الثلاثاء، 19 أفريل، 2011

النهضة ... ويوفى الحديث : رد على اكسترا بلوغ


قبل كل شي نشكر الناس إلي علقت على التدوينة الفارطة وادعو من سالني بعض الأسئلة إلي بلاش تهم (السيد إلي قال إلي أنا مأجور مانيش باش نجاوبو ...) أن يقرا التدوينة هذي وإنشاء الله يلقى مبتغاه ... باهي ونشكر كل صفحات الفايسبوك إلي نشرت التدوينة سوى إلي موفقتني أو إلي موش عاجبها الحديث ...  

حاجة أخرى كيف قلت في التدوينة الفارطة أن ما نحبش نحكي في الموضوع ، أما أحرجني المدون اكسترا بلوغ وزاد ضربلي اللغة كيف ما نحب (راسي كبر تنجم تقول) وليت نحس في نفسي ملزم على أن نجاوب وكيفو هو خيرة يكون الرد في إطار تدوينة حتى تعم المنفعة  ... وبالمناسبة هذي أخر مرة نحكي في الموضوع لأني كيف ما قلت قبل ثمة حاجات أهم ببرشة ... أما كان ثمة تعليق ساعة ساعة ما نقولش لا :)

باهي باش نفسر علاش ما نعتبرش الموضوع هذا هام ، بالنسبة ليا الموضوع هذا مفتعل و مشي في بالنا على أنه هام ... تنجم تكون النهضة وراء الافتعال هذا حتى ما نحكيو كان عليها والأحزاب الأخرى إلي من عهد بن علي ديمة تشكي وتبكي ما قالوش لا وعملو شوهة ونساو حتى هما أن البلاد حاجتها برامج تنمية موش برامج لطم ... وينجم يكون موضوع مفتعل من الطرف المقابل سواء كان أعضاء من "التجمع" أو الأحزاب الأخرى أما التعامل مع الموضوع  ما كانش كيف ما يلزم ... 

بعض الناس إلي علقت، تعتبر أن المسألة هذي تهم مستقبل البلاد وأن الشعب يتسائل في الأسئلة هذي (لائكية ، إسلامية ، النهضة أو موش النهضة ...) على خاطر يحب يعرف ويحدد مصيره في البلاد هذي ... متفق معاكم لكن كي تجي قبل ما يهرب بن علي ، كنا في "حرب " بين أنصار بسيشو أم وسوسن معالج ... هذا ما يبرهن على أن الموضوع هذا ما يحل حتى مشكل وبالعكس يشنج الأعصاب ويعرك الناس في بعضهم  ... المشكل هذا أعمق من أن يتحل في ثلاثة أشهر قبل إنتخابات ... هذا مشكل تشتت نواة المجتمع ، الناس بعدت برشة على بعضها ، وأصبح التكفير والتهمة بالإرهاب كي "خويا عندكشي سغارو" ... المشكل أن أكثرية الناس صحيح قارية ومتثقفة والأغلبية عندهم شهائد لكن الوعي ينقص وخاصية التسامح ناقصة ...  برشة عباد مازالت تخمم بعقلية فيراج ، رابحين ، خاسرين ، ماكمش سالمين  .... لذا أنا نشوف أن الحكاية هذي موش وقتها ... (وزيد الثورة قامت على الظلم و البطالة يعني هي أولويتنا ، نحبو نشوفو برامج تنمية صحيحة ... كيفاش باش يتم تصليح الإدارات ؟ كيفاش باش يتم تغيير برامج التعليم ، تي اسئلة قد شعر الراس ... )

في خلاصة القول مدام ثمة عباد تعتبر الائكية هي زواج المثلية وشكون يعتبر الدين عفيون الشعوب ... راهو الحديث هذا ما يصلحش ...

كيفاش نصلحو ؟ بالنسبة ليا تكون في مرحلة أولى هناك وسائل إعلام كيف التلفزة الوطنية (إلي نخلصو فيها من جيوبنا) ، وتحاول تكون محايدة و ما تهبط الخبر إلا بعد ما يثبتو فيه مليح (كيف عوايدهم يعني) ... تقوم بدور توعوي ، وتجيب أشخاص إلي يحب يشوفها الجمهور ، موش كيف المحامية هذي إلي تحكي على الثورة البولشفية كمحاولة للقطع مع الدين و هي بهامة صارخة ، وما غير ما نذكر إلي هي ما تعرفش تقرا القرأن خلي باش تحكي عليه وتحلو -) ، أو كيف سي صالح الزغيدي إلي قلك نندبهم على شعبي ... يا أخي مانيش ملك السيد الوالد باش تندبهم عليا ... جيبو ناس تحكي برزانة موش تهريج الحكاية ...

بالنسبة للسيد إلي يخدم "جنغولوج" نحبك تفسرلي شنية علاقة الحكاية إلي تحكي فيها مع الموضوع متاعي ؟ هل أنا قلت ما ثماش تجاوزات ؟ وننصح خويا امشي تعلم شوية كراتيه باش تتعلم تدافع على روحك شوية ...   



اه ونسيت ما أكدتش بحكم أن البعض ما يفهمش- النهضة يجب نقدها أما في حاجات صحيحة ... ولا داعي للخلط بين ما يقوم به السلفيين وبين مشروع النهضة ... لأن حتى كان النهضة ما تربحش ، فإن السلفيين قاعدين ولا مجال لتلويحهم في السجون مرة أخرى ... على الحزب إلي يحبني نصوتلو أن يقترح مشروع إجتماعي صلب ...   

وبربي إلي يحب يفهم علاش النهضة تعمل وتقول وما تعملش راني ما نعرفش ، خطني ... البارح كيف اليوم نحكي على النفاق والكذب والتلفيق متاع برشة عباد ... ونحكي زادة على عجرفة (ولو أنها موش أتباع النهضة برك... حتى صديقي إكسترا يحب يدهم على خالو بسكينة) بعض الناس ... ووو-... إلي قلتو البارح

باهي تدوينة اكسترا بلوغ ... طويلة وعريضه أما الله غالب حشمني ... باش يكون الرد في شكل فقرة من بلوغ اكسترا (بالألوان) ثم تليه اجابتي ...

أملاً في انو يفهمني ويتناقش معايا

أنا فهمتك، إي نعم فهمتك وفهمت الجميع وباش نتناقش معاك ...




حسب ملاحظتي الأولية : كتب الخبر في سياق يطغى عليه إتجاه واحد ومنظور واحد، معناها -مش كيما قال ولا يظهر من كلامو إن نقد النهضة مافيهيش جانب صحيح ما عن حتى علاقة بمفهوم هجمة- نقد النهضة فيه الغث والسمين وأهم حاجة المغالطات من الجانبين، فما أغلاط وفما تمسكين زادة من النهضة و احنا نتعرضو لحملة و احنا يا حليلنا نسخفو و احناحقوقنا مهضومة و نعانو من الإسلاموفوبيا!! توا بلكشي عايش في اللامريك بش تقلي إسلاموفوبيا ؟ تونس أغلبية ساحقة مسلمة وتقلي إسلاموفوبيا؟ توا أنا نعرف حتى السكارجي ماخذ فكرة بهية علي يصلو والملتزمين هاو هذاك ناس طيبة يصلي ويعرف ربي. تي مرة في تكويرة الراجل يحب توش قتلو ما مستنيش الكرة، جاني صاحبي فرد ايكيب وقلي الراجل يصلي مش بش يكذب عليك!!! وإنت تقلي إسلاموفوبيا؟ تعرف شنوا معناها يخي ولا تتهيبل؟ معناها إنت مسلم دنك تخوف، إذا فما خوف من التطرف ما يتسماش اسلاموفوبيا وإلي يمن إلي فما إسلاموفوبيا في تونس يا إما بهيم حشاكم ويا إما لغاية في نفس يعقوب ...


هنا نحب نقول إلي أنا متفق مع حكاية التمسكين متاع البعض من النهضة وهذا ما قلتو البارح ومانيش باش نعاودو ... باهي هنا مانيش باش نجاوب لأني اعتبر نفسي لم اتحدث عن إسلاموفوبيا ... وما نحبش ندخل في حوار في مسألة تهم أطباء النفس ... أما أنا حكيت على فوبيا بمعنى الخوف ليس إلا ... وهي حالة الخوف الشديد إلي ربما تغيب العقل وهذا ما أشرتلو أنا البارح ...

باهي توا نرجعو للرد على التدوينة، فما إشاعات وإشاعات مضادة، حسب ما قلت إنت إشاعة حكاية الأستاذة والنقاب، أنا 
حسب ما
عرفت لحكاية هذي خرجوها برشة ناس متعاطفين مع النقاب على الأقل اصدقائي منهم خرجوها كيما خرجو

كما هاك الطفلة في صفاقس إلي باعترافها تقبحت على الأستاذ خاطر ما قبلهاش بالنقاب وجابت خوها عطاه طريحة، والجماعة تتبكى والله ما حقوش الأستاذ، نورمال ياكل طريحة وتتقبح عليه تلميذة!، قال شنوا حرية ! والله نتمنى من هذو الجماعة كانهم جماعة حرية, ينادو بالحرية حتى للعرايا معناها كيف يجيك أستاذ قلم ما يقلقكش، ولا وقتها الحرية تولي عندها ضوابط؟ وكيفكيف على المثلية الجنسية.... إلخ إذا إنت تعتبر انها حرية شخصية، ووقتها نفهمك إلي إنت وصلت لدرجة في منظور الحرية متاعك فاتتني وفاتت مخيالبسيط أما ضربان اللغة مش لازم منو.

باهي هنا صديقي تعمل في تحليل وتقول فيا في كلام أنا ما قلتوش ... هل أن في كلامي (وأرجع للتدوينة) قلت أن النقاب حرية شخصية ؟ أنا انتقدت بعض الأعمال الدنيئة إلي لا فيها نزاهة و لا موضوعية ، وعطيت مثال لحكاية تكون تداولت وطريقة "عادية" ويتم نقلها كفاجعة والتلامذة حرب من القسم ، وهاو رجال تونس اش تعمل كيف تشوف مرة بالنقاب ... أنا قلت موش معقول نكذبو ليس إلا ... لذا ما تدخلنيش في حكاية أنا مع النقاب أو ضد لأن عند رأيي على المسألة ومانيش مستعد (وأنا حر في هذا) أن أدلي به ...





باهي بالنسبة للحرية الدينية مسمعتش أنا فما شكون مش بش يضمنها؟ واللهي توا حتى هذا كلام!
بالنسبة لإستعمال المساجد صار, والناس الكل لازمها تحكي فيه وسامحني حطان النقطة هذي في سياق التدوينة اسمها مغالطة كبيرة، كأنها مش نقد هادف وعندو معنى، أنا نحكي مثلاً على بلادي جربة صارت مشاكل على الحكاية هذي متع تغير الأيمة، معناها النهضة قاعدة تتدخل ومش من حقها،وبالنسبة لإستعمال المساجد (خاصةً بالطريقة إلي حكى بها صديقنا كالميرو ، كأنو يقول يا مصلين كان مش بش تصوتو نهضة راهو الجامع بش يسكر ويردوه بار! قلو ضمان الحرية الدينية




يخي فما شكون
مشبش يضمنها؟ تي الوطد قالك عنا رفقاء حجاج بيت ربي وإنت تقلي ضمان درة شنوا! حتى هذا كلام! حملة التسييس في المساجد مع الوعي المحدود والجانب التقديسي تخلي العملية مربحة ونفهم علاش النهضة تنحي إمام من البي دي بي بش تحط إمام نهضوي كما صار في صفاقس. الوقاحة والإستهتار بالمعتقدات المذهبية وصل بيهم بش ينحو إمام اباضي في اجيم جربة (نأكد إنو كان صباب كبير) وتعويضه بإمام مالكي ولا سلفي ولا شنوا المهم عرفوه مش اباضي من تكبيرة الإحرام ، قال شنوا الكلنا مسلمين وكيفكيف، قالولهم أهوكة فما جامع المالكية قلك الناس الكل تصلي معانا، كان هكا وما وصلوش للسلطة وما يحترموش الأقليات ، ملا كان جات بيدهم كيفاش؟


باهي نجيو للنقطة الكبيرة (المغالطة متاعي ، في إنتظار المغالطة متاعك ؛) ) إلي برشة عباد تنتقد فيها وإلي ربما ماهيش واضحة برشة ... باهي قبل كل شي أنا قلت بالحرف الواحد " صحيح ان النهضة مش من حقها تتدخل في حتى إمام ومش معقول يتم طرد إمام من طرف أي عضو من أعضاء النهضة" لذا النقطة هذي نعتبر نفسي كنت واضح فيها ... وفي ما يخص إستعمال المساجد كي قلت إحترام حريتهم الدينية نقصد حرية المرأة في لبس الحجاب على سبيل المثال وإلي على فكرة العديد من الأحزاب يعتبرو هذا دخيل على الدين تقول الكلهم عاملين 20 سنة فقه (ومن بعد يقلك ما ندخلوش السياسة في الدين ... حوس تفهم ...)  ... نقصد كذلك أنهم يجب أن يصوتو للحزب إلي يخلي الجوامع محلولة 24 / 24 ... الحزب إلي باش يحترم الأذان ومهوش باش يعملو "سيلسيو" ... وما إلا غير ذلك وهذا نعتبرها حاجة عادية... أنا شخصياً إلى حد الأن ما ريتش فيديو فيها "صوتو للنهضة" وهما في الجامع ...  وزيد هذي موش مشكلة النهضة كي الأحزاب الأخرى ساكتة في المسائل هذي، تكلمو ويزيو من النقد الفارغ ... ومرة أخرى هنا مانيش ندافع على النهضة أما نعطي في وجهة نظر متاعي ، ما تخص كان شخصي ... ونأكد على أن ضد الدعاية لأي حزب من الأحزاب في الجوامع أما يلزم نحدو شنوا دعاية وشنوا لا ... أما الكلها خلوط وجلوط ما تجيش ... 





وهكا بش نتعدى لحكاية إيران، لهنا نحب نقول التاريخ لا يرحم إلي ما يتعلمش منو، معناها كيف نقول منحبش مثلاً ثورة مذهبية ولا دينية معناها كيف تاخذ مسافة من النهضة وما تكونش منساق أعمى وراء قيادتها حتى ولو بش تصوتلهم، هذا ما يعنيش انك تلوث في صورتها، أما لزمنا نتعلمو من تجارب الدول الأخرى وكيفية إنهاء ثورة، ماهيش بالسهولة إلي نتوقعوها كيف نشوفو اش صار بعد ثورة روسيا وثورة إيران، معناها التعلم من التاريخ مهوش هجوم غير مبرر ضد النهضة بل إنارة لكي لا نسقط في أخطاء سقط فيها غيرنا، والمقصود هنا اليقظة من أي إنحرافات عن مسار ثورة الحرية لا من النهضة فقط بل من جميع الأطراف؛ النهضة والشيوعيون وبقايا الدكتاتورية والدكتاتوريين الجدد، وما يمكنني ملاحظته هو إنتشار ضاهرة مسكنة النهضة والنهضة فوق النقد الشيء إلي يسهل دكتاتورية جديدة خاصةً مع بروز هذا الكام الهائل من البرهان بسيس المنتشرين هنا وهناك.

باهي وبالتالي علاش اللوم (هنا مانيش نحكي عليك أما بصفة عامة) على البعض إلي يحكي على اللائكية الفرنسية كمثال خايب من اللائكية الكلية إلي تمحق الدين (وموش الديانات الكل على فكرة كيف كيف) ... ؟ علاش اللوم على النهضة كيف تاخذ خطاب يجيش المشاعر وفي المقابل هناك خطاب يخوف ويهرب من "الدين" (بان ذفرين لأني لا اعتبره بالضرورة في الدين ما يجري بإيران وغيرها) ... هذا ما ننتقد فيه في التدوينة متاعي هو النفاق متاع البعض إلي تخدم بطريقة "علينا وموش عليكم" وهاذم من الجيهتين ...  





باهي بالنسبة لكتب راشد الغنوشي وبالرغم من إنو تكويني علمي بالأساس، إلى إن معرفتي بكتابة فرويد تخليني نهستر بالضحك من الفقرة المذكورة، خاصةً وإنو المرأة ومهما كان السياق، لا تتمحور حياتها حول وضيفتها الجنسية بل إن المرأة والرجل وحسب علم النفس، تتداخل أفعالهم وميولهمو التطور النفسي والتكيف الجنسي الاجتماعي يرتبطان بالسن وبتطور الفرد جسدياً واجتماعياً بصورة وثيقة، أما لا علينا ممكن أنا ضيع فيها وكتاباتو كمفكر لا تعنيني قدر مواقفو كسياسي،
باهي هنا ما عندي ما نعملك كي انتي ترفض أنك تحل كتاب وتطلع عليه وحتى تعاود تقرا الفقرة إلي أنا كتبتها لأني اعتبرها مفهومة وثمة عباد أثق في امكانياتهم "العقلية" قراوها ومتفقين مع التحليل هذاك ... لذا لا نقاش مع من يرفض حتى أن يحل كتاب ويقراه ... أنا متأسف أما لهنا برهنت على أنك موش مستعد تبحث عن ألحق ... وكيف ما قلت على كل احنا نحبو برنامج سياسي وأنا كيفك نستنى فيه ... أما الكذب والتلفيق على العباد لا وهذاك كان موضوع تدوينتي وإلي لم تحمل عنوان الدفاع عن النهضة ... بل أخر فقرة متاعي كان ترجعلها وتقرها بتريث تفهم مليح إلي حتى بعض أفراد النهضة عطيتهم الصطاكة ... وبكل حزم ...  





لا علينا نمشو توا للمغالطة الكبرى والمحرمة وإلي من كثر ما سمعتها ولت تسببلي توتر في أعصابي كيف نقول أنا مسلم وما تمثلنيش النهضة والنهضة لا تمثل الإسلام بجاه ربي وينو الإقصاء؟ توا مؤخراً أي واحد ينقد النهضة يجيه كيل من السباب المجاني، هاو تلميذ بن علي ويدعو للإقصاء! براس أمك كيف انتي ما تمثلنيش وينو الإقصاء؟ توا هبال هذاية ولا تهيبيل؟ (سامحني أما النقطة هذي بالذات من كثر ما سمعتها خايف كان يحكيهالي خالي (النهضوي) ندغرو بسكينة و نباسي في جرتها*)
هذا رويق حزب فوق النقد ونظرية الهولوكست كما إلي حكى عليها يوسف لهنا، ما يلزموش يتسخر، كأنو احنا ناقصين تقديس وتكفير 

خلي نزيدو إقصاء، تي هما 
قال شنوا إلي ما يحبش النهضة 
كافر وكما قبل إلي يدعو للعلمانية كافر، وهما لعباد إلي تكفر ماهيش في ثقافة الطالبي ولا
جعيط ولا وإلى



باهي الهنا انتي عملت كيف برشة منافقين أنا نحكي عليهم وهو يهز شطر جملة ويعمل عليها ندابة ... نحكي على النوع هذا متاع الناس "
يجي كذلك البعض يحب يوهم الناس بأن النهضة تنصب في نفسها كحامي للدين وما نعرف شنوة
 " ... يعني الناس إلي يحب يقصيها بدعوة لا وصاية في الدين وما حاجتيش شكون يعلمني ديني ...وهاذم موجودين ولا إنكار لهذا ... رانا نشوفو في نفس الحكايات ، ربما انتي يجيوك عادين وموش اقصائيين ... أنا لا اعتبر حركة النهضة كذلك (وصاية دينية) وهذاك علاش قلت ما تحبهاش ما تصوتش وما تقصيش ... وقلت في تدونتي ، يا جماعة النهضة كفاكم بكاء ... وحكاية "شبي إلي يدعي للعلمانية يقولولو كافر" تي بربي اش مدخل النهضة ؟ خلينا نحكيو بالمنطق ... النهضة شنية دخلها ... تي ماهو زادة إلي ما يحبش العلمانية خوانجي ورجعي ويحب ياخو 4 نساء ... قلت أنه هناك حزب وراء هذا ؟ تي هذاك مجتمعنا ونذكرك في أخر أيام المخلوع كان نفس الصراع على حكاية بسيكو أم ...  







باهي بالنسبة للي صار في قليبية توا نمشي معاك إنو فيه استفزاز (غير مرغوب فيه حالياً لحساسية الضرف لكنه ضاهرة صحية لنشاط المجتمع المدني ويصير في كل الدول الديمقراطية وين تلقى تظاهرات مناوئة) ، أما ماكانش التجاوب معاه بالطريقة الوديعة إلي تحكي بها فما كاميرا تخطفت، وفما تكفير وسبان من الجهتين،
أما جيست حاجة التشبيه بمنع البي دي بي والتجديد مجانب للصحة، كيف تلقى عباد تحب تدخلباش تناقش ماهيش كيف عباد تمنع تجمع، وبالمناسبة صفحة الحقائق الخفية إلي نشرت هذه التدوينة، كانت تبارك 

هجمات عنيفة على البي دي بي والتجديد 
لكن هذا منتظر من مثل هذه الصفحات المنافقة بالرغم اني سمعت إنو صديقنا المدون محمد تيتو متع المتنوشة معاهم، أما يا خويا مش معقول هذا الإنفصام
أنا الفيديو إلي ريت ما فيهاش ضرب ... إلي أنا حطيتها ... نمشي معاك ونحسن بيك النية ... يا سيدي كان فيها ضرب وسبان أنا ضد يا أخي هل قلت غير ذلك أنا ؟ هل قلت إي اضربو ميسالش ؟ ... أما نشالله تكون صحيحة موش كيف حكاية الشلبوق متاع المطار ... تعليقك على صفحة الحقائق الخفية وتيتو نخليه بناتكم لأني ما نمثل كان نفسي ... 

بالنسبة لإحتقار المرأة، مثلاً حسب منفهم من كلامك نتعرفو عليه من خلال تصرفات عائلة الغنوشي وهذا إنجمو نعرفو من خلالو إلي النهضة بش تسمح بتعدد الزوجات بما إنو الشيخ راشد متزوج زوز نساء

بخلاف كلامهم على حقوق المرأة عند الطلاق.. إلى غير ذلك، معناها المنطق متاعك نفهم منو إذا ولد راشد الغنوشي معلم في الكورة، تونس بش تهز الكوب دي موند إذا شد الذيخ راشد، هل متشابهات الشعبوية ما عندها حتى معنى كان عند أصحاب العقول البسيطة

هنا بصراحة أفحمتني بالتحليل القوي متاع أصحاب العقول المعقدة :) 
يا ولدي أنا نحكي على الناس إلي تصور في النهضة كفزاعة وعدوة للنساء ... عطيت مثال ...لا أكثر ولا أقل ... هذا جواب حتى لك إنت إلي تحكي بأن الغنوشي يعتبر المرى تقتصر حياتها في وضيفتها الجنسية ... 




ولا تسألهم على تهربهم من إمكانية عقد ميثاق جمهوري (مهوش كما قيل انها مبادرة المواطنة بل يقع عقده داخل الهيئة وتنجم تلقاها بكل وضوح لهنا وتهرب واضح، توا يخي أنا باش نعمل إلتزام أخلاقي نشور الشعب؟ ولا الأحزاب الأخرى؟ شاورت الشعب باش تعمل القانون الأساسي؟ يخي الشعب باش يصوت للمبادئ متاعك ولا هات يصوتلك وأنا نعملو اش يحب،كأنك تقول لحزب بيئي

فش قام تكون بيئي ستنا موافقة الشعب)

بالنسبة للحكاية هذي وإلي أنا اعتبرها مغالطة كبيرة ... لأن المؤتمر من أجل الجمهورية على سبيل المثال وإلي يرأسو منصف المرزوقي ما حبش يشارك في العقد هذا ... لذا بقية الأسئلة نسألوهم على الناس الكل أو موش لازم ... 

وفي الأخير نحب نعلق على الفيديو متاع "الحبيب اللوز" إلي أنا زادة ما عجبنيش الكلام ونرفضو ... 

باهي هذا كان ردي وكيف ما قلت أنا الموضوع هذا اعتبره مغلق لأنو لا ينتهي والمنافقين والكذابين برشة ... إلي باش يعمل تعليق نجاوب وأكاهو ...

في خلاصة القول نحب نشكرك على البادرة وكيف ما قلت أنا لا اعتبر نفسي أدافع على النهضة بل عن ألحق وربي يظهر ألحق والسلام ... اه نسيت بربي شنوا تعليقك على الحكاية هذي ؟ تعتبرها حاجة عادية ؟ هذا موش نفاق ؟ هذا يعتبر ندافع عن النهضة ؟
 ... 

السلام  
abuiyad

19 تعاليق:

مشاكس يقول...

très cohérent kom d'hab :)calimero la yo9har :D

guyguoz يقول...

horr elhout aliiik yè fennen billahi ennajjem n3amil pub andek ...n3aref ennajjem niddallil : ENA MOSLMA WITMATTALNI ENNAHDA o__________O allah yirham illi karra w warra !

soulmate يقول...

tu les as scié, fière de toi, de ton éducation, de ton respect pour l'autre (meme quand il se permet de te manquer de respect, que ce soit à travers la satyre, les sousentendus parfois trop "explicites", ou alors des accusations blessantes lynchant toute différence, tu as compris que cette bassesse n'est que la caricature de son auteur) tu te dégages du lot comme d'habitude, et ils sont dans ton ombre surtout avec leur malhonnéteté intellectuelle dont ils s'auto-mutilent, garde la tete froide, l'esprit sain, et continue à chercher le nord et à nous apprendre à le chercher malgré tous les efforts fournis pour faire de nous "l'Homme unidimensionnel" qui répète tout ce qui se dit, qui ne cherche jamais la vérité, et qui adopte l'opinion de la majorité qui l'entoure, tu refuses ça, et ceux qui te le reprochent c'est les "pseudo-intellos", comme quoi des fanatiques dénoncent fanatiquement le fanatisme :) sois béni mon cher ami :)) tu rends fier de toi, je persiste

extrablog يقول...

بالنسبة للفقرات إلي ماهيش ف سياق رد على كلامي اتفق معاك 100%، بالنسبة للرد على كلامي تو نجاوبك لهنا مرة أخرى، خاطرك في بعض الأحيان ما فهمتنيش (ممكن خاطر كتبت بزربة الفكرة ما وصلتش) وساعات زادة هربت على الموضوع ، وساعات تسخايلني نحكي عليك
بالنسبة لحكاية العلم، نفاق واضح وعلقت عليه في وقتو على الفايسبوك.
نشالله نزيد نوضح على مدونتك بش ما تكبرش لحكاية هو بش نبدا الليلة

extrablog يقول...

النقطة الأولى؛ تقريباً متفقين خطرني ما نقصدكش
النقطة الثانية: كيفكيف فقط نقصد فما الدعاية من الجانبين (هذا إلي غاب على تدوينتك) ومبعد عملت تعريج ما نقسدكش بيه
النقطة الثالثة: حكيت على تعيينات في الجوامع، معناها تحب تقول للمصلين أنا نحل الجوامع 24/24 ، ما تجيش تنحي إمام وتحط إمام أخر تابعك معناها ، تراها حجة تستحق إنو عبد يعطيك عليها صوتو قولهالو أما البرة من الجامع، ومش لازم يقول صوتو للنهضة، متصوتوش للعلمانيين كيفكيف عندها نفس الواقع وإنت لابس جبة إمام (عملوها برشة منهم شيخ مورو )

extrablog يقول...

النقطة الرابعة: مفهمتهاش، أما حسب مافهمت إنت تحب حتى واحد ما يشوف اش صاير في العالم ولا شنوا؟ حتى حد ما يخوف من الدين وما ينجمش عبد يخوف من الدين، يا ديني الكلنا مسلمين، أما كيف ما قلت ما يلزمش إنحرافات والمتطرفين من الجهتين، ضهرلي لهنا واضحة لحكاية جبدان إيران ولا فرنسا مهم جداً لأخد العبر وهذا إلي قلتو وسامحني أما النقطة هذي يا إما مفهمتش ردك، خاطر حسيت إلي كلامي منطقي أكثر بعض تعليقك (توافقني معناها)

extrablog يقول...

النقطة إلي مبعد متع المرأة في كتاب الغنوشي؛ والله سامحني، أما راني قريت كتابات في علم النفس التحليلي مأثرين فيا، معناها تكويني الفكري (في العلوم الإنسانية إلي ماهيش إختصاصي) يخليني نعتبرها هكاكة وهذا عادي كأنك تجي لمتدين تحب تقنعو بالنشوء والإرتقاء، الله غالب منجمش! ولا لواش ممكن عندو الحق أما أنا منفهمش كما مثلاً واحد ملحد تحب تقنعو إلي الرسول ركب على طائر هزو للقدس وللسما في ليلة (صارتلي لحكاية لهنا بش نقنعهم إلي القدس مقدسة عندنا، شاخو علي بالضحك) وكيف ما قلت قبل بالنسبة ليا موضوع جانبي ما عندو حتى معنى، أما نصيحة اسئل جماعة قاريين طب في تونس على الموضوع.. تو تلقى تكوينهم في البسيكياتري ما يختلفش برشة

extrablog يقول...

النقطة السادسة : هاو كلامك (فقرة كاملة ولك سديد النظر، يجي كذلك البعض يحب يوهم الناس بأن النهضة تنصب في نفسها كحامي للدين وما نعرف شنوة ... يا أخي إنت تعتبر روحك مسلم والنهضة ما تمثلكش ، ثمة شكون تمثلهم النهضة ... علاش تقصي فيهم ؟ علاش ما تحبهمش يحكيو ؟)
معناها ضهرلي مشي تهرب إلا الأمام كي تقلي لعباد تحب كي تقول النهضة ماهيش حامية الدين معناها إقصاء!! والله لا فهمتك تحكي بجدك ولا تفدلك؟ النهضة معناها وجودها ينتفي إذا ماهيش حامية الدين، سامحني أما عورتها في الرد أكثر (الله غالب النقطة هذي مركبتلي كل أنواع العقد النفسية منجمتش نفهم كيفاش ماهيش واضحة عند الناس الكل) لحكاية ساهلة النهضة ليست وصية على الدين. (نقطة=معناها هذا ما ينتج عليه شي= بالفلاقي يوفى لحديث )

extrablog يقول...

النقطة السابعة: متفاهمين حبيبات
النقطة الثامنة: أنا ما قلتش الغنوشي يعتبر إنو المرأة درة شنوا، نقلت جملة عن كتاب الغنوشي في منطلق شبه فكري (خطرني نعاود مش إختصاصي)، والغنوشي المفكر حاجة والسياسي حاجة، ملخر فهمتك اش تقصد ملول أما الجملة إلي قلتها على بناتو ما تعني شي، ينجم يكون عدو الحركة النسوية بتعدد الزوجات، ولا كما أعلن إنو يحس حقوق المرأة عند الطلاق أكثر من الازم، كان قريت كلامي كيف ما هو راك اكتشفت إلي ماهيش حجة
النقطة التاسعة: نحكو على النهضة في بالي، لا؟ على فكرة الموضوع هذا نقدت فيه بشكل مباشر أحد أعضاء حزب المؤتمر و إقتنع بكلامي على أمل يوصل للقيادة، معناها ننقد الناس الكل كي يبداو يلبزو أما لهنا ،أحكي على النهضة

extrablog يقول...

أهوكة على أمل اني نكون زدت وضحت، الحق ضهرلي مفهمتنش برشة شنوا إلي حبيت نحكي فيه أما ميسلش على الأكثر، مشكتلي مع التعبير، منحبش نكبر الموضوع أما استغلت تدونتك بش نعطي برشة أراء وبرشة ردود أغلبها في سياق إما تكميلي (حبيت نوري الجانب الأخر) أو تعديلي ، وفي بعض الأحيان ضد الطرح تماما، تبقى نصيحة ل سولمات رهو الإحترام هو إحترام النفس، معناها خلينا في نقاش الأفكار أحسن من نقاش الأشخاص، أنا نقدت برشة المتعصبين في مقال الإسلام واليسار إلي تلقالو رابط من تدوينتي، معناها كانك قريت مقالي كامل، راك ما أسقطش فكرة غالطة ملحيط،ربي يهدي من خلق
سامحني رديت عليه على مدونتك،
إحتراماً لمن يستحق الإحترام
سلام

Primavera يقول...

chnowwa ? wallitou kima les rappeurs jewebni w njewbek ? :D

Bravo pour ton précédent article, hétheya ma9ritouch :pp

mais bravo pour le courage.. le courage de vaincre la paresse surtt lool

كاليمارو يقول...

اكسترا بلوغ :
سمحنا على التأخير راني كنت غاطس النهارين ...

باهي النقطن اللوالا متفاهمين ...

الثالثة : أول حاجة أنا قتلك راني ضد تغير الإيمت كيف ما يحبو ... في ما يخص "ما تسوطش للعلمانية" هذي نشوفها كاجتهاد الإمام ، يعني كل إمام عند قراءة للعلمانية وينجم يشوفها واحد عادية والأخر لا ... وينجم يكون متخوف من علمانية مطرفة إلي صراحةً تتضارب مع بعض العقائد دينية ... أنا شخصيا مع إيجاد حل وسط ، يوفق بين الإثنين لأني نتصور هذا الحل ينجم يوحد الشعب إلي يقل في بعضو اليوم ...

كاليمارو يقول...

النقطة الرابعة :
متفق معاك هذاك علاش قتلك في الحالة هذي يلزم "التمثيل بموديل أخر" يكون مرخص من الجهتين ... لكن للتحذير حدود ...أول حاجة رانا يا خويا ماناش الكل مسلمين في تونس ... ثمة اليهود وثمة المسيح وثمة زادة اللا ديني (و الأخير ينجم يفسر الاسلاموفوبيا إلي يحكيو عليها العديد) ... والفديوات من نوع "هكا باش تولي تونس" ومرا تاكل في الكرارد ، نشوفها قدح في الدين ورؤية ياسر تصغيرية ليه من انو إنتقاد للنهضة ... علاش ولينا في تونس كل واحد يحكي على الدين أو يعطي تصور المنظور متاعو يكون ديني ، فيسع ما نمشيو للتطرف ... هذا إلي حبيت نقولو من خلال الحكاية هذي ...
وقلت أن البعض يبدا ينقض في النهضة ومن بعد يزلق يولي من غير ما يحس "يشتم" في الدين وهذا مش معقول ... صحيح ثمة أيمة بهايم ، لكن حتى واحد لاهو معصوم من الخطأ والإزلاق في ذم الدين موش مبرر ...

كاليمارو يقول...

النقطة إلي من بعد فقط بش نقلك رهو مهوش رأي الغنوشي ، هو يحكي على رأي ما نعرف أنهو العالم (معروف أما أنا ما شدتش اسمو) في الحكاية هذي /// على كل إنت ما عندك ما خاسر تعمل طلة ... على خاطر المعنى إلي هبطت به التصويرة فيها مغالطة للمعنى متع الكتاب وهذا المهم بالنسبة ليا ... البقية ثمة عباد تفهم خير مني ...

كاليمارو يقول...

النقطة السادسة : مرة أخرى ما فهمتنيش ... أنا متفق معك أنها مش حامية الدين ، ولو أن بعض الناس يعرفو هذا وبحكم "الهجمة" على الدين من البعض المتثقفين اصبحو يعتبروها كحزب حامي للدين باعتباره ما يهاجموش بل يفتخر به ...
باهي وأنا إلي قلت يقصيو ... موجودين ، ثمة عباد إلي نحكي عليهم في التدوينة هذي بالنسبة لهم لا مجال لمشاركة النهضة في الحياة السياسية ... وعند حتى صحابي كربل برشة ... مانيش نحكي علي ينتقد ... فقط الناس إلي يحبوها تتحل كي ف التجمع ، تتحل وتتحاسب (وإلي بصراحة أنا اعتبرها تحاسبت بما فيه الكفاية) ... فهمتني توا ؟ :)

كاليمارو يقول...

النقطة الثامنة :
متفقين ، جيست حكاية الطلاق ما نعرفهاش ... يلزم نبحث عليها باش نحكم ... وفي ما يخص تعد الزوجات ماهو قالو باش يخليو مجلة الأحوال كما هي ... والهنا الكلهم متفقين على الكلام هذا حسب ما شفت ...

النقطة التاسعة :

باهي متفقين ... فقط حبيت نشير لهذا لأن العديد يحكي كان على النهضة وناسي أن المؤتمر زادة رفض ...

باهي صديقي كنت تنجم تقولي مثلا أن بعض الكلام مش موجه ليا ، لأن في بعض الأحيان تشنجت كيف نشوف كلام ما قلتوش :) ... ومرحبا بيك كان عندك ما تعلق

كاليمارو يقول...

مشاكس
شكراً

كاليمارو يقول...

غيغوز :

هههه ادلل يا للا وكان موش إنت شكون يدلل في محلي :)

soulmate

راسي كبر ههه ... برى توا اش باش يفشوا ... صحيتك وهاني نستنى في تدوينة جاية :)

Prima bent el-Vera

والله أحسن حاجة كانت في البلوغسفير هي هالنوع متاع الديباوات ... يا حسرة ، هيا نقص من البخل ويزي من التخبية متاعك

hanéne ferjeni يقول...

wtawa 9ouloulna 3da chnia Raykom fiha nahdha!!!!!!!!!!!!!!hahahahahaha elli konna 5ayfin minou to7na fih!!!!!Nahdha to93od 7oukouma ghayr kouf2a bech tchéd el bléd et surtou fi dhourouf kima hédhi!!!ta3yinet mil 3ayla.....des passport diplomatics.....si bouchléka y7awess bil yakht mta3 trabilsya.......ytalbou b ta3widhat wel bléd dé5la fi 7it......el mé qw dhaou ma9souss fi sidi bouzid........jar7a thawra ma3anna mana3mloulkom.....Ben Ali machétnéch bih puisk el 3ala9at m3a 9atar w SAUDI aham min thawra......w5étmouha b hadhm 7ou9ou9 él mar2a éch 9allék wéch 9al 3lik'Al mar2a moukamla lé rajol"""7assél mayji éssmha kén 7oukouma al 3ar wéna mana7kich 3la Nahdha akahaw éna na7ki 3al 7oukouma él kol.......N7éb n9oul élli él bléd hedhi mahich bech tét7assén tant que chédinha firan 7boussét ji3anin ymoutou kén 3al flouss.....kima lélla Ma7rzia 10 million 9atlék mouch mkaffini.....3béd bech ymoutou michar whia 9atlék mouch mkaffinha wzid y7ébbou yna9ssou 4jours 5édma lé zawéli elli yo5loss fi 300dt minhom kré wdhaou wsghar wham azra9.....él 7kouma tghanni 3lina"w3al bouhéli 3mal thawra w3tahéli" 7assél nchallah Rabi yoster w brabi zidou déf3ou 3liha mana a7na twénssa z3am fil 9ofa ma7abétech tétna7a mina san3a hédhi wkim y9oul él matha"old habits die hard" ma3néha a7na mahma yssir fina joréét el 7oukouma hédhi dima nsaf9ou w nzaghrtou wa 2assamé2ou safia wal 3asafirou touza9zi9

إرسال تعليق

أعطي رايك