الاثنين، 3 جانفي 2011

أخر خطاب لسيادته

قمت الصباح كيف العادة مدهشر وتاعب ... الخبزة صعيبة هالأيمات وكي تشد بلاصة  يلزمك تنضبط أكثر من اللازم وما تعرفش على البلاء ... يجي ولد سي فلان يطيروك وما يتلفتلك حتى حد ...

كيف كل صباح مشيت للكوجينة نلقى الوالدة مطيبة قهيوة ززوة تعمل ستة وستين كيف ... قبلتها من على جبينها وقعدت نسمع في الراديو ... كنت نسمع كل يوم للغناية متاع ماجدة الرومي "خلقت طليقاً" (شعر أبو القاسم إييييه) ونبدى سارح معاها حتى تنبهني الوالدة إلي الوقت جاء ويلزم نمشي ...

يومها على غير العادة برشة حركة في الراديو والأخبار تلو الأخبار والجماعة الكل تحكي على خطاب الرئيس مع الثمنية متاع الليل ... عادة قيدتها مليح خاصةً وأنهم أكدو على أهمية الخطاب ...

مع الثمانية قدام الصندوق السحري ... جات المقدمة متاع الأخبار تحكي ... طولة برشة الحقيقة حبت تلم أكثر عدد من المتفرجين وجاء الخطاب بعد طول إنتظار :


شعبي الكريم ... نعرف قداش انتم تعانيو من الفقر والبطالة ... نعرف قداش عملتو مطالب شغل وقروضات حتى تعملوا مشاريع وقعدتو بالعام والعامين أو أكثر وانتم تستناو و ما جوبناكمش أو قلنالكم لا بدون تبرير... نعرف إلي عيلتي سرقتكم برشة ونهبتكم وكرهتكم في حياتكم ... نعرف إلي أنا عبيت جيوبي من عرقكم ... نعرف إلي أنسابي سراق وإحتكرو إقتصاد البلاد ... نعرف إلي كان مش البوليس إلي في خدمتي راكم كليتوني من هاك العام ... نعرف إلي انتم شعب يقدر ويصبر وينسى ولكن اليوم خرجتو تعبرو على غضبكم وهذا حقكم ... اليوم فديتو وحرقتو أنفسكم ... وهذا أمر يؤلمني !

هذاك علاش أنا اليوم نحب أولاً نطلب السماح من شعبي لأني كثرت على ما وصاوني وهاز البلاد في هاوية وعزوز وما همها قرص ... نطلب السماح للعائلات إلي دمرتها والنساء إلي رملتها وللأطفال إلي يتمت ... نطلب السماح من القاري إلي يبيع الحمص والدكتور إلي في الحبس ... نطلب السماح من الحارق إلي غرق ... ومن الفقير إلي عايش بلكريدي والعطار والجزار والخضار يجريو وراه ... ومن الجهات إلي نسيتها وكبيتلها سعدها ... نطلب السماح من كل إنسان ضريتو من قريب أو من بعيد بسياستي الفاشلة ! 

نحب ثانيا نوعدكم انو جاء الوقت إلي تستعيدو فيه حرياتكم ... بدايةً من اليوم تشيخو في الانترنت كيف ما تحبو ... اليوم يكسر المقص ويرفع الحجاب عن الانترنت ... اليوم يطلق سراح الصحافيين والسياسين ولي في جراء حقوقهم مسجونين ... بش نخلي الأحزاب المعارضة تتكون من يسار إلى يمين مروراً بالدين ... كيف أمريكا ... اليوم حق المعرفة أصبح مصرح بيه ... فلا للكتب الممنوعة ولا للصحف والمجلات المحظورة ولا وألف لا للتلفزة البنفسجية ... معاش تعتيم ومعاش تجلطيم ... شعبي مهوش بهيم...

ثالثا ... الفقراء بش نعملولهم دار المال ... تؤخذ الأموال من الأغنياء وتعطى للفقراء ... المنح الجامعية باش نزيدو فيها ونبدلو في الدخل الأدنى للعايلة حتى يفرح أكبر عدد من الزواولة بالمنحة ...

رابعا ... البطالة باش نحاربها ... انقصو من شهريات الكوارجية والمدربين ... انقصو من المصاريف المخصة لبناء المساجد (علاش في كل حومة جامع ؟؟) انقص من مصاريف بناء الملاعب (كل ما نبنيو ستاد كل ما مستوى الكورة يطيح) ... انقص من مصاريف بناء الملاهي كالعلب الليلية وغيرو من أماكن ما يدخلهم كان إلي جيبو معبي ... الفلوس هذي الكل باش نبنيو بها مواطن شغل ... ونعملو منحة للباطل عن العمل حتى ينجم يصبر على البطالة وما يتلزش يسرق أو يحرق روحو ...

خامساً ...  باش نقدم استقالتي من اليوم على خاطر ...

في خامسا الصوت قص وبديت نشوف في تصويرة ماهيش واضحة ... شكيت أن عمار إدخل وقطع علينا الخامسة و قص علينا حلاوة الاستماع إلى خبر يفرح جميع البنفسجيين ... ولكن شوية و بدا يرجع الصوت وماشي ويقوى ...

- أية يعيش ولدي فيق ... معادش وقت على خدمتك ... 
abuiyad

9 تعاليق:

Unknown يقول...

هههه ! بنفسجيست حتى في النّوم الخطاب هذا ما تسمعوش كان في عرصات القيامه والحبيّب يبدا يجري هنا وغادي يفركس على التوانسه والكلها متورنه عليه إلّي يكلمو يقلّو ما نيش تونسي آنا صاحب مغارم آاااه يا حر هذا خطاب الدّنيا لخرى :'(

Primavera يقول...

aaaaah yeecer 7lowwwa banafsaj, chapeau bas !

nchAllah bark to93od 7or w mayjich akel bessel ykassarlek kraymek bel 4*4 mté3ou hhhhh

Michmécha يقول...

=)))))))))))))
mch béhi wé7id i3ich fi 3alim il 7lem =)))))
hani nid3ilik bch Ammar mé ifi9ich bik =))))

EL FAN يقول...

Aya 9oum ...
9oum e5dem be kolli 7azem la yet3ada 3miratou y7azamlek el blog :p

كاليمارو يقول...

من جملة أربعة تعليقات 3 يفولو على مدونتي الغالية :'( ... يا عمار ما تسمعش كلامهم مانيش نحكي علي في بالك

غيغوز:

صباح الفل :)
بالقلب إلي عندو يا ذنوبي كان تتحركلو شعرة فالدنيا لخرى ... أما الله غالب صديقك أحلامو مش واقعية حتى طرف ههه :)

بريمة :p :

أية بيكش ؟؟ شبيها مدونتك تفشخ فالنوم ؟؟
يعطيك الصحة إنت على مرورك و كان ضربني عمار نعمل مدونة جديدة (بلاش فلوس راهي) وإلا نجي إنبلبزها في مدونتك (شرير) :D

مشماشة:

أية وقتاش اطيب يا مشماشة خلي نجي نعض ... لول
مانيش موافقك برشة ... الأحلام أحسن حالة تنجم تعيش فيها لأنك تكسر القيود وتمشي إلى المجهول بلا مبالاة :)
نشالله دعوتك مقبولة :)

فان :

وقتها نجي نعلقلك في مدونتك بكل حزم هههه فماش ما تتحزم حتى هي :)
مرحبا بيك صديقي

Michmécha يقول...

le réveil sera plus difficile dans ce cas :p

il mecmecha tayba ama to5zir ib 3inik w akahaaw te9if ghadi :D

كاليمارو يقول...

مشماشة:

يا بنتي موش لازم تفيق ... أقعد ديمة احلم هههه

غير معرف يقول...

ياسر مزيانة :)
انا طارتلي الشاهية مالتدوين على الدمار اللي نرى فيه في البلاد
حقة اوكة بدلت لدريسة ولات
http://elboukachen.blogspot.com
اما يظهرلي باش نعمل ترتيحة هالمديدة

Unknown يقول...

هههه
وزعمة لمرة هاذي نحلمو زادة ؟
يمشيوشي يقيمونا منوم في 24 جويلية ؟
أنا خلوني راقد يعيشكم

إرسال تعليق

أعطي رايك