الاثنين، 18 أفريل 2011

النهضة و ما ادراك ما النهضة



تقوم الصباح ... نهضة ، تفطر نهضة، في التوالت (حشاكم) نهضة ... تي حتى في النوم ... نهضة ... تي شنية الحكاية ؟ الشعب ماكل بعضو ؟؟ 

هو بصراحة موضوع ما نحبش نحكي فيه لأني نعتبر نفسي محايد ولا دخل لي في هالصراعات الجانبية إلي تصير في المجتمع لأنها أبسط ما يمكن أن يقال عنها تفوريخ ... سبني نسبك ، ونحيلي جد والديا إنحيلك جد والديك ... أما الواحد ساعات يتلز يحكي على خاطر نشوف في برشة نفاق من الطرفين وفي التدوينة هذي بش نحكي على العوج اللي نشوف فيه وكيف العادة إلي حساس وقلبو ضعيف ننصحو ما يقراش ويبدا يتهم في سيادتي بتهم بهيمة كيف أني نعمل في الفتنة أو أني خوانجي وهات ما جاك من التهم الحاضرة إلي طاح قدرها ... 

باهي باش نبدى بالحملة الكبيرة على راشد الغنوشي وحركة النهضة وهذي "الفوبيا" من الحركة إلي استقرت في قلوب برشة ناس وماشية و تكبر في قلوبهم ، حتى أنهم عمات وما عادش يحكيو بموضوعية ويشوفوك تكذب خبر تولي خوانجي إرهابي ظلامي ...

من بين الأشياء إلي تصير هي تكبير الحكايات كيف الاستاذة إلي لابسة النقاب في صفاقس وقالو بأن تلامذتها خرجو وما إلى غير ذلك ... وهذي كذبة 

من بين الحكايات أن البعض ينشر اشاعة تكون ساعات خطيرة برشة ، كيف إشاعة ماء الفرق (والسارق إلي يدو مقصوصة وبرشة حاجات أخرى ...) ومن بعد ما ينشرش التكذيب متاعه وشفت منهم برشة هالأشكال هاذم 

من بين الحاجات الغير معقولة هي تنشر فديوات تعذيب أو ضرب للنساء أو هاك الفيلم "برسيبوليس" متاع إيران وتستعمل من أجل غاية سياسية ... 

السياسيين اليوم إلي يحب يبان ويولي يفهملها يحكي على النهضة وإستعمال النهضة للمساجد ... صحيح ان النهضة مش من حقها تتدخل في حتى إمام ومش معقول يتم طرد إمام من طرف أي عضو من أعضاء النهضة ... ولكن كيف يجي مورو أو الغنوشي أو غيروا يحكي في الجامع وينصح المسلمين على أن ينتخب من يضمن لهم حريتهم الدينية ، هذا أمر عادي ولا علاقة له بإستعمال المسجد كمنبر سياسي ، لأن المسلم يعيش في مجتمع والإسلام لا يخاطب الفرد كفرد انما كعضو فعال في وسط المجتمع ...

يجي كذلك واحد يقص شطر فقرة من كتاب متاع راشد الغنوشي على سبيل المثال ويجيب هاك الفقرة إلي تحكي على المرة "كأداة جنسية" ومن بعد  يقلك شوف اش يقول ... لا هذا كذب وإفتراء ولا أرضاه ولا أرضى النفاق والمنافقين إلي يتبعو فيه ولو أني متأكد أنه هناك بعض البهايم وكذلك بعض أصحاب النوايا الحسنة ... على كل الكتاب هنا والفقرة هذيكة في الصفحة 54 ويحكي فيها راشد في باب "حب النساء" (يعني الباب يحكي في موضوع الحب والجنس بين الجنسين) وهنا راشد الغنوشي لم يفسر الحياة الجنسية من المنظور التقليدي (بالمعنى الديني) انما يعود إلى علم النفس الجنسي الذي يرى أن الحياة الجنسية هي وظيفة بيولوجية عند الرجل وظاهرة نفسية عند المرأة ... هذا اش فهمت أنا إلي بعيد عن أمور النفس و قريت الكتاب فيسع باش نكتب هالحرفين ، مانيش نقول إلي أنا معاه ومانيش ضده ، لأن الحكاية هذي ما تخصنيش برشة ولكن لا للتلفيق والتبلعيط لا وألف لا ... والإنسان إلي بالحق يلوج على الحقيقة وما يحبش يفيق نهار ويقول غلطوني ما عليه كان يقرا الكتاب أو حتى الباب هذاك ... 

يجي كذلك البعض يحب يوهم الناس بأن النهضة تنصب في نفسها كحامي للدين وما نعرف شنوة ... يا أخي إنت تعتبر روحك مسلم والنهضة ما تمثلكش ، ثمة شكون تمثلهم النهضة ... علاش تقصي فيهم ؟ علاش ما تحبهمش يحكيو ؟ 

وإلي صار البارح في قليبية أنا نشوفو من باب قلت الإحترام وكنت قلتها حتى وقت طردو الشابي في بنزرت وغيره ... هذي قلت تربية أنك تشد رجل تصورلو وجهو كعبة طماطم وتبدى تسب فيه عيني عينك ورغم ذلك حكى بكل ديمقراطية ولم يشتم أحد فيهم ...  

برشة خرم نشوف فيه ، كيف المجموعات إلي تطرد في "المطرفين" إلى السعودية وأفغانستان ... بدعوى أن تونس بلد التقدم والريق البارد ... كان جينا تقدم راك كيف تدخل لبوسطة تاخو قضيتك في رمشة عين مش تعدي فيها ثلاثة أيام ... كان جينا تقدم رانا نعرفو نسمعو الطرف الأخر مش نسبوه ونسمعوه الكلام بدعوى التقدم ... خلي عزاها سكات ...  

من بين الحكايات إلي نسمع فيهم أن النهضة باش تحط المرى في شكارة وتسكر عليها الباب ... بينما كي تجي تشوف بنات راشد الغنوشي "المجرم" "الإرهابي" ... 

تسنيم : دكتوراه في السوسيولوجيا 
سمية : اجزتان في الفلسفة والتاريخ وتعد دكتوراه في التاريخ 
يسرى : الإجازة في الفيزياء وتعود رسالة دكتوراه في علم الذرة 
إنتصار : دكتوراه في الحقوق ومحامية

إن كان هذا إحتقار للمرى فقلي كيفاش يتم تبجيلها ؟ 

كل واحد يدعي أنه مسلم يخرج للشارع ويعمل غلطة فيسع ما يولي تابع النهضة و مزمرة علينا ووو... شريعة وحالة كلبة ... تو بربي الناس إلي يصليو في الشارع (إلي أنا مانيش موافق عليها) اش مدخلهم في النهضة ؟ ... 

وعلاش كيف واحد يصلي في الشارع تولي "جريمة" وكيف واحد يبلع تولي حرية ؟ ... لأن النفاق مزال في قلب التونسي مكبش  فينا كضربان البندير ...  

حاجة أخرى هي الدخول في النوايا الخفية لحركة النهضة ... يقلك إي ليوم يحكيو ديمقراطية ونهرت إلي يشدو الحكم شكون بش يضمن ... و شكون يضمن أن الشابي أو براهيم أو غيره يسيب الكرسي ؟ ... أنا نقول أن الشعب هو إلي يضمن ... واحنا إلي ما يعجبناش ويكذب علينا "ديغاج" ... لذا كفانا تقشيقش أحناك والي عندو مشروع يعطيه أو يسكت علينا كان باش يبكي ويشكي من النهضة ... 

ومن غير ما نحكي أنه هناك العديد العديد إلي يبداو ينتقدو في النهضة ومن بعد ينزلق ويولي يسب في المسلمين ... ساعات من غير ما يشعر وأنا هنا بحكم أني مسلم نطلب من سيادته يحل عينيه ويعرف وين يحط شلاكتو ... إنتقد النهضة بالصدق مرحبا أنا معاك ... تكذب عليها أو على أي حزب أخر أنا ضدك ... أما تولي تعمم على المسلمين أو البنات المتحجبات بصفة عامة ، هذا نعتبرو تطرف وبهامة في نفس الوقت ... 

باهي تو باش نحكي على بعض أنصار النهضة مهما كلفهم الثمن ... البعض إلي يكفرو الناس أو يوصلو يقصيوك أو يعتبروك تعمل في الفتنة لأنك تقول الحاجة يعتبروها ضدهم ولو أنها صحيحة ... هذي غلطة أو ما تجيش ... أنا ادعو البعض إلي بكل بساطة مسكرين أنهم يحلو شوية مخاهم ويستعملوه ساعة ساعة ما فيها باس ... وأنك لا تتهم انسان بكفر أو نفاق أو غيره حتى تثبت مليح لأن المسلم مسؤول على كل كلمة ينطقها ... وأن كفانا نصرة إلى النهضة بكل قوة ، كان غالطة نقولو غالطة ... وكفانا من حطان المسلم في مركز الضحية ... يزي من البكاء والعويل ... والنهضة لا تمثل الإسلام ... لأن البعض للأسف ماشي في بالو كيف يدافع على النهضة ، فهذا دفاع عن الإسلام ...      

دعوة أخيرة إلى أن نكف من الهدر الفارغة ونتلهاو ببناء مجتمع متماسك وصحيح ، على خاطر الحديث هذا يفرق ويشنج أكثر من يحل مشاكل ... وكان باش نواصلو فيه بحول الله داخلين في دكتاتورية جديدة ووقتها نقولها من قلبي لا تقيملنا قايمة ... والسلام  
abuiyad

33 تعاليق:

Guide de la pêche en Tunisie يقول...

Bravo
Bonne continuation !

Unknown يقول...

tout simplement bravo

Unknown يقول...

bien dit

Mouzika Tounsia يقول...

m3allem ! bien dit ya3tik esa7a :)

Tunisian Smileys يقول...

bravoooo ya3tik essa7a!

Unknown يقول...

أشكرك على قول ما يدور بخلد العديد من الأشخاص وأحترم رأيك مع العديد من التّحفّظات. أما نحب نجاوبك عالفكرة الأخيرة متاعك باش نقلّك ألّي الهدر الفارغة هذي هي الّي تمثّل جوهر الموضوع متاعك علا خاطر تعني بصريح العبارة أنّ الشّعب التّونسي واعي بحاضرو ومهتم بمستقبلو شديد الإهتمام ويحقّ لكلّ شخص أن يعبّر على مخاوفه وأن يدافع على آرائه. وأنّي لئن أستخدم عبارة كان قد استخدمها النّظام السّابق لتأليب الآراء ضدّ الثّورة إلاّ أنّي أعتبرها في مكانها الصّحيح الآن عندما أقول أنّ هذا يؤكّد على مجتمع حيّ وحركيّ وعاشت تونس مهد الحرّيّات

Unknown يقول...

Allah yerham waldikk :)

Unknown يقول...

hhhhh, hèyel barcha , ayya tfakkarni 3 snin o5rin !!!!!!!!!!!!!!

CéSar يقول...

fort sa7bi ....bravo

Unknown يقول...

wallah chay yfarra7 ki nal9a annou mazelfama twensa t5amem de cette façon. Bravoooooooooooooooooooooooo

benchaaben hichem يقول...

looool bien , bonne continuation :)

Unknown يقول...

C'est l'avocat d'ENAHDHA !!!!!!!!!!!!

chad يقول...

une situation vecue personnellement ! kafrouni sabouni ou limite tharbouni 5ater je suis un gynecologue ou netkachef 3ala 3awrat nsé walla desintox zeda ? za3ma nektheb 3ala rou7i ? faut etre impartial Mr mouch parler 200 ligne contre ceux ki sont contre ennahdha et deux 3 ligne contre les partisans ! ou ken mouch msada9 machrou3hom barra a9ra l'interview mta3 jbali el amin el 3am lel nahtha fi journal realité elli you3ed fina mli7 bel chari3a ou jaw el behi
b5atrek si el mou7Ayed

sakkouhi يقول...

المشكله مشكلة تعصّب في الأفكار .... كل واحد والحبس اللس حاصر فيه روحو.... كل واحد والداموس اللي محنّط فيه ذاتو.... كلامك معقول لكن كيف الإنسان يفشل في التّخطيط فهو قاعد يخطط للفشل ... أنا ضذّ النهضه وضدّ كل حزب ماهوش واضح قدام روحو وقدام الناس وقدام الخالق ... لأنّو التاريخ علّمنا أنه "لايلدغ المؤمن من جحر مرّتين" .....

IBNOUKHOULDOUN يقول...

إني متأكد و أن حركة النهضة ذكية جدا اذ جعلت كل ألأحزاب و الجمعيات المناهضة لها تبتكر في ألإشاعات و ألأكاذيب فكانت النتيجة أن الشعب أخذ يبحث و يتساءل في حقيقة هذه الحركة و لما تيقنا من ألأدعاأت تيقن أكثر فأكثر من فراغ وعبثية الطرف المخادع و أيقن في نفس الوقت بالتوجه الواضح و جدية النهضة
ان ألأحزاب و الجمعيات المناهضة للنهضة كانت و لا تزال بوق للإشهار المجاني للنهضة و هذا ما يؤكد نقص التجربة السياسية و غباء هذه ألأطراف فلو قاموا بمراجعة نتائج أكاذيبهم لأيقنوا و أنها كانت تصب في مصلحة النهضة وتسيء لهم أكثر فأكثر
ما أراه شخصيا حسب تتبعي للأحداث في الوقت الذي كانت فيه هذه الجماعات تستنبط ألأكاذيب كانت جماعة النهضة ترص صفوفها و تعمل على تركيز برنامجها في الحركة مما أكد حاليا التفاوت الكبير بين الراكب و من ينهق كالحمار
أدعو هذه المجموعات المنكوسة أن تعرض أنفسها في أقرب ألآجال على طبيب نفسي حتى يشفيهم من مرض الحسد و البغض التي عادتا ما بنيت على مصالح و مأرب شخصية قبل أن يطلع عليهم يوم و يصفر عليهم القطار اذ أنه كل ما زاد يوم كل ما كبرت الهوة

A man named david يقول...

المقال الوحيد إلي فرهدلي على قلبي
Un article qui dit tout haut ce que je pense tout bas, et qui garde son sens de la répartie au milieu de la psychose ambiante !

taftaf2007 يقول...

كلام معقول و موزون برشا، لكن يا أخي يختلف معاك في نقطة اللي تقول : " لأن البعض للأسف ماشي في بالو كيف يدافع على النهضة ، فهذا دفاع عن الإسلام ... "
أنا شخصيا يا أخي أعتقد أني بنصرتي و مساندتي للنهضة هو مساندة للإسلام و دفاع عنه لأن و إن وجدت أحزاب إسلامية فإنها غير معروفة (مولودة بعد 14 جانفي ) أو أنها متشددة (حسب رأيي) و لا تراعي فقه المرحلة ( حزب التحرير) و بما أن تونس تعتبر أكثر دولة حورب فيها الإسلام في العالم في العهد الحديث و شوهت ملامحه ثقافيا و عقائديا و حضاريا و كل ما تريد ، حورب الإسلام شكلا و مضمونا . و بما أن بقايا هؤلاي "المحاربين" لا يزالون يريدون جرنا إلى هاوية التغريب و الحداثة الزائفة.. ولا أرى في الساحة من إستمات و لازال يستميت في الدفاع عن الدين و رفع رايته في بلادنا غير حركة النهضة ، فإنني بالتالي أرى أن في مسانتهم مساندة للمشروع الحضاري القيمي للإسلام و إمتداد لنضال نبينا محمد و صحابته.. و هذا لا يعني أنهم، أي النهضة ، منزهون عن الخطأ أو النقد بل بالعكس لابد من محاسبتهم و مراقبتهم في كل تحركاتهم لأن في ذلك مصلحة الجميع..هكذا أرى و الله أعلم

Unknown يقول...

je vois que c une analyse interessante mais jme3et ennahdha ma 3andhomch el 7a9 yrawjou el 7amlethom il inti5abia fi jwema3 .
je pense qu'on doit garder la neutralité des mosquées.

Unknown يقول...

للوهلة الأولى بشعر أن مكتب مأجور ,,, لكن لنتجاوز مبدأ سوء النية و لتوضح لنا في 'مقالك' القادم بعض التساؤلات :
لماذا سارعت النهضة باعتبار نفسها خليفة للتجمع ؟
بماذا تفسر الإزدواجية في الخطاب في العديد من المسائل؟
لماذا لم تطوي النهضة ملف العنف بإدانته إدانة واضحة؟
كيف يمكن للنهضة أن تتسستعمل المساجد و هي حزب مدني ينشط في دولة مدنية ؟
لماذا لم تتخذ النهضة لنفسها مسافة من السلفيين ؟
لماذا تعتمد النهضة سيــــاسة التجمـــع التعبوية ( الحافلات .....
مــــــــاهو برنامج النهضة(لن تجد جوابا)؟
بنات الغنوشي درسن في بلاد الكفر يا سيدي
لماذا لا تعتبر النهضة المرحلة القادمة مرحلة ائتلاف وطني؟
؟؟؟؟؟؟؟؟؟
,,,,,,,,

b.b يقول...

: ya akhi el fadhel
enahdha lam ta3taber nafsaha khalifa lel tajamo3 hadha katheb wa iftira2
anahdha lam tasta3mel al isdiwajiya fil khitab
anahdha ajabat 3ala milaf al 3onf bi annahou 3amal la yantaseb lel 7araka
anahdha lam tasta3mel al masajed lel nachat al siyesi
man 9ala anna al nahdha laysat motakhidha li nafsiha masafa mina al salafiyeen?
al nahdha lam ta3tamed al siyesa al ta3baouyia
anahdha laha barnemej mousater wa sa tou9adimouhou 3inda al taracho7 lel intikhabet
banat el ghanouchi law ken 3andhom el 9odra bech yedersou fi tounes rahom dersou ou biled el kofr elli te7ki a3liha arham min bilad el islam fi 3ahd ben ali

ElGueuzifié يقول...

هذا الكلام إلي حبيت نقولو و ما عرفتش نعبر عليه !! كيف نقرى تعليقات متاع الصفحات المعادية للنهضة تقول يحكيو على تنظيم القاعدة أو إيران !! و بعد كيف نحكي مع جماعة النهضة و إلا نشري الجريدة متاعهم و إلا نسمع الخطابات كاملة متاع الغنوشي و غيرو (موش مقتطعات) نلقى حاجة بعيدة كل البعد على هذه الإتهامات .. حاصيلو بارك الله فيك و إن شاء الله العباد تستوعب الكلام هذا

Unknown يقول...

pourquoi le tunisien doit tjrs soit pour ou contre? il peut pas se mettre en une position neutre? on est tous devenu un esclave aux machines, on pense selon la logique binaire 1 ou 0.
Sinon bravo pour cet article et bonne continuation

Unknown يقول...

جازاك الله خيرا ... قلت الذي يجب أن يقال ...

احمد بوعثمان يقول...

مقالك سمح اما انتي غالط في حاجا الي انتي دخلت حزب النهضة في سلفية . اما المقال متاعك عجبني

هيكل بن جعفر يقول...

إنت نهضاوي معروف و ديما نشوف فيك في إجتماعاتهم تسربي في الليموناضة... ما تحاولش تنكر.. ما تحاولش...
برافو كاليمارو :)

Amal يقول...

سلام موافقتك في أغلب إلي قلتو أما راهو هذا الإختلاف هو أصل الثراء الفكري ، صحيح إلي أمور البلاد ما تعجبش أما زادة احنا قادمين على الإنتخابات ولازم كل إنسان يعرف مليح شكون يمثلوا وشكون لا حسب توجوهاتو؛ احنا للأسف عنا أزمة فهم لديمقراطية في البلاد ومازلنا متعصبين لارائنا ومنقبلوش بالرأي الاخر وهذا إلي لازم يتبدل قبل كل شي، لا يغير الله بقوم حتى يغيروا ما بأنفسهم، يعني إلي صاير تو الكلو مهوش تفاهات أما فترة ينجر علاها تغيير بما في نفس يعقوب باش يتعلم منها أصول الديمقراطية قبل مايطالب بحقو فيها، باهي عل حكايت إلي النهضة ما تمثلش الإسلام ، هو أساساً حزب ذو مرجعية إسلامية والإسلام مهوش محتاج باش يمثلوا، أما كانسانة تحرمت حياتي كل من تطبيق شعائري الدينية في بلاد كان يجب إنو يكون مسلم، أنا أتوق إلى أن يمثلني حزب له مرجعية دينية ويضمن لي حقوقي وحق غيري مادام الإسلام يحترم جميع الديانات ولا يكره أحد في .. مايمنعش اني ننتقدو كيف يخطئ

Midovik يقول...

كلام معقول ! عندي أيامات وانا نقنع في الجماعه بنفس المنظور متاعك ! آما النافع ربي ! نكمل تفسيري من هنا نلقاهم ايبرتاجيو حاجه منافيه للي كنت نقول فيه بعد ثواني .. آه يا راسي ! آه يا تونس ! آه يا ثوره ..

Unknown يقول...

السلام عليكم
كلام جميل و معبر .انا كنت مترددة في الحكم على النهضة لكن اتيحت لي الفرصة ان اجلس مع بعض القيادات في الحزب, فتاكد ان النهضوين يدفعون عن فكرة " النهضة تستمد مبادئها من الاسلام لكنها ليست الاسلام و ان اخطؤا فهذا لايمس الاسلام" و اقناعني برنامجهم و اظن ان التونسين قادرين على ايقاف اي دكتاتور. و كلمة اخيرة للمنساقين وراء الاشاعات " يقول الحق -تبارك وتعالى-:"يا أيها الذين آمنوا إن جاءكم فاسق بنبأ فتبينوا أن تصيبوا قوماً بجهالة فتصبحوا على ما فعلتم نادمين"

كاليمارو يقول...

شكراً على تعاليقكم ، ادعو الجميع إلى قرأت التدوينة الثانية في نفس الموضوع حتى نبين أكثر موقفي من الحكاية ... وإلي سالني نشالله يلقى جواب فيها ...

Unknown يقول...

klém ma39oul ama bizarre ya Mr neutre elli enti ketib presque article kémel 3la les anti-nahdha w jmé3it nahdha 3a faza awka bech tsakket la3béd ketib klimtin w kelma , mélé5err klém s7i7 ama yzid yfatten w 3aychoo Mr il "Mou7ayed" !! w salém

Moez يقول...

بعد أكثر من عام على كتابة مقالك هذا , نقلك توه يا سيد أنت برا حل مخك وراجع كوارتك ... واللبيب بالإشارة يفهم
رضي الله عني وأرضاني ...

ركن الهدى يقول...


شركة كشف تسربات المياه بالاحساء
شركة تسليك مجارى بالاحساء
شركة عزل اسطح وخزانات بالاحساء
شركة مكافحة النمل الابيض بالاحساء
شركة مكافحة حشرات بالاحساء
شركة تنظيف مسابح بالاحساء
شركة تنظيف خزانات بالاحساء
شركة تنظيف ستائر بالاحساء
شركة تنظيف كنب بالاحساء

Unknown يقول...


شركة كشف تسربات المياه في الشارقة
شركة تسليك مجاري في عجمان
شركة تسليك مجاري في دبي
شركة كشف تسربات المياه في دبي
شركة كشف تسربات المياه في عجمان

إرسال تعليق

أعطي رايك