تقوم الصباح ... نهضة ، تفطر نهضة، في التوالت (حشاكم) نهضة ... تي حتى في النوم ... نهضة ... تي شنية الحكاية ؟ الشعب ماكل بعضو ؟؟
هو بصراحة موضوع ما نحبش نحكي فيه لأني نعتبر نفسي محايد ولا دخل لي في هالصراعات الجانبية إلي تصير في المجتمع لأنها أبسط ما يمكن أن يقال عنها تفوريخ ... سبني نسبك ، ونحيلي جد والديا إنحيلك جد والديك ... أما الواحد ساعات يتلز يحكي على خاطر نشوف في برشة نفاق من الطرفين وفي التدوينة هذي بش نحكي على العوج اللي نشوف فيه وكيف العادة إلي حساس وقلبو ضعيف ننصحو ما يقراش ويبدا يتهم في سيادتي بتهم بهيمة كيف أني نعمل في الفتنة أو أني خوانجي وهات ما جاك من التهم الحاضرة إلي طاح قدرها ...
باهي باش نبدى بالحملة الكبيرة على راشد الغنوشي وحركة النهضة وهذي "الفوبيا" من الحركة إلي استقرت في قلوب برشة ناس وماشية و تكبر في قلوبهم ، حتى أنهم عمات وما عادش يحكيو بموضوعية ويشوفوك تكذب خبر تولي خوانجي إرهابي ظلامي ...
من بين الأشياء إلي تصير هي تكبير الحكايات كيف الاستاذة إلي لابسة النقاب في صفاقس وقالو بأن تلامذتها خرجو وما إلى غير ذلك ... وهذي كذبة
من بين الحكايات أن البعض ينشر اشاعة تكون ساعات خطيرة برشة ، كيف إشاعة ماء الفرق (والسارق إلي يدو مقصوصة وبرشة حاجات أخرى ...) ومن بعد ما ينشرش التكذيب متاعه وشفت منهم برشة هالأشكال هاذم
من بين الحاجات الغير معقولة هي تنشر فديوات تعذيب أو ضرب للنساء أو هاك الفيلم "برسيبوليس" متاع إيران وتستعمل من أجل غاية سياسية ...
السياسيين اليوم إلي يحب يبان ويولي يفهملها يحكي على النهضة وإستعمال النهضة للمساجد ... صحيح ان النهضة مش من حقها تتدخل في حتى إمام ومش معقول يتم طرد إمام من طرف أي عضو من أعضاء النهضة ... ولكن كيف يجي مورو أو الغنوشي أو غيروا يحكي في الجامع وينصح المسلمين على أن ينتخب من يضمن لهم حريتهم الدينية ، هذا أمر عادي ولا علاقة له بإستعمال المسجد كمنبر سياسي ، لأن المسلم يعيش في مجتمع والإسلام لا يخاطب الفرد كفرد انما كعضو فعال في وسط المجتمع ...
يجي كذلك واحد يقص شطر فقرة من كتاب متاع راشد الغنوشي على سبيل المثال ويجيب هاك الفقرة إلي تحكي على المرة "كأداة جنسية" ومن بعد يقلك شوف اش يقول ... لا هذا كذب وإفتراء ولا أرضاه ولا أرضى النفاق والمنافقين إلي يتبعو فيه ولو أني متأكد أنه هناك بعض البهايم وكذلك بعض أصحاب النوايا الحسنة ... على كل الكتاب هنا والفقرة هذيكة في الصفحة 54 ويحكي فيها راشد في باب "حب النساء" (يعني الباب يحكي في موضوع الحب والجنس بين الجنسين) وهنا راشد الغنوشي لم يفسر الحياة الجنسية من المنظور التقليدي (بالمعنى الديني) انما يعود إلى علم النفس الجنسي الذي يرى أن الحياة الجنسية هي وظيفة بيولوجية عند الرجل وظاهرة نفسية عند المرأة ... هذا اش فهمت أنا إلي بعيد عن أمور النفس و قريت الكتاب فيسع باش نكتب هالحرفين ، مانيش نقول إلي أنا معاه ومانيش ضده ، لأن الحكاية هذي ما تخصنيش برشة ولكن لا للتلفيق والتبلعيط لا وألف لا ... والإنسان إلي بالحق يلوج على الحقيقة وما يحبش يفيق نهار ويقول غلطوني ما عليه كان يقرا الكتاب أو حتى الباب هذاك ...
يجي كذلك البعض يحب يوهم الناس بأن النهضة تنصب في نفسها كحامي للدين وما نعرف شنوة ... يا أخي إنت تعتبر روحك مسلم والنهضة ما تمثلكش ، ثمة شكون تمثلهم النهضة ... علاش تقصي فيهم ؟ علاش ما تحبهمش يحكيو ؟
وإلي صار البارح في قليبية أنا نشوفو من باب قلت الإحترام وكنت قلتها حتى وقت طردو الشابي في بنزرت وغيره ... هذي قلت تربية أنك تشد رجل تصورلو وجهو كعبة طماطم وتبدى تسب فيه عيني عينك ورغم ذلك حكى بكل ديمقراطية ولم يشتم أحد فيهم ...
برشة خرم نشوف فيه ، كيف المجموعات إلي تطرد في "المطرفين" إلى السعودية وأفغانستان ... بدعوى أن تونس بلد التقدم والريق البارد ... كان جينا تقدم راك كيف تدخل لبوسطة تاخو قضيتك في رمشة عين مش تعدي فيها ثلاثة أيام ... كان جينا تقدم رانا نعرفو نسمعو الطرف الأخر مش نسبوه ونسمعوه الكلام بدعوى التقدم ... خلي عزاها سكات ...
من بين الحكايات إلي نسمع فيهم أن النهضة باش تحط المرى في شكارة وتسكر عليها الباب ... بينما كي تجي تشوف بنات راشد الغنوشي "المجرم" "الإرهابي" ...
تسنيم : دكتوراه في السوسيولوجيا
سمية : اجزتان في الفلسفة والتاريخ وتعد دكتوراه في التاريخ
يسرى : الإجازة في الفيزياء وتعود رسالة دكتوراه في علم الذرة
إنتصار : دكتوراه في الحقوق ومحامية
إن كان هذا إحتقار للمرى فقلي كيفاش يتم تبجيلها ؟
كل واحد يدعي أنه مسلم يخرج للشارع ويعمل غلطة فيسع ما يولي تابع النهضة و مزمرة علينا ووو... شريعة وحالة كلبة ... تو بربي الناس إلي يصليو في الشارع (إلي أنا مانيش موافق عليها) اش مدخلهم في النهضة ؟ ...
وعلاش كيف واحد يصلي في الشارع تولي "جريمة" وكيف واحد يبلع تولي حرية ؟ ... لأن النفاق مزال في قلب التونسي مكبش فينا كضربان البندير ...
حاجة أخرى هي الدخول في النوايا الخفية لحركة النهضة ... يقلك إي ليوم يحكيو ديمقراطية ونهرت إلي يشدو الحكم شكون بش يضمن ... و شكون يضمن أن الشابي أو براهيم أو غيره يسيب الكرسي ؟ ... أنا نقول أن الشعب هو إلي يضمن ... واحنا إلي ما يعجبناش ويكذب علينا "ديغاج" ... لذا كفانا تقشيقش أحناك والي عندو مشروع يعطيه أو يسكت علينا كان باش يبكي ويشكي من النهضة ...
ومن غير ما نحكي أنه هناك العديد العديد إلي يبداو ينتقدو في النهضة ومن بعد ينزلق ويولي يسب في المسلمين ... ساعات من غير ما يشعر وأنا هنا بحكم أني مسلم نطلب من سيادته يحل عينيه ويعرف وين يحط شلاكتو ... إنتقد النهضة بالصدق مرحبا أنا معاك ... تكذب عليها أو على أي حزب أخر أنا ضدك ... أما تولي تعمم على المسلمين أو البنات المتحجبات بصفة عامة ، هذا نعتبرو تطرف وبهامة في نفس الوقت ...
باهي تو باش نحكي على بعض أنصار النهضة مهما كلفهم الثمن ... البعض إلي يكفرو الناس أو يوصلو يقصيوك أو يعتبروك تعمل في الفتنة لأنك تقول الحاجة يعتبروها ضدهم ولو أنها صحيحة ... هذي غلطة أو ما تجيش ... أنا ادعو البعض إلي بكل بساطة مسكرين أنهم يحلو شوية مخاهم ويستعملوه ساعة ساعة ما فيها باس ... وأنك لا تتهم انسان بكفر أو نفاق أو غيره حتى تثبت مليح لأن المسلم مسؤول على كل كلمة ينطقها ... وأن كفانا نصرة إلى النهضة بكل قوة ، كان غالطة نقولو غالطة ... وكفانا من حطان المسلم في مركز الضحية ... يزي من البكاء والعويل ... والنهضة لا تمثل الإسلام ... لأن البعض للأسف ماشي في بالو كيف يدافع على النهضة ، فهذا دفاع عن الإسلام ...
دعوة أخيرة إلى أن نكف من الهدر الفارغة ونتلهاو ببناء مجتمع متماسك وصحيح ، على خاطر الحديث هذا يفرق ويشنج أكثر من يحل مشاكل ... وكان باش نواصلو فيه بحول الله داخلين في دكتاتورية جديدة ووقتها نقولها من قلبي لا تقيملنا قايمة ... والسلام
