اليوم باش نحكي في موضوع بعيد على الثورة والسياسة والغفاصة ... اليوم باش نحكي على الذكرى 30 من رحيل صاحب الفن الجميل ... روبارت نستا مارلي الملقب بال"بوب مارلي" ...
اييه يا حسرة كيف كنت مغروم بالبوب وصوتو ما يفارقش مسمعي لما كنت صغير ... يا سيدك ملي نقرا في الروضة كان السيد الوالد يحط البوب في الدار وأنا تلقاني نسمع ونتبع وهو في حقيقة الأمر نخرم وحدي ... كنت نثبت مليح على الغناية هذي :
كنت وأنا نلعب في الصدار نبدى عامل كيف عليها ... امشي يا زمان وايجة يا زمان ، كان عندنا حانوت كاريه واحد حجام ... السيد كان حوات (أما موش صاحب الراجحي) ورستمان ... حياتو للبوب واتباعه ... كان في الدخلة مصور تصويرة البوب وفي كل تركينة عندو صنبة متاع البوب ... وداهن الحانوت أحمر وأصفر وأخضر و المنشفة متاعو عليها علم الجماييك وبالطبيعة أعفيكم من التفاصيل و شنوا يعمل كيف يجي الليل ويسكر الحانوت ويحط الفن الجميل ...
كان هو إلي علمني كل ما يمت بصلة للريغي والرستفاري ... وزاد حبني نهارت إلي هزيتلو كسات قديمة ولقا فيها غناية كان قلب عليها الدنيا وما لقهاش ... وبزهرو الغناية كانت كل شطر في "فايس" متاع الكاسات ...
من ثمة وأنا بديت نبحث وحدي في العالم متاع الريغي ... كنت في ألسنة سابعة لما عملت "كلاسور" ونحط فيه الكلمات متاع الغنيات ... ونثبت الصيف إلي بين السابعة والثامنة خدمت فيه مرمة ... كنت خدمت مع بياض يدعى "شقلاب" وفي الأخر قلبني في عشرة لاف لتو نسالهالو ... عدة سيف كامل وأنا من قرقاش لقرقاش ، ومن قصدرية دهن لقصدرية السرفاسير باش في الاخر دبرت تفتوفة شريط بهم "بافلوات" كبار باش نسمع بهم الفن على أصولو ...
والتنبك متاع الغرام عام التاسعة ... قرا معايا صديق حميم ليا كان يعزف الغيثار و أنا كنت نغني البوب ... وزيد قراني أستاذ انكليزية مغروم بيه ... كان العام محصور بين "البافلوات" .. دار صديقي والحصة متاع أستاذ الانكليز ... وعامتها تفرجت نهار في فيلم على قناة ألمانيا نسيت اسمها وأخر الفيلم حطو غناية البوب ... من يومها وأنا وليت نعتبرها أقوى غناية متاعو ...
وصلت نرقد فوق الطاولة ... راسي فوق الكتاب إلي يحكي على قصة حياة البوب وبافل من اليمين والأخر من اليسار ... كنا أنا وصديقي نصورو راس البوب على ذرعاتنا ونبداو شمخانين تقول اش عاملين ... هبال قعد متبعني سنين ولو أنه نقص كيف وليت في الليسي وتغرمت ب"بنك فلويد" و-"داير ستريت" و كذلك الفن الشرقي من أم كلثوم وفيروز ، ماجدة والعديد من الأسماء ... الهبال قعد يجري في دمي إلي خلاني في ألسنة الثانية متاع الجامعة نعمل شعري "دريد لوك" كيف البوب ... أما كانت تجربة قصيرة لأني بعد ما قديتو ما حملتش اللهوة بيه ... جوجمة ... وليت عملتها قرعة عالمية شاخو فيها صحابو ضرب ، لا تربحهم ...
تو انجم نقول أني معاش مغروم برشة بالبوب أما باقي عند نوستالجي للغناء متاعه وساعة ساعة نحط نقشة نوسع بها بالي ...
البارح وأنا نتفرج في السبسي ، إستغفر الله ، نتفرج على السيد الوزير الأول للحكومة "المؤقتة" ... حسيت روحي قدام عبد العزيز العروي ... بابا الحاج بهيبتو المعتادة محلق في وسط الصغيرات ولاهي ينكت وبالطبيعة ساعة على ساعة يجبد أية قرأنية ثماش ما يبهرهم بصدق قوله
السبسي يبدى بتهمة كبيرة يوجها للراجحي ... فاسق ... الفاسق هو من خرج عن الملة ... فالفسق والكفر يجيو في نفس المرتبة عند الله بحيث يقول (وكره اليكم الكفر والفسوق والعصيان) ... وبالمناسبة سي الباجي نسى أن يتفكر قوله تعالى " هل يستوي الذين يعلمون والذين لا يعلمون " و " هل يستوي الأعمى والبصير"
هجمة شرسة على الراجحي ...بالمناسبة كلام الراجحي لا يلزم ناخذوه وكأنه قرأن أو نضربو به عرض الحائط ... كلام فيه وعليه ... أما الحاجة إلي موش فاهمينها برشة ناس في الحكومة وإلي مسندينها أن الراجحي قام "بتأكيد" بعض الشكوك وإعطاء بعض الأجوبة (سواء كنت اجتهادات خاطئة أو معلومات صحيحة) لبعض تساؤلات الشارع التونسي ... و هذاك علاش لقات إستجابة كبيرة من الناس ... ربما النقطتين إلي غشو بابا الحاج هما أن الراجحي حكى على اللطيف وقال بأن الجيش ينوي تسلم الحكم في حالة ما إذا النهضة ربحت ... لكن هل هذا يفسر المنطق العادم إلي ستعملو البارح ... ناقص كان باش يحكي بما تحت الحزام
إذن قلت هجمة كبيرة بمنطق متاع باندية بحيث إستعمل سياسة "كف وكعبة حلوة" مع الصحافيين إلي مانيش باش نحكي عليهم لأن الناس الكل تعرفهم ... نحب نقول هما يستحقو الكلاط أما موش من عند السبسي لأنها موش مهمتو ... شنية إكتبو وأعملو هاي ولات تسخير الصحافة لخدمة الدولة عيني عينك ... ومرة على مرة يرميلهم كلمة حلوة وتشوف عادة هاك الإبتسامة العريضة تعلو على وجوههم فخراً وإعتزازا بما حققوه من تميز في ميدانهم
من بعد السبسي اتحفنا بجملة من الأكاذيب (زعمة تذكر هنا الأية إلي بدا بها اللقاء متاعه ؟) ... ومن أجملها هي أن رشيد عمار قائد أركان الجيش عظم الله أجره لبس "كوستيم" ومشى لقطر يلوج كيفاش يركحهم على مشروع إقتصادي هايل يطير بإقتصاد البلاد ... بحيث فكرني في التدوينة السابقة وهاك المقولة متاع "أنا بهيم والشعب التونسي لا يمثلني" ... الراجحي خرجوه على خاطر حط مدير حرس وطني من عهد بن علي ... إذن نقيلوه ونحطو الصيد وما ادراك ما الصيد ... بحيث مازال يبرئ في اللطيف إلي بفمو قال إلي هو يخدم في السياسة تحت حس مس ... وباش يكمل الفيلم متاعه يدعو الناس إلى التحلي بالرجولية وألإتجاه إلى القضاء ورفع القضايا ... وكأن القضاء أصبح مستقلا ... وبالطبيعة أشار إلى بعض الأحزاب إلي قاعدة تقود فينا بالسلاسل نحو الديمقراطية والحرية ... التجديد والبي دي بي ... وهذي حاجة ما تجينيش غريبة منهم الثنين .. بحيث بقية الأحزاب "أين أنتم ؟"
القناصة ما ثماش ... بحيث حتى من الراجحي الفاسق موافق معايا في هذي ... الشعب التونسي الكل خرف و كان يحلم وحتى إلي شدوهم (ما إسمهمش قناصة) تحاكمو ... إي قداش تحاكمو ؟ ووقتاش ؟ أساميهم ؟ وشنية التهمة إلي توجهتلهم ؟ ... و هاذم فيسع تحاكمو وتبلعو في الحبس والأخرين تولي العدالة تاخذ مجراها ؟
سؤال بعد ما تبينا أن السبسي يكذب ... مزال شداد صحيح ويحب يحاسب الراجحي ؟
الحاجة الوحيدة إلي عجبتني (مش برشة) في الخطاب وقت حكى على معرفتو للدولة ومفهومها ... صحيح عندو خبرة ويعرف الداخلية ولكن هذا ما يعنيش أنها حكر على الشياب ... بحيث كان ينجم يحط إنسان عنده شخصية قوية قادر على تنظيف الخمج والعفن الراسب منذ سنين
سامحوني راني مزلت دايخ ، صبحت عند الطبيب ، قريب ننسى إلي البوليس متاعنا طلع عندو مشكلة نفسية ... والله سخفوني مساكن قريب نتبرعلهم بلحمي يفشو فيه غلهم بحيث يسترجعو بالتالي كامل هيبتهم ... يمكن من زيادة الشهرية إلي خذاوها بفضل الأش وميتين شهيد مرضو نفسياً ... يمكن زادة على خاطر قعدو مديدة ما يسمعو في الناس تحكي بحرية وتقول عليهم إلي هما موش وطنيين وكلاب ... ونساو هما الكلام الحلو إلي يستقبلو به المواطن في المراكز بخلاف عادة كيف تبدى عامل عملة ... بالمناسبة هاو قلك الصحفي باش يولي لابس كسوة خاصة حتى يتمكن البوليس من التفريق بين الصحفي والمواطن ... بحيث ما تتلزش الداخلية وتطلب السماح من الصحفي على خاطر مشى في بالهم مواطن
ليلة الأربعاء الأمور مريقلة ... الشعب لاهي في وحدة ملحدة إلي يسب وإلي يدافع ... والأخر ينبر عالنهضة والأخر يصيح يا ولادي يزيو ... تي الحاصل شي يعمل الكيف ...
عمك السبسي يجبد فيه خميري على الجراية ، راسو فوق فخض العزوزة و يشخر ... وهي في يدها زوز مساسك تخيطلو في مريول للشتاء القادمة ...
شرن شرن ... شرن شرن
- أووه ... شكون هذا الثناش متاع الليل ... ما يكون كان رئيس حزب من احزاب الكاكوية يكلم في البجبوج الغالي يحب يشوف معه كيفاش يسلكها في الإنتخابات ... آالو ، إنت منهو ؟
- فؤاد ، فؤاد ... فيسع عديلي السبسي راني راسي باش يطرشق ...
- أهوكة فن يوجعك راسك كلم السبسي سيدي ... موش قتلك معاش إتدور بيه ... شيبة جهنم !!
- تي هيا عاد ... وراسك حكاية اكيدة ...
- باجي ، باجي ... قوم هاو فؤاد يحب يحكي معاك ..
الباجي حل عين وشهد وقال اللهم ارزقنا الصدق في القول والإخلاص في العمل ...
- شبيه زادة ... ما يحبش يطيع ولي الأمر ... يخي ما سمعنيش كي قلت " فلا وربك لا يؤمنون حتى يحكموك فيما شجر بينهم" ؟
- تي فك علينا يا باجي ... ماكش في التلفزة باش تحكي هكا ... إسمع رهو هبطو حوار مع صحفي في شسمو ... تي كلي عالكمبيوتر إلي كان مرتحنا منو عمار ... (صوت بحذاه ... فيسبوك) ... إي عالفيسبوك راس البلا ...
- ينعن د ... ويقص عليه فوفو
- يزي يا بجبوج المرى حذاك هع هع هع ... أما ما إنطقك كان أنا
- وإنت ثمة واحد ما نطقتوش ؟ حتى الكرسي إلي بارك عليه يتشفع منك ... أية خلي نمشي نشوف الحكاية ...
تلفت بجبوج للمرى ...
- أية حل حل ... حل الفيسبوك ونحي من يديك الصوف ، أنا بش تشعل فيا النار وإنت تحب تغمني في مراول صوف ... هالليلة الكلبة
- اللطف عليك ، بعد عمر طويل ...
قحرلها بجبوج ... وقامت تجري وقام هو وراها ، يعثر في البطانية ويشربها ... تجي يدو في صحن الغلة وتتغفس كعبة برقدان ... يقوم يلعن ويسب ويمشي يجري ورى المرى ...
- أية اكبس اكبس ...
- ووووه يا باجي ... نسيت كلمة السر
- تي مش مشكلة نتفرج في فيديو ومن بعد تفكرها وحدك
- تي لا أما ... أما ... دنكست راسها ووجهها بدا يصفار ... شمت ريحة النتونة ...
- إو ، حتى أنا على شكون معول ... انتم متاع مناصفة ؟ يرحمك يا بن لادن ... غير الدنيا ... استغفر الله ... إذهب من قدام وجهي انتي ، هل عفشة ...
- تي ستنا شوية تو نعمل فايسبوك جديد ...
- فايسبوك جديد ؟ اللهم لا تؤاخذنا بما فعل السفهاء منا ... برى يراك مغفصة تحت كميونة .... ونضحك من قلبي كيف نشوفك معجونة ... ما تموتش وتعدي بقية حياتك مغبونة ... ملي عرفتك الكبدة متاعي ممروجة ... يا حسرة عليك يامي دوجى ... كيف كنت نركش حذاك انتي وخدوجة ... أية كملتش ؟
- يا باجي بجاه ربي إنعل الشيطان وأخطاني دقيقتين من زمان ...
دخلهم بجبوج وهزهم للطاولة إلي كان ينظف فيها ... فيها خضروات عرقانات ، فرحات عينيه حوالت ...
- يا باجي يا باهي ، يا باجي يا تحفون ... يعمبو السياسة ، يعمبو الشعب التونسي ، الشعب التونسي ... تي ولا أخطاني منو لا تو يولي ينبر عليا أنا زادة ... تي هو حتى كي مشيت معاه في الخط ، طلع فيها طليعة ... هيا حطلي في يوم وليلة وايجة نحكيو ... عندك رجرج ؟
- إلي تطلب يا فرحات ، انتي السكين وأنا اللحم ... تدلل يا خويا الباهي ...
- عندك ككاوية ؟
- لا تلقاها عند احزاب المعارضة هذيكة هع هع هع ... احنا إختصاص "شيبس" ...
- اه وزيتون مصير ... يا عيني عليك يا معااالم ...
تقدت القعدة ... وبداو من الأول يلعبو ويضحكو ... ينبرو على الشعب التونسي ...
- أنا بهيم والشعب التونسي لا يمثلني ههههه
- لا يا باجي لا ... احنا شياب حركة الإلتفاف بمخزن السبسي هععع
- تي شبيك ها لطيف ساكت ؟ خوذ كلمة وأعطي كلمة ...
- خونا فرحات كلفلي السهرية غالية ... أنا من الفيديو فهمت إلي يحب على قهوة ... أما هو يقصد قعدة ... تو عشرين سنة نخدم في السياسة ... حتى قعدة لا تكلفتلي شحم دجاج كيف هذي ... يا خويا قداش يبعث ...
- سي فرحات احنا إكسبرس أف أم نحبو نعملو معاك لقاء في ما يخص الفديوات ...
- قعدة ؟ المرة هذي في القنطاوي ولا ما نجيش ...
- لا لا لقاء في الراديو أما مذبينا تو تو ...
الباجي ولطيف تغامزو وفهمو إلي هو الوقت المناسب ... وبداو يداعبو في الراجحي ...
- إي يا فرحات التليفونات في الليل والراديوات ... تي شكون كيفك ... صحة والله ...
- باهي كلموني نصيف ساعة أخرى خلي نخسل وجهي ونشرب شوية "راد بول"
بعد بنصف ساعة كيف متفاهمين اللقاء في الراديو وخونا فرحات دخل الدنيا بعضها ... مرة يقول قلت ومرة ما قلتش ... مرة صوروني ومرة ما يعرف شيء ... يا ولدي مصيبة ... ومع كل سؤال هو يبدا يخمم باش يجاوب والباجي يحوطلو كرذونة في "المال" متاع الكرهبة ... بعد اللقاء ، باسو بعضهم وكل واحد شد داره ... فرحات روح فرحان عندو مخزون شهر مشروبات ... والبعض من الشعب التونسي يعسلو على داره ...
تنويه : هذه التدوينة فكاهية تنبرية بحتة ... الغاية منها الترويح على النفس في وسط هالزوبعة متاع الأخبار إلي ما بين التصديق والتكذيب ... والرسالة متاعي هي أني شخصيا ما فهمت حتى شي ... أي حاجة فيها تتوافق مع الواقع فهي صدفة لا أكثر ولا أقل ...
الموضوع بش نحكي فيه كلمتين لأنو ما يستاهلش التطويل ... المشكلة الكلها في الوعي التونسي إلي ناقص وإلي لا بد معالجتو من القواعد ... من المدرسة ، الحكاية وما فيها المخرجة هذي ملحدة وقالتها في تلفزة تونسية يتفرج عليها الناس الكل ... بصراحة ما كنتش باش نحكي وكنت نكتب في تدوينة أخرى (خرافة من خرافاتي) ولكن كيف نشوف واحد كيف لسعد عصبان يحكي ويسب فهم وفي نفس الوقت يعمل في إشهار للمسخرية متاعو بعنوان "زنقة زنقة " وشفت مجموعات على الفيسبوك من النوع هذا قلت نقول كلمتين ...
باهي النقطة الأولى ... هي ملحدة ، هي تعبد الجرابع ... اش يهمنا فيها ؟ ... أنا حسب ما نفهم الدين الإسلامي ، يدعو المسلمين إلى أن يكرهو الكفر ولا الكفار ... يعني تكره أن تكون كافر ، وتكره أن ترى الناس تكفر ... ولكن لا تكره الكفار ... وبالتالي الحملة الشخصية المحملة على الإنسانة هذيكة نشوفها لا معنى لها ... هي لم تسب الدين بل رفضته وهذي حاجة تخصها، كان سبتو وقتها نقاش أخر ...
النقطة الثانية ... لو كان باش ناخذو على حد راهو قناة سي نصرة ... خرمة بعل ... على خاطر هي "تسوق" في الكفر والإلحاد ... و هي بعد هذا الكل قناة خاصة وحتى كان تحب إتدورها أفلام إباحية ما يسالها حتى حد ... أما لا يخفى على حتى حد أنها قناة تفتن وتميع في قضايا الشعب ... وأنا إلى الأن باهت في العباد إلي تتفرج فيها ... تي ماهو كي ما يتفرج فيها حتى حد تو تسكر ... ونرتاحو ، تقعد عندنا كان تونس سبعة واحنا جونا في الأحد الرياضي ...
النقطة الثالثة ... هو أن في فيديو فيها كلام على اللائكية ... وبكل صراحة حنبعل تجيب وحدة تحكي على الكفر ومن بعد وحدة تحكي بالفرنسية على اللائكية ... هذا يعطيني فكرة على لائكية بعض الشلايك ... أنا اللائكية متاع الناس هذوكم ارفضها لأنها اليوم خايفة من أن يفرض عليها الدين غدوة يولي الأذان يقلقها والناس إلي تصلي في الصبح مقلقينها كيف سي الصغير أولاد أحمد ... هذي لائكية مطرفة غير مرحب بها في تونس وكيف هي تعتبر نفسها في حرب ضد "الإسلاميين" ... أنا اعتبر نفسي في حرب فكرية ضد المطرفين هاذم ...
النقطة الرابعة ... الأنسة هذي ترفض أن يجبرها إنسان على أن تعتنق دين ... ولكن انتي ما تجبرش الناس على اللائكية ... جاية إنتخابات والشعب يختار ... وكانك قابلة للديمقراطية تقبل رأي الأغلبية وتحترم الشعب إلي أكثريتو مسلمة أحببتي أم كرهتي ... وإلي موش عاجبو ما عليه كان يعمل كوردة ... وحاجة أخرى مدام نحكيو على إحترام الغير ... كفانا من إعتبار كل ما يتعلق بالدين رجعي وظلامي ... أو بالأحرى الكذب على الدين وتلصيق كل ما هو ظلامي إليه ... وبالمناسبة لبرشة حيوانات يزيونا من الإشاعات على المسلمين ... إي نقول مسلمين لأن العديد أصبح يحارب الدين وليس يحارب في حزب إسلامي ... وعندكم بعض الأمثلة عن الإشاعات في مدونة المتنوشة ...
النقطة الخامسة ... باش نخرج شوية على الموضوع ... فيما يخص هالمخرجين إلي عندنا ... صحيح ما يسالهم حتى حد ... أما بربي شنوا هالموضوع ؟ على قلت مشاكلنا ؟ ... أو إلي يحكي ويلعبها مثقف ومفكر ويفهم في قوالب الدنيا والدين يقلك "حقوق المرأة" ... تي بربي أهبط للشارع وشوف المرى فاش تعاني قبل ما تحكي مساواة ... ياخي شبيكم ما تحكيوش على التجارة إلي تصير بالبنيات الصغار ؟ ما تحكيوش على حلول للقضاء على البغاء أو الحد منه ... مكبشينلي في شطر ميراث ... تي ماهو تحب الشطر إكتب لبنتك الشطر وفك علينا من حسك ... اه حكاية تعدد الزوجات ؟ باهي في تونس قبل ما يجي بورقيبة كان هناك ما يسمى بعقد القران القيرواني إلي تشترط فيه المرى أن زوجها ما ياخو عليها حتى مرة أخرى ... هذا إجتهاد بعض أيمة توانسة ... يعني إلي يجي يقول أن الدين باش يرجع بالتوالي راهو إما مهوش فاهم وما عليه كان يسئل وإما يتبوهم ووقتها ليا وليه ربي ... لأن حسب ما نشوف ، الطرف إلي ضد الدين هو إلي يحب يكون دكتاتوري بدعوى المكاسب والتطور فيضيق ما هو واسع ... تنجم تعمل وصوية كي انتي القوانين الربانية ما ساعدوكش ... هذا ونحب نذكر أن في أمريكا (وما ادراك) كبير العيلة فقط يورث والباقية ياخذو الشب (هذا لا يعني أن نحب نكون كيفها بل نحب نوري أن شطر التركة لا تعني التقدم)...
النقطة الأخيرة ... هي لمن يقدم لنا اللائكية كفانا تمعجين ... يا أخي فاهمين إلي اللائكية هي فصل السياسة عن الدين ... وكان تحب تو نقريهالك ... أما شنوا تحب تعمل في أرض الواقع ... شنوة إلي باش تبدل على قبل ؟ ... شنوا برنامجك للمجلس التأسيسي ... وكفانا كفانا من الحديث على التطرف الديني وعلى غيره ... راهو الحديث هذا باش يهزنا للهاوية ... هاو جماعة رافعين قضية بالنهضة ... تي بربي شنوة الخرم هذا ؟ وكنت حكيت على هذا بأكثر تفاصيل هنا ... والسلام
اختلطت المعاني والمصطلحات ... نتنافس بشراسة من أجل ألقاب تنسب إلينا ... صفات ونعوت قد لا نملكها ، في أغلب الأحيان ... تأتي لتجعل أيامنا أسعد، ويزداد فخرنا ... بتلك المغالطات
الخب في أيامنا يعتبر نفسه ذكي وذو حيلة ، والمهتور يدعي البطولة ... كبطولة البخيل في حرصه وشطارته ...
فقد العشق معناه ، وتراكم الغبار داخل قلوب عاشقيه ... فالإعجاب بالمظهر هو الحب بعينه... هو العشق ، هو الغرام ...
ضاعت المعاني مع تهافت الكلمات ... كلمات ككل الكلمات ...
رفعت القواميس ، ومزجت الحروف ...
أصبح ألحق باطلا والباطل حق ... لم نعد نستمع لنبض القلوب ، جفت الشرايين من المشاعر كما يجف القلم من الحبر ...
الجاه والمال وليدا الإحترام ... والفقر يربي الإحتقار ... كلمات كلمات ثم مجاملات ، النفاق في القول والرياء في العمل ... التخاذل والتكاسل عنه هي في أيامنا صفات محمودة ... تمجد ويصفق لها ...
نحن على أبواب الخراب ... مستحضرات التجميل تزين في ديارنا والقرطاس ينظف شبابيكنا ...
عائلاتنا تتشتت ... اصبحنا نجتمع داخل جدران يبردها المكيف ويسخنها المدفئ ... قوالب طوب من حولنا لا تحمل أحاسيس، لا تروينا عطفاً ولا من نقص الحنان تشفينا ... نظلم أنفسنا رياءا ، ثم نعيب زمننا ... وما العيب إلا فينا ...
اليوم نحب نكتب في ما يخص يوم التدوينة المدنية (ادخلو وأقراو الموضوع متاع الحكاية) ... مبادرة من طرف بعض المدونين ...
أولاً علاش باش نكتب ؟
بصراحة مانيش مغروم برشة بحكاية "يوم من أجل كذا" لأنه بالنسبة ليا انسان مقتنع بحاجة يعملها كل يوم حتى يوصل لمبتغاه أو لقدر الله يموت قبل ...
لكني قررت باش نكتب لأني مانيش موافق مع الحكاية متاع الجبهة الديمقراطية برشة وذلك لبعض الأسباب من بينها أن الأحزاب إلي مبدئيا مشاركة فيها ما تعنيلي حتى شي (التجديد أصحاب الفكرة العبقرية ، أفاق تونس و ربما التقدمي باش يلتحق بهم على حسب ما سمعت ...) ...
ومنها أيضا أن الجبهة هذي شنوا تحب تعمل ؟ تربح هي بأغلب المقاعد في الإنتخابات متاع المجلس التأسيسي إلي باش يبني دستور بلاد وتجيب "الظلاميين" على برة، إي ومن بعد ؟ توليو تتعاركو في المجلس التأسيسي كل واحد يحب على حاجة ؟ ... والغاية بالطبيعة باينة ، بناء دستور يقصي الأحزاب الدينية أو يحد من "خطورتها" ... وأنا مبدئي الشخصي هو "لا للإقصاء، ما عجبكش ، ما تصوتش " .... من بين الأسباب الأخرى وهذي شخصية كذلك، أنا لا أعطي صوتي لحزب أو مجموعة من الأحزاب تلعب على الخوف ... لأنها وبكل بساطة سياسة فاشلة وزفر عليها الترينو ... كيفها كيف الأحزاب إلي تلعب على البكاء ...
المشكل الكبير هو أن الجبهة هذي باش تنسينا المشاريع السياسية وغيرها من مشاكل تهمنا بصفة مباشرة وتغرق وتغرقنا معاها في صراعات "اديولوجية" ... باش تقسم الشعب التونسي إلى "ظلامي" و"تقدمي" ... باش تلعب لعبة ساهلة ، وتخرج تهم من الأرشيف وتبدى تفرق فيهم على الناس ...
والحاجة إلي إلى حد الأن نستنى نشوفها من أحد "قيادات" الأحزاب الجهنمية هذي هي مشروع مجتمعي واقف على ساقيه (بما أنا هنا نحكيو على مشروع مجتمعي "حداثي") ... باهي يجيو ياقفو يقلك النهضة مطرفين ومتزمتين ... إي وإنت بابا لعزيز ؟ كيفاش باش تتعامل مع المطرفين ؟ شنوة تعريفك للتطرف قبل كل شي ؟ هل تعتبر التطرف ديني فقط أم أنه هناك أنواع أخرى متاع تطرف ؟ شنية طريقة معالجتك للتشتت الإجتماعي الحالي والتشاتم بالألقاب "ظلامي" و"ماسوني" ؟ ... هذا وبخلاف بقية الأسئلة عن الإقتصاد والتنمية المحلية والسياسة الخارجية والتعليم ... تي الحاصل نحس في ناس تبكي وتصيح اعطيها كرسي ومن بعد تو نتفاهمو ...
أنا لا أؤمن بدولة خلافة ولا أؤمن بدولة "لائكية مطلقة" ... أنا كيف نشوف حديث كيف متاع السيدة هذي مقلقها إعادة "ترميم" الزيتونة نخاف ... فاحنا لا حاجة لنا لإجتهاد في الدين ... عندنا تبارك الله القنوات التلفزية ما فيه الكفاية ولا داعي لفتاوى تونسية تنطلق من واقع تونسي وتنطبق عليه ... تي شبيني نحكي على هذي ، تي هو الصغير أولاد أحمد وما ادراك (مع احترامي لنضالاته) موش عاجبتو صلاة الفجر ويتقلق من الناس إلي تخسل وجوها وتمشي تصلي ...
هذي هي الصراعات إلي تخوفني ، لأن بعض الناس بإسم الحداثة أصبحت تحارب الدين وحتى إمكانية تطور الخطاب الديني وإعادة النظر فيه ... وباش حتى واحد لا يحطلي تعليق من نوع "شبيك ما تخافش من الخوانجية ؟" نحب نقول أن الموضوع متاعنا هي الجبهة وبالتالي أنا انتقد بعض الناس إلي بإسم الديمقراطية والحداثة تزلق في التجريح في الدين من غير علم ...
لذا مرة أخرى نرى أن الأحزاب هذي فاشلة وتاخو في المسألة من الباب الخاطئ ... وهذاك علاش التجمع متاعهم ما يعنيلي حتى شي ... تبقبيق وريق بارد ...
تصوري للوضع القادم ؟
أنا اعتبر أن علينا تركيز مجهوداتنا على مشروع إقتصادي صحيح ... مشروع يعمل المساواة بين الجهات قبل المساواة بين الجنسين لأن المرة في المناطق الداخلية مضطهدة وماكلة على راسها والبعض يتحدث عن المساواة ...
أعتقد وأن علينا بناء مشروع ينهض بقطع الصحة في المناطق الداخلية ، والمواصلات كذلك ... التركيز على قطاع الخدمات ... ولن أعطي صوتي إلى حزب ما يعطينيش برنامج واضح وصريح ... كيفاش باش يبني ، وشنية الأليات إلي باش يتم استعمالها ، قداش باش يخصص من الميزانية من أجل بناء كذا وقداش من ميزانية من أجل كذا ... كفانا حكايات على النهضة ومشتقاتها ...
نحب نشوف مشروع بناء ، مشروع يعبر عن صوت الشعب الحقيقي موش عن متطلعات بعض الناس ...
اه مزال بكري تو نحكيو على دستور ؟
باهي شنية رؤيتكم لمجلس النواب ؟ كيفاش يتنظم وكيفاش يتم إنتخابو ؟ قداش مدة النيابة متاعو ؟ هل من حق محاسبة أطرافه ؟ كيفاش باش تكون هيكلة الدولة ؟ شكون وكيفاش باش نضمنو استقلال السلط عن بعضها ؟ هل أنتم مع إستقلال السلط ؟ من أنتم ؟ أنتم مع مشروع رئاسي ؟ برلماني ؟ راسوي ؟ فسرلي علاش هذا وموش هذا ؟ هل أنتم مع إستقلال القضاء ؟ ومن الضامن ؟
شنية نظرتك للمؤسسات الخاصة ؟
شنية مهام الرئيس ؟ كيفاش يتم مراقبتها ؟ كيفاش ومتى تتم محاسبته ؟ هل تنوون محاسبته أصلاً ؟
شنية صلاحيات المجلس الدستوري ؟ ما هي حدود "إستقلاليتو" ؟ كيفاش يتم تنقيح الدستور ؟
تي كان نقعد نسال من هنا لغدوة وما نكملش ... مانيش نقول إلي أنا خبير في القانون وغيره ... أنا مواطن عادي نحب نعرف وين ماشين بنا بالحكايات متاعكم ... إنت داهم على دستور فسرلي على القليلة التوجهات الكبرى متاعك موش تقلي حرية معتقد و تقدمية وما نعرف اش من خرمة ... داخلين على دستور راهو مش حرب صليبية يا ديني !
هذا رأيي الشخصي في ما يخص المسألة هذي مع احترامي لكل من شارك فيها كأشخاص أما الأفكار فهاني حكيت عليهم ... والسلام
القصة متاع اليوم فريدة من نوعها ...هي قصة متاع فيديو فيها 20 ثانية ... فيديو فيها برشة عباد وعندهم كورة ... إلعب باليد ، بالضبط كيف لاعبين كرة اليد أما ما عندهمش مرمى ولا حارس ... يلعبو تمريرات أما يلزم يعديو الكرة بسرعة كبيرة ويتحركو في البلايص الكل في وسط الملعب ... شدينا 10 من الناس وقلنالهم يتفرجو في الفيديو هذي ... يركزو معاها مليح وما يفلتوش حتى "باس" متاع الكرة ... وفي أخر الفيديو يلزم يقلولنا قداش من تمريرة تلعبت في الوقت هذاك ... المشكلة أن اللاعبين يتحركو ويمرو بسرعة ويلزم تركيز كبير ... دخلو المتنافسين في بيت ظلام وكل واحد في يدو ورقة وقلم ... الفيديو تتعاود مرة برك ... وبدا اللقاء ...
تشوف الوجوه كيفاش تتبدل ... الكلها تفاجئت بالفيديو هذي وسرعتها ... أما فيسع ما شدو وركزو أرواحهم وبداو يحسبو ...في شطر الثنية ثمة شكون لوح القلم وكتف يديه وبطل ، و شكون مركز ويحسب ومهوش عارف روحو صحيح وإلا غالط ... إلي يحسب بصوت عالي بش يضيع تركيز المتنافسين الأخرين وإلي نافخ صدرو ويلعب بشعرو ، الثقة في روحو طالعة للسماء و في قلبو يقول "أنا صحيح" ... واحد أخر تحسو مش قاعد يحسب أما مخو يخدم الله أعلم وين سارح ... واحد أخر ضيع التركيز وولا يشجع في الناس الأخرين ... الحاصل في العشرين ثانية هذيك قامت القيامة فيهم ومخاخهم ... الجماعة الكل تغزر لبعضها ...
جاو يسألو فيهم قداش حسبو من تمريرة ... كل يغني على ليلاه (تهناو زعبوع موش معاهم) ... كل واحد يقول للأخر إنت بهيم ، وإنت مصتك ما تعرفش تحسب ... و قريب إتدور بونيا لولا تدخل المراقب في أخر لحظة .. أية سيدي في الحقيقة الإختبار هذا موش متاع تركيز مع الكورة و حسبان قداش من تمريرة ... حبينا نعرفو هل أن الإنسان ينجم يعطي الثقة لكل ما يراه ؟ إلى أي مدى العين متاع الإنسان تنقل الصورة بمصداقية و بدون مغالطات ... حتى واحد لا فهم شنوة إلي صاير أو شنوة المطلوب ...
الحكاية وما فيها في وسط الفيديو يظهر "غوريلا" لمدة تسعة ثواني ... الغوريلا يتلفت للمتفرجين ويعمل في حركات من أجل لفت انتباههم ليه ... في العشرة متسابقين واحد فقط فاق بالغوريلا هذاك السيد إلي ما كانش يحسب انما كان يتأمل ... كنت عندو نظرة مختلفة على الفيديو و لم يضيع وقته في حكاية من المستحيل حلها ... أما البقية فقامو يحلفو ويتكتفو إلي الحكاية هذي خرمة وأن إلي شافها يستخايل وحدو ... إلي شافها بهيم ... الحقيقة هي أن الأغلبية شكو في حاجة إلا أن البعض كان واثق من نفسه إلي ما ثمة حتى شي وواصلو الصراع على عدد التمريرات ونساو الهدف الأصلي متاع الإختبار متاعهم ... فخسرو في الإختبار وخسرو الدروس إلي كانو يتعلموها من هذا الإختبار ...
