاك الفليجة إلي وراه مع كل حجرة تترفع تقول بش اطير بيه ولكن عزمو على الخلوط فالوقت جعلو يكبش فيها ...

وصل للمطار وتفاجأ بعدد الحنوشة والثعالب إلي كانت في إستقبالو ... لكن فيسع ما تفكر إلي الملك مسافر وهذي حاجة عادية ...
تقابل بنفسجيست مع الثعلب إلي كان وعدو باش يجيبلو جواز السفر ...

- صباح الخير ...
- صباح الفل ... لباس ؟ شنوة عجبك العرس ؟؟ هههه 
- هههه (ضحكة برتقالية) ... إي إي 
- أية هاو الجواز إلي وعدتك به 
- الله الله عليك ... إلي يعول يعول على راجل (صحة لك استنى نخرج بركة)
- تي  ويني المدام ؟ موش ماشية معاك ؟

هكاكة ودخلت مرتو تعڨل ... مشى حذاها وعطاها الجواز حطتو "فالصاك" متاعها .. وقعدو يوتوتو مع بعضهم في إنتظار الركب الملكي ...  بعد نصف ساعة أو أكثر شوية جاء ميغالو الملك ودخل معاه عدد كبير من الحنوشة والثعالب وبطبيعة الحال اللبوة كنت معاه "برادسي برادسو" ... سلمو على بنفسجيست ومرتو وباركولهم بالعرس وأكثر من هذا وعدوهم بدار مجهزة في كندا كهدية العرس ... فرحو العرايس الجدد خاصةً مرة بنفسجيست إلي كانت ياسر متخوفة من المغامرة ... دخلو الجماعة للمطار وعطاو الفليجات لثعلب منهم باش يهزهم للطيارة ...

ومشى ميغالو وبنفسجيست و زوز نساهم إلى مكان الإستقبال الملكي ... هي عبارة على صالون كبير بكلو رخام من جميع الألوان ومعبي بالأثار الأصيلة ... طلب ميغالو من زوجتو أن تمشي تعمل دورة بمرة بنفسجيست على حافة "ألبيسين"  إلي في الصالون ..

- شوف هذي تحفة من غابة يسميوها الصين ... هذي تسوى قرابة 500 شهرية متع أستاذ أما بربي لواه الخساير شعندو يعمل بها الشهرية 5 الأف فالجمعة تكفيه ...


- ملة ... صحة لك راجلك يشريلك إلي تحب ...
- ها ها ... ياخي هو يقرر وأنا موجودة ؟؟ يحمد ربي كي مزلت ما سيبتش عليه سيدي خويا ياكلو حي ...إسمع الراجل يلزمو كالخاتم في صبعك ما كانش اش قام عليك تعرس  ... 

حاصل دخلو في هاك الحكايات متع النساء ... راجلك باهي معاك وأعملو هك وما تعملش هك وكيفاش وعلاش وفلان وفالتان (بذكر التقطيع والترييش البارح زميلة سابقا وراتني تصويرة متاعها على الفيسبوك تحتها تعليق "الجاذبية البشرية أقوى بكثير من الجاذبية الأرضية" ها ها ها) ... 

وفي نفس الوقت مد ميغالو ماصو لبنفسجيست وطلب منو أن يحلو ... بنفسجيست كيف شد الماصو وفرح قبل ما يحلو كان يتوقع أن باش يلقى العقد متع الدار إلي وعدو بها ... حل الجواب وجبد الأوراق إلي في وسطو ... بدات يديه ترتعد ... بدا يحس في سخانة تخنق فيه والفجعة إلي كلاها الله لا يذوقها لحبيب ... حب يهز عينيه ويتكلم إلى أن جميع حواسه خانتو ... تلفت لمرتو يلقاها تضحك مع اللبوة الكبيرة حب يعيطلها ... حب يفسرلها ... حب يضرب ميغالو ويهرب لكن قبل ما يعمل حتى شي نط أحد الأحناش وعلق له حزام ناسف وعبالو جيابو بجميع أنواع المخدرات والممنوعات وصاح فيه ثعلب وصاح معاه ميغالو وتم في رمشة عين إلقاء القبض عليه ... حاولت زوجتو أن تطلب رحمة ميغالو لكنو رفض وتم حمل بنفسجيست على وجه السرعة إلى التحقيق في التخطيط  لعملية إرهاب والثلب وتهريب مخدرات والتحضير لإغتيال الملك ... 

قبل ما يخرج بنفسجيست تلوحت عليه مرتو تحب تمشي معاه إلا أن الملك منعها وجرها معه إلى الطائرة ... وهي تصيح وتبكي ... طلعو في الطيارة و اقلعوا ... بنفسجيست وصل للمركز ويلقى قدامو الأحناش فرحة بإستقبالو ... 
في الطيارة كانت مرة بنفسجيست انعزلت على كرسي وحدها ... تتفرج من الشباك وتفكر في الإنتحار ... كانت تذكرت زواجها المتعجل  ومعرفتها وثقتها ببنفسجيست أنه على حق جعلها تلعن الشيطان وتحاول تدارك الموقف وتصلح إلي تنجم ... حطت يدها في جيبها وإذا بها تلقى وراق ... جبدتهم ... تصاورها هي ورجلها في القهوة إلي كانوا تقابلوا فيها وحكاو على العرس ... وبدات تحاول تفهم شكون صورها وكيفاش وصلو التصاور لجيبها إلا أن كثرة الأحداث جعلها حايرة وما فاهمة حتى شيء ...

بنفسجيست حكم عليه 25 سنة ومرتو قعدت تناضل وتنادي بحق رجلها وبإنشاء جمهورية ... تعمل في فيديوات وتحط فيهم على الفيسبوك ... الناس تتفرج وتحط "جام" ولا واحد معبرها حتى واحد لا نجم يعطيها حل للغز إلي خلاهولها رجلها ...

في زنزانة وحدو دنيا ضلام يوصلو الحديث على مرتو ... جاء بوها و سمعو الكلام ... كلمة ألحق إلي قالها في وجه الظلم تكلفتلو غالية ... السلاسل في يديه وساقيه ما يحكي مع حتى حد وحتى حد لا يحكي معاه ... حتى نهار جابولو ورقة ...

تم إغتيال زوجته في كندا ...بكى برشة ولكن لا حيلة له ... مزق الورقة الحاملة لأقسى خبر سمعه منذ أن عارفها  ... مزق معها كل أمل في حياة أفضل ...

نعم مزقها ودخل الزنزانة ... دخلها ولم تعد له رغبة فالخروج منها ... فالسجن أرحم به من غدر الأصدقاء ... ماتت من ضحت معه ومات نضالها وماتت حرية التعبير ... مات العالم والمتعلم وبقي اللئيم في شأن القوم يتكلم ... دخل إلي زنزانة مظلمة ... كان قد رسم على جدرانها اسمها ... 

*
يداعب في الجدران بأصابعه الضعيفة المرتعدة ...  و عقلو قد سافر في ذاك العالم المجهول ... في ما لاقت زوجته اثر الممات أهي تنعم في جنات ؟ ... في زنزانة مظلمة يخاطبها ويطلب منها أن  تسامحه ... لاقت يده لبنة سحرية  من لبنات الزنزانة ... فتحت له مفراً من ذاك السجن ... وجد نفسه يحدث زوجته ويداعبها في ضل نخله تدلت ثمارها ... فيقطف من تمرها الذي إن لامسته تحول إلى عنب ذهبي اللون حلو المذاق ... فتأكل من يديه وتهمس له في أذنه كلمات ليست كالكلمات ... فيطير نشوة ويطير حلمه وقت إلي هبطت عليه متراك ...

- تڨعد  ... شفت روحك فين راقد ؟؟

ثار بنفسجيست وهرب بالمتراك من يد الحنش وطاح يضرب يضرب يضرب ...

مات الحنش ...

وأعدم بنفسجيست ...  وقبل الإعدام قال كما قال الشاعر و هو ينظر في عينا ميغالو :

إن الملوك بـلاء حيثما حـلـوا * فلا يكن لك في أبوابهم ظــل
ماذا تؤمل من قوم إذا غضبـوا * جاروا عليك وإن أرضيتهم ملوا
فاستعن بالله عن أبوابهم كرمـا * إن الوقوف على أبوابهــم ذل 
* الفقرة الأخيرة مستوحاة من تبادل تعاليق مع المدونة الصديقة أجندة ... كانت عبارة على خاتمة تخيلناها لقصة حلوة وحكاتها هي بطريقة ياسر ممتعة ... وكذلك الأبيات كانو من إقتراح أجندة ... مشكورة
  
abuiyad

10 تعاليق:

Michmécha يقول...

triste fin! tellement réaliste!
Rabi i9adir il khir w bara =)

"الجاذبية البشرية أقوى بكثير من الجاذبية الأرضية"
3ijbitni *\o/* w hani bch nista3milha éna zéda

Unknown يقول...

هل يمكن أن نتوقّع نهاية أفضل ..لا تنسى إذا دخلت لمدوّنتي أن تسمع أغنية ذيب الغابه لجيل جلاله فهي بالغة الرّمزيّة و الواقعيّه

ريحة تونس يقول...

علاه هكة يا وخي شعملنالك ؟ ناقصين أحنا؟

كاليمارو يقول...

مشماشة:

حزينة وسعيدة في نفس الوقت ... وربي يقدر الخير :)
أيوا إستعملها أما ... قللنا شكون :p


غيغوز:

كان عندي برشة حلول أما في الوضعية الحالية متاعي بعد الشي إلي صاير في سيدي بوزيد ما نجمت كان نحكي على الموت والإعدام ...
أهوكة في نفس الوقت نبدل شوية من النهايات الكلاسيكية :)
عندك موسيقى روعة ... ناس الغيوان وجلجيلالة (تعرفها "حكمة الأقدار" متاع الأرصاد ؟ ... أغنية مغربية زادة وروعة)


بنت بنزرت :

والله ما نجمت نحكي كان هكاكة ... كيف قتلك في مدونتك قلبي حزين :( ...و في نفس الوقت باهية المفاجأة !
تو الحكاية الجاية نشالله نلقالها وقت ... أما باش تكون سعيدة بقدرة ربي ؛)

مسلمة يقول...

salem
ya3tik essa7a pour la publicité :D
:((( mamatech banafsajist mameeeetech mahou 9olna bel3ani :D
ataw nekhoulek betharek w thar martek, migalo 9atletou 9atletou :D
(mech sa3idia ama.... tounsia ):P
(je suis désolée j'écris en arbe metfarnes 7alit par hasard, li 3awda inchALLAH pour lire les reste des notes)
Bonne continuation dans ton paradis ;)

كاليمارو يقول...

أجندة :)
وعليكم السلام ... مغير مزية انا استعملت حاجة عملناها الثنين مع بعضنا يلزمني نذكرك :) ونشكرك !
شفت كيفاه ... من قلبي حزين هلأيمات يخي وليت قتلتو باش توفى الحكاية ونرتاح من مشاكلو لول
باهي نوكلك بميغالو ... إنتقم وخذلي ثأري ...

أية أرجع وامتعنا نحن في انتظارك :)

مسلمة يقول...

إييييييي وانا انجم ننسى ؟؟ :)) يعيش خويا الغالي، ربي يعزك ويخليك :)

شكون موش حزين هل الأيامات يجي يقابلني ويسلفني شوية "سعادة"

قعدت 4 أيام محليتش الإنترنت ، قعدت بني وبين روحي، خرجت، حوست، مشيت.. مشيت.. مشييييت... و رجعت.. قلت أية برى نكتب نفرغ الشكارة إلي في قلبي أما المشكلة ، صوابعي ميهنيونيش ديمة نلقى روحي خارجة عل موضوع ونكتب في خورمولوجية تقول إنت "كوسي كوسا" :D

الله المستعان يا بنفسجيست، انشالله ربي يفرهد علينا الناس لكل، بنسبة لميغالو، دع الخلق للخالق فلنا رب يمهل ولا يهمل ؛)

نهنيك على النونية ؛)

إلى لقاء قريب بين مدونات أهم انشالله، أقول: دمت حراً بنفسجيست :)

كاليمارو يقول...

مشيت مشيت مشيييت ... ما تعبتش من المشي ؟؟ لول
أما 4 أيام بلاش انترنت ... بصراحة قوية منك :)

الله المستعان كيف ما قلت ... هاك حطيت تدوينة جديدة نشالله نتفاضة ونقراها أنا زادة هلأيمات مش في صحني برشة :)

يبارك فيك ... عجبتك النونية ؟

مسلمة يقول...

:)
متعبتش :P مادام نمشي مادام منتعبش، إلي يتعب هو الوقوف ؛)

4 أيامات قوية؟ لوول ضاهرة تنبيرة أما هاو بش نحسب روحي ماعمباليش :)

مننصحكش تقرا إلي كتبتو ، شديت كتبت شوية خرملوجية سكت بهم الجوجمة إلي في راسي لوول إلى أن تهبني بنات أفكاري حاجة تصلح،

انشالله مطولش وانت مش في صحنك

عجبتني النونية.. أما كملت على ما بيا:'(((


بالتوفيق:)

كاليمارو يقول...

هاها ... المرة هذي مانيش انبر لول ... أما كان تحبني انبر ما يقلقنيش :) كيفاش امالة 4 أيام كاملين ؟ باباباب ... قدكش سوفرنس قدكش سوفرنس :p

اللطف عليك ... هاني نكمبز في قصة جديدة ... فديت من المشاكل :)

إرسال تعليق

أعطي رايك