الأربعاء، 6 أفريل، 2011

يا بو رقيبة يا بطل



نعرف باش نشري الشبوك مع بعض الناس بالتدوينة هذي أما إلي يعرف روحو حساس برشة على بو رقيبة ، الأب الروحي لتونس، وإلي يحبو أو تحبو لدرجة أنه كان مستعد يشد الصف نطلب منو ما غير ما يقرا ومن بعد يقوم يبكيلي هوني ... أنا هنا باش نعطي رأي شخصي ومانيش باش نجامل حتى حد ... 

يا سيدك هالأيامات حملة قد السماء على سي بو رقيبة ، إي علاش لا ، رئيس تونس الأول ، نحى النظام الملكي وحط نظام جمهوري ، يبدل فيه الاتخابات كيف عام 81 ، ويقتل فيه العباد إلي تطلب في الخبز (على القليلة بن علي قتل ناس تحب على كرامة -حاجة غير مادية ، غير ملموسة -) ، وهو كان سبب في ظهور التيار الإسلامي المطرف و خلاه ينمو كإجابة إلى التيار اليساري إلي كان مقلقو (اسمعوا اش يسمي المعارضة) في السبعينات ، وخصتاً مع العنف الجامعي إلي يسميوه اليسارين في مذكراتهم بالمراهقة السياسية ...

بو رقيبة جاء وسكر أكبر معلم في تونس (جامع الزيتونة - يعني قطع مع تاريخ تونس ) هذاك اش خلانا اليوم نشوفو ناس لا تعرف لا لغة ولا قرأن ولا فقه تاقف تخطب قدام الداخلية ... نزيدكم ؟ اه لا يزي لا نولي إسلامي متخفي نكره بو رقيبة على خاطر عمل إلي يقلك "مجلة الأحوال الشخصية" ، إلي على فكرة عملها الطاهر الحداد إلي بدورو تشبع بأفكار بن ضياف وعبد العزيز الثعالبي ووو-... يعني ما جاب شي من راسه سي لحبيب ... أو على خاطر عمل مدارس ؟ تقول في مصر (إلي مثقفيها يقسمو بالمثقفين متاعنا 10 مرات) أو المغرب ، أو حتى الجزاير ما يعرفوش يحلو كتاب ... 

لا ويحكيو يقلك "كان مش هو راك ما تعرفش تقرا " ... باهي على خاطر علمني نقرا، واكتشفت إلي هو دكتاتور ما ننتقدوش ؟ شبي البعض يسب في ربي ؟ ياخي بو رقيبة خير ؟ 

أنا إلي يغيظني اليوم يجيو في حنة البغل برنامج يحكي على بو رقيبة ، إلي يبكي وإلي ينوح ، وبن علي ظلم بو رقيبة ، ونحى النشيد الوطني وما خلاش الناس "تحزن" على وفاته ... تي شتحبو يعمل ؟ اش عمل بو رقيبة في الباي ؟ فرح بيه ؟ تحبوه يخلي نشيد يحكي على رئيس قديم ؟ كفانا تخليد وتمجيد للعباد من فضلكم ... يزينا من إستبلاه الشعب  

يا أخي كي انتم تحكيو على تاريخ البلاد ورجال البلاد ... أحكيو على لزهر الشرايطي (إلي بو رقيبة حتى قبرو ما دلناش عليه ... ) ، صالح بن يوسف ، البشير صفر و عز الدين القفصي و فرحات حشاد (إلي يقال أن بو رقيبة عندو يد في اغتياله و الله أعلم ) وحرب بنزرت إلي مات فيها سخط عباد في جرة بو رقيبة ، ومن بعد يقلك غلط ... إي غلط في ألاف الأرواح ... و لا يجيك واحد في برنامج (يضهرلي متاع حنبعل زادة) ويقلك "ربما أحسن حل عملو بو رقيبة هو أنه حب يوحد البلاد -ما خلا حتى حد يتكلم معاه- " ... علالش قدامك باش نمشيو الكل في نفس الثنية ؟ عادي يقتل ويغتال ؟ اه حقة احنا في دولة ما تحاسب حتى "شخصية" على القتل والإغتيال بخلاف الإسلاميين على خاطرهم يحكيو بإسم الدين ويحبو يتسلطو علينا ... (مرة أخرى مانيش مع الإسلاميين ، أما مع أن كل من يقتل روح يتحاسب و لو مات)

وأسفي وألمي كبيران على التصويرة هذي ... في 2011 ، إلي يقلك ناس تبني في ناطحات سحاب ، وصوارخ وهاوكنغ مخو لاهب في حل الغاز الكون ... التوانسة يبنيو في ضريح متاع رئيس عندو 23 سنة ملي مشى  ... على قريب تخرج رزنامة فيها موسم الحج نشالله وتقبل منكم بورقيبة أعمالكم الصالحة وولائكم  له ... طوفوا به حتى تمطر السماء عليكم مدرارا   

بو رقيبة راهو أسس لدولة بوليسية ، هو سن الدكتاتورية والنفوذ إلى الحاكم ، بو رقيبة وصل في وقته الناس ترقل خوف منه ... أنا جدتي تخاف تدخل ب-500 مليم للتوالات (حشاكم) فيها تصويرة سي بو رقيبة ... ومن بعد تقولي قرى الناس ؟ 

 بو رقيبة كان أول إنسان أجهض العلم والإبداع العلمي في تونس - نذكر على سبيل الذكر ولا الحصر ، سي البشير التركي - ... وملاحظة بربي ، أنا نشوف أنه منذ الإستقلال ما عاش عندنا مفكرين ، إلي مثلو تاريخ تونس الكل جاو قبل الإستقلال ... نسكت خير 

نحكي، نحكي أما زايد ... التاريخ يكتبو إلي يربح ،وبالطبيعة بو رقيبة باش يخرج بطل لأنه هو من أشرف على كتب التاريخ  ... هذا الكل وبالطبيعة نعترف إلي عمل برشة حاجات باهيين وأنا هنا موش باش نحكي عليهم ، أهوكة تبركالله الصفحات على الفيسبوك برشة تلقاو ما يشفي غليلكم ...  

نحب نشير أنه كلامي ربما حاد ... موش كره لبورقيبة ، أما الشاي إلي نشوف فيه ينطق من الأجناب ... فيبلنا تحررنا وكسرنا الأصنام ، نقومو تو نمجدو ... نكملو نعملو تماثيل لحنبعل  وعليسة ونحطوهم حتى هما في الشوارع ...

وفي الأخر نحب نقول ربي يتولاه سوى بالباهي أو بالخايب 
abuiyad

28 تعاليق:

islam_ayeh يقول...

بارك الله فيك !
من الصباح إنخمم باش نكتب تدوينة على هالموضوع ياخي هاك كفيت ووفيت !
برت يجعلك وين تڤبل تربح :))))

soulmate يقول...

excellent article dont la Tunisie a besoin pour nous éviter des longues éloges lassantes dont les bénéficiaires ne sont qu'une bande de profiteurs sans foi ni loi, l'avenir de ce pays n'est pas dans ses défunts, mais dans le potentiel de sa jeunesse. la réconciliation avec le passé ne se fait pas en glorifiant certaines personnes, mais en étant hoonète dans l'évaluation des bienfaits et des méfaits de chaque phénomène, chaque évènement et chaque régime. c'est comme ça qu'on apprendra à éviter les erreurs du passé. l'avenir de la nation c'est dans sa jeunesse humble, ambitieuse, intègre et fidèle à la cause non aux individus; les individus sont mortels et altérables, les causes ne le sont pas.

كاليمارو يقول...

Islam_yeah
مرحبا بيك :))) أنا قعدت نسخن نسخن ، وشديت روحي وفي الأخر معاش انجم ... كثرولها يا خويا :)

soulmate

Bienvenue à toi

Exactement, il faut qu'on arrête avec notre nostalgie au passé ainsi que notre attachement à un "guide", un "combattant" qui nous mène -comme des moutons- vers la Lumière.

Merci pour ton commentaire que j'apprècie beaucoup, il apporte une touche "sage" à une note "fofolle" :)

à bientôt je l'espère :)

Lili يقول...

أكثر جملة عجبتني :" كفانا تخليد وتمجيد للعباد من فضلكم ... يزينا من إستبلاه الشعب"
ذكرتني ب بلاكة ريتها في دمشق مكتوب فيها : "لبّيك يا أسد !" إن شاء اللّه ما يجيش نهار و نشوفها في تونس !
@soulmate: bravo pour le commentaire, je suis tout à fait d'accord avec vous !

آركول يقول...

فرحات حشاد (إلي يقال أن بو رقيبة عندو يد في اعتقاله و الله أعلم )

إغتياله يا حمادي هههههه

أيا هاو بش نعملّك إشهار للتدوينة مشّي ألفين ههههه

Fantome يقول...

yé zebbi yé zebbi berredli guelbi, désolé pour les grossièretés mais berrsmi melguit mengoul

rmed19 يقول...

Aman ken mechi tzour fi bourguiba kouli nab3ith m3ak bako chma3

AHD BEKIR يقول...

انا بورقيبي حتى النخاع.. و مع ذلك عجبني الارتيكل كلام واقعي و معقول ...و ما فيهش تهجم و لعن و سبّان وحقد ....مع ذلك نحب بورقيبة

amelmimouni يقول...
أزال المؤلف هذا التعليق.
Amel يقول...

بردتلي على قلبي

كاليمارو يقول...

Lili
ههههه ، ربي يستر ، يزي ما تعطيهمش أفكار :P

أر كول
صديقي شكراً على الإشهار والتصحيح للخطأ :)

Fantome

مرحبا بيك ، هاني المرة هذي خليتو ، أما يا خويا مخلطة :)) على كل شكراً على تعليقك

rmed19

باهي ، وشوية عظم عربي تعمل مزية ... شكراً على مرورك

كاليمارو يقول...

AHD BEKIR
أحي فيك الروح الرياضية ، واحترامك لحرية التعبير :)
واحترم كذلك رأيك ، فقط أنا حبيت نوري علاش ننتقدوه وأنه قام بأخطاء كبيرة لا يمكن تجاهلها
و مرحباً بيك :)

Amel

مرحبا بيك :)

Primavera يقول...

Calo tu t'es surpassé dans cette note, j'adhère, j'adore et j'applaudis (une seule fois tt de même :p) je te reproche juste de laisser le commentaire de Mr le délicat, franchement les gros mots fel chera3 w fel dar yecer 3leyya wena bent eddar et tu le sais ;)

guyguoz يقول...

calemero yirhim illi karra w warra : weldik mouch bourguiba !

Don Dali يقول...

صاحبي كاليمارو ...إنت فهمتنا

Calo, t'as bien présenté les raisons on en a pas besoin des personnes sainte ici en Tunisie. Moi
Je supporte que la Tunisie

ramzoun يقول...

الناس مساكن كانت كارهة بو رقيبة وكيف شافو بن علي ولاو يتشفعو ،، زاد رسخ عندهم مبدء شد مشومك لا يجيك ما أشوم
الله يبارك فيك أما نشاء الله لعباد تفهم وبرا ....

spiderCem يقول...

‎"Bourguiba: C'est un Grand Homme avec de Grandes Qualités et de Grands Défauts."-- Mongi Slim

mohammed يقول...

كل شيء فهمتو لكن شكون ههذا "بن ضيا" اللي تأثر بيه الطاهر الحداد.اذا كان تقصد بن ضياف راك تهز و تسبط لان بن ضياف رجعي للعنكوش في موضوع المراة

firefox يقول...

يوما بعد يوم يطلع علينا أنصار الرّاحل بورقيبة غير المأسوف عليه بنعيق من التّمجيد يصمّ الآذان والغرض من وراء ذلك لم يعد يخفى على أحد وهو استغلال هذه الفترة الإنتقالية لبعث البورقيبية المشؤومة من جديد والتّمكين لها في السّاحة التّونسية وقد كنت ذكرت في مقال سابق أنّه يمكن أن نرى يوم 6 أفريل إحياء لذكرى وفاة بورقيبة وأنّ المتنفّذين الحاليين في تونس يحاولون ربح الوقت وغزو أكثر ما يمكن من مواقع النّفوذ والقرار وأخذ أقصى ما يمكن من المسافة عن نظام بن علي ولسان حالهم يقول أنّ فترة هذا النّظام الدّكتاتوري النّهّاب لا تمتّ بأي صلة إلى بورقيبة ونهجه السّياسي تمهيدا للعودة إلى السّاحة السياسية تحت يافطة شرعية التّحرير وبناء الدّولة الحديثة!!!

من أين جاء بن علي؟ ألم يكن لفترة طويلة سفيرا لدى نظام بورقيبة؟ ألم يكن لفترة طويلة مدير الأمن في نظام بورقيبة وطارد الطّلبة في الشّوارع وقتل عثمان بن محمود وغيره من أبرار تونس؟ ألم يكن وزيره الأوّل قبل أن ينقلب عليه؟ أم تراهم تناسوا كلّ هذا ويريدون أن يوهموا النّاس بعذرية كاذبة لنظام بورقيبة ...

أليس بورقيبة هوّ الّذي بدأ حياته السّياسية بالإنقلاب على حزب الثّعالبي ذو الأصول والتّوجّهات الإسلامية ... ثمّ انتهى بنفس المصير حيث انقلب عليه خادمه وتلميذه الألمعي و كما تدين تدان؟

أليس بورقيبة هو من كان يحارب الهويّة العربية الإسلامية حيث نزع "سفساري" المرأة التّونسية وأصدر المنشور 108 سيّء الذّكر لمنع الحجاب وانتهى في آخر حياته بأن طلّق السّيدة وسيلة بن عمّار رفيقة دربه فأهانها بذلك أيّما إهانة وانكشف زيفه وهو الّذي يتشدّق بتحرير المرأة؟

أليس بورقيبة هو من كان يقول باستمرار بأنّ مكانة تونس مع الغرب وليس مع العرب وهو الّذي أوقف التّعليم الزّيتوني وأفطر أمام الملأ في رمضان ليحثّ النّاس على الإفطار بتعلّة أنّ الصّوم يؤثّر سلبا على الإنتاجية وأصدر قانون المساجد وحاصر الدّعاة وزجّ بهم في السّجون وألغى نظام الأوقاف لوضع اليد على كلّ المؤسّسات الإسلامية؟

أليس بورقيبة أوّل من اعترف، وبشجاعة الجبناء المنهزمين، بمشروع تقسيم فلسطين وأقرّ للصّهاينة المحتلّين بشرعيتهم الكاذبة على أرض فلسطين المقدّسة وشرخ بذلك شرخا بليغا في الصّف العربي؟

أليس بورقيبة هوّ الّذي أجرم في حقّ اليوسفيّين قبل اليساريّين و الإسلاميّين فصفّى منهم من صفّى وأقصى من أقصى ونفى من نفى وسنّ بذلك المحاكمات السياسية التي عانى منها وما يزال الطّيف السّياسي التّونسي؟

أليس بورقيبة من لجأ إلى محاكم أمن الدّولة لتصفيّة خصومه السّياسيّين وإسكاتهم وأنشأ "سبّاط الظّلام" مكان التّعذيب وقتل الخصوم في تونس وسنّ بذلك سنّة ستلحق له اللّعنات في قبره كلّما أنّت ضحيّة من ضحايا التّعذيب وسيبوء بإثمها إلى يوم الدّين؟

حريّ بالمتنفّذين حاليا في تونس إن كان لهم معنى للوفاء أن يكونوا أوفياء لدماء شهداء ثورة الكرامة الّتي لولاها ما كانوا اليوم ليكونوا في مواقع القرار ولظلّ الباجي قايد السّبسي وأعوانه في موضع الظّل الّذي حشرهم فيه بن علي المجرم. أولى بهم أن يعبّروا عن وفائهم للوطن وأن يعملوا ما في الوسع ليعمّ الأمن والعدل والتّنمية ولينصف الشّباب والمسحوقون وينعموا بنتائج ثورتهم المجيدة.

محاولة العودة إلى السّاحة السّياسية تحت اليافطة البورقيبية لعبة سخيفة ومحاولة يائسة للإلتفاف على مكاسب الثّورة وكان أولى بممثّلي ومخرجي هذه المسرحية الرّديئة الهابطة، إن كان لهم باع في السّياسة والوطنية، أن ينأوا بأنفسهم عن الإرتباط بالبورقيبية وأن يدخلوا المعترك السياسي ببرامج و أطروحات مفيدة للبلاد والعباد فبورقيبة ليس بطلا ولن يكون بما اقترف في حقّ الوطن والوطنيّين، فكفّوا أيديكم عن مكاسب الثّورة وكفّوا غدرا وتدبيرا بليل لخنق الشّعب واللّعب بمقدّرات البلاد.

إنّ سياسة إعادة الإنتشار والتّموقع لجيوب الرّدة وأعداء الثّورة وتسلّلهم إلى مواقع النّفوذ وتوسّلهم بالكولسة وربح الوقت لتكريس سياسة العصا الغليظة تحت شعار هيبة الدّولة وهو شعار حقّ أريد به باطل، كلّ هذه الأساليب لن تخدع يقظة الشّعب التّونسي وسيكون لها بالمرصاد ويبطلها جميعا ولن يسمح بعودة النّظام البورقيبي بأيّ وجه من الوجوه ولا يحيق المكر السّيء إلاّ بأهله و دم الشّهداء أعظم من أن يُلتفّ عليه و أيقونة تونس التي أضاءت بهذا الدّم لن يستطيع أحد أن يطمس نورها.

لقد اتّضح طريق التّحرّر وانطلقت القافلة ولن تقف إلاّ عند دولة يسودها قانون عادل مترجم لإرادة الشّعب وطموحاته ويحكمها رجال ونساء وطنيّون لا همّ لهم سوى خدمة البلاد وإسعاد الشّعب وليس النّهب والقمع والتّسلّط.




العربي القاسمي / نوشاتيل ـ سويسرا في 4 أفريل 2011

كاليمارو يقول...

Primavera

يا طفلة سامحنا على القلق وإنت في دارك :P ... هاني انذرت والمرة الجاية المقص :)
وشكراً على التصفيقة اليتيمة :p

Gyuguoz

أمين :) شكراً على مرورك والدعوة الحلوة :)

كاليمارو يقول...

Don Dali

أنا فهمتكم وفهمت الجميع :) لا وألف لا للركوع إلى الحكام والتمسح على عتبات قصورهم :)

Ramzoun

شكراً على تعليقك ، كلامك صحيح ، وربي تسترنا من إلي باش يجي

SpiderCem

Je suis tout à fait d'accord avec toi :)
Ceci dit içi j'ai décidé de parler que du mauvais coté :) le bon on le connais tous

كاليمارو يقول...

mohamed

باهي غلطة في الكتيبة "الفاء" ما تمشيش مليح عندي ... شكراً على التصحيح

في ما يخص "إبن ابي ضياف" بخلاف "الإتحاف" إلي قريت منه شوية ما نعرفش كتاباته الأخرى ...
وفي ما يخص ذكري ليه هنا ، مش من باب الإنفتاح أو الإنغلاق على مسألة المرأة ، وانما الطاهر الحداد تأثر بالموجة الإصلاحية ، أو موجة الحداثة "الدينية" -إن صح التعبير- إلي كان أحد رموزها بن ضياف و خير الدين التونسي ، صحيح في التدوينة ما دققتش الحكاية هذي ... وإلي حبيت نقولو هو أن الإصلاح "الديني" إلي جاء به بورقيبة رهو مش من راسو انما ثمرة عمل سنين طويلة لبرشة ناس إلي نسيناهم :)

لذا نشكرك على تعليقك إلي بفضلو هاني زدت وضحت الحكاية :)

ومرحبا بيك

firefox

شكراً على تعليقك وعلى الأرتيكل هذا :)

البرباش يقول...

يعطيك الصحة

كاليمارو يقول...

البرشباش

زارتني البركة :) وشكراً

tuotane يقول...

بورقيبة قاتل.... لاتنسو اليوسفيين ...لاتنسوا اليساريين ....لاتنسوا ما فعله مع الاسلاميين

jaabira يقول...

هربنا من القطرة جينا تحت الميزاب

imen يقول...

على ذكرك للقبر متاع بورقيبة التوريست كيف يجيو يزوروه في المستير يبداو يتساءلو كيفاش أنتوما في الدين متاعكم ما تعبدوش البشر و عاملين هالقبر تزورو فيه كاينكم تعبدوه؟ و إلاّ يقولو ماهو الدين متاعكم يقول عالمساواة مالا آشبيه قبر بورقيبة هكا و باقي القبورة ماهياش كيفو؟ أسئلة تحيّر والله و ما يلقى الواحد ما يجاوبهم.

takoua يقول...

كاليميرو يا بطل..برا يرحم الأم الي جابتك...لا عزاء لا لأيتام بن علي و لا لأيتام بورقيبة..يزينا من تقديس الأشخاص كينهم فوق ربي و يزنا من الوقوف عل الأطلال فديييييييينا...و لازم تاريخ تونس يتكتب من جديد و بالصحيح المرة هاذي احنا عرفنا تاريخنا كبار خلي الأجيال القادمة تعرف تاريخ تونس و تاريخ مناضليها مالصغرة..انا الي يبهتني وقاحة البورقيبيين الي يختصرولك تارخ تونس لكل في "المجاهد الأكبر" و كينو ماجابت تونس كان سيادتو...يعطيك الصحة مرة اخرى

إرسال تعليق

أعطي رايك