الأربعاء، 19 جانفي 2011

قلبي في بلادي

والله يا ناس ... تعبا الكأس ...ديمة نقول لباس
واليوم هاني ندادي...نحب نرجع لبلادي
بالحريات نحب انادي... نخرج مع أندادي
بالزلاط ندافع على ممتلكاتي ... عيلتي وفليساتي
نحب نشم ريحة الحرية ... ريحة الياسمين والطرنجية 
نحب نبات متهني ... على دارنا وكل من يقرب مني 
نحب نلعب فالحومة ... مع الناس إلي كانت مظلومة 
نحب نشوفك يا مدينتي ... نتذكر الماضي و طفولتي
أيام كنت فيك صغير ... نلعب كيف الطير 
نعوم في بحرك ... نجري فوق رملك 
نشري كسكروتاتك ... ونسهر في كيساتك 
ناكل كسكسي ومرقة ... ونمشي لسوسة ولطبرقة 
نركب على الموبيلات ... ونسترجع ذكريات 
مشات وفنات ... كيف ما تعدات الحياة ... وضاعو أيمات 
نتذكر واحد جلاد ... كان يحكم البلاد 
كرهوه العباد ... مسكر النات 
فاهم المواطنين والمواطنات ... هرب ما لقاش وين يبات 
نحب نلعب بيس وزربوط ... ونعدي سهريات تحت الحيوط 
نهز عينيا الفوق ... ونعيط من غير بوق 

محلاك يا حرية

زينك يا تجمع هرب ... قعدو فيك قطاطس الخرب 
الجوع والطمع ماكلهم ... والشعب ما حاملهم 
شفناك يا تجمع باستمرار ... ملي طيحتو الإستعمار 
اليوم قهرتونا وذبحتونا،عملتو العار ... حتى من الانترنات منعتونا، انتم وعمار 
حبينا يا ناس نفهموكم ... أما اليوم لازم نخرجوكم
يزي ما خدمتو تونس، بلادنا ... اليوم يبني محمد ويونس، مستقبل اولادنا 
خليني نحكي للزين ... قلو يحل هاك الوذنين
أنا الإرهابي المخرب... خرجتك وخليتك تتهرب
 برى عند ال السعود... أما نجيبك قبل ما ياكلك الدود
في حقي ومالي ماني مسلم... ما تنساش إلي انا متعلم 
تعلمت نقرا كذبك ونفاقك... وكي نحكي نكشفلك أوراقك
اه يا تونس من حبك نطقتيني... ومعاش قادر نغمض عيني
 نحب نشوفك لابسة الحرية ... سامحني وأرضى عليا 

تو يا بلادي ينقص فيك اللعب ... وتحكم فيك إرادة الشعب
ما تخافوش يا شباب ... الراجل ما يخافش من الكلاب
لما نوريوهم العذاب ... ويتنحى الإرهاب
وترجع الخدمة و القراية ... ونقولوا كيف الغناية 

أنا بتنفس حرية

هذي صرخة متغرب ... من بلادو يحب يتقرب
صرخة قلب حزين ... معادش يغمض العين
بلادو شمت الحرية ... وتقولو شبيك بعيد علي
أرجع وواسيني بضحكتك ... واحكيلي جرحك ومحنتك  




abuiyad

5 تعاليق:

Unknown يقول...

سي الحر هذه قصيده تفرح القلب وتدمع العين كيف يقول عبد الرزّاق الشابي بنفسج دمعة ثم ابتسامه بورك قلمك وروحك الحرّه إنتظر قليلا حتى تنجلي العتمه فتقر ين أمّك بك

Primavera يقول...

yeecer 7lowwa ya3tik essa77a w nchAllah men 7assan ila a7ssan que ce soit enti wala Tounes :D

كاليمارو يقول...

غيغوز:

الله يخليك ... أهوكة علاش قتلك ما نجمش نكتب :)
انشالله تتجلى العتمة و يفرج علينا ربي مرة وحدة ... ونفرحو الناس الكل :)

بريمافيرا:

آمين ... يعطيك الصحة على الدعوة :)

Yosri يقول...

Bravo, beau poème, ça exprime des sentiments profonds
:)

كاليمارو يقول...

Yosri:

Bienvenue :)
et merci
Mes amitiés :)

إرسال تعليق

أعطي رايك