الثلاثاء، 28 ديسمبر 2010

عمار يستفيق من سباته الشتوي

عمار صاحب ميدالية الموظف المثالي لسنة 2010 ... بدا تقريبا نهار الخميس إلي فات في حملة زنسفورية جديدة على بعض الصفحات والبروفيلات في الفيسبوك ومنهم صفحتي إلي بصراحة ما فهمتش علاش جزرها (الله لا تبركلك ... هذاك اش انجم نقلك) ...  

اه تفكرت على خاطر حطيت رابط لصفحة مشبوهة ... وفيها استقواء بالأجنبي ... أو في رواية أخرى قلت كليمة حق !

إي عادة قلك انتم يا مدونين ويا فسبوكيين تكرهوا تونس و تعطيو في صورة مزفتة للبلاد إلي ريحتها ورد وياسمين (يابا يابا)... قاعدين تكذبو فالمعجزة الإقتصادية إلي يشهدلنا عليها العالم الكل ... وتبكيو على مجرد ١٩ فاصل تفتوفة بالميا بطالة (فقط) ... انتم يا وجوه اللوح (يا إلي ما عاش تفيد فيكم لغة الخشب) ما تعرفوا حتى شيء، نهار وطولو وراء "اكرن" و تحكيو على حال المدن الفقيرة ... 

إمشيو عيشو فيها وها تو تشوفو الإنجازات ورفع التحديات ... وتو تشوفو شعب زاهي وأمورو عال العال ... الشعب من كثر حبه للحياة أصبح يعمل في أنشطة ثقافية في المدينة كمحاولة إنارة شوارع البلاد بتشعيل بدنو وإلا السباحة في بئر أو محاولة التسلق في أسلاك الضوء أو حتى محاولة التصدي للكرتوش ببدنو ... صحيح انو شعب "ساديك" نوعا ما أما راهو كل واحد وسكرتوعلاش تجيه ...

هاو حتى المعارضين إلي في مجلس النواب قالو إلي انتم متأثرين بالجزيرة تيفي (إلي كيما تجيب في معارضين تجيب في سي بصيص)  وناويين على خلاها ... لذا باش ما تفزدوش العلاقات الحميمية بن السلطة والشعب ... وباش ما تقلقوش حراس المناصب عفواً المكاسب في مسيرتهم المباركة نحو تغميض أعين الناس ... قررنا نحن المجلس الأعلى للمراقبة الهنترنتية أن نرفع تشكياتنا إلى حبيبتنا أمريكا إلي كالعادة من أجل إرساء الديمقراطية البنفسجية إستجابة لطلبنا باستعمال المبيد التدويني الى وهو صبع عمار عفواً مقص عمار (ما تنساوش إلي سامحناها (أمريكا) على وكليكس ...ومن باب رد الجميل يلزمها تستجيب) ...

أية إن شاء الله تكونو فهمتو رواحكم ... اطلبو السماح من بلادكم راكم حشمتوها قدام شعوب العالم (حتى من زامبيا حكات عليكم ... زعمة نكونو أول بلاد تصنصر موقع زامبي ؟؟ )  !

أية توا خليونا إنركزو ويزيو بلا همجية ... خلينا نعديو ألسنة الدولية للشباب على خير...

La censure nuit gravement à l'image de ma Tunisie (imbéciles)


abuiyad

10 تعاليق:

غير معرف يقول...

يرحم والديك فرهدتلي على قلبي
الله يجعلك في كل ثنية عثرة يا عميريشة 404 اليانكي الماسوني
الله يعطيك على كل بلوغ مصنصر مشطة في مؤخرتك
الله يعطيك داء مالوش دواء اكثر من هالكلب اللي راكبك هالنهارين
سامحني خويا بنفسجيست راني وين يتجبد ولد الامريكان الكلب متاع ال 404 اللي نبهنا ليه خونا الصوابني كشاكشي تطلع و نولي ندعي عليه ديراكت
نتمنى لي و ليك فرج قريب من داء ال404 اللي ضربني بيه عميريشة

Primavera يقول...

de l'ironie et de l'humour noir comme on aime bien, bravo :)

ama mets toi à jour ammar tla3 américano esmou John w 3andou 4*4 moch 404 ;)

كاليمارو يقول...

العيدودي بوكشان:

مرحبا بيك زارتنا البركة :)
يا ولدي ادعي قد ما تحب (مدام بلاش كلام زايد) و أنا هاني نأمن معاك :)
بنسبة لرفع الحجب ... مانيش متفائل القصان هذا يهز وما يرجعش :( لذا صديقي ما عليك كان تبدل العنوان متع المدونة و الله المستعان ...

بريمة (صحة لك بالعربي تجيك بريمة يا بريمة) :

شكراً على تعليقك الحلو وعلى "الميز ا جور" عجبتني ال-4*4 :) ... المهم هو فهم رحو وعرفني إلي نحكي على هاك الرمز إلي مستعملي الانترنت الكل يسبو فيه صباح وليل .

مسلمة يقول...

عمار فاق و زاد عرس و ولا عندو برشة ذرية لووووول انبر عليه عندك مانع؟

ريحة تونس يقول...

أه صارا هي الباج متاعك مصنصرة وآنا نسخايل الكونكسيون عندي تاعبة ؟:).نقلك حاجة في وذنك ؟ بعد هالتدوينة عمار باش يونسك في البلوغ متاعك

Michmécha يقول...

ya sidi incha Allah bil barka =) si Ammar bkollou t3ada 3al page w 3malilha 5atm a7mir w chi3ar w médailles w walet 404 =) éna fi blastik nafra7 =) hédhéka ramz lil watania mte3ik =) wala 3andik injez 3adhim t7otou fi CV!ili i9olik 3ammar i3taraf bik!

w tzaghrita 3al a7beb wil as7ab =)

كاليمارو يقول...

أجندة :

نبر للة نبر ... أما كان سكرلي مدونتي نجي نحرم عليك :p

بنت بنزرت :

لا أهوكة عملت صفحة جديدة :(
الفال شعملتك ؟؟ أهوكة إستعمل البروكسي المرة الجاية ...

مشماشة:

الله يبارك فيك :) العاقبة عندك خليك تفرح :D

مسلمة يقول...

إههههه وترصيلي انا معاش نلقى وين انبر !!! لا لا مايساعدنيش، عميراتو انا ما قلت شي راهو ، كلو جرت بنفسجيست ، هاني بش نقعد عاقلة

لاينحيك علينا يا بنفسجيست يا حر ، انشاء الله عمار وين ينوي يزورك ميلقاش ترونسبور لول ربي يحفظك يا خويا :)

كاليمارو يقول...

أجندة :

جرتي ؟؟ زيد شعل النار ... برة نتفاهمو فيها :p
الله يخليك يا أجندة يا باهية ... كان صنصرني أهوكة البروكسي ولا يهمك :)

Imène يقول...

الله لا تربح بجاه ماهي ليلة جمعة وليلة ريفين
ياخي قلي الهوت سبوت يخدم ولا لا ؟

إرسال تعليق

أعطي رايك